Anamoona a Yehova Anoonela Sai Masikho?
Moota nimpaka ahu masikho ni nnoonela ahu mwaha ola. Hiyo nimpaka eyo nittharaka etthu Biibiliya enihimya awe. Nlavulaka sa mwaha ola, Biibiliya onihimya wiira:
Khahiyo voottheka oriipiwa murima okathi onikhwa awe mutthu namphenta ahu. Mwa ntakiheryo, awiixutti a Yesu yaahinla ni yaahiriipiwa murima, okathi yaakhwiiye aya atthu yaaphenta aya. (Yohani 11:33-35, 38; Miteko 8:2; 9:39) Tivonto, hiyo anamoona a Yehova khannoona wiira okathi owo wa osikha nihaana othweela wala olavula iperwa. (Musuweli 3:1, 4; 7:1-4) Masi, ninnoona okhala okathi para wooniherya wiira ninniwoonela othunku ale akhweliwe. Nave ninnoona okhala vooreerela owooniherya atthu awo wiira ninnaaphenta, ni ninniphavela waamaaliha ni waalipiha. — aRoma 12:15.
Atthu akhwiiye khansuwela etthu, nnakhala vakhaani. Moohicikha sa opuro oyariwa ahu aahiiso makhalelo ahu, hiyo khanintthara soolema aahiiso itthu atthu akina anikupali aya, seiyo sinooniherya wiira atthu awo anikupali wiira alipa-ookhwa annisuwela etthu wala pooti onikhaliherya. (Musuweli 9:5, 6, 10) Itthu iyo sinihela muhina, opaka ifesta niphavelaka omuttittimiha ole okhwiiye, wala waavaha mukuttho alipa-ookhwa, aahiiso ovaanela ni atthu awo, nnakhala waavekela nikhaliheryo ni opaka esatakha para ale akhweliwe. Hiyo khanimpaka itthu iyo, okhala wiira ninniiwelela yooruma eri Mbiibiliyani, yoowi: “Mukhume eriyari aya, nvalaane naawo, ni muhiye ovara itthu soonanara”. — 2 aKorinto 6:17.
Niireke ale akhwiiye annilipelela etthu? Biibiliya oniixuttiha wiira ohoolo, atthu akhwiiye anrowa ohihimuxiwa ni khuuvo onrowa okhwaaka okathi owo. (Miteko 24:15; Wiisuupulula 21:4) Ntoko siisaale olipelela ohihimuxiwa waakhalihenrye aya makristau avinre, olelo-va, onninikhaliherya wiira nihitepeke oriipiwa murima, nnakhala otthara soolema sihinimusivela Muluku. — 1 aTesaloonika 4:13.
Khannipaka masikho niphavelaka ohimmwa. (Miruku 11:2) Hiyo khannoona wiira okathi wa masikho, nihaana wooniherya wiira na mutthu orina musurukhu munceene. (1 Yohani 2:16) Tivo, masikho ahu khanikhala a musurukhu munceene, yaawo atthu anipaka aya aphavelaka wooniherya paahi. Nave-tho, khaninthuma ikaxau sa musurukhu munceene aahiiso khaninwara ikuwo sa musurukhu munceene niphavelaka wooniwa paahi.
Nlavulaka sa masikho, nihimukhanyereryeke mutthu weemererya itthu sinikupali ahu. Ohimya ekeekhai, hiyo nintthara miruku sini: “Khula mmosa a hiyo onrowa waakhula ohoolo wa Muluku”. (aRoma 14:12) Masi, okathi vanireerela aya olavula, hiyo ninneererya omutthokiherya mutthu itthu ninkupali ahu “vooreerela murima, ni nttittimiho”. —1 Pedru 3:15.
Anamoona a Yehova anipaka sai masikho aya?
Opuro: Akhala wiira emusi ekhweliwe enoothanla opaka masikho, pooti opaka opuro onoona aya oreerela. Mwa ntakiheryo, pooti okhala Empa ya Omwene, opuro okhwiiye awe mutthu owo aahiiso vatthokoni, opuro onipahiwa aya aahiiso omahiye.
Moota eniiraneya aya: Para waamaaliha apatthani ni amusi, onnipakiwa mwaha yoowo onitthokiherya etthu Biibiliya onihimya awe sa alipa-ookhwa ni nlipelelo na ohihimuxiwa. (Yohani 11:25; aRoma 5:12; 2 Pedru 3:13) Pooti wiira okathi onilavuliwa aya mwaha, sinoottittimiheriwa mikhalelo aarina awe mutthu owo okhwiiye. Nave pooti ohimmwa etthu eniixutta ahu ni waamini aarina awe. —2 Samuweli 1:17-27.
Nave ninniipiwa nsipo ninvarihana ni Biibiliya. (aKolosi 3:16) Wanikisa waya, ninnipakiwa nivekelo para waamaaliha atthu ari opuro owo. — aFilipi 4:6, 7.
Ovaha musurukhu: Hiyo khaninveka musurukhu mwaha wa mutthu onrowa olavula moolumo a Muluku, ohela muhina masikho anipakiwa. Nave-tho, okathi ninthukumana ahu empa ya Omwene, hiyo khaninveka musurukhu. — Matheyo 10:8.
Ti pani okhanle oorowa? Atthu ahikhanle Anamoona a Yehova pooti orowa okathi Anamoona anipaka aya mwaha wa masikho Empa ya Omwene. Ntoko siniiraneya aya ni mithukumano sahu, nave masikho ahu annirowa atthu ootheene.
Niireke Anamoona a Yehova annirowa masikho anipahiwa ni atthu a itiini sikina?
Khula Namoona a Yehova, ohaana othanla orowa aahiiso ohirowa, orumeelaka murima awe wiixuttihiwe ni Biibiliya. (1 Timootheyo 1:19) Masi hiyo khanniirela mpantta masikho anipakiwa, yaawo ahinivarihana ni Biibiliya. —2 aKorinto 6:14-17.