Ireferensia sa Okumi ni Orummwa Ahu Ekaderno Enirumeeliwa Omuthukumanoni
© 2025 Watch Tower Bible and Tract Society of Pennsylvania
5-11 YA MAIO
MIHAKHU SINIKHUMA MBIIBILIYANI
Ovara Muteko ni Nthiti Onnikumiherya Mireerelo
Owehaweha 06/2016 epaax. 30 itti. 6
Mukhalelo Wootepa Otthuneya Ovikana iDiamante
Arumeyi akina a Yehova vannaaxankiha ophwanya musurukhu oniphiyerya wira alyiheke emusi aya. Masi ohiya okhala oohiroromeleya wira aphwanye etthu yoolya, awo anniimananiha ovara muteko mooluttuweliwa wira aphwanye yoolya. Mwaha woopaka eyo, annooniherya mikhalelo sooreera sa Muluku, ohela muhina ororomeleya, mukhalelo yoowo ori wa faita yuulupale ovikana khula mureerelo wa werutthuni. — Mir. 12:24; aEef. 4:28.
Owehaweha 01/02/2015 epaax. 5 itti. 4-6
Moota Woosiveliwa ni Muteko Anyu
Nikoho nla nookiserya ti nooloka wuupuwelela, maana muteko onnihakalaliha akhala wira ninnoona moota onaakhaliherya aya akina. Yesu aahimmye so: “Mulipa-òvaha [onnihakalala vanceene] onvikana mulipa-òvahiwa”. (Miteko 20:35) Nave, ohiya paahi makiliyenti ni mapatarau ahu, aakhala-tho atthu akina anttottela mureerelo muteko ahu, niire so, amusi ahu ni ale oothoiwa.
Amusi ahu. Vaavo muhooleli a etthoko onivara awe muteko mooluttuweliwa wira okhaliherye emusi awe, owo onnikumiherya mureerelo mwa inamuna piili. Yoopacerya, onnaavaha atthu awo itthu sa werutthuni ntoko eyoolya, ikuwo, ni opuro wookhala. Veekeekhai onnaakhwaniherya muritti ovahiwe awe ni Muluku wa ‘othokorerya emusi awe’. (1 Timótheyo 5:8) Ya nenli: Ole onivara muteko onniixuttiha orweela mwa ntakiheryo nawe. Shane oromoliwe wanipacerya, onihimya so: “Apaapa annivaha ntakiheryo na mutthu oosuwela ovara muteko. Awo ti mutthu oororomeleya yaawo avanre muteko okumi aya wotheene. Nto aaviriha okathi munceene aryeene kalapintero. Ntakiheryo naya nookiixuttiha otthuneya waya ovara muteko ni matata, ni opaka itthu sinrowa waakhaliherya atthu akina”.
Ale oothoiwa. Murummwa Paulo aahaatumererya maKristau wira ‘ahaweleke ovara muteko. Siso anokhalana yo wakawela alipa-òthoiwa’. (aÉfeso 4:28) Tthiri, vaavo ninvara ahu muteko wira niikhaliherye mmansihu ni emusi ahu, nnoowerya-tho waakhaliherya ale oothoiwa. (Miruku 3:27) Ovara muteko mooluttuweliwa onooniphwanyiha ohakalala wuulupale mwaha wowaakhaliherya akina.
Itthu sa Efaita sa Mbiibiliyani
Owehaweha 09/2024 epaax. 28 etti. 10
Muhakalaleke Mwaha Wookhala Mutthu Oovaha
Muhiliyale wiira moolumo aakhalana owerya. Niireke munnimusuwela mutthu aarowa ohakalala mwaha wa ottottopeliwa? Niireke munnimusuwela mutthu onipirisari olipihiwa? Nto akhala wiira munnimusuwela, munoonela sai okumana nuuwo ni wooniherya wiira munnimuthokorerya? Nyuwo pooti omuxukurya, omulikarela ni omwinviyarela mensagem. Khivampirisari oxankiheya ni etthu munrowa anyu ohimya. Vakhala wiira nnoorumeela moolumo ooreera, eyo enoomukhaliherya munna aahiiso murokora ovilela mixankiho sinimphwanya ni okhala oororomeleya. — Mir. 12:25; aEef. 4:29.
12-18 YA MAIO
MIHAKHU SINIKHUMA MBIIBILIYANI
Muhiwokiwe ni “Muthuko wa Atakhali”
Perspicaz vol. 2 epaax. 189 itti. 2-3
Lampata
Orumeeliwa mwa nlikanyiho. Lampata onnimukhaliherya mutthu omwalela ephiro oneetta awe. Elavulaka mwa nlikanyiho, eliivuru ya Miruku enninvirikanyiha naxariya ni mutthu ootakhala, ehimyaka so: “Muthuko wa anaxariya, onnaarya vanceene, Masi muthuko wa atakhali onoottipihiwa”. (Mir 13:9) Muthuko wa anaxariya onnaarya vanceene, masi muthuko wa atakhali, hata okhalaka ntoko onnimwaleela iphiro sa atakhali, Muluku onoowiriha omorela mulittini. Ela ti etthu anilipelela aya ale anaatakhaliha apaapa aya ni amaama aya. — Mir 20:20.
Ottipihiwa lampata a mutthu, onitaphulela wiira mutthu owo khorina nlipelelo na muhoolo. Eliivuru ekina ya Miruku enihimya so: “Mwaana orina ankhili onnimutteeliha murima paapa awe, Masi mulolo onnimuthanya maama awe”. — Mir 24:20.
Omphenta Muluku ipaax. 123-124 itti. 13-14
Mutthyaweke Orupihana Woohiloka
13 Apatthani ahu pooti oniiriha opaka itthu sooloka wala soohiloka. Akhala wira ninnaathanla apatthani animwiiwelela Yehova, awo anoonikhaliherya omwiiwelela Yehova. (Miruku 13:20; mmusome 1 aKorinto 15:33.) Etthu yaamukhumelenle Dina mwaana a Yakobe enniniixuttiha otthuneya waya waathanla mwa miruku apatthani ahu. Owo aahuuwale etthoko ya atthu yaamukokhorela Yehova. Dina khahiyo aari mutthu aarupihana moohiloka, masi aahaathanla apatthani aximwali a oKanani, yaawo yahaamukokhorela Yehova. Musuweleke wira aKanani khiyaarina moonelo wa Muluku voohimya sa orupihana ni atthu otheene yaanisuwela wira aKanani waanaasivela orupihana woohiloka. (Onamukuttho 18:6-25) Mwaha wa apatthani awe, Dina aahimusuwela mmiravo a oKanani iihaniwa Sikhemi. Nave Sikhemi aahisiveliwa vanceene ni Dina. Muupuweleke wira Sikhemi aari mmiravo ‘oneliwa vatthu n’atthu othene a vatthokoni v’atithi awe’. Masi Sikhemi khamphenta Yehova. — Maphattuwelo 34:18, 19.
14 Okhala wira Sikhemi aahisiveliwa vanceene ni Dina, owo aahipaka ele aaphavela awe ni oona awe okhala yooloka. Tivonto Sikhemi “ahinvara, khumukuxa n’ikuru, khumurupiha, khumuhonona”. (Musome Maphattuwelo 34:1-4.) Etthu ele yoohiloka khahiyo yaamukumihenrye mixankiho Dina paahi, masi emusi awe yotheene. — Maphattuwelo 34:7, 25-31; aGalasia 6:7, 8.
Owehaweha 15/07/2004 epaax. 31 etti. 6
“Mutthu a Ankhili Onnipaka Itthu Mwa Miruku”
Mutthu a ankhili ni orooromeleya onipaka itthu eettihiwaka ni osuwela onooreelihiwa. Salomoni aahimmye so: “Naxariya onnoolya mpakha ovona, masi mutakhali onnivoliwa etala.” (Miruku 13:25) Yehova onnisuwela etthu eri yooloka para hiyo, sikhale myaha sa vatthokoni, sinikhaliherya olipiha ompatthani ahu ni atthu akina, okathi woolaleerya ni okathi ninttaruxiwa ahu. Vaakhala wiira nniimweetteela miruku nimphwanya ahu mbiibiliyani, moohaaniherya nnookhalana okumi wooloka.
Itthu sa Efaita sa Mbiibiliyani
Owehaweha 02/2022 epaax. 13 itti. 15-17
Niireke Miruku Sanyu ‘Sinnitteeliha Murima’?
15 Mwaasuweleke saana anna. Sintoko niwenhe ahu woopaceryani wa mwaha ola, wira nivahe miruku sooreerela, khoniphiyerya paahi osoma soolepa ni omuleela mutthu owo etthu ekhanle awe oopaka. Anna ahaana oweha wira ninnaathokorerya, ni wira ninnisuwela itthu sinaaxankiha nave nimphavela waakhaliherya. (Musome Miruku 27:23.) Axitokweene ahaana wiimananiha okhala apatthani a anna ni arokora.
16 Axitokweene ahaana okhalana ephoole wira ahiwiiriheke anna wuupuwelaka wira anaalavuliha paahi yaaphavelaka waavaha miruku. Vaavo axitokweene anivaanela aya ni anna ni arokora, anniwooniherya wira anniphavela osuwela itthu siniwiiraneela anna awo. Munna mmosa opacenrye khalai orumeela ntoko mutokweene, onihimya so: “Akhala wira nnookhalana yoolema ya ovaanela ni anna, nnoowerya okhala apatthani aya. Nto okathi vanrowa aya oreerelaka waavaha miruku, khivanrowa oxankihaka opaka eyo”. Nave ole nninvaha ahu miruku iyo, vanoomukhweela owiriyana ni weemererya.
17 Mukhaleke mutthu oopixa murima ni oreera murima. Vannireerela oreera murima ni opixa murima, vanceenexa akhala wira mutthu owo onikhaliheriwa khoneemererya miruku sa mBiibiliyani. Mutokweene ohaana okhalana ephoole wira ohaakuveke oveeheya aahiiso onanariwa, akhala wira ole oninvaha awe miruku woopaceryani khoneemererya. Omuhimyaka Yesu, Biibiliya aalavunle so: “Owo khonrowa omala-maliha mutathi woowunteya, khonrowa ottipiha ntthampo nintthuwa mwiixi”. (Math. 12:20) Nto okathi mutokweene oninvekela awe Yehova, woonasa wene pooti onvekela wira omukhaliherye munna owo aahiiso murokora, weemya miruku iyo. Pooti oreerelaka onvaha okathi munna owo wira otthokelele saana miruku iyo ovahiwe awe. Vakhala wira mutokweene onimooniherya opixa murima ni oreera murima, eyo enoomukhaliherya ole ovahiwe miruku weemererya. Ekeekhai wira sihaana okhuma mBiibiliyani.
19-25 YA MAIO
MIHAKHU SINIKHUMA MBIIBILIYANI
Muupuweleke Oratteene Yaakhumelela Ehasara
Owehaweha 02/2023 ipaax. 22-23 itti. 10-12
Nivaheke Efaita Okumi Nivahiwe Ahu ni Muluku
10 Mwa ntakiheryo, ikwaha sikina hiyo khaninsuwela okathi sinrowa aya okhumelela ihasara sa ephattu, iretta sowaakuva wuulaana aahiiso ikhotto. Masi hata vari siiso, okathi itthu iyo siniiraneya aya sookhala itthu sikina nikhanle ahu oopaka wiira noopole okumi ahu. Hiyo nihaana othaama mapuro awo vakhala wiira makhulupale a mulaponi aanivekela aahiiso otthara malakiheryo anrowa aya onivaha. (aRom. 13:1, 5-7) Masi ikwaha sikina vanniweryaneya osuwela okathi enrowa aya okhumelela ehasara. Nto wiira niilokiherye okathi eyo eniiraneya aya, nihaana otthara malakiheryo ninvahiwa ahu ni makhulupale a muttetthe ninkhala ahu. Mwa ntakiheryo, vanooloka okhalana murupa ninrowa ahu ohela itthu sihinaakuva ohononeya, ntoko maasi, mirette ni eyoolya.
11 Ankhi akhala wiira enookhumelela eretta yoowaakuva wuulaana mapuro ninkhala ahu, ninrowa opaka exeeni? Nto eyo yiiraneya nihaana wiiwelela malakiheryo ninvahiwa ahu ni makhulupale ntoko, onyawa, orakamelana, onwara maskara ni ohikhuma mapuro ninkhala ahu. Nave akhala wiira nnootthara malakiheryo awo, nnimooniherya wiira ninnivaha efaita yoovaha ya Muluku, eyo piiyo, okumi.
12 Okathi enikhumelela aya ehasara mootutuxerya, woonasa wene axipatthani ahu, mavisiinyu ahu wala ihapari sa mulaponi, pooti ohimyaka itthu sihikhanle sa ekeekhai. Masi, ohiya okupaliki ‘sothene sinihimeriwa ahu’ onrowa okhala va miruku otthara malakiheryo oororomeleya. (Musome Miruku 14:15.) Nto anna a Nikhuuru Noolamulela ni a ibetheli sa olumwenku wootheene anniimananiha ophwanya malakiheryo oororomeleya ninreerela ahu otthara. Awo annipaka eyo ehinatthi othanla vaareerelaka otthikela mithukumano sa mmulokoni aahiiso muteko woolaleerya. (aHeeb. 13:17) Nto okathi nniiwelela ahu malakiheryo awo, ninniikhapelela hiyo mmansihu ni waakhapelela atthu akina. Ohiya-vo, ninnaakhaliherya atthu akina okhalana moonelo wooloka voohimya sa Anamoona a Yehova. — 1 Ped. 2:12.
Owehaweha 07/2024 epaax. 5 etti. 11
Mulipeke Murima Ntoko Sadoki
11 Vakhala wiira anna ni arokora a mmulokoni sinnaaphwanya mixankiho anipirisari aya okhaliheriwa, ninrowa wooniherya sai okhala oolipa murima ntoko Sadoki? Nnoowerya nittharaka iponto iya sinittharelana: (1) Otthara malakiheryo. Okathi sinikhumela aya itthu soowoopiha, nihaana okhala atthu oowiiraana ni otthara malakiheryo anikhuma oBeteli. (aHeeb. 13:17) Axitokweene ahaana owuupuxerya anna ni arokora malakiheryo a mutthenkeso wa Yehova, anooniherya moota woowiilokiherya ni etthu akhanle aya oopaka sakhumelela ihasara. (1 aKor. 14:33, 40) (2) Mulipeke murima masi ni ephoole. (Mir. 22:3) Muupuweleke muhinatthi opaka etthu. Muhiikumiheryeke ehasara mahala ene. (3) Mmuroromeleke Yehova. Muhiliyale wiira Yehova onnovahani efaita nyuwo ni anna ni arokora. Nto owo onimookhaliheryani wiira nwerye waakhaliherya anna ni arokora moovareleleya.
Itthu sa Efaita sa Mbiibiliyani
Okumi Woohimala yoosoma 35 eponto 2
Moota Woopaka Soothanla Sooloka
Biibiliya onihimya wira: “Mulipa-ànkhili onniwehaweha mwettelo awe wothene”. (Miruku 14:15) Eyo enitaphulela wira muhinatthi opaka yoothanla, muhaana wuupuwela itthu sootheene sinihela muhina yoothanla eyo. Nto okathi munithokorerya anyu yoothanla eyo, mwiikoheke so: ‘Malakiheryo xeeni a mBiibiliyani anivarihana ni mwaha ola? Kiireke yoothanla ela, enookiphwanyiha murettele wa mmuupuweloni? Kiireke yoothanla aka khenrowa waakumiherya mixankiho atthu akina?’ Nikoho nikina na faita munireerela anyu othokorerya tinla: ‘Kiireke yoothanla aka enoomuhakalaliha Yehova?’ — Otumererya 32:29.
Yehova ookhalana ehakhi ya onileela ele eri yooloka ni yoohiloka. Okathi ninsuwela ahu oratteene malamulo ni malakiheryo a Yehova, hiyo ninnimwiiwelela ni ninniixuttiha murima ahu. Murima, etthu niyaraniwe ahu ennisuweliha etthu yooloka ni etthu yoohiloka. (aRoma 2:14, 15) Murima wowiixuttihiwa saana, onoonikhaliherya opaka soothanla sooloka.
26 YA MAIO-1 YA JUNHO
MIHAKHU SINIKHUMA MBIIBILIYANI
Mwaakhaliherye Atthu Akina Wiira Ehakalaleke
Owehaweha 15/11/2010 epaax. 31 etti. 16
‘Nihihiye Okhala Ororomeleya’
16 Yoobi aanisuwela owaakhela saana aleetto. (Yoobi 31:31, 32) Hata nire ene atthu oohaawa, vanniweryaneya okhalana “yoolema ya owaakheela aleetto”. (aRom. 12:13) Nnoowerya okawana itthu vakhaani nirina ahu, nihiliyaka wiira “fataari olya makukhu opuro atthu aniphentana aya, ohiya okhuura enama opuro atthu aninyokhana aya”. (Mir. 15:17) Hata ekhalaka eyoolya vakhaani, olya mwa niphento ni atthu orooromeleya ti vooreeera ni vannilipiha waataana wahu ni Muluku.
Owehaweha 04/2018 ipaax. 23-24 itti. 16-18
Mulipihaneke Mukina ni Mukhwaawe, “Votepa-tho” Olelo
16 Ankhi akhala wira vannoovilani waaleela akina moota muniwoonela anyu? Okhala wene, khahiyo etthu yootepa ovila waalipiha akina. Nyuwo pooti weererya omutheela mutthu. Akhala wira mutthu owo-tho khontheya, musuweleke wira yookhala enimuxankiha, nto mweererye ovaanela ni yena. Nyuwo pooti omulipiha mwaha wonwiriyana paahi. — Yakobo 1:19.
17 Munna mmiravo oniihaniwa Henri aahinyoonyiheya nuumala amusi awe ohiya omurumeela Yehova. Mmosa a yaawo aari tiithi awe, yoowo aarumeela ntoko mutokweene. Vano mutokweene a esirkwiitu, aahoona wira Henri aahiriipiwa murima. Nto aahirowa owurya ekafe hoothe. Mutokweene ole aahinwiriyana saana Henri vaavo aamutthokiherya awe muxankiho awe. Nuumala ovaanela, Henri aahoona wira enamuna emosa yowaakhaliherya amusi awe otthikela wa Yehova, waari ovikaniha okhala oororomeleya. Nave aahilipa nuumala osoma Esalimo 46, Sofoniya 3:17, ni Marko 10:29, 30.
18 Exeeni nikhanle ahu oowiixutta ni yowiiraneya ya Martha ni Henri? Nniixutta wira otheene ahu nnoowerya omulipiha munna ni murokora onitthuneya olipihiwa. Mwene Salomoni olempe wira: “Osuwela wakhula otteliha murima: nulumo nowatta okathi worera ti vareranxe. Maitho òtteliwa annatteliha murima: ihali sorera sinnilipiha [makhuva]”. (Miruku 15:23, 30) Niireke munnimuupuwela mutthu onimusuwela anyu oriipiwe murima aahiiso okhulumunwe? Sai weererya omusomela Owehaweha aahiiso websaite ahu? Nave, Paulo ohimmye wira wiipa hoothe isipo sa Omwene ni mutthu owo pooti omwiiriha okhala saana. Paulo olempe so: “Mwixuttihaneke, mulakiheryaneke n’ankhili othene. Mutthapeleni Muluku: mwipeleni ni murim’anyu wothene mw’eroho isipo ni masalmo òtthapa”. — aKolosi 3:16; Miteko 16:25.
Itthu sa Efaita sa Mbiibiliyani
Waakhuliwa wa Makoho a Mbiibiliyani muru 39 etti. 3
Niireke Makristau Aahaana Weemererya Olooliwa Ni Maameetiku?
2. Kihaana weemererya etthu ya nenli aahiiso yaaneeraaru maameetiku anrowa aya okilela? “Yaatta atthu anvaha miruku”, pooti okhaliherya vanceene otepexa wene vakhala wiira muxankiho wa okumi anyu muulupale. — Miruku 15:22.
2-8 YA JUNHO
MIHAKHU SINIKHUMA MBIIBILIYANI
Makoho Mararu Annikhaliherya Opaka Yoothanla Yooloka
Owehaweha 15/01/2014 ipaax. 19-20 itti. 11-12
Opaka Soothanla Mwa Miruku Okathi wa Omiravo
11 Omurumeela Yehova ti etthu enikumiherya ohakalala wuulupale. (Mir. 16:20) Woonasa wene, Barukhi sekretaario a Yeremiya, aahiliyala mwaha owo. Maana ohaavo okathi mookumini mwawe, ahoona awe oreera omurumeela Yehova. Tivonto Yehova aahimmye so: ‘Nyuwo munniphavela itthu suulupale. Muhiphaveleke-tho itthu iyo. Maana kinimwaruhela ehasara atthu othene, . . . nto kinimopola ekumi anyu, ntoko etthu yoowaakhiwa, opuro othene onirowa anyu’. (Yer. 45:3, 5, Tradução do Novo Mundo) Munoonela sai? Exeeni yaarowa omwiiriha Barukhi ohakalala? Niireke waavya itthu suulupale, wala okhala oororomeleya wa Muluku wira oopowe okathi woopwetexiwa Yerusalemu? — Yak. 1:12.
12 Munna mmosa yoowo ophwannye ohakalala mwaha wowaarumeela akina, ti Ramiro. Owo onihimya so: “Miyo kiyariwe emusi yoohaawa, yaakhala muttetthe mwaamukhaani, myaako sa Andes. Nto okathi yoole muulupale aka aivahenrenrye awe okiliverya wira kasome universidade, kaahoona okhala eparakha yuulupale. Masi kiira kibatiziwene niinano ntoko Namoona a Yehova, ni kaahivahiwa eparakha ekina, pioneero mmosa aahikilattula orowa olaleerya muttetthe mwaamukhaani aakhala awe. Kaahirowa muttetthe ole kiixutta moota woothikila maihi, nto kitthukula opuro wowaamettha atthu wira kiphwanyeke musurukhu woowiikhaliheryano. Vaavo vaivahererya ahu owiixuttiha atthu Biibiliya, atthu anceene yanaakhulela. Muhoolo mwaya kaahirowa muloko waatthukuliwe niinano, yoowo waarumeela nttaava na muttetthe yoole. Vano kinnirumeela mmuteko wa okathi wotheene, etthu yowiiraka iyaakha muloko. Khuuvo muteko mukina waarowa okiphwanyiha ohakalala, ovikana waakhaliherya atthu akina wiixutta ihapari sooreera arumeelaka nttaava naya nooyaraniwa”.
Owehaweha 15/09/2013 epaax. 17 itti. 1-3
Niireke Nyuwo Moorukunuxa Mukhalelo Anyu?
OTHEENE ahu ninnipaka itthu nittharihelaka moota ohuuwale ahu wala opuro oyariwa ahu. Eyo enihela muhina mawarelo ahu; muthinto wa yoolya ennisivela; ni itthu sinikupali ahu. Mwaha wa xeeni? Eyo enniiraneya mwaha wa atthu anikhalana ahu ni makhalelo ahu.
2 Masi, sookhala itthu suulupale sinivikana othanla yoolya wala moota woowara ikuwo. Mwa ntakiheryo, nihiixutta osuwela itthu sooloka sinireerela opaka, ni okhootta itthu soohiloka. Nto, itthu iyo khula mutthu tonithanla, mwa enamuna yoovirikana ni akina. Soothanla sahu pooti wooniherya-tho moota onivara aya muteko yowuupuxerya ya murima ahu. Biibiliya onihimya wira ‘[nnaamwi atthu a mulaponi], ahisuwelaka ikano sa Moise, [awo annipaka itthu attharihelaka] ikano’. (aRom. 2:14) Niireke ela entaphulela wira khanikhanle nlamulo na Muluku nnooniherya mweettelo wooloka, ni wira khula mutthu ohaana otthara makhalelo a opuro onikhala awe wala ayareliwe awe paahi?
3 Aakhala mathowa manli anooniherya wira maKristau khanireerela otthara yoolema eyo. Nthowa noopacerya: Biibiliya onihimya wira ‘Sihavo iphiro sinònahu orera, masi nimmalela wokhwani’. (Mir. 16:25) Okhala wira hiyo atthu oohimalela, khanirina owerya wa osuwela saana moota wowiikhapelela wira nikhumele saana moomalela. (Mir. 28:26; Yer. 10:23) Nthowa na nenli: Biibiliya onnooniherya wira soophavela ni soolema sa mulaponi sinnikumiheriwa ni weettihiwa ni Satana, yoowo ori ‘muluku a vathí-va’. (2 aKor. 4:4; 1 Yoh. 5:19) Nto, akhala wira nimphavela ophentiwa ni oreelihiwa ni Yehova, nihaana wiiwelelaka miruku siri mwa aRoma 12:2. — Mmusome.
Itthu sa Efaita sa Mbiibiliyani
Owehaweha 05/2019 epaax. 24 etti. 13
Muhiwokiwe ni “Osuwela wa Vathí-va”
13 Biibiliya onihimya wira: “Murima wowisona onnaviruxa Apwiya”. (Mir. 16:5) Xeeni Yehova ohinaaphavela awe atthu oowiixinnuwiha? Nthowa nimosa okhala wira atthu awo aniixoona okhala a faita waavikana akina ni annaatumererya atthu akina okhala oowiixinnuwiha ntoko Satana. Nkahaya muupuwele ela: Yesu aahimukhaliherya Yehova opattuxa itthu sotheene sikhanle, masi moowixinnuwiha Satana aaphavela okokhoreliwa ni Yesu! (Math. 4:8, 9; aKol. 1:15, 16) Hata atthu yaale owiitthuna annikupali wira osuwela wa olumwenku ti woololo vamaithoni va Muluku.
9-15 YA JUNHO
MIHAKHU SINIKHUMA MBIIBILIYANI
Mukhaliheke Murettele Mukasamentoni Mwanyu
Nvenye! 09/2014 epaax. 11 etti. 2
Moota Wooxintta Opweha Maathowa Vaamurimani
Mwiivareeryeke mmensinyu moororomeleya. Biibiliya onnooniherya wiira atthu akina ‘toowaakuva onanariwa ni oviruwa’. (Miruku 29:22) Niireke nyuwo muri siiso? Mwiikoheke so: ‘Kinnipweha mathowa vaamurimani? Kinnaakuva oveeheya? Kiireke kookhalana yoolema ya wiiriha mixankiho saamukhaani okhala suulupale?’ Biibiliya onihimya wiira “ole onithipelela olavula mwaha mmosa, onnaavalaanya apatthani ooloka”. (Miruku 17:9; Musuweli 7:9) Etthu emosa-ru pooti wiiraneya mukasamentoni. Nto, vakhala wiira nyuwo munniipweha mathowa vaamurimani, mwiikoheke so: ‘Kiireke kihaana wuncererya opixawaka murima para aiyaka?’ — Maalakiheryo a mbiibiliyani: 1 Pedro 4:8.
Owehaweha 01/05/2008 epaax. 10 itti. 6-11 eponto 1
Ophuka Mixankiho
1. Muthanle okathi wiira mphuke muxankiho owo. “Khula etthu yookhalana emar’aya, . . . Okathi w’omala n’okathi w’olavula”. (Musuweli 3:1, 7) Ntoko yooniheriwa aya mwaha ola, mixankiho sikina pooti omwiiriha mutthu okhalana moonelo woohiloka. Vaakhala wiira eyo enimwiiraneya ni nyuwo, mwiikhapelele ni mmuleele ole muthelanne anyu wiira muhaana wiivahaka okathi ‘woomaala’ muxankiho owo ohinatthi wunnuwa. Nyuwo munoowerya osyaka mixankiho sinceene mukasamentoni mwanyu, vaakhala wiira munootthara miruku sa mbiibiliyani sini: “Opacerya owana-wana onlikana ni ocuula maasi, Mukhume opuro owo atthu ahinatthi opacerya onyakulihana”. — Miruku 17:14.
Nave wookhala “okathi w’olavula”. Mixankiho siri ntoko maalaaxi ammeela mmaatta, yaahiivahiwe ephoole awo pooti wunnuwa. Nto muhuupuweleke wiira mixankiho sinoovira mekhaya. Vakhala wiira munoonvekela okathi ole muthelanne anyu wiira mphuke muxankiho mmosa, mooniherye nttittiimiho muthanlaka okathi onrowa wookhaliheryani ovaanela. Opaka eyo eniimookhaliheryani owanli anyu weetteela malakiheryo a mbiibiliyani ani: “Muhihiye nsuwa nikelaka nlelo munanariwe ene”. (aEefeso 4:26) Okhala wene, nyuwo muhana opaka ele munihimya anyu.
Itthu sa Efaita sa Mbiibiliyani
Owehaweha 06/2023 ipaax. 20-21 etti. 3
Omuttittimiha Yehova Vanceene Onniphwanyiha Itthu Sooreera
3 Etthu yuulupale enniiriha okhapelelaka murima, mwaha woowi Yehova onnitokosa murima ahu. Yehova toovirikana ni apinaatamu maana awo anwerya oweha makhalelo anooneya a mutthu. Masi Yehova onniwerya oweha murima ahu ni osuwela itthu sinuupuwela ahu. (Musome Miruku 17:3.) Akhala wiira nnoosarihaka mmuupuweloni mwahu miruku sa Yehova, owo onoonikhaliherya aka ni onoonivaha okumi woohimala. (Yoh. 4:14) Niira siiso, mweettelo woohiloka ni wootha wa Satana, khonrowa onihaaxa. Mwaha wa xeeni? Mwaha woowi khaninrowa wuupuwelaka itthu soohiloka. (1 Yoh. 5:18, 19) Nihiliyaleke wiira nihiku na Yehova ninnitepa waattamela. Nto, nihaana otepaka omphenta ni omuttittimiha. Ohiya-vo, omphenta wahu vanceene Yehova, onniniiriha okhootta muupuwelo waarowa oniiriha opaka etampi. Okathi nneehereriwa ahu wiira nipake etampi, nihaana wiikohaka so: ‘Kinrowa owerya sai omutthekela Muluku aka yoowo oonihenrye ikwaha sinceene wiira onnikiphenta?’ — 1 Yoh. 4:9, 10.
16-22 YA JUNHO
MIHAKHU SINIKHUMA MBIIBILIYANI
Mwaalipiheke Ale Aniwereyasiwa
Owehaweha 10/2022 epaax. 22 etti. 17
Ankhili Annikhuwela
17 Muupuweleke muhinatthi olavula. Naahiivahe ephoole, pooti okumiherya mixankiho sinceene mwaha wa moolumo ahu. Biibiliya onihimya so: “Okakaruwa mwano tukuthi onvulaliha: nlumi na musuweli ninnivoliha makhwatta”. (Mir. 12:18) Ninnikumiherya murettele vaavo ninsyaka ahu omwarya-mwarya soovonya sa atthu akina. (Mir. 20:19) Wira moolumo ahu akhaleke oolipiha ohiya waakumiheryaka mixankiho atthu akina, murima ahu ohaana okhalana osuwela onikhuma mBiibiliyani. (Luka 6:45) Akhala wira nnimuupuwelelaka ele Biibiliya onihimya awe, moolumo ahu anookhalaka ntoko “maphattuwelo ànkhili” yaawo anaatteeliha murima atthu. — Mir. 18:4.
Owehaweha 04/2020 ipaax. 15-16 itti. 6-7
Nwiriyane, Musuwele ni Mukhalaneke Othunku
6 Wira niwerye waawiriyana oratteene atthu akina, nihaana wiiyeviha ni opixa murima. Vannireerela wiimananiha opaka eyo, mwaha wa mathowa mararu. Noopacerya, khaninrowa waakuvelaka waaphukela aahiiso okhalana moonelo woohiloka voohimya sa atthu akina. Na nenli, nnoosuwela moonelo ni etthu ewiirinhe opaka etthu eyo ni owoonela othunku. Na neeraru, hiyo pooti omukhaliherya mutthu owo wiisuwela. Ikwaha sikina mutthu pooti ohisuwela moonelo awe mpakha ophiya okathi onrowa awe waaleela atthu akina. (Mir. 20:5) Mutokweene mmosa a wÁsia onihimya so: “Kinnuupuwela okathi kaalavunle aka kihinatthi wuupuwela. Ekwaha emosa kaahimuleela murokora mmosa wira aahaana ovaha ikomentaario sooloka mmithukumanoni. Muhoolo mwaya, kaahisuwela wira murokora ole vaanimuxankiha osoma ni aaniimananiha vanceene wira okomentari”. Eyo enooniherya wira khula mutokweene ohaana opacerya “wiwa” saana ohinatthi ovaha miruku! — Mir. 18:13.
7 Anna ni arokora akina, vannaavila ohimya moonelo aya mwaha wa makhalelo aya, soolema, itthu saakhumelenle ni omutthu aya. Ninrowa waakhweiherya sai anna awo onitthukulela murima wira anileele moonelo aya? Muupuweleke enamuna Yehova aamuthokorenrye awe Eliya okathi aatthyawa awe wira ohiiviwe ni Yezabeli. Yaahivira mahiku wira Eliya omuleele Tiithi awe a wiirimu itthu sotheene uupuwela awe. Yehova aahinwiriyana oratteene. Moottharelana Yehova aahimulipiha Eliya ni aahinvaha muteko wootepa otthuneya. (1 Mam. 19:1-18) Mwa enamuna emosaru pooti ovira okathi wira anna ni arokora anileele ele eri vamurimani vaya. Nto okathi anipaka aya eyo nihaana wiimananiha osuwela moonelo aya. Nakhala wira nnoomutakiha Yehova naapixeryaka murima, awo anooniroromelaka. Nto okathi annileela aya moonelo aya, nihaana waawiriyana oratteene.
Owehaweha 01/23 epaax. 14 etti. 3-epaax. 15 etti. 1
Moota Woowaakhaliherya Ale Arina Eretta ya Mmuupuweloni
“Mwaamaaliheke ale ariipiwe murima”. — 1 ATESALOONIKA 5:14.
Woonasa wene mpatthani anyu onnixanka mwaha wa wiixona ohikhalana efaita. Hata muhisuwelaka oratteene etthu yoohimya, nyuwo munowerya omulipiha ni ommaaliha mpatthani anyu mmooniheryaka wiira munnimuthokorerya.
“Mpatthani eekeekhai onniphenta okathi wootheene”. — MIRUKU 17:17.
Mmukhaliheryeke. Ohiya wuupuwelaka wiira munnisuwela moota woomukhaliherya, mmukoheke mmptthani anyu etthu yoopaka. Masi vakhala wiira vannimuxankiha mpatthani anyu ohimya etthu oniphavela awe okhaliheriwa, mweererye ohimya etthu mukhanle anyu ovara hoothe. Nyuwo pooti wiivahererya omukhaliherya othuma itthu omerkaatu, opaka elimpesa owannye awe aahiiso muteko mukina. — aGalasia 6:2.
“Mwaapixeryeke murima”. — 1 ATESALOONIKA 5:14.
Khahiyo wiira mpatthani anyu owo okathi wootheene vanoomusivelaka ovaanela ni nyuwo. Nto, vaavo onikhala awe ootaphuwa ovaanelaka ni nyuwo, mmusuweliheke wiira okathi wootheene munoomukhaheryaka. Mwaha wa oreeta awe mpatthani anyu pooti ohimya aahiiso opaka etthu enrowa woowereyani vanceene. Owo pooti waamaliha apalano mwaapanke anyu hoothe, aahiiso pooti okhala owaakuva onyoonyiwa. Okathi munimukhaliherya anyu, mpixeke murima ni mwiimananiheke wiiwexexa muxankiho awe. — Miruku 18:24.
Itthu sa Efaita sa Mbiibiliyani
Owehaweha 01/2024 epaax. 24 etti. 13
Yehova Onimookhaliheryani Okathi wa Mixankiho
Etthu nikhanle ahu oopaka. Mwiimananiheke wiira muhikhaleke mekhinyu. Akhala wiira nnimwiivalaanya ni atthu akina, yoophavela ahu enrowa okhala paahi owehexexa mixankiho sahu aahiiso itthu sinnikhumelela. Oviriha okathi munceene nuupuwelelaka itthu iyo, pooti oniiriha opaka yoothanla yoohiloka. (Mir. 18:1) Ekeekhai wiira ikwaha sikina ninnipirisari okhala mekhihu, otepexa wene okathi yoowo sinniphwanya aya mixankiho. Nihiliyale wiira atthu awo yoovaha Yehova onirumeela awe wiira onikhaliherye, nto nihiviriheke okathi munceene niri ene mekhihu. Hata ikwaha sikina vavilaka opaka eyo, mweemereryeke okhaliheriwa ni amusi anyu, apatthani aahiiso axitokweene. Mukupaliki wiira eyo enamuna Yehova onirumeela awe wiira ookhaliheryeni. — Mir. 17:17; Yes. 32:1, 2.
23-29 YA JUNHO
MIHAKHU SINIKHUMA MBIIBILIYANI
Mukhale Mpatthani Eekeekhai a Anna ni Arokora
Owehaweha 11/2023 ipaax. 12-13 itti. 16-17
Nihihiye Olipiha Waaphenta Wahu Anna ni Arokora
16 Nihaana owehexexaka itthu sooloka anna ni arokora anivara aya, ohiya ifaalya saya. Nrowe nthokorerye ntakiheryo nla: Nkuupuwelani muri ene ofestani mutthekulaka ni ekhurupu ya anna ni arokora. Wanikisa wa efesta nyuwo munnikumiha efootu ni atthu ootheene nave munnikumiha-tho ifootu piili wiira yakhala emosa ehikhumme saana muranttelihe. Nuumala-vo, munnoona wiira efootu emosa ookhala munna okhumme onanariwe ene. Exeeni munrowa anyu wiiriha efootu eyo? Etthu mukhanle anyu oopaka ottipiha efootu eyo okhala wiira mookhalana sikina, seiyo munna ole aananariwe vamosa ni atthu akina akhumme aya atheyaka.
17 Vano mulikanyihe efootu eyo muhiyale anyu ni miyuupuwelo murina anyu. Moohaanyiherya nyuwo munnuupuwelela itthu sooreera nvirinhe anyu muri ene ni anna ni arokora. Masi okathi owo, woonasa wene munna aahiiso murokora oohimya etthu yoowereyaleni. Exeeni mwaarowa anyu opaka ni muupuwelo owo? Xeeni muhiniimananiha anyu oliyala ntoko mwaattipinhe anyu efootu ele yoohiloka? (Mir. 19:11; aEef. 4:32) Vakhala wiira munimuupuwelelaka okathi wooreera nvirinhe anyu ni munna aahiiso murokora, vanimookhweelani oliyala okathi ole wooxankiha. Nto okathi owo wooreera nvirinhe anyu ni anna ni arokora tonireerela wuupuwelelaka.
Owehaweha 07/2023 ipaax. 9-10 itti. 10-11
Muncererye Omphenta Wanyu Yehova ni Anna ni Arokora
10 Hiyo nave, nihaana waavyaka inamuna sa waakhaliherya anna ni arokora. (aHeeb. 13:16) Nrowe nthokorerye yoowiiraneya ya Anna, nimulavunle ahu mwaha ovinre. Nuumala epheyo yuulupale, murokora Anna ni iyawe, yaahirowa oxukurya emusi emosa ya Anamoona a Yehova. Nuumala ophiya, awo yaahoona wiira empa ya emusi ele, yaahinyaanyiwa vasulu ni epheyo. Nto mwaha waivaavo, emusi ele khiyaarina ikuwo sooloka. Murokora Anna onihimya so: “Naahikuxa ikuwo sa emusi ele, nrowa nakattha naahittikiha siri ene sooreera ni sookhuniwa. Tthiri nne naari nikhaliheryo naamukhaani paahi, masi mwaha waivaavo, hiyo na apatthani a ekeekhai mpakha olelo-va”. Mwaha woowaaphenta anna ni arokora, Anna ni iyawe yaahipaka etthu wiira yaakhaliherye. — 1 Yoh. 3:17, 18.
11 Okathi nnaareerela ahu murima ni nnaathokorerya ahu anna ni arokora, awo annoona wiira ninniimananiha omutakiha Yehova. Woonasa wene, hiyo pooti ohisuwelaka moota awo anivaha aya efaita wiimananiha wahu. Kaila yoowo nimulavunle ahu ittima sivinre onniwuupuwelela ale yaamukhalihenrye. Owo onihimya so: “Kinnaaxukhurela vanceene arokora yaawo yaakikuxa arowaka muteko woolaleerya. Awo yaanikirweela owaani, yaanikilattula wiira nalye hoothe ni yaanikittikiherya owaani moovareleleya. Olelo-va, kinnoona wiira tthiri ole waari muteko muulupale arokora ale yaavara aya. Nave awo yaanipaka itthu sootheene mwa niphento”. Ekeekhai wiira khahiyo atthu ootheene nnaakhaliherya ahu anoonixukhurelaka. Kaila olavulaka sa ale yaamukhalihenrye onihimya so: “Miyo kaaniphavela waaxukhurela ootheene ale yaakireerenle murima, masi nkinsuwela mapuro anikhala aya. Masi Yehova onnisuwela mapuro anikhala aya. Nnaamwi kihiweryaka waakhaliherya kinninvekela yena wiira aakhaliherye”. Kaila onihimya ekeekhai. Yehova onnisuwela khula etthu nimpaka ahu wiira naakhaliherye atthu akina hata ekhalaka yaamukhaani. Tthiri owo, onnivaha efaita wiimananiha wahu, nave onithokorerya ntoko etthu nimukophinhe ahu wiira onilive muhoolo. — Musome Miruku 19:17.
Owehaweha 11/2022 epaax. 19 itti. 6-7
Muhihiye Wooniheryana Ophenta Wekeekhai
6 Nkahaya mmuupuwele mutthu onivara muteko empresa emosa mwa iyaakha sinceene, nave namuteko oororomeleya. Iyaakha sotheene ovirinhe awe ori ene empresa ele, owo khonavaanele ni mapatarau awe. Nave khahiyo wira okathi wotheene sammusivela soothanla sa mapatarau awe. Nto nnaamwi ohisiveliwaka ni empresa ele, owo onnihakalala okhalana muteko onimpwanyiha musurukhu. Owo khonrowa ohiya ovara muteko ole mpakha oreformari aahiiso ophwanya muteko mukina wooloka.
7 Ntoko niwenhe ahu ettima 6, wookhala ovirikana eriyari ya ororomeleya ni ophenta wekeekhai. Maana ophenta wekeekhai onitaphulela itthu sinimwiiriha mutthu wooniherya ophenta wekeekhai. Etthu xeeni yaawiiriha arumeyi a Muluku a khalai wooniherya ophenta wekeekhai? Awo yaanooniherya ophenta wekeekhai ohiya mwaha wa okhanyereriwa, masi mwaha woowi yaaniphavela ni murima aya wootheene. Nwehe ntakiheryo na Davidi. Owo aaniphavela ni murima wotheene omooniherya ophenta wekeekhai mpatthani awe iihaniwa Yonathani, hata okathi yoole paapa awe Yonathani aaphavela awe omwiiva Davidi. Nto muhoolo mwaya Yonathani aahikhwa. Nuumala Yonathani okhwa, Davidi khaahiyale omooniherya ophenta wekeekhai mwaana a Yonathani iihaniwa Mefiboxethi. — 1 Sam. 20:9, 14, 15; 2 Sam. 4:4; 8:15; 9:1, 6, 7.
Itthu sa Efaita sa Mbiibiliyani
Perspicaz vol. 1 epaax. 549
Miruku, Mulipa-oovaha Miruku
Yehova tori mwaneene osuwela wootheene ni woomalela. Yena paahi toohinipirisari ovahiwa miruku. (Yes 40:13; aRo 11:34) Mwaana awe tori “Namiruku òthamaleya”, yoowo onnivaha malakiheryo ni onneettiha okhala wiira aakhenle miruku iyo wa Tiithi awe ni okhalana munepa wa Muluku. (Yes 9:5; 11:2; Yoh 5:19, 30) Eyo enoniherya wiira, vakhala wiira nimphavela ovaha miruku sooloka ni waakhela miruku sooloka nihaana toko omuupuwela Yehova. Miruku sinivirikanya malamulo a Muluku, khasirina efaita. Iyo khahiyo miruku. — Mir 19:21; 21:30.
30 YA JUNHO-6 YA JULHO
MIHAKHU SINIKHUMA MBIIBILIYANI
Itthu Sinrowa Waakhaliherya Ale Aninamorari Opaka Yoothanla Yooloka
Owehaweha 05/2024 ipaax. 26-27 itti. 3-4
Enamuna ya Onamorari Eninvuwiha Yehova
3 Nnaamwi okathi makristau aninamorari aya ori ene woohakalaliha, masi awo ahaana ovarerya saana maana nlo nivalo nuulupale nikhanle oowiiriha othelana. Nihiku anithelana aya, awo annimuleiherya Yehova wiira anrowa ophentanaka ni ottittimihana mukina ni mukhwaawe okumi aya wootheene. Nto nihinatthi oleiherya khula etthu, nihaana wuupuwela saana. (Musome Miruku 20:25.) Nave eyo, enihela muhina yooleiherya ya othelana. Yoolakela ya onamorari, ori osuwelana oratteene mukina ni mukhwaawe wiira apake yoothanla yooloka. Ikwaha sikina, yoothanla eyo pooti okhala othelana aahiiso omala-maliha onamorari iwo. Nto akhala wiira makristau annithanla omala-maliha onamorari waya, eyo khentaphulela wiira onamorari waya khokhumenle saana. Masi eyo entaphulela wiira aamaleliha yoolakela ya onamorari, eyo piiyo, opaka yoothanla yooloka.
4 Xeeni vari aya vooloka osuwela saana yoolakela ya onamorari? Mukristau oohithela aahiiso oohitheliwa orina moonelo wooloka, khokhanle oonamorari ohiphavelaka othelana. Masi khahiyo moonelo owo wooloka anireerela okhalana paahi makristau oohithela aahiiso oohitheliwa. Ootheene ahu, nihaana wuupuwelela yoolakela ya onamorari. Mwa ntakiheryo, atthu akina anuupuwela wiira makristau yaanamorariki, awo ahaana othelana. Ankhi makristau oohithela aahiiso oohitheliwa, anoonela sai muupuwelo owo? Murokora mmosa oohitheliwa onikhala wEstados Unidos, oniitthaniwa Melissa, onihimya so: “Eyo enniwiiriha Anamoona a Yehova anceene aninamorari othelana mwaha wookhanyereriwa, nnaamwi onamorari waya ohikhumelaka saana. Nave eyo enniwiiriha makristau ahinnamorari ohiphavela-tho. Nto eyo enniwiiriha atthu akina oxankiheya”.
Owehaweha 05/2024 epaax. 22 etti. 8
Moota Woomuthanla Mwa Miruku Ole Munrowa Anyu Othelana
8 Munrowa owerya sai omusuwela saana ole oosivenleni masi yena moohisuwela? Munoowerya osuwela waataana orina awe ni Yehova, mikhalelo sawe ni mweettelo awe, okathi wa mithukumano sa mmulokoni aahiiso mithukumano sikina. Mwa ntakiheryo, munoosuwela tani ari apatthani awe, ni itthu xeeni sinilavula awe. (Luka 6:45) Niireke soolukama sawe sinoolikana ni sawinyu? Nyuwo pooti waakoha axitokweene a muloko awe aahiiso anna ni arokora akina arina waataana wooloka ni Yehova animusuwela oratteene. (Mir. 20:18) Nyuwo pooti okoha voohimya sa mikhalelo sawe ni mweettelo awe. (Rut. 2:11) Okathi munimusuwela anyu ole oosivenleni, musyakeke omunyoonyiha aahiiso omuriipiha murima. Muttittimiheke miyoonelo sawe ni muhiviriheke okathi munceene muri ene ni mutthu owo, mphavelaka osuwela itthu sootheene mpakha ommala-maliha.
Owehaweha 05/2024 epaax. 28 itti. 7-8
Enamuna ya Onamorari Eninvuwiha Yehova
7 Munrowa owerya sai osuwela mikhalelo sa mutthu owo? Enamuna emosa mukhanle anyu oosuwela, ori omukohaka itthu muniphavela anyu osuwela ni owiriyana ni ephoole moota onaakhula awe. (Mir. 20:5; Yak. 1:19) Wiira eyo yiiraneye, nyuwo muhaana ohaavya miteko mukhanle anyu oovaraka hoothe, sinrowa wookhaliheryani ovaanela, ntoko olya hoothe, opasiyari mapuro oowaatta atthu ni okhuma hoothe muteko woolaleerya. Nave etthu ekina enrowa wookhaliheryani osuwelana, ori oviriha okathi muri ene ni amusi ni apatthani. Nave nyuwo pooti ompaka palano a ovara etthu enrowa omukhaliherya ole oninamorari ni nyuwo, opaka itthu mwa inamuna soovirikana ni atthu a makhalelo oovirikana. Nrowe nthokorerye etthu Aschwin yoowo onikhala elapo ya Holanda, aapanke awe, okathi aanamorari awe ni Alicia. Owo onihimya so: “Naanithanla miteko naakhanle ahu oovara hoothe, saanikhaliherya osuwelana mukina ni mukhwaawe. Miteko iyo saakhala saamukhaani ntoko olokiherya yoolya ni miteko sikina sa vate. Opaka eyo yaaninikhaliherya osuwela mikhalelo sa khula mmosa ni ifaalya sawe”.
8 Nave nyuwo munoosuwelana oratteene akhala wiira munoomusomaka Biibiliya hoothe. Nuumala othelana, muhaana opaka eprokrama ya omulompa Muluku vatthokoni, okhala wiira muhaana omuhela Yehova nipuro noopacerya mukasamentoni mwanyu. (Mus. 4:12) Nto ti vooloka opacerya niinaano-va muninamorari anyu, omusoma Biibiliya hoothe. Ekeekhai wiira ale aninamorari, khahiyo anamathelana nto mulopwana khahiyo muhooleli a muthiyana owo. Akhala wiira khamunihiya omusoma Biibiliya hoothe, eyo enimookhaliheryani osuwela moota waataana wawe ni Yehova ori aya, ole oninamorari ni nyuwo. Max ni Laysa, anamathelana yaawo anikhala wEstados Unidos, aawerya osuwela etthu ekina eniphwanyiha mureerelo. Max onihimya so: “Okhuma wanipacerya wa onamorari wahu, hiyo naanisoma iliivuru sinimutthokiherya Biibiliya sirina myaha saalavula voohimya sa onamorari, ekasamento ni okumi wa vatthokoni. Nto osoma iliivuru iyo, saaninikhaliherya oovaanela myaha sa faita, saakhanle oonixankiha opaceriha oovaanela”.
Itthu sa Efaita sa Mbiibiliyani
Owehaweha 03/2016 epaax. 5 itti. 4-5
Nyuwo Amiravo, Moolikana Wira Mbatiziwe?
4 Biibiliya khonihimya wira aniphwanela obatiziwa ti yaale yinnuwale wala arina iyaakha sinireerela obatiziwa. Miruku 20:11, ninsoma so: “Mwanamwane onsuwanyeya ni sowira sawe, mwettelo awe wakhalá worera ni wa xariya”. Hata mwaana pooti osuwela etthu eri yooloka ni osuwela ele enitaphulela aya wiivahererya wa Mpattuxa awe. Tivonto, mmiravo onooniherya wira ohinnuwa momunepani ni iivaherenrye wa Yehova, onnoona wira obatizo etthu yootthuneya. — Mir. 20:7.
5 Onitaphulela exeeni wunnuwa momunepani? Khonitaphulela wunnuwa erutthu paahi. Biibiliya onihimya wira atthu oowunnuwa momunepani “ahalimaleliha ankhili aya osuwela n’uthanla sorera ni sotakhala”. (aHéb. 5:14) Nto, atthu oowunnuwa momunepani annisuwela ele Yehova enoona awe okhala yooloka, ni annilakela ovara yeeyo ni murima wotheene. Tivonto, khanaakuva ohapuxiwa wira apakeke itthu soohiloka; hata khanimakela otumereriwa opaka itthu sooloka. Atthu annilipelela wira mmiravo oniphavela obatiziwa ohaana wiiwelela malamulo a Muluku, hata anamuyari awe wala atthu akina ahikhanle vakhiviru. — Mulikanyihe ni aFilipi 2:12.