Ireferensia sa Okumi ni Orummwa Ahu Ekaderno Enirumeeliwa Omuthukumanoni
© 2024 Watch Tower Bible and Tract Society of Pennsylvania
3-9 ya Março
MIHAKHU SINIKHUMA MBIIBILIYANI MIRUKU 3
Mooniherye Wiira Munnimuroromela Yehova
Textos Bíblicos Explicados muru 14, itti. 4-5
Miruku 3:5, 6 — “Muhiroromele osuwela wanyu”
“Mmuroromele Yehova ni murima anyu wootheene”. Ninnooniherya wiira ninnimurorormela Muluku, okathi nimpaka ahu itthu ntoko oniphavela awe.Okathi wootheene nihaana omuroromela Muluku mwa inamuna sootheene. Mbiibiliyani, nuulumo noowi murima onihimmwa omutthu ahu wa muhina, eyo enihela muhina moota nimpaka ahu itthu, moonelo ahu, muupuwelo ahu ni mikhalelo sahu. Tivo, omuroromela Muluku ni murima ahu wootheene onitaphulela opaka ele Muluku oniphavela awe ohiya opaka itthu sinnisivela paahi. Ninnipaka eyo mwaha wookupali wiira Mpattuxa ahu toonisuwela etthu yooreera para hiyo. — aRoma 12:1.
“Muhiroromele osuwela wanyu”. Nihaana omuroromelaka Muluku, maana okhala wiira hiyo niyariwe nirine ene etampi. Vaakhala wiira nnimwiiroromelaka mmansihu aahiiso opaka itthu sinnisivela. Pooti opaka soothanla seiyo sinikhala ntoko ti sooloka, masi sikhanle onikumiherya mixankiho muhoolo. (Miruku 14:12; Yeremiya 17:9) Osuwela wa Muluku ti wuulupale ovikana osuwela wahu. (Yesaya 55:8, 9) Vaavo nimpaka ahu itthu ntoko Yehova oniphavela awe, khula okathi nnoorowa waakhela aka mareeliho manceene mookumini mwahu. — Esaalimu 1:1-3; Miruku 2:6-9; 16:20.
Textos Bíblicos Explicados muru 14, itti. 6-7
Miruku 3:5, 6 — “Muhiroromele osuwela wanyu”
“Mmuupuweleke mootheene muneetta anyu”. Okathi nimpaka ahu soothanla sa efaita mookumimwahu, nihaana wuupuwela moota Muluku onoonela awe. Ninnipaka eyo ninvekela aka malakiheryo awe ni nittharaka ele onihimya awe Mbiibiliyani. — Esaalimu 25:4; 2 Timootheyo 3:16, 17.
“Owo onimookolola iphiro sanyu”. Muluku onnookolola iphiro sahu, vaavo onnikhaliherya awe weetta moovarihana ni malkiheryo awe a exariya. (Miruku 11:5) Mwaha wa yeeyo, nnoosyaka mixankiho saakhanle onikhumelela, nave nnookhalana okumi wootepexa oloka. — Esaalmu 19:7, 8; Yesaya 48:17, 18.
Beneficie-se epaax. 76 etti. 4
Mukhalaneke moonelo wooloka ni itthu munisuwela anyu
Mutthu orina sookumanana sinceeene mookumi mwawe, owo pooti wuupuwela so: ‘Etthu ela khahiyo enoopacerya okiranela. Miyo kinnisuwela etthu yoopaka’. Niireke tivooloka okhalana muupuwelo owo? Miruku 3:7 onninilopola ohimyaka so: “Muhiikhalihe mutthu a ankhili vamaithoni vanyu”. Itthu sinikhumelenle khalai, sihaana onikhaliherya osuwela etthu yoopaka sanikhumelela itthu sikina muhoolo. Nave vaakhala wiira mookhalana waataana woolipa ni Yehova, itthu ninsuwela ahu sihaana oniiriha osuwela wiira mareeliho a Yehova taaniiriha okhumela saana. Tivonto, orowa wahu ohoolo khonilipa ni itthu ninsuwela ahu ahiiso wiiroromela mmansihu, masi onilipa ni malakiheryo ninvahiwa ahu ni Yehova. Ninnooniherya wiira ninnirowa vahoolo, vaavo ninroromela ahu wiira khivo etthu eniiraneya Yehova ohemerenrye ni nikhalana ahu waataana wooloka ni yena ni ororomela Tithia hu a wirimu.
Itthu sa Efaita sa Mbiibiliyani
A Sentinela 15/09/2006 epaax. 17 etti. 7
Iponto Suulupale sa Eliivuru ya Miruku
Nihaana wooniherya wiira ninnivaha efaita mukhalelo wa ophenta ni ororomeleya. Ntoko siisale mutthu owanre ekolaari ya musurukhu munceene muxikoni mwawe ohinoovelela awe owooniherya atthu akina, hiyo nave nihaana owooniherya mikhalelo iyo atthu akina. Nto nihaana ohela vamurimani vahu mikhalelo iyo ntoko etthu eniirela mpantta omutthu ahu.
10-16 ya Março
MIHAKHU SINIKHUMA MBIIBILIYANI MIRUKU 4
“Mukhapeleleke Murima Anyu”
Owehaweha 01/2019 epaax. 15 etti. 4
Munrowa Okhapelela Sai Murima Anyu?
Miruku 4:23, nuulumo noowi ‘murima’ nintaphulela omutthu aahiiso ele eri vamurimani va mutthu owo. (Musome Esalimo 51:8.) Mwa enamuna ekina, nuulumo noowi ‘murima’ nintaphulela miyuupuwelo, moonelo, etthu enimwiiriha mutthu opaka etthu ni soophavela sa mutthu owo. Murima ahu onnooniherya omutthu ahu wa muhina ohiya paahi mukhalelo ahu wa ota.
Owehaweha 01/2019 epaax. 17 itti. 10-11
Munrowa Okhapelela Sai Murima Anyu?
10 Naaphavelaka okhapelela saana murima ahu, nihaana oweha itthu sikhanle oohonona ni opaka khula etthu wira niikhapelele. Miruku 4:23 nuulumo noowi mukhapelele, ninnuupuxerya muteko wa mulipa-oolipelela. Mahiku a Mwene Salomoni, mulipa-oolipelela eemela vasulu va makokoro a epooma wira yaarwaaka awanani aaleeleke atthu ari muhina mwa epooma. Eyo enninikhaliherya osuwela etthu nikhanle ahu oopaka wira Satana ohihonone muupuwelo ahu.
