OVAANELA VOOHIMYA SA BIIBILIYA

Omwene wa Muluku Opacenrye Silini Olamulela?​—Mpantta 1

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyihe wira Namoona mmosa oniitthaniwa Antoonio oophiya owannyawe mulopwana oniihaniwa Tomaas.

“MPHAVELEKE” WIIWEXEXA

Antoonio: Nkahaya ihaali atokweene? Miyo okisivela omusoma Biibiliya ni nyuwo.a Mukwaha wookiserya naavaanenle ahu, munnuupuwela wira mwaahikoha etthu voohimya sa Omwene wa Muluku? Nyuwo mwiirale wira mwaaphavela osuwela nthowa naya Anamoona Yehova anikupali aya wira Omwene wa Muluku opacenrye olamulela eyaakha ya 1914.

Tomaas: Salaama. Tthiri, ehaavo erevista anyu kisomme aka, enihimya wira Omwene wa Muluku opacenrye olamulela 1914. Tivonto kiniphavela aka osuwela nthowa naya, maana nyuwo munihimya wira sookupali sanyu sotheene sinikhuma mBiibiliyani.

Antoonio: Vaareera.

Tomaas: Miyo koomusoma Biibiliya otheene. Masi nkoonale etthu enilavula sa 1914. Nto kaahimphavela Biibiliya a Interneti wira kitokose mwaha ola, masi khuhiphwanya etthu.

Antoonio: Kinnoottottopelani mwaha wa itthu piili. Yoopacerya: Nyuwo moomusoma Biibiliya otheene. Kinoona wira munniphenta Nuulumo na Muluku.

Tomaas: Aayo okisivela. Khiivo eliivuru enilikana ni Biibiliya.

Antoonio: Ekeekhai. Etthu ya nenli eniphavela aka woottottopelani mwaha woomurumeela Biibiliya wira mphwanye waakhuliwa wa nikoho nanyu. Nyuwo moopaka yeele Biibiliya onnitumererya awe, eyo piiyo: ‘Ophavelasa’ wiiwexexa.b Wiimananiha wanyu etthu yooreera.

Tomaas: Kooxukhurela. Miyo kiniphavela ovikaniha wiixutta. Tthiri, kaahivikaniha otokosa mwaha ola nto khuphwanyaka muhina mwa eliivuru ela enisoma ahu epantte enilavula sa 1914. Kinoona wira yaalavula sa mwene aalohenrye mwiri muulupale yoowo waikitthiwe, nto khutthikelaka ophuwa.

Antoonio: Aah, kihuupuwela. Eprofesia eyo eniphwanyaneya eliivuru ya Daniyeli ekapiitulu 4. Enilavula sa oloha wa Mwene oBabilonia, Nabukhodonosori.

Tomaas: Ti yeeyo tthiri. Koosoma eprofesia eyo ikwaha sinceene. Masi, nkinoona ovarihana waya ni Omwene wa Muluku wala eyaakha ya 1914.

Antoonio: Moosuwela, hata profeta Daniyeli khaiwexexa saana itthu sotheene saarummwa awe ni Muluku wira olepe!

Tomaas: Ekeekhai?

Antoonio: Aayo. Moone ele aalempe awe va Daniyeli 12:8: “Miyo kahìwa molumo awo, masi nkasuwela sahimyaya”.

Tomaas: Eversiikulu ela yookilipiha.

Antoonio: Daniyeli khaasuwela saana moolumo otheene aalepa awe, okhala wira khiwaaphiyale okathi wa Muluku wira apinaatamu yiiwexexe iprofesia sa Daniyeli. Masi vano, woophiya okathi aya.

Tomaas: Munsuwela sai?

