Niireke Anamoona a Yehova Aakhalana Ireekera Saya sa Onamorari?

Anamoona a Yehova, annikupali wiira Biibiliya pooti waakhaliherya opaka soothanla sooloka sikhanle oowaakhaliherya ni sinrowa omuhakalaliha Muluku. (Yesaya 48:17, 18) Hiyo khaninkumiherya malamulo ahu, masi nniimananiha otthara ele Biibiliya onihimya awe. Nrowe niwehe moota malamulo ni malakiheryo awo anivarihana aya ni onamorari.a

• Ekasamento ti ya mahiku ootheene. (Matheyo 19:6) Anamoona a Yehova anniweha onamorari ntoko nivalo para ekasamento. Nto awo annithokorerya onamorari ntoko etthu yuulupale.

• Atthu anireerela onamorari, taale arina iyaakha sinireerela othela wala otheliwa. Mutthu ohaana “ovira iyaakha sa omiravo”, okhala wiira okathi yoowo mutthu onitepa awe ophavela orupihana. — 1 aKorinto 7:36.

• Mutthu oninamorari, ohaana okhala ootaphuwa para othela wala otheliwa. Atthu akina pooti okhala ootaphuwa para omwalana ni othela vasya nnaamwi ahiraruweliwe. Masi moonelo wa Muluku ti woovirikana. Biibiliya onniweemererya anamathelana omwalana, akhala wiira mmosa a yaawo, onoomuraruwela mukhwaawe. — Matheyo 19:9.

• Biibiliya onihimya wiira mukristau ohaana othela wala otheliwa, mwa Apwiya paahi. (1 aKorinto 7:39) Anamoona a Yehova annikupali wiira malamulo ala khanimuhimya paahi mutthu onittittimiha sookupali sahu, masi animuhimya mutthu onikhala moovarihana ni malamulo awo ni ori Namoona a Yehova oopatisiwa. (2 aKorinto 6:14) Okhuma khalai, Muluku onnaatumererya arumeyi awe, wiira athelaneke ni mutthu orina aya waamini omosa-ru. (Maphattuwelo 24:3; Malakiya 2:11) Anamatokosa ahoona wiira yooruma ela, ennivareleya muteko.b

• Anamwane ahaana owiiwelela anamuyari aya. (Miruku 1:8; aKolosi 3:20) Anamwane ahaana wiiwelela soothanla sa anamuyari aya voohimya sa onamorari. Eyo enihela muhina iyaakha akhanle aya oopacerya onamorari ni itthu akhanle aya oopaka okathi aninamorari aya.

• Anamoona a Yehova aakhalana otaphuwa wa ophavela onamorari aahiiso nnaari. Nave awo pooti omuthanla mutthu onaasivela. Okathi anipaka aya eyo, khaniliyala malakiheryo a mbiibiliyani yaawo ani: “Khula mutthu onrowa oteexa muritti awe”. (aKalaasia 6:5) Nave akina annaavekela miruku apatthani aya yaawo ari Anamoona a Yehova ni anisuwela itthu sinceene voohimya sa mwaha owo. — Miruku 1:5.

• Itthu sinceene atthu anipaka aya okathi aninamorari aya seiyo sinikhala ntoko itthu sooloka, itampi suulupale. Mwa ntakiheryo, Biibiliya onnitumererya otthyawa orupihana woohiloka. Ohiya orupihana woohiloka paahi, nave-tho nihaana osyaka ovarakasa enoka ya mutthu mukina aahiiso orupihana mwaano wala waamakhuttu. (1 aKorinto 6:9-11) Akhala wiira atthu aninamorari annivarakasana mpakha ophavela orupihana, awo annipaka etthu “yoonanara ” yeeyo ehinimusivela Muluku. (aKalaasia 5:19-21) Nave Biibiliya onnikhoottiha ‘olavula itthu soowuuliha muru’. — aKolosi 3:8.

• Murima woototha. (Yeremiya 17:9) Owo pooti oniiriha opaka itthu seiye ninsuwela ahu wiira ti soohiloka. Wiira murima aya ohaawoke, atthu akina aninamorari, annisyaka okhala mekhaya opuro yaakhanle aya oopaka etthu yoohireerela. Awo annikhalana ephoole yaathanlaka atthu akhanle oowaahoola mikwaha saya. (Miruku 28:26) Mukristau yoowo oniphavela othela, onnisuwela ephoole onireerela awe okhalana ni isaiti sinirumeeliwa para opaceriha onamorari. Nave owo onnisyaka opatthana ni atthu ohinaasuwela awe saana — Esaalimu 26:4.