11 Khalai, alipa-oolipelela yaavara vamosa ni alipa-oohula mikhora. (2 Sam. 18:24-26) Otheene aya yaanikhaliherya okhapelela epooma ni asuwelexaka akhala wira mikhora saahiwaliwa saana hata awanani aya ari ene vakhiviru. (Neh. 7:1-3) Yowuupuxerya ya murima ahu yiixuttihiwe ni Biibiliya, eri ntoko mulipa-oolipelela ahu ni enninleela akhala wira Satana onneererya ohonona murima ahu, niire so, vaavo oneererya awe opahula muupuwelo ahu, moonelo ahu, etthu enniiriha opaka etthu eyo aahiiso soophavela sahu. Nto vaavo yowuupuxerya ya murima ahu ennileela aya etthu, nihaana owala mikhora sahu sa mmuupuweloni wira niikhapelele
Owehaweha 01/2019 epaax. 18 etti. 14
Munrowa Okhapelela Sai Murima Anyu?
14 Wira nikhapelele murima ahu, khivanitthuneya paahi okhootta sookhanyererya soohiloka masi nihaana weemererya itthu sooloka. Nkahaya muupuwele nlikanyiho na epooma erina makokoro. Mulipa-oohula mukhora ahaana owala mikhora wira awanani ahikele, masi okathi mukina, owo aahaana ohula mikhora wira sivoloihiwe soolya ni mireerelo sikina. Akhala wira khaarowa ohula mikhora, atthu a epooma eyo yaamookhwa etala. Moolikanasa, okathi wotheene nihaana ohula murima ahu wira nivoloihe muupuwelo wa Muluku.
Owehaweha 1/05/2012 epaax. 32 etti. 2
‘Mukhapeleleke Murima Anyu’!
Xeeni ninreerela ahu okhapelela murima ahu wa nthonyeryo? Muluku aahimuruma Mwene Salomoni olepa so: “Mwa itthu sootheene, mukhapeleleke murima anyu, Maana owo ti maphattuwelo a okumi”. (Miruku 4:23) Wiira nikhalane okumi wooloka niinaano-va ni muhoolo onlipa ni moota ninkhapelela ahu murima ahu wa nthonyeryo. Mwaha wa xeeni? Okhala wiira Muluku onniweha etthu eri vamurimani vahu. (1 Samuweli 16:7) Etthu enniiriha okhalana waatana ni Muluku, omutthu ahu wa muhina, etthu eri ‘vamurimani vahu’. — 1 Pedru 3:4.
Itthu sa Efaita sa Mbiiliyani
Owehaweha 08/2021 epaax. 8 etti. 4
Niireke Moolakela Omulipelela Yehova?
4 Yoolepa ya Miruku 4:18, enihimya so: “Mukhalelo w’atthu òloka onlikana ni warya wa nsuwa: onkhumelela oxaka, khunnuwa mpakha othana eriyari”. Moolumo ala anihimya enamuna Yehova onaakhaliherya awe arumeyi awe wiiwexexa ele oniphavela awe. Owo onipaka eyo vakhaani-vakhaani. Masi yoolepa ela enninikhaliherya woona marukunuxo mukristau onipaka awe mookumini mwawe wira omusiveliheke Yehova. Wunnuwa mwa omunepani khahiyo etthu eniiraneya moowakuveya, onnivira okathi munceene. Akhala wira nnimwiimananiha omusoma Biibiliya, weettela malakiheryo nniixutta ahu mBiibiliyani ni weettela malakiheryo ninvahiwa ahu ni mutthenkeso wa Yehova, vakhaani-vakhaani nnoowerya otakiha mikhalelo sa Kristu. Nave nnimuncererya omusuwela wahu Muluku. Nrowe nithokorerye nlikanyiho Yesu aapanke awe ninnikhaliherya wiiwexexa oratteene.
17-23 ya Março
MIHAKHU SINIKHUMA MBIIBILIYANI MIRUKU 5
Mukhootte Orupihana Woohiloka
A Sentinela 15/07/2000 epaax. 29 etti. 1
Nyuwo Munoowerya Okhotta Orupihana Woohiloka Olumwenku Ola Wootakhala
Eliivuru ya Miruku onniromoliwa “muthiyana oohiirya”, aahiiso muthiyana onrupihana voohiloka. Moolumo onirumela awe wiira onwoke mutthu tootepa oreera. Nave anlikana ni mahepepe a oravo, iyano sawe ti soonuna ovikana makhura. Nave atthu anceene anrupihana voohiloka olelo-va annirumela moolumo ntoko a muthiyana ole. Mwa ntakiheryo, nwehe yoowiraneya ya Amy, yoowo orina iyaakha 27. Owo onihimya so: “Kookhalana kooleka aka omutekoni yoowo onikiwehexexa vanceene, nave ikwaha sinceene onnikittottopela. Tivooloka ottottopeliwa masi kinoona wiira enamuna onikithokorerya awe oniphavela wiira nirupihane. Nkinrowa wemeererya owokiwa ni moolumo awe”. Moolumo a mutthu oniphavela orupihana woohiloka anikhala ntoko tooreera vakhala wiira khaninsuwela yoolakela aya. Wiira nisyake sooweha iyo nihaana orumela saana muupuwelo ahu.
A Sentinela 15/07/2000 epaax. 29 etti. 2
Itthu sinikhumelela mwaha wa orupihana woohiloka ti sootepa otakhala onvikana espata eniitha ninno-ninno. Nave mutthu onirupihana voohiloka pooti okhwa. Mixankiho iyo sinihela muhina ohoonona murima anyu, mutthu pooti orupala ohiphavenle ni ophwanaya iretta siniraviwa mwaha wa orupihana woohiloka. Nkuupuwelani owereya onoonawe ole oniraruweliwa. Ohiroromeleya vakhaani paahi pooti okumiherya mixankiho mutthu okhanle awe oviriha okumi awe wootheene. Mweekeekhai orupihana woohiloka onnikumiherya mixankiho.
A Sentinela 15/07/2000 epaax. 29 etti. 5
Nihaana osyaka waatana ni atthu akhanle oniiriha ophavela orupihana woohiloka. Xeeni ninreerela ahu okhotta waatakiha atthu ni owiriyana muusika soohiloka, oweha iprokrama sinrowa ohoonona muupuwelo ni oweha epoornokrafia? (Miruku 6:27; 1 aKorinto 15:33; aEefeso 5:3-5) Vaarowa okhala etthu ya ololo opaka itthu saarowa wooniherya wiira ninniphavela orupihana woohiloka aahiiso wiitthokiha ni owara voohikhalela. — 1 Timootheyo 4:8; 1 Pedru 3:3, 4.
Itthu sa Efaita sa Mbiibiliyani
A Sentinela 15/07/2000 epaax. 29 etti. 7
Nyuwo Munoowerya Okhotta Orupihana Woohiloka Olumwenku Ola Wootakhala
Salomoni onnihimya mixankiho suulupale aniphwanya aya atthu ale anrupihana woohiloka. Mutthu oniraruwa khoniphenta erutthu awe ni khonittittimihiwa ni atthu akina. Tthiri ti vowuuliha muru orupihana woohiloka niphavela aka wiisiveliha mmansihu aahiiso waasiveliha atthu akina. Mwekeekhai ole onrupihana ni mutthu ohithelanne awe onnooniherya wiira khonittittimiha ni khoniphenta erutthu awe.
24-30 ya Março
MIHAKHU SINIKHUMA MBIIBILIYANI MIRUKU 6
Exeeni Nniixutta Ahu ni Eneneele?
Perspicaz vol. 1 epaax. 999 itti. 1-2
Eneneele
‘Ankhili a Eekeekhai’. ‘Ankhili’ a ineenele khakhumelenle meekhayaru paahi, masi ankhili awo anikhuwa wa Mpattuxa. Biibiliya onihimya wiira eneenele ‘ennilokiherya yoolya aya okathi wa elimwe ni ennittottela eyoolya ya okthi woohepha’. (Mir 6:8) Enamuna emosa ya ineenele muteko aya ori ottottela eyoolya (Messor semirufus), ennittottela eyoolya aya okathi wa elimwe ni ennirumela eyoolya eyo ohela muhina okathi wa eyiita vaavo enithowa aya eyoolya. Enamuna ela ya ineenele sinniphwanyaneya mapuro yale eri aya eyoolya yinceene. Nto vaavo epuula eniinaniha aya yoolya ya ineenele, iyo sinnikumiherya ota eyoolya wiira yaaneye vansuwani. Okathi ipyo saapwenhe aya sinimela aya ineenele iyo sinniphela. Ekurupu emosa ya ineenele sinilokiherya eyoolya aya sinnisuwenyeya mwaha wa ephiro ayaohela muhina makukhu sinirihela aya mukherekhere ya ephiro sinivira aya.
Mikhalelo sooloka. Nuumala osoma voohimya sa ineenele, sinninitumererya wiiwelela miruku iya sini: “Nyuwo mulipa-oonyoonyiwa, mwiixutte etthu ni eneneele; Nwehe iphiro saya wiira mukhalane ankhili”. (Mir 6:6) Ineenele khahiyo paahi siniwerya oliherya yoolya aya para muhoolo, masi iyo sookhalana yoolakela ni sinnithipelela hata ikwaha sikina vataphulelaka okuxa muritti onivikana ikwaha piili olemela wa ineenele iyo sipaka itthu siniwerya aya ni sikhoottaka ohiya muteko onavara aya hata ikwaha sikina simooraka. Iyo sinnivara muteko hoothe, sinnilokiherya ni orattela mwiithe aya nave sinnooniherya wiira sinnikhapelelana ikwaha sikina sikhaliheryanaka vaakhala wiira yookhala eneenele evulanle ottikiherya mwiithe aya.
A Sentinela 15/09/2000 epaax. 26 itti. 3-4
Mukhapelela Nsina Nanyu
Khivanireerela hiyo okhala atthu oovara muteko nitakihaka ineneele? Wiimananiha ovara muteko ni olokiherya enamuna niinvara ahu muteko etthu yooloka para hiiyo, hata nihooleliwaka ahiiso nnaari. Nto hata oxikola ,omutekoni,ahiiso vaavo ninvara ahu miteko sikina sa Muluku hiiyo nihana wiimananiha vaanceene. Ntoko siisale eneneele enittottela aya mureerelo muteko onivara aya, Muluku oniphavela wiira hiiyo nave ‘niweheke sooreera soothene siniphwanya ahu ni muteko ahu’. (Musuweli 3:13, 22; 5:18) Murima wooloka nave ohakalala wa mutthu, mareeliho anikhumelela mwaha wa muteko onivara awe. — Musuweli 5:12.
Salomoni onnirumeela makoho manli wiira akhaliherye atthu oonyoonyiwa.Owo aahimmye so: “Nyuwo mulipa-oonyoonyiwa, munrowa wumpaathiki mpakha silini? Munrowa ovenya silini opuro munirupa anyu? Mwarupa vakhaani, mwaphwanya ikhove vakhaani, mwaikhuraana vakhaani mphavelaka omumula, ohaawa wanyu onimoorwa ntoko latarau, nave othoiwa wanyu, onimoorwa ntoko mulopwana okunxe ikaruma sa ekhotto.” (Miruku 6:9-11) Vaavo mulipa-oowoolowa onirupa awe onnimurwela ohawa ntoko latarau nave othoiwa onnimurwela ntoko mulopwana okunxe ikaruma sa ekhotto. Imatta sa mulipa-oonyoonyiwa sinnisareya malaxi ni oyele. (Miruku 24:30, 31) Nakoso a mulipa-oonyoonyiwa khoonikhumela saana. Niireke patarau onoowerya onvilela okathi munceene mulipa-oonyoonyiwa? Nave niireke naskola oninyoonyiwa osoma, onookhumela saana oskola?
Itthu sa Efaita sa Mbiibiliyani
A Sentinela 15/09/2000 epaax. 27 etti. 3
Mukhapelele Nsina Nanyu
Eliivuru ya Miruku ennihimya itthu 7 seiyo sikhanle oomwiiriha mutthu opaka etampi. “Maitho oowiisoona” ni “Murima oniphavela opaka itthu sootakhala” sinihimmwa itampi mutthu onipaka awe orumelaka muupuwelo awe. “nlumi noowootha” ni “namoona onilavula itthu soowootha” anihimmwa moolumo ootakhala animwiiriha mutthu opaka etampi. “Matata animwiiva mutthu ohitthenke etthu” ni “inawu sintthimakela opaka itthu sootakhala” sinihimmwa miteko sinivariwa ni atakhali. Nave atthu Yehova onanyokhawe taale onaasivela owana-wana ni omaliha murettele wa atthu akina. Mwaha wa wuncerereya itampi iyo 6 para 7 siniphwanyaneya eliivuru ya Miruku eyo enooniherya wiira khaahiyo elista yoomalela ya itampi Yehova oninyokha awe, maana khula nihiku, apinaatamu annipaka itampi sinceene.
31 A MARÇO–6 A ABRIL
MIHAKHU SINIKHUMA MBIIBILIYANI MIRUKU 7
Musyake Itthu Sikhanle Ooweehereryani
A Sentinela 15/11/2000 epaax. 29 etti. 5
“Musuke ikano saka wiira mukhaleke mahiku manceene”
Salomoni iira eemenle ene vaxanelani ya ekarati, woonasa wene yaapakaiwe sirumeeliwaka ithaapwa. Vaahiiila nave iphiro saahiriipela, nto Salomoni aahinweha mmiravo ori ene mekhaawe. Mmiravo owo khiwaarina ankhili, khaawuupuwela saana nave khiwarina murima wooloka. Mmiravo ole aanisuwela ephiro xeeni aavinre awe ni aanisuwela etthu yaakhanle omukhumelela mwaha woovira ephiro ele. Owo aahaattamela opuro “woowiipitheya wa muthiyana namararuwa”. Muthiyana ole aaphavela exeeni?
A Sentinela 15/11/2000 epaax. 30 etti. 4-6
“Musuke ikano saka wiira mukhaleke mahiku manceene”
Iyano sa muthiyana ole namararuwa saari sooreera. Owo anilavula ni ikuru ni aaniirorormela okathi aalavula awe. Moolumo ootheene aarumelela awe wiira onwoke mmiravo ole, yaari othanleliwa saana. Vaavo aahimmye awe wiira aahivaha mikuttho sa opatthani ni aahimmaliherya natiri awe, muthiyana ole vaakhala wiira okhalana exariya nave vaakhala wiira aahikhalana waatana wooloka ni Muluku. Mikuttho saavahiwa mutemplo oYerusalemu saahela muhina enama, otthu, makhura ni eviinyu. (Onamukuttho 19:5, 6; 22:21; Mammeru 15:8-10) Okhala wiira mutthu aavaha mukuttho wa opatthani aaneemereriwa orumeela eyoolya aya, owo aahimmye wiira aahikhalana eyoolya yinceene ni soowurya. Nto moolumo otheeene a muthiyana ole yaahooniherya wiira miravo ole aamutthekula vanceene opuro owo. Etthu yuulupale yaamwiirinhe muthiyana ole okhuma owannye awe okhala wiira amphavela mmiravo ole. Ti vootikiniha vanceene para oniiwa yoowiraneya ela. Mulopwana mmosa onisoma soowiraneya sa mbiibiliyani, ohimmye so: “Ekeekhai wiira muthiyana ole aanimwavya mutthu, masi niireke amphavela mmiravo yoole onilavuliwa yoowiraneya ela? Moohaniherya mulolo paahi ntoko mmiravo ole taakhanle omukupali muthiyana ole namararuwa”.
Ohiya paahi enamuna awanre awe muthiyana ole namararuwa aahirumela moolumo owoka, ahimukuparela ni aahirumela eperfume yoowunkhela. Owo aahimmye so: “Kihaatala ekoolxa yooreera vakhaamani vaka, ya eliinyu yooreera ya wExiitu. Kootathela vakhaamani vaka iperfuume soowunkhela, seiyo sipakiwe ni miira, alowe ni ekanela”. (Miruku 7:16, 17) Aahilokiherya ekhama awe orumelaka eliinyu yooreera ya wExiitu. Nave aahihela eperfume yoowunkhela yaapakiwe ni miira alowe ni ekanela.
Muthiyana owo namararuwa aahihimya so: Murwe, nirupe hoothe mpakha oxa; Murwe nrupihane. Yoolakela ya nlattulo nne khahiyo waari oxantari paahi wa atthu anli. Yoolakela aya waari orupihana woohiloka. Nto yaari etthu yoowoopiha para mmiravo ole! Wiira otepe onwoka muthiyana ole onnicererya ohimyaka so: Okhala wiira iyaka khokhanle owaani; oheetta mukwaha woorakama. Owo ookuxa musurukhu, khontthika niinaano mpakha eriyari ya mweeri. (Miruku 7:18-20) Muthiyana ole namararuwa aahimmye wiira khivo yootakhala yaarowa okhumelela ni aahimulipiherya omuleelaka wiira iyawe khiwaakhanle aaronwe omwiira nakoso ottaiwene ni khaarowa otthika niinaano. Muthiyana ole namararuwa aahiwerya onwoka mmiravo ole! Aahinwoka mmiravo owo ni moolumo oowoototha. ni aahimukuxa ni moolumo awe ooweepesa. (Miruku 7:21) Aprisari mulopwana olipa ntoko Yosefe wiira oxinntte yooweha ele. (Maphattuwelo 39:9, 12) Niireke mmiravo ole anwerya oxintta yoooweha ele?
A Sentinela 15/11/2000 epaax. 31 etti. 2
“Musuke ikano saka wiira mukhaleke mahiku manceene”
Mmiravo ole khaawenrye okhootta nlattulo na muthiyana namararuwa. Mmiravo ole aahihiya wuupuwela saana, nave aahimutthara ntoko epooyi enrowa ohitiwa, ntoko mulolo onrowa ohukhummwa vamwirini. Ntoko siisaale mutthu otthukiwe ni ikwirinti ohinikhotta awe ohaaxiwa, mmiravo ole aahipaka etampi. Mmiravo ole aasuwenle wiira aahipaka etthu yootakhala nuumala ntthere omuthorola hapa awe, niire so, nuumala omphwanya mixankiho saarowa omwiiva. Mmiravo ole aamookhwa mwaha wa iretta siniravihaniwa mwaha wa orupihana woohiloka. Mixankiho iyo saahela muhina ohonoona waatana wawe ni Muluku, nave-tho saamumphwanya mixankiho mookumini mwawe. Nave mmiravo ole aahiikumiherya mixankiho sinceene mookumini mwawe nave aahimutthekela Muluku. Ntoko siisaale mwaapalame onivavela awe vantaphani, mmiravo ole aahitthimakela wookhwani!
Itthu sa Efaita sa Mbiibiliyani
A Sentinela 15/11/2000 epaax. 29 etti. 1
“Musuke ikano saka wiira mukhaleke mahiku manceene”
Salomoni alempe so: “Mutthukwelele [ikano saka] mukathani mwanyu Nave mulepe vamurimani vanyu”. (Miruku 7:3) Ntoko siisaale ninwerya ahu oweha ikatha sahu khula okathi ni sinnikhaliherya aya opaka itthu nimphavela ahu, itthu nniixutta ahu mbiibiliyani nihaana wuupuwelela aka khula okathi nimphavela ahu opaka etthu ni weemererya weettihiwa ni malakiheryo awo. Nihaana olepa vamurimani vahu, eyo piiyo, wiilimaleliha otthara okathi wootheene malakiheryo a mbiibiliyani.
7-13 ya Abril
MIHAKHU SINIKHUMA MBIIBILIYANI MIRUKU 8
Mwaawiriyane Ankhili a Yesu
Murwé Mukitthareke epaax. 131 etti. 7
“Kinnaphenta Atithi”
7 Mu eversiikulu 22, miruku sinihimya so: “Apwiya àkipattuxa, kikhalaka muraji mwa miteko saya, okhuma wopajeryani, ehinatthi opattuxa etthu ekina”. Tthiri, yookhala etthu ekina eniheliwa muhina ohiya paahi miruku, okhala wira miruku khasitonko ‘opattuxiwa’. Miruku khasirina ephattuwelo aya, okhala wira Yehova khorina ephattuwelo awe ni okathi wotheene owo namiruku. (Esalimo 90:2) Masi, Mwaana a Muluku “t’òpajerya mwa sopattuxiwa sothene”. Owo aaroopakiwa aahiiso opattuxiwa; toopacerya mwa soopattuxiwa sotheene sa Yehova. (aKolosi 1:15) Elapo ni erimu ehinatthi opakiwa, Mwaana iira okhanle ene ntoko sinihimya aya eliivuru ya Miruku. Ntoko Nsu, eyo piiyo, Namuhupi a mwaneene Muluku, Mwaana owo aari ethoonyeryo yoolokexa ya miruku sa Yehova. — Yohani 1:1.
Murwé Mukitthareke ipaax. 131-132 itti. 8-9
“Kinnaphenta Atithi”
8 Muteko xeeni Mwaana aavara awe, okathi wotheene ovinre ohinatthi orwa valaponi? Eversiikulu 30, Tradução do Novo Mundo, ennileela wira Mwaana owo aari ni Muluku ntoko “funti a miteko”. Eyo entaphulela exeeni? Eliivuru ya aKolosi 1:16 entthokiherya so: “Mwa yowo Muluku òpattuxa itthu sothene wirimu ni vathí, . . . Muluku òpattuxa sothene mwa Kristu: sothene sipattuxeriwe yowo”. Nto, Yehova Mpattuxa, aahivara muteko ni Mwanawe, Funti a Miteko, wira opattuxe itthu sotheene, opacerya soopattuxiwa somunepani siri wiirimu, khiyarowa olumwenku ola wotheene, elapo ya vathi ni itthu sooreera siri vathi vaava, ntoko miri ni inama sa khuta muthinto, ni wanikisa waya, aahipattuxiwa pinaatamu valaponi. Mmikhalelo sinceene, hiyo pooti olikanyiha wiiraana okhanle eriyari ya Tiithi ni Mwaana, ntoko nxinyero onivara muteko awe vamosa ni mulipa-ooteka, yoowo oniteka itthu ottharihelaka muupuwelo ni osuwela wa nxinyero. Vaavo vanttottopela ahu khuta etthu epattuxiwe, mwekeekhai, hiyo nninvuwiha Nxinyero Muulupale. (Esalimo 19:2) Nave-tho, hiyo nohaana wuupuwelaka wiiraana woohakalaliha okhanle okhuma khalai eriyari ya Mpattuxa ni “funti [awe] a miteko”.
9 Vaavo apinaatamu anli oohimalela vanivara aya muteko hoothe, ikwaha sinceene sinnikhumelela mixankiho. Masi mixankiho iyo khasitonko omwiiraneela Yehova ni Mwanawe! Mwaana ola oovara muteko vamosa ni Tiithi awe iyaakha ikonto soohikontareya, ni okathi owo wotheene aari ootteeliwa “murima okhala vamaithoni vawe okathi p’ukathi”. (Miruku 8:30) Aayo, Mwaana aanisiveliwa okhala vamosa ni Tiithi awe, nave-tho Tiithi aanisiveliwa okhala hoothe ni Mwanawe. Mwekeekhai, Mwaana aahinnuwa otepaka okhala ntoko Tiithi awe, iixuttaka otakiha mikhalelo sa Muluku. Tivonto nihintikhina ahu wira wataana wa Tiithi ni Mwaana waari wuulupale! Nto, pooti ohimmwa moohivonya wira iwo ti ophentana wekeekhai weiwo opacenrye khalaixa molumwenkuni.
A Sentinela 15/04/2009 epaax. 31 etti. 14
Mmuttittimiheke Yesu yoowo ori Muulupale Onvikana Davidi ni Salomoni
14 Mweekeekhai mulopwana mmosa paahi toowenrye okhalana ankhili onvikana Salomoni. Mulopwana owo ti Yesu, okhala wiira aahihimya okhala mulopwana orina efaita yuulupale onvikana Salomoni. (Math. 12:42) Yesu aahilavula moolumo a okumi woohimala. (Yohani 6:68) Mwa ntakiheryo, mwaha alvunel awe vamwaako aahihimya itthu nniixutta ahu ni miruku sa Salomoni seiyo sinooniherya moota mutthu onimurumela Yehova onrowa awe ohakalala. (Mir. 3:13; 8:32, 33; 14:21; 16:20) Yesu aahitthokiherya wiira ohakalala weekeekhai onikhumelela mwaha wa omurumela Yehova ni wiiraneya wa itttu oleihenrye awe. Owo aahimmye so: Oohakalala taale anisuwela wira ahaana omusuwela Muluku, okhala wira Omwene wa wiirimu ti wawaya (Math. 5:3) Yehova yoowo ori maphattuwelo a okumi onniwihana atthu otheene ale aneettela soowiixuttiha sa Yesu. (Esal. 36:9; Mir. 22:11; Math. 5:8) Yesu Kristu toori ankhili a Muluku. (1 aKor. 1:24, 30) Ntoko Mweene oothanliwa ni Muluku, Yesu okhaalana, eroho ya ankhili. — Yes. 11:2.
Itthu sa Efaita sa Mbiibiliyani
Despertai! 05/2014 epaax. 16
‘Ankhili Annikhuwela’ — Nyuwo Munniwerya Owiiwa?
▪ Encyclopedia The World Book ehimmye so: “Biibiliya eliivuru ehiireere osommwa okhuma khalai ni etaphuleliwe mattaava manceene ovikana iliivuru sikina”. Mahiku ala Biibiliya ntero aahiiso metaade onniphwanyaneya mattaava anivikana 2.600 nave atthu oowiiraka 90% a olumwenku wootheene anoowerya omusoma Biibiliya nttaava aniiwexexa aya.
▪ Nave ankhili “khanihiya okhuwela vanceene” mwa enamuna yoowoneya. Matheyo 24:14, ninsoma so: “Nave-tho, ihapari iya sooreera sa Omwene sinoolaleiwa elapo yotheene, wira atthu otheene yiiwe. Vano, olumwenku ola omaleke”.
14-20 ya Abril
MIHAKHU SINIKHUMA MBIIBILIYANI MIRUKU 9
Mukhale Mutthu a Ankhili, Ohiya Ooveeha
Owehaweha 02/2022 epaax. 9 etti. 4
“Mwiwe Molumo Àsuweli”
4 Ohimya ekeekhai, okathi ninvahiwa ahu miruku, khivanikhweya weemererya ni ovarihela muteko. Hiyo ninneemererya wira na anatampi. Masi pooti okhala vooxankiha weemererya miruku, vakhala wira mutthu owo onninleela etthu enreerela ahu olokiherya. (Mmusome Musuweli 7:9.) Ikwaha sikina hiyo pooti woothereryaka itthu. Aahiiso pooti onyoonyiwaka ni mutthu onivanhe miruku iyo, nnapacerya wuupuwelaka wira onooninyokha. Hiyo pooti wuupuwelaka so: ‘Ale tani wira ekivaheke miruku miyo? Ale-tho annittheka!’ Nto akhala wira miruku iyo nivahiwe ahu khasinisivenle, hiyo pooti okhoottaka wiiwelela, nnamuhaavya mutthu mukina onrowa onivaha miruku sinrowa onisivela.
Owehaweha 02/2022 epaax. 12 itti. 12-14
“Mwiwe Molumo Àsuweli”
12 Exeeni enrowa onikhaliherya weemererya miruku? Nihaana okhala oowiiyeviha ni ohiliyala wira na atthu oottheka, ni wira ikwaha sikina ninnipaka itthu soohiloka. Ntoko niwenhe ahu, Yobi aahikhalana moonelo woohiloka. Masi aahilokiherya muupuwelo awe, nave Yehova aahimureeliha. Mwaha wa xeeni? Mwaha woowi Yobi aari mutthu oowiiyeviha. Eyo yaahooneya okathi eemerenrye miruku sa Elihu, hata Elihu aari mmiravo onvikana yena. (Yobi 32:6, 7) Wiiyeviha onoonikhaliherya weemererya miruku, hata nuupuwelaka wira khinaaphwanela ovahiwa miruku iyo aahiiso nivahiwe ene ni mutthu orina iyaakha vakhaani onivikana hiyo. Mutokweene mmosa a oCanadá, ohimmye so: “Sookhala itthu sikina siniiraneya mookumini mwahu nihinwerya ahu oweha, masi sinooniwa ni atthu akina. Nto ninrowa owerya sai olokiherya itthu iyo?” Khivanikhweya olokiherya mweettelo ahu, vakhala wira khuuvo mutthu onnivaha miruku. Ekeekhai wira khula mmosa a hiyo ookhalana etthu enreerela awe olokiherya. Ntoko makristau, vannireerela wiimananiha wira nooniheryeke mikhalelo sooreera sinikumiheriwa ni munepa woowaarya. Nave nihaana osuwela olaleerya ni wiixuttiha ihapari sooreera. — Musome Esalimo 141:5.
13 Okathi munivahiwa anyu miruku, mooneke ntoko ophenta wa Muluku. Yehova omphavela oniphwanyiha mureerelo. (Mir. 4:20-22) Okathi onnivaha awe miruku orumeelaka nuulumo nawe, iliivuru sinimutthokiherya Biibiliya, ni munna aahiiso murokora a mmulokoni, eyo enooniherya wira onniniphenta. Yoolepa ya aHeeberi 12:9, 10 enihimya wira Yehova onnipaka eyo, “wira niphwanyeke mureerelo”.
14 Nweheke miruku, ohiya moota munivahiwa anyu miruku iyo. Ikwaha sikina hiyo pooti wuupuwela wira khanivahiwe miruku mwa enamuna yooreerela. Ekeekhai wira mutthu onvaha miruku ohaana ovaha mwa enamuna yooreerela. (aGal. 6:1) Masi ankhi akhala wira hiyo ti ninvahiwa miruku iyo? Akhala wira ti hiyo, nihaana owehexexa etthu sinniixuttiha aya, ni ohuupuwela etthu yaakhanle opakiwa wira nivahiwe saana. Niikoheke so: ‘Hata ehikisivenle enamuna kivahiwe aka, masi kiireke etthu ehimmwale ekeekhai? Kiireke owehexexa itthu soohiloka munna ole otonko awe opaka khalai, onookikhaliherya wiixutta etthu ni miruku onkivaha awe?’ Vakhala wira nnimooniherya wira na atthu a ankhili, nnimwiixutta itthu sooreera ni miruku ninvahiwa ahu. — Mir. 15:31.
A Sentinela 15/05/2001 epaax. 30 itti. 1-2
‘Mwaha wa ankhili, nnookhala mahiku manceene’
Moota onoonela awe mutthu a ankhili okathi onivahiwa awe miruku onnivirikana ni moonelo wa mutthu ooveha. Salomoni aalempe so: Mmuttaruxe mutthu a ankhili, nto owo onimoophentakani. Mmwiixuttiheke mutthu a ankhili, vano owo onoowuncererya ankhili awe. (Miruku 9:8b, 9a) Mutthu a ankhili onnisuwela wiira khuuvo onihakalala okathi onittaruxiwa awe, masi onnoona owereya. Vano ale aniphavela wiixutta etthu, anniphwanya mureerelo. Nuumala-vo, awo anniwerya ovara miteko sa xariya ni okhala ni murettele. (aHeeberi 12:11) Hata nivahiwa aka miruku sinikhala ntoko sinooniphukela, exeeni yaarowa oniiriha ophavela wiisakiha nisuwelaka wiira miruku iyo sinoonikhaliha atthu a ankhili?
Mwene ole a ankhili aahivikaniha ohimyaka so: Mmwiixuttiheke naxariya, nto owo onimuncererya osuwela wawe. (Miruku 9:9b) Khuvo pinaatamu osuwela vanceene aahiiso hata ori ene oowuuluvala ohinireerela wiixuttihiwa. Etthu yoohakalaliha waaweha atthu owuuluvala yeemereryaka ekeekhai ni yiivahereryaka wa Yehova. Nave hiyo, nihaana okhalana yoolakela ya wiixutta ni wiimamaniha osuwela itthu sa niinaano.
A Sentinela 15/05/2001 epaax. 30 etti. 5
‘Mwaha wa ankhili, nnookhala mahiku manceene’
Khula mutthu okhalana muritti wa wiimananiha wiira aaphwanye ankhili. Mwene Salomoni aahittittimiherya mwaha owo ohimyaka so: Mwakhala mutthu a ankhili, munimwiiphwanyiha mureerelo mmansinyu. Masi, mwakhala mutthu ooveeha, ti nyuwo munrowa wiikumiherya maxakha. (Miruku 9:12) Mutthu a ankhili onniphwanyiha mureerelo masi mutthu ooveha onniikumiherya maxakha mmansa awe. Tthiri ele nnaalahu tenrowa ahu ohepha. Tivonto, Nwiiweleleke oratteene ankhili. — Miruku 2:2.
Itthu sa Efaita sa Mbiibiliyani
A Sentinela 15/09/2006 epaax. 17 etti. 5
Iponto Suulupale sa Eliivuru ya Miruku
9:17 — Exeeni ekhanle “maasi oowiiyiwa” ni xeeni aarya aya ‘oosiva’? Okhala wiira Biibiliya onnilikanyiha orupihana wa atthu athelanne ntoko owurya maasi ooriirya a mweehimeni, maasi oowiiyiwa anithoonyerya orupihana woohiloka onipakiwa wiiphiini. (Miruku 5:15-17) Nto mwaha wa atthu awo wuupuwelaka wiira khuuvo mutthu onrowa osuwela etthu anipaka aya, teniiriha maasi awo okhalaka ntoko oosiva.
21-27 ya Abril
MIHAKHU SINIKHUMA MBIIBILIYANI MIRUKU 10
Ninrowa okhalana sai okumi woohakalala?
A Sentinela 15/07/2001 epaax. 25 itti. 1-3
‘Anaxariya Annireelihiwa’
Anaxariya annireelihiwa mwa enamuna ekina. Mutthu oolosowa, onoohaawa, masi mutthu onivara muteko, onoothaaciri. Mwaana onipaka itthu mwa miruku onnihepha okathi wa elimwe, masi mwaana onipaka itthu soowuuliha muru onnirupa vanceene okathi woohepha. — Miruku 10:4, 5.
Moolumo ala a mwene akhalana yootaphulela yuulupale para atthu ale anivara muteko woohepha mmatta. Okathi woohepha khahiyo okathi para orupa. Okathi mutthu oniviriha awe iwoora sinceene ovaraka muteko. Tthiri okathi woowiixaakuviha.
Olavulaka sa ohepha ipyo ohiya atthu, Yesu aahalela awiixutti awe wiira: Soolya khasireere mmatta, masi anamuteko ari vakhaani. Tivonto, munvekele Mwaneene ematta wira aaruuhe anamuteko. (Matheyo 9:35-38) Mwaakha wa 2000 atthu anivikana imilyau 14 yaahirowa wuupuwelela okhwa wa Yesu, nummeru nenno ninvikana ikwaha piili mwaattelo wa Anamoona a Yehova. Nto, ti pani ohineemererya wiira ipyo soolikana wira sihemphwe? (Yohani 4:35) Anamakokhorela a ekeekhai anninvekela mwaneene ematta anamuteko anceene, vaavo aaniimananiha aya ovara muteko woowapaka awiixutti ni mavekelo anipaka aya. (Matheyo 28:19, 20) Yehova onnireliha wiimananiha waya! Mwaakha wa muteko wa 2000, atthu anivikana 280.000 yaahipatisiwa. Awiixutti awo asya anniimaniha owiixuttiha atthu akina nuulumo an Muluku. Nihakalaleke okathi ola woohepha, niimananihaka wiirela mpantta muteko woowaapaka awiixutti.
A Sentinela 15/09/2001 epaax. 24 itti. 3-4
Mweetteke ‘Ephiro ya Xariya’
Salomoni onnitthokiherya efaita erina aya exariya. Owo aahimmye so: Mihakhua sa mulipa-oothaaciri sinlikana ni epooma awe yoolipihiwa. Osikhini wa alipa-oohaawa onniwiiriha ohaawa. Miteko sa anaxariya sinniphwanyiha okumi; masi miteko sa atthu ootakhala sinniphwanyiha etampi@@Miruku 10:15, 16.
Mihakhu okathi mukina sinnikhapelela okumi wa mutthu, ntoko siisale esitati yoolipihiwa enakhapelela aya atthu anikhala musitati mmo. Osikhini pooti okhala etthu yootepa oxankiha otepexa wene okathi enikhumemelela aya etthu naahaalipelela ahu. (Musuweli 7:12) Woonasa wene mwene ole a ankhili aahimya woopiha orina aya mihakhu ni osikhini. Mutthu oothaaciri pooti ororomelaka vanceene mihakhu sawe, oonuupuwela wiira itthu sooloka orina awe sinlikana ni exiri enimukhapelela. (Miruku 18:11) Nave mutthu oohaawa pooti wuupuwelaka wiira mwaha wa osikhini awe khorina nlipelelo na muhoolo. Siiso, otheene aya annihiya wiimananiha okhalana nsina nooloka ohoolo wa Muluku.
Perspicaz vol. 1 epaax. 314
Mareeliho
Yehova onnareeliha apinaatamu. “Mareeliho a Yehova tanimwiiriha mutthu othaaciri, mareeliho awe khanooniha owereya”. (Mir 10:22) Yehova onnaareeliha atthu ale oniwemererya awe akhapelelaka, aavahaka malakiheryo awe, okumi munceene, akahliheryaka oweettela saana itthu, aavhaka itthu sinaathowa ni aaphwanyihaka mureerelo.
Itthu sa Efaita sa Mbiibiliyani
A Sentinela 15/05/2006 epaax. 30 etti. 18
Ohakalala Nimphwanya Ahu Mwaha Wookhala Atthu Ororomeleya
18 “Mareeliho a Yehova” taniwiiriha arumeyi awe okhalana wataana wooloka ni Yehova. Nave ninnikupali wiira mareeliho awo “khanooniha owereya”. (Miruku 10:22) Nto xeeni arumeyi a Yehova sinaphwanya aya mixankiho seiyo siniwiiriha woona owereya vanceene ni ohaawa? Hiyo sinniniphwanya mixankiho mwaha wa mathowa maraaru. (1) Mwaha wa mupuwelo ahu oneettihiwa ni etampi. (Maphattuwelo 6:5; 8:21; Yakobo 1:14, 15) (2) Mwaha wa Satana ni malaikha awe otakhala. (aEefeso 6:11, 12) (3) Okhala wiira ninkhala olumwenku ola wootakhala. (Yohani 15:19) Nnaamwi Yehova emereerya aka arumeyi awe waakhumelela itthu sootakahala yena khahiyo toonikumiherya. Mweekeekhai, “Soovaha sotheene sooreera ni soomalela, sinikhuma wiirimu. Iyo sinivahiwa ni Tiithi opattunxe mithuko sa wiirimu”. (Yakobo 1:17) Tthiri mareeliho a Yehova Khanooniha owereya.
28 A ABRIL–4 A MAIO
MIHAKHU SINIKHUMA MBIIBILIYANI MIRUKU 11
Muupuweleke Saana Muhinatthi Olavula!
A Sentinela 15/05/2002 epaax. 26 itti. 4
Atthu a xariya anneettihiwa ni ororomeleya
Ororomeleya wa naxariya onnaphwanyiha mureerelo atthu akina, nave mutthu otakhala onnaphwinyiha mixankiho atthu akina. Mwene Salomoni aahimmye so: Moolumo a namavirikanya annimpwetexa ole aattamanne awe, masi naxariya onimoopoliwa mwaha wa osuwela wawe. (Miruku 11:9) Ti pani ohinemererya wiira owootherya akina, waapa olavula moolumo oohiloka onnakumiherya mixankiho atthu akina? Naxariya, onnithanlela moolumo awe, olavulaka etthu yooloka ni mooreerela murima. Ankhili a naxariya annimwaakiha, okhala wiira mwaha wa orormeleya wawe onniwerya wooniherya wiira ale animulupttha anoomotherya.
A Sentinela 15/05/2002 epaax. 27 itti. 2-3
Atthu a xariya anneettihiwa ni ororomeleya
Vaavo atthu anikhala mmuttettheni aneettela aya exariya, awo annikumiherya murettele ni ovareleleya, ohiya-vo, annaalipiha atthu akina anikhala mmuttettheni mmo. Nto mwaha wa atthu awo, muttetthe owo onnilipa ni onnikhala mahiku manceene. Ale aniwootherya akhwaya itthu soohiloka anniwiiriha atthu anikhala mmuttetthe mmo ohimaleleya, ohihakalala, ohiirana ni waakumiherya mixankiho. Eyo enniraneya ikwaha sinceene vakhala wiira atthu awo akhalana okhulupale mmuttettheni. Muttetthe siisa onnisareya owana-wana wiiyeryana, annithowa atthu arina mikhalelo sooloka ni atthu anikhala muttetthe siisa annihaawa.
Malakiheryo ari eliivuru ya Miruku 11:11 annivareleya muteko para arumeyi a Yehova olelo-va yaawo anikhala moowiirana mmilokoni ntoko mittetthe soolipihiwa. Miloko ari aya atthu arina waataana wooloka ni Muluku, aneettela exariya ni aneettihiwa ni ororomeleya, atthu aya toohakalala nave anniluttuweliwa ovara miteko sa Muluku ni anninvuwiha Muluku. Yehova onnireeliha muloko siiso ni muloko owo onnirowa vaahoolo. Okathi mukina atthu akina pooti ohicalelaka ni olavula voohiloka moota sinipakiwa aya itthu mmulokoni. Atthu siiso ari ntoko mutathaari orina eveneno okhanle oowunnuwa ni waakumiherya mixankiho atthu akina mmulokoni. (aHeeberi 12:15) Atthu awo ikwaha sinceene aniphavela okhalana okhulupale ni ovuwa. Awo annaapa, ahimyaka wiira khapakeliwe exariya, anninyokhiwa ni itthu sikina yaahimyaka axitokwene. Moolumo aya pooti okumiherya okawanyeya mmulokoni. Wiira nikhalane waataana wooloka ni Muluku nihaana wiimananiha okhaliha murettele ni wiiraana mmulokoni nihiwiriyanaka itthu soohiloka sinihimmwa ni atthu awo.
A Sentinela 15/05/2002 epaax. 27 etti. 5
Atthu a xariya anneettihiwa ni ororomeleya
Mixankiho sinikumiheriwa ni atthu ale arina mweeettelo woohiloka aahiiso ahirina murima wooloka ti soowaatta. Atthu siiso anniwaapa ni waaveha atthu akina. Axitokwene ahaana opaka etthu moowakuveya wiira amalihe mweettelo ola woohiloka mmulokoni. Moovirikana ni mutthu ohirina murima wooloka, muuthu a ankhili onnisuwela okathi onireerela awe olavula. Ohiya omwara-mwarya isiiri sa atthu akina owo onnipweha esiiri. Mwaha woosuwela wiira moolumo yaahirumeliwe saana pooti waakumiherya mixankiho atthu akina, mutthu ororomeleya onnirumela saana moolumo awe. Owo onniroromeleya ni atthu a mmulokoni ni khonilaleya itthu sikhanle oowakumiherya mixankiho atthu akina. Tthiri atthu ororomeleya siisa mareeliho para muloko!
Itthu sa Efaita sa Mbiibiliyani
Despertai! 01.2020 epaax. 11, ekaaxa
Moota Wooxintta Onyoonyiheya
“OREERA MURIMA ONNIMALIHA ONYONYIHEYA”
“Mutthu ooreera murima onniipakela itthu sooreera, masi mutthu ootakhala onniikumiherya itthu sootakhala”. — MIRUKU 11:17.
Ekaapiitulu emosa ya eliivuru Vencendo o Estresse ehimmye so: “oreera murima onnimaliha onyonyiheya”. Moovarihana ni mulipa-olempe eliivuru eyo, Dr. Tim Cantopher, ohimmye wiira waathokorerya atthu akina mooreerela murima ennikhaliherya okumi ahu okhala wooloka ni enniniiriha okhala ohakakalala. Nave mutthu onathokorerya atthu akina vootakhala khonihakalala okhala wiira khuuvo mutthu oniphavela omwaattamela aahiiso waatana ni yena.
Nyuwo munoowerya oxintta onyoonyiheya mwiithokoreryaka mwa enamuna yookhalela. Mwa ntakiheryo, nihaana osyaka wiivaha nthowa mootepana aahiiso wuupuwela wiira khanirina efaita. Yesu ohimmye so: “mumphenteke mukhwiinyu ntoko siniiphenta anyu.” — Marko 12:31.