Antoonio: Moone eversiikulu enittharelana. Daniyeli 12:9 onihimya so: ‘Molumo ala animwipitheya mpakha okathi wokiserya’. Eyo enooniherya wira iprofesia iya saarowa wiiwexexiwa muhoolo, eyo piiyo, “okathi wokiserya”. Nave, iprofesia sotheene sinnooniherya wira ninkhala okathi yoowo. Masi muhixanke. Muhoolo yoosoma ahu yeela enoonikhaliherya wiiwexexa mwaha owo.c

Tomaas: Xontte, mukikhaliherye wiiwexexa eprofesia ela.

Antoonio: Aayo, kinoomananiha.

OLOHA WA NABUKHODONOSORI

Antoonio: Wira nipacerye, niwehe toko ele Mwene Nabukhodonosori aalonhe awe. Nuumala-vo, nilavuleke sa yootaphulela aya.

Tomaas: Kihiiwa.

Antoonio: Nabukhodonosori aahiloherya mwiri muulupale yoowo iritta saya saaphiya wiirimu. Moottharelana owo aahiiwa yooruma yaakhuma wiirimu yaahimya wira mwiri ole waahaana wiikitthiwa, masi iritta saya saahaana oriheliwa ota. Nuuvira “iyakha thanu na pili” mwiri ole waamutthikela ophuwa.d ABiibiliya akina nuulumo nla noowi “iyakha thanu na pili”, nitaphuleliwe okhala ‘imaara thanu na piili’. Wanipacerya, eprofesia ela yaamuhimya Mwene Nabukhodonosori. Nnaamwi aari mwene oowerya ntoko mwiri waaphiya wiirimu, Nabukhodonosori aahiikitthiwa olamulelo mwa ‘imaara thanu na piili. Nyuwo munnisuwela ele yaakhumelenle?

Tomaas: Nnaari.

Antoonio: Biibiliya onihimya wira Nabukhodonosori aanilya malaxi ntoko enama mpakha iyaakha 7. Okathi owo, mwene ole khaawerya olamulela. Masi, wanikisa wa iyaakha iya 7, Nabukhodonosori aahihiya olya malaxi nto khutthikela olamulela.e

Tomaas: Kinniiwa enihimya anyu. Masi, eprofesia ela enivarihana sai ni Omwene wa Muluku wala eyaakha ya 1914?

Antoonio: Kinoomananiha otthokiherya. Eprofesia ela enniiraneya ipantte piili. Yoopacerya, yiiranen’ye okathi Nabukhodonosori aahiihiwa awe olamulela. Ya nenli, yiiranen’ye okathi Omwene wa Muluku aahiyale awe olamulela mwa okathi vakhaani. Nto epantte ya nenli ya eprofesia ela, tenivarihana ni Omwene wa Muluku.

Tomaas: Munisuwela sai?

Antoonio: Eprofesia ya Daniyeli enniiwanyeiha mwaha owo. Moovarihana ni Daniyeli 4:14, eprofesia eyo yaahilempwa wira “atthu othene esuwele wira Muluku a wirimu onniruma omwene wothene wa mulaponi: Muluku onnavaha omwene ale anatthunawe”. Kiira muhoona nuulumo nla noowi “onniruma omwene wothene wa mulaponi”?

Tomaas: Aayo, kinoona wira onihimmwa ‘Muluku a wirimu yoowo oniruma omwene wothene wa mulaponi’.

Antoonio: Ekeekhai. ABiibiliya akina nuulumo nla noowi “Muluku a wirimu”, nitaphuleliwe okhala ‘a Vasuluxa’. Nto ti pani onihimmwa okhala ‘a Vasuluxa’?

Tomaas: Kinoona wira onihimmwa Muluku Mpattuxa.

Antoonio: Muhaakhula saana. Tthiri eveersu ela ennooniherya wira eprofesia eyo khiyaamuhimya Nabukhodonosori paahi. Masi, onniheliwa muhina Muluku a wiirimu yoowo ‘oniruma omwene wothene wa mulaponi’. Eyo etthu yookhalela akhala wira ninnitokosa saana eprofesia yotheene.

Tomaas: Nto eyo ennikitikiniha. Muniphavela ohimyani?

