MAKHALELO A MAKRISTAU
Mulipiheke Waamini Wanyu Mmusomaka Biibiliya
Biibiliya pooti oturuka okumi ahu. (aHe 4:12) Masi wira nittottele mureerelo miruku sawe ni malakiheryo awe, nihaana okupali wira Biibiliya tthiri “nuulumo na Muluku”. (1 aTe 2:13) Biibiliya onrowa olipiha sai waamini wahu?
Mmusomeke mahiku ootheene. Okathi munimusoma anyu, mwiimananiheke oweha itthu sinooniherya wira Yehova tori Mwaneene Biibiliya. Mwa ntakiheryo, nyuwo pooti oweha itthu sinihimmwa eliivuru ya Miruku ni moota sinivareleya aya muteko olelo-va. — Mir 13:20; 14:30.
Mumpakeke palano oosoma. Musomeke soowiiraneya sinooniherya wira Biibiliya nuulumo na Muluku. Murowe eliivuru eni: Eliivuru Enaakhaliherya a Namoona a Yehova Otokosa, murowe mwaha oni: “Biibiliya” nuumala-vo mwaha oni: “Uupuxeriwe ni Muluku”. Nave nyuwo pooti olipiha waamini wanyu wira Biibiliya khoturukeyale, musomaka myaha siri Apêndice A3 ori Biibiliya Tradução do Novo Mundo.
NWEHE EVIIDIYU ENI: ITTHU SINNIIRIHA WAAMINI . . . NUULUMO NA MULUKU. NUUMALA-VO, MWAAKHULE MAKOHO ANITTHARELANA:
Exiri ya etemplo yaaphwanyiwe oKarnak wExiitu, enooniherya sai wira veekeekhai Biibiliya nuulumo na Muluku?
Ninsuwela sai wira itthu onihimya awe Biibiliya khasiturukiwe?
Moota Biibiliya okhapeleliwe awe mpakha ophiya olelo-va, onnikupaliha sai wira Nuulumo na Muluku? — Mmusome Yesaya 40:8.