Athiyana ale yaaronwe mahiye aavithiwe Yesu, yaahitikinihiwa nuumala woona wira mahiye ale khiyaakhanle etthu! Maria a oMadaala, aahitthimaka orowaka “okumana ni Simoni Pedru ni mwixutti mukina, yowo Yesu amphentexawe”, eyo piiyo, murummwa Yohani. (Yohani 20:2) Masi athiyana akina yaari omahiye, yaahiweha nlaikha. Nave muhina mwa mahiye naahikhala nlaikha nikina, nenno ‘nawanre ikuwo sottela’.​—Marko 16:5.

Nlaikha nimosa naahimmye wira: “Nyuwo, muhòvé etthu! Kosuwela tthiri wira munimphavela Yesu, yole akhomeliwe” vamwirini va nihaaxeryo. “Khakhanle vava: òhihimuwa ntoko sahimyalyawe! Murwé mone nipuro naixathiwawe. Vano, mwakuveke orowa walèla awixutti awe wira: ‘Owo òhihimuwa! Vano-nto onohola orowa oGalileya’”. (Matheyo 28:5-7) Okhala wira “yamuthukumela ni wova”, athiyana ale yaahitthimakasa wira yaaleele awiixutti awe.​—Marko 16:8.

Vano Maria aahimphwanya Pedru ni Yohani. Iitthaka iphumu, aahaaleela wira: “Apwiya àkuxiwa omahiye! Khansuwenle wixathiwaya”. (Yohani 20:2) Nto Pedru ni Yohani yaahitthimakela omahiye. Yohani taapacenrye ophiya. Yohani aahithurumela mmahiye khuweha ikuwo saaphapaniwa awe Yesu, masi khaakenle mmahiye.

Vaavo Pedru aaphiyale awe, aahikela mmahiye. Nto aahoona ikuwo sa eliinyu saaphapaniwe muru wa Yesu. Yohani aahikela, vano-nto aahikupali ele Maria aahimmye awe. Nnaamwi Yesu aahimmye vahinatthi, khuuvo mutthu aakupali wira Yesu aahihihimuxiwa. (Matheyo 16:21) Atikinihiwe ene, yaahitthikela owaani. Masi Maria aatthikenle omahiye.

Okathi yoowo, athiyana akina yaahirowa waaleela awiixutti wira Yesu aahihihimuxiwa. Nto mphironi, Yesu aahaakhumelela khwaaleela wira: “Mwetteke ni murettele!” Athiyana ale yaahimwaattamela “khumukokhorela”. Vano Yesu aahaaleela wira: “Muhòvé! Murowé mwàhimerye axinn’aka wira evenye eroke oGalileya. Weiwo t’anrowaya okòna”.​—Matheyo 28:9, 10.

Okathi yaakhumelenle aya etetere ni malaikha, anakhotto yaari omahiye ‘yahithukumela ni wova, enakhala ntoko yarimokhwa’. Nuumala okhala saana, yaahitthikela opooma analeela “alupale ànamukuttho sothene sakhumelenle”. Vano anamukuttho, yaahaakoha ahooleli a aYuda. Nto ahooleli a aYuda, yaahaaleela wira yaahaana waaliva anakhotto wira yoothereryeke, ariki: ‘Awixutti awe yahirwa ohiyu, hiyo nrupaka, khukuxa murutthu awe’.​—Matheyo 28:4, 11, 13.

Akhala wira anakhotto ooRoma yaamurupa opuro yaavara aya muteko, yaaniiviwa, tivonto anamukuttho ale yaalipihenrye aya, ariki: “Etthu ila [wootha waya wira yaamurupa] yaphiyá owaruni wa guvernatoro, hiyo nnomwepesa, niwakiheni ovelavela wothene”. (Matheyo 28:14) Anakhotto yaahikuxa musurukhu yaaliviwe aya nto khupaka ntoko saahimyale aya anamukuttho. Tivonto, wootha iwe woowi murutthu wa Yesu waahiiyiwa, waahaaphwanya aYuda otheene.

Nlelo, mooriipiwa murima, Maria a oMadaala iira ori ene omahiye. Owehaka mmahiye, aahoona malaikha manli awanre ene ikuwo sootteela! Nimosa naari waamuru nikina waametto wa opuro aavithiwe Yesu. Awo yaahimukoha Maria wira: “Muthiyana! Munìnlelani-ni?” Vano Maria aahiwaakhula so: “Pwiy’aka t’okuxiwe. Vano nkinsuwela vaixathiwaya-vo”. Orukunuwaka, Maria aahimoona mutthu. Mutthu owo aahitthikela opaka nikoho malaikha yaapanke aya, khuncererya wira: “Munimphavela t’ani?” Uupuwelaka wira ole aari guarda a ejardim ele, Mariha aahihimya wira: “Napwiya, mwari nyuwo mmukunxe, mukihimerye omwixanthanyu-vo, miyo kirowe kamukuxe”.​—Yohani 20:13-15.

Okathi ole, Maria khaasuwela wira aalavula ni Yesu yoowo aahihimuxiwe. Masi, vaavo Yesu aahimmye awe wira: “Maria!” Nto Maria aahisuwela wira aalavula ni Yesu. Otikinihiwe ene, aahikhuwela moohakalala oriki: “Rabbuni!” (entaphulela wira: “Mwixuttihi!”) Uupuwelaka wira Yesu aahanle vakhaani orowa wiirimu, Maria aahinvara Yesu. Tivonto, Yesu aahimuleela wira: “Muhikivaré. Nlelo nkironwe w’Atithi. Vano murowé, mwàhimerye axinn’aka wira miyo kinrowa w’Atithi, yawo-tho akhanle Atith’inyu: kinrowa wa Muluku aka, yowo-tho okhanle Muluku anyu”.—​Yohani 20:16, 17.

Maria aahitthimaka orowaka opuro yaari aya arummwa ni awiixutti akina. Khwaahimeerya wira: “Kowona Apwiya!” Nto eyo yaahincererya ele arummwa yaiwale aya ni athiyana akina. (Yohani 20:18) Hata vari siiso, nlelo arummwa ale ‘yahòna molumo ale okhala òhisuwanyeya’.​—Luka 24:11.

Vano yaari Ettiminku 16 a Nisani. Nto awiixutti khiyaareere oriipiwa murima. Maaana khiyaiwexexa nthowa naya murutthu wa Yesu wahaakhanle aya omahiye. (Matheyo 28:9, 10; Luka 24:11) Makaaripi wa nihiku nenne, Kelopha ni mwiixutti mukina yaahikhuma oYerusalemu arowaka oMawuusi, mukwaha wa ikiloomo 11.

Yeettaka mphironi, awo yaanilavula ele yiiraneyale. Vano aahikhumelela mutthu yahaamusuwela aya. Owo aakonhe wira: “Exen’iyo enivanelanyu mwettaka n’iphiro?” Kelopha aahimwaakhula wira: “Nyuwo pahi muri muletto oYerusalemu, vahinsuwelanyu itthu sìraneiye mahiku ala?” Mutthu ole, aahaakhula wira: “Ekhumelenle exeni?”​—Luka 24:17-19.

Awo yaahihimya wira: “Sa Yesu muNazarethi. . . . Hiyo nanroromela wira yowo t’atthuna owòpola atthu a Isarayeli”.—Luka 24:19-21.

Kelopha ni mukhwaawe yaahivikaniha olavula etthu yiiraneyale nihiku nle. Ahimyaka wira athiyana yaaronwe mahiye aavithiwe Yesu, khiyaaphwannye murutthu awe. Ni wira yaahoona itthu sootikiniha, eyo piiyo, malaikha yaawo yaahimya wira Yesu oohihimuxiwa. Nave yaahihimya wira atthu akina yaahirowa omahiye “khuphwanya sothene ntoko athiyan’awo sahimalyaya”.​—Luka 24:24.

Awiixutti ale anli, khiyaasuwela ele yaataphulela aya etthu yiiraneyale. Mutthu ole yahaamusuwela aya, aahiwaakhula moolipiherya wira aakhaliherye olokiherya muupuwelo aya, nto eyo yaahivara murima aya. Owo aahimmye wira: “Nyuwo mw’àtthu muhirina ankhili ni òpisa wamini sothene salaleiyaya maprofeta. Mòpoli khaphwanenle ohawa itthu iya, wira akele movuwani mwawe?” (Luka 24:25, 26) Owo aahipacerya waatthokiherya Soolempwa sinceene saamuhimya Kristu.

Nto otheene aya yaahiphiya waattamela oMawuusi. Masi awiixutti ale anli, yaaphavela osuwela itthu sikina, tivonto yaanvekenle aya mutthu ole wira: “Mukhalé ni hiyó: vahìla, nsuwa nihanle okela!” Nto mulopwana ole aaheemererya ni yaahilya vamosa. Nuumala ovekela, aahikawanya ephaawu onaavaha. Vano yaahisuwela wira mutthu ole aari Yesu, nto owo aahilakaseya. (Luka 24:29-31) Tthiri yaahikupali wira Yesu aahihihimuxiwa!

Moohakalala awiixutti ale anli yaahipacerya waaleela atthu akina ele yaawiiranenle, ariki: “Khinòna murim’ahu oviha, vanilavulihawe mphironi, antaphulelaka Solempwa?” (Luka 24:32) Moohipisa yaahitthikela oYerusalemu, weiwo yaaphwannye aya arummwa ni atthu akina. Ahinatthi ohimya etthu, yaahiwiiwa akina ahimyaka wira: “Vekekhai, Apwiya àhihimuwa! Ahìsoniherya wa Simoni!” (Luka 24:34) Moottharelana, awiixutti ale yaahihimya moota Yesu aakhumelenle awe. Nave, awo yaari anamoona a ohihimuxiwa wa Yesu.

Okhala wira Yesu aahikhumelela esaala ele, awo yaahitikinihiwa! Yaari etthu yootikiniha okhala wira mikhora saahiwaliwa mwaha woowoova aYuda. Nto Yesu aaheemela eriyari aya. Moomaaleleya, Yesu aahimmye wira: “Murettele okhalé ni nyuwo!” Masi awo yaahoova. Nave ekwaha ela, awo “yùpuwela wira yòna munepá”.​—Luka 24:36, 37; Matheyo 14:25-27.

Ophavelaka waakupaliha wira aari tthiri mutthu, ohiya munepa, Yesu aahiwooniherya matata awe ni inawu sawe mapuro aakhomeliwe awe. Yesu aahaaleela wira: “Exeni ewininheni murima? Munihoveryani mmurimani mwanyu? Moneke matat’aka n’inawu saka: ti yomi ene. Kivaravareni, mukiwehe: munepa khurina erutthu, nnákhala makhuva, ntoko sinkònanyu miyo kikhalannene”. (Luka 24:36-39) Nnaamwi yaahakalanle ni otikinihiwa, vaanavila okupali.

Ophavelaka-tho waakupaliha wira owo mukumi, aahaakoha wira: “Mokhalana vo etthu enlyiwa?” Yesu aahaakhelela ephaawu ni ehopa yoowooxiwa onakhuura. Nuumala-vo, Yesu aahaaleela wira: “Mùpuwele itthu sohimenryakani varyaka nlelo ni nyuwo: yari yophaveleya wira sìraneye sothene silempwe sikàsaka miyo, Mulivuruni mwa Moise ni mwa Maprofeta ni mMasalmoni”.​—Luka 24:41-44.

Yesu aahaakhaliherya wiiwexexa Soolempwa atthu ale yaathukumanne, ntoko aamukhalihenrye awe Kelopha ni mukhwaawe, oriki: “Ti siso silempwaya: wira Kristu ahana ohawa n’uhihimuwa mmurottoni mwaya, ni wira atthu a maloko othene, opajerya oYerusalemu, elalèriwe ni nsina na Yesu orukunuxa murima n’uleveleliwa itampi. Nyuwo mw’ànamona a itthu seiyo”.​—Luka 24:46-48.

Masi murummwa Tome khaakhanle. Mahiku yaattharelana, moohakalala atthu akina yaahimuleela wira: “Nowona Apwiya!” Tome aahimmye wira: “Miyo, kahoneru mmatatani mwaya makhwatta mwathoroliwaya, kahikeliheru ekath’aka mmakhwattani mwaya, kahikeliheru ntata naka mpararini mwaya, nkinamini!”—Yohani 20:25.

Nuuvira mahiku 8, awiixutti yaahithukumana-tho awanle ene mikhora, nto ekwaha ela Tome aahikhala. Owanre ene erutthu ya opinaatamu, Yesu aahikhumelela eriyari aya, aakhomasa oriki: “Murettele okhalé ni nyuwo!” Onwehaka Tome, Yesu aahimmye wira: “Muruhe va ekath’anyu. Mone matat’aka. Mòkole ntata nanyu, mukelihe mpararini mwaka. Muhikhalé mutthu òhamini”. Vano Tome aahihimya wira: “Pwiy’aka ni Muluku aka!” (Yohani 20:26-28) Vano Tome aahikupali wira Yesu oohihimuxiwa khuvahiwa erutthu yomunepani, ni wira namitthaka a Yehova Muluku.

Yesu aahimmye wira: “Nyuwo muhamini, mana mokona. Òreriwa t’ale anamini ehonne!”​—Yohani 20:29.