MWAHA MUULUPALE A ELIIVURU YA DANIYELI

Antoonio: Eliivuru ya Daniyeli enniromola Omwene wa Muluku ikwaha sinci. Eyo ennilavula sa okathi Omwene wa Muluku waarowa aya opacerya olamulela weettihiwaka ni Mwanawe, Yesu. Mwa ntakiheryo, nrowe nitthikele ottuli vakhaani wira niwehe ikapiitulu sikina. Xontte, mmusome Daniyeli 2:44.

Tomaas: Khiva mwaha. Onihimya so: “Mahiku òmwene owo, Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”.

Antoonio: Kooxukhurela. Kiireke eveersu ela ennivarihana ni Omwene wa Muluku?

Tomaas: Hmm, woonasa wene.

Antoonio: Moone wira eversiikulu ela enihimya wira Omwene ola “onrowa okhalaka wa mahiku othene”. Moohaaniherya, Omwene onihimmwa-va ti Omwene wa Muluku, ohiya eguvernu ya apinaatamu, kiira?

Tomaas: Kinoona wira aayo.

Antoonio: Ehaavo-tho eprofesia ekina enilavula sa Omwene wa Muluku. Eniphwanyaneya va Daniyeli 7:13, 14. Elavulaka sa mwene aya, eprofesia eyo eni: Owo “òvahiwa owerya n’uttittimihiwa n’umwene: atthu a ilapo sothene ni a maloko othene ni a ilavulelo sothene yanimurumela. Owerya wawe khunimala, khanakhiwa: omwene awe khunipwetexiwa-tho”. Niireke ehaavo etthu eromoliwe-va enivarihana ni eversiikulu esomme ahu ottuli?

Tomaas: Aayo, onniromoliwa omwene.

Antoonio: Ekeekhai. Nave ola omwene wa vameekhaaya. Daniyeli onihimya wira Mwene aya aarowa waalamulelaka “atthu a ilapo sothene ni a maloko othene ni a ilavulelo sothene”. Mmasu makina, Omwene ola waarowa weettihaka olumwenku wotheene.

Tomaas: Moosuwela, mi nkaasuwela ele yaataphulela aya yoolepa ela, masi vano enniiweya.

Antoonio: Eprofesia ya Daniyeli yoomuromola Mwene aya. Ehimyale wira ‘owerya wawe khunimala, khonakhiwa: omwene awe khunipwetexiwa-tho’. Niireke moolumo awo annivarihana ni Daniyeli 2:44 nimusomme ahu?

Tomaas: Aayo.

Antoonio: Nrowe nuupuwelele vakhaani ele nixuntte ahu. Mpakha-va, nihoona wira eprofesia ya Daniyeli ekapitulu 4 yaahilempwa wira “atthu othene esuwele wira Muluku a wirimu onniruma omwene wothene wa mulaponi”. Eyo enooniherya wira eprofesia ela yookhalana yootaphulela ekina, ohiya paahi sa Nabukhodonosori. Nave, eliivuru ya Daniyeli yookhalana iprofesia sinooniherya olamulela wa Omwene wa Muluku weettihiwaka ni Mwanawe. Kookoheeni so: Niireke ti vookhalela okupali wira eprofesia ya Daniyeli ekapitulu 4 ennivarihana ni Omwene wa Muluku?

Tomaas: Woonasa wene. Masi nlelo nkinoona ovarihana waya ni eyaakha ya 1914.

‘MPAKHA IMAARA THANU NA PIILI’

Antoonio: Nkahaya nuupuwelele vakhaani sa Mwene Nabukhodonosori. Mwa epantte yoopacerya ya eprofesia ya Daniyeli, owo aalikanyihiwe ni mwiri. Nabukhodonosori aahihiya olamulela mwa ‘imaara thanu na piili’ wala iyaakha 7, okathi yoole mwiri wa eprofesia waikitthiwe aya. Iyaakha iyo saamanle okathi yoole Nabukhodonosori aahiyale awe olya malaxi, nto khutthikela olamulela. Mwa epantte ya nenli ya eprofesia, Omwene wa Muluku waahihiya olamulela mwa okathi vakhaani, masi eyo khentaphulela wira Muluku khaalamulela saana.

Tomaas: Muniphavela ohimyani?

Antoonio: Khalai, mamwene a wIsarayeli yaawo yaalamulela oYerusalemu yaanihimmwa wira yaakilaathi ‘vehijeni va Yehova’.f Awo yaanilamulela ntoko atthu yaarummwale ni Muluku. Olamulela wa mamwene ala waathoonyerya eguvernu ya Muluku. Masi muhoolo mwaya mamwene manceene yaahihiya omwiiwelela Muluku; nave atthu anceene yaahitthara ntakiheryo naya. Nto mwaha wa yeeyo, Muluku aaheemya wira aIsarayeli axinttiwe ni aBabilonia mwaakha wa 607 AEC. Okhuma mwaakha yoole, khuuvo mwene aalamulela oYerusalemu waathoonyerya eguvernu ya Yehova. Nto, hiyo pooti ohimya wira mwaakha wa 607 AEC, Omwene wa Muluku waahihiya olamulela. Kiireke niri hoothe mpaka-va?

Tomaas: Aahe.

Antoonio: Nto mwaakha wa 607 AEC, sipacenrye aya ‘imaara thanu na piili’ sa eprofesia ya Daniyeli, kiire so, okathi yoole Omwene wa Muluku waahiyale aya olamulela mwa okathi vakhaani. Wanikisa wa ‘imaara thanu na piili’, Muluku aarowa omukumiherya mwene musya. Masi mwene owo aarowa okhuma wiirimu. Okathi owo saarowa wiiraneya iprofesia sikina sinisoma ahu muliivuruni mwa Daniyeli. Nto nikoho nuulupale tinla. Simanle silini ‘imaara thanu na piili’? Akhala wira nnoophwanya waakhuliwa wa nikoho nlo, nnoosuwela mwaakha opacenrye aya olamulela Omwene wa Muluku.

Tomaas: Kinoona wira ‘imaara thanu na piili’ simanle eyaakha ya 1914.

Antoonio: Muhaakhula saana!

Tomaas: Masi ninsuwela sai?

Antoonio: Okathi Yesu aari awe valaponi, aahihimya wira ‘imaara thanu na piili’ khisaamanle nlelo.g Nto waahaana ovira okathi munceene. Iyo saapacenrye Yesu ohinatthi orwa valaponi, ni saahivikaniha mpakha okathi vakhaani nuumala Yesu otthikela wiirimu. Muupuweleke wira iprofesia sinceene sa Daniyeli saarowa wiiwexexiwa “okathi wokiserya”.h Iyaakha sa 1800, alipa-oomusoma Biibiliya a nthiti yaahitokosa eprofesia ela ni iprofesia sikina. Nto yaahipacerya wiiwexexa wira ‘imaara thanu na piili’, saarowa omala 1914. Itthu sinceene siniireya okhuma mwaakha yoowo, sinnooniherya wira Omwene wa Muluku woopacerya olamulela wiirimu eyaakha ya 1914. Olumwenku ola topacenrye aya mahiku wala okathi wookiserya. Kinoona wira noolavula itthu sinci sinivila wiiwexexa okathi omosaru!

Tomaas: Ee, aayo. Kinrowa otthikela osoma mwaha ola wira kiiwexexe saana.

Antoonio: Muhixanke. Ni miyo kaahaana oviriha okathi wira kiiwexexe saana iprofesia iya. Masi, kinoona wira ovaanela wahu ohookhaliheryani osuwela wira sookupali sahu sotheene sinikhuma mBiibiliyani.

Tomaas: Aahe. Nave kihoona wira nyuwosa munimurumeela Biibiliya wira mwaakiherye atthu akina.

Antoonio: Nto kinoona wira ni nyuwo munniphavela opaka etthu emosaru. Masi ntoko sihimyale aka, ola mwaha wooxankiha wiiwexexa! Woonasa wene, nlelo mookhalana makoho makina. Mwa ntakiheryo, olelo nooxutta wira ‘imaara thanu na piili’ sa Omwene wa Muluku, sipacenrye 607 AEC. Masi, ninsuwela sai wira okathi owo omanle mwaakha wa 1914?i

Tomaas: Nlo nikoho nootthuneya tthiri.

Antoonio: Biibiliya onninikhaliherya osuwela olokela wa imaara thanu na piili. Esumana eyo nnoothokorerya mwaha owo, munoonela sai?

Tomaas: Vaareera, kinimoolipelelakani.

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali ni sowiira sa Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iyo ni nyuwo.

[Inoota]

Muru onittharelana wa epantte ala, onrowa othokorerya iversiikulu sa Biibiliya sinnikhaliherya osuwela olokela wa imaara thanu na piili.

OVAANELA VOOHIMYA SA BIIBILIYA

Omwene wa Muluku Opacenrye Silini Olamulela?​—Mpantta 2

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyiherye wira Namoona oniitthaniwa Antoonio ootthikela owannyawe mulopwana oniihaniwa Tomaas.

WUULUULA OLOHA WA NABUKHODONOSORI

Antoonio: Vaakisivela woophwanyani-tho olelo, Tomaas. Okisivela omusoma Biibiliya ni nyuwo khula esumana.a Ihaali sanyu?

Tomaas: Salama.

Antoonio: Vaareera. Nihiku nookiserya navaanenle ahu, naahilavula nthowa naya Anamoona a Yehova anihimya aya wira Omwene wa Muluku opacenrye olamulela eyaakha ya 1914.b Naahiphwanya etthu ennikhaliherya wiwexexa eprofesia ya Daniyeli ekapitulu 4. Munnuupuwela ele enihimya aya eprofesia eyo?

Tomaas: Aayo, enilavula sa mwiri muulupale Mwene Nabukhodonosori aalohenrye awe.

Antoonio: Ekeekhai. Nabukhodonosori aahiloherya mwiri muulupale yoowo iritta saya saaphiya wiirimu. Moottharelana, owo aahiiwa yooruma yaakhuma wiirimu yaahimya wira mwiri ole waahaana wiikitthiwa, nto exa ni mitathaari saya saahaana ohiiwa. Nuuvira imaara “thanu na piili”, mwiri owo waamutthikela ophuwa.c Nave-tho, naahoona wira eprofesia eyo eniiraneya ipantte piili. Kiireke munnuupuwela epantte yoopacerya?

Tomaas: Kinoona wira yaari etthu yaamukhumelenle Nabukhodonosori, kiira? Owo aanilya malaxi ntoko enama mpakha oviriha iyaakha 7.

Antoonio: Muhaakhula saana. Nabukhodonosori aanilya malaxi ntoko enama mpakha iyaakha 7, okathi yoowo aahiihiwe awe olamulela. Masi wiiraneya wuulupale wa eprofesia ela, enivarihana ni okathi Omwene wa Muluku waahiyale aya olamulela mpakha ovira imaara thanu na piili. Naahoona wira imaara iyo saapacenrye vaavo Yerusalemu aaxinttiwa awe ni aBabilonia mwaakha wa 607 AEC. Okhuma okathi yoole, khuuvo mwene aalamulela oYerusalemu aathoonyerya eguvernu ya Yehova. Wanikisa wa imaara thanu na piili, Muluku ammukumiherya Mwene aarowa olamulelaka eguvernu awe. Eyo enooniherya wira wanikisa wa imaara iyo, Omwene wa Muluku waarowa opacerya olamulela wiirimu. Nave, naahithokorerya okathi saapacenrye aya imaara thanu na piili. Akhala wira nnoosuwela mwaakha omanle aya imaara iyo, nnoosuwela-tho okathi Omwene wