Onanariwa Pooti Omwiiriha Mutthu Opaka Itthu Sootakhala

Nuumala Adamu ni Eva woomoliwa ojardim ya wEdeni, awo yaahikhalana anamwane anceene. Mwaana oopacerya aari Kayini, nto muteko awe waari olima. Vano a nenli aari Abeli, muteko awe waari okukhula inama.

Nihiku nimosa, Kayini ni Abeli yaahinvaha mikuttho Yehova. Nyuwo munnisuwela mukuttho exeeni? Eri etthu yooreera yeeyo mutthu oninvaha awe Muluku. Yehova aahihakalala ni mukuttho wa Abeli, masi khaasiveliwe ni mukuttho wa Kayini. Eyo yaahimwiiriha Kayini onanariwa vanceene. Yehova aahimulopola Kayini wira onanariwa wawe wammwiiriha opaka etthu yoohiloka. Masi Kayini khaamwiiwelenle Muluku.

Nihiku nimosa, Kayini aahimwiirela Abeli wira: ‘Nrowe mukihoole omatta’. Nto vaavo yaari aya mekhaya, Kayini aahimmana Abeli mpakha omwiiva. Exeeni Yehova aapanke awe? Yehova aahimuhukhumu Kayini, khumoomola wira akhaleke elapo ekina. Kayini kheemiheriwe otthikela-tho elapo awe.

Exeeni eniixutta ahu? Hiyo pooti opacerya onanariwa akhala wira itthu khasineetta ntoko nuupuwela ahu. Noona wira noopacerya onanariwa, wala akhala wira atthu akina anninlopola mwaha wa onanariwa wahu, nihaana olokiherya muupuwelo ahu moohipisa, nihinatthi opaka etthu yoohiloka.

Okhala wira Abeli aanimphenta Yehova ni aanipaka itthu sooreera, Yehova khonrowa omuliyala. Muluku onirowa omuhihimuxa Abeli vaavo elapo enrowa aya okhala eparayiisu.