YOOSOMA 58
Muhihiye Omwiiwelela Yehova
Makristau eekeekhai khaneemererya etthu aahiiso mutthu owiirihaka ohiya omukokhorela Yehova. Tthiri eyo ti etthu nyuwo muniphavela anyu opaka. Yehova onnivaha efaita yinceene ororomeleya wanyu. (Mmusome 1 Wahala 28:9.) Itthu xeeni sikhanle ooweehererya ororomeleya wanyu? Munrowa opaka exeeni wira muxintte itthu iyo?
1. Atthu akina anrowa weehererya sai ororomeleya wanyu wa Yehova?
Atthu akina anniimananiha onihiiha ororomeleya wahu wa Yehova. Atthu xeeni anipaka etthu eyo yootakhala? Atthu yaale ahiyale ekeekhai apakeya anamavirikanya. Nto awo pooti ohimya itthu sowoothiwa voohimya sa mutthenkeso wa Muluku wira ahonone waamini wahu. Akina ahooleli a itiini, yaawo anilavula itthu sowoothiwa wira awiirihe atthu akina ohiya weettela ekeekhai. Ti voohiloka ovaanyihana ni atthu awo annilupattha, osoma iliivuru saya, okela isaiti saya aahiiso oweha iviidiyu saya. Aahimyaka atthu ale aniimananiha onihiiha ororomeleya wa Yehova, Yesu aahimmye so: “Awo atthu ahinoona aniweettiha akina ahinoona. Vano, mulipa-oohoona aamweettihaka mukhwaawe ohinoona, oowanli aya anoomorela mulittini”.—Matheyo 15:14.
Ankhi akhala wira mutthu nimmusuwela ahu khoniphavela-tho okhala Namoona a Yehova? Hiyo pooti oriipiwa murima vanceene akhala wira mutthu namphenta ahu onnipaka eyo. Woonasa wene, okathi owo nihaana othanla okhala mpantta wa mutthu owo aahiiso mpantta wa Yehova. Masi nihaana ororomeleya wa Yehova ovikana itthu sikina. (Matheyo 10:37) Nto nihaana wiiwelela yooruma ya Yehova enihimya wira niheetteke ni atthu ntoko awo.—Mmusome 1 aKorinto 5:11.
2. Soothanla sahu, sinrowa wooniherya sai wira ninniroromeleya wa Yehova?
Omphenta wahu Yehova onooniiriha ohiirela mpantta etiini yowootha. Eyo enihela muhina ohiirela mpantta mitthenkeso sinivarihana ni etiini yowootha, ntoko ovara miteko saya aahiiso etthu ekina. Yehova onninlopola oriki: ‘Nyuwo atthu aka, mukhume’ oBabilonia Muulupale.—Wiisuupulula 18:2, 4.
MWIIXUTTE ITTHU SIKINA
Nwehe etthu enrowa wookhaliheryani ohimweemererya mutthu aahiiso etthu ehononaka ororomeleya wanyu wa Yehova. Nave nwehe moota mukhanle anyu oowooniherya wira munniroromeleya wa Yehova mukhumaka oBabilonia Muulupale.
3. Mukhootteke sowiixuttiha sowoothiwa
Nipakeke exeeni akhala wira ninniiwa itthu sinootheriwa awe mutthenkeso wa Yehova? Musome Miruku 14:15, nuumala-vo mwaakhule nikoho ninttharelana:
Xeeni vanireerela aya ohikupali khula etthu nniiwa ahu?
Mmusome 2 Yohani 10, nuumala-vo mwaakhule makoho anittharelana:
Naathokoreryeke sai anamavirikanya?
Ninnisuwela oratteene wira khanikhanle oovaanela ni anamavirikanya. Masi naahiivahe ephoole, awo anrowa owerya sai onihapuxa?
Yehova aarowa woonela sai akhala wira ninniwiriyana itthu soohiloka atthu anihimya aya sa mutthenkeso awe?
4. Muhihiye omwiiwelela Muluku hata munna aahiiso murokora opakaka etampi
Nasuwela wira ookhala munna aahiiso murokora mmulokoni opanke etampi yuulupale, nihaana opaka exeeni? Nwehe ele Muluku aalenle awe aisarayeli a khalai. Mmusome Onamukuttho 5:1.
Ntoko enihimya ya eversiikulu ela, nasuwela wira ookhala mutthu opanke etampi yuulupale, nihaana orowa waaleela axitokweene. Masi nihinatthi opaka eyo, nihaana omutumererya mutthu owo orowa waaleela axitokweene. Nto akhala wira mutthu owo khoniphavela orowa waaleela axitokweene etampi opanke awe, ororomeleya wahu wa Yehova ohaana oniiriha orowa waaleela axitokweene itthu sootheene ninsuwela ahu. Opaka eyo, ninrowa wooniherya sai wira ninniroromeleya wa . . .
Yehova Muluku?
mutthu opanke etampi?
anna ni arokora a mmulokoni?
Akhala wira munna aahiiso murokora ookhalana mixankiho, nihaana omukhaliherya!
5. Mukhume oBabilonia Muulupale
Mmusome Luka 4:8 ni Wiisuupulula 18:4, 5, nuumala-vo mwaakhule makoho anittharelana:
Kiireke kookhuma etiini yowootha kaari aka ni nsina naka noottipihiwa?
Kiireke kinniirela mpantta mutthenkeso onivarihana ni etiini yowootha?
Kiireke muteko aka onnivarihana ni etiini yowootha?
Kiireke yookhala etthu mookumini mwaka kinireerela aka ottharuwa wira kihiirele mpantta etiini yowootha?
Akhala wira nookhala nikoho munaakhula anyu wira “aayo”, marukunuxo xeeni munireerela anyu opaka?
Akhala wira ti siiso, mpakeke yoothanla enooniherya wira mookhalana murima wooloka ni munniroromeleya wa Yehova.
Munrowa opaka exeeni akhala wira munnivekeliwa okhaliherya muteko onivariwa ni etiini yowootha, yoowo onikhaliherya mmuttettheni?
ATTHU AKINA ANIHIMYA WIRA: “Kihaana osuwela itthu anamavirikanya aniwootherya aya Anamoona a Yehova, kiira siiso kinoowerya waakiherya ekeekhai”.
Munoonela sai, niireke ti va miruku opaka eyo? Mwaha wa xeeni?
IPONTO SUULUPALE
Hiyo nimphavela ohihiya ororomeleya wa Yehova, nto nihaana okhootta weetta ni atthu ahinroromeleya wa Yehova. Nave nihaana okhuma ni ohiirela mpantta etiini yowootha.
Wuuluula
Xeeni vahinreerela aya oweha, osoma ni owiriyana itthu anamavirikanya anihimya aya?
Naathokoreryeke sai ale ahiniphavela-tho okhala Anamoona a Yehova?
Nipakeke exeeni wira niiwelele yooruma ya okhuma etiini yowootha?
NWEHE ITTHU SIKINA
Nwehe etthu mukhanle anyu oopaka akhala wira atthu akina anniwootherya Anamoona a Yehova.
“Niireke Munnisuwela Itthu Sotheene sa Mwaha Owo?” (Owehaweha, Agosto 2018)
Etthu xeeni enrowa wookhaliheryani osuwela akhala wira muteko owo onnivarihana ni etiini yowootha?
“Muhihiye Oluttuweliwa Mahiku Ala Ookiserya” (Owehaweha, Outubro 2019, ittima 16-18)
Anamavaanyiha anipaka exeeni wira ahonone waamini wahu?
Musome mwaha oni: “Okhuma Enamwane Aka Kaaniphavela Omusuwela Muluku”, wira nwehe etthu yaamwiirinhe paatiri xintoísta ohiya etiini yowootha.
“Biibiliya Onnirukunuxa Mirima sa Atthu” (Owehaweha, 1 a Julyo, 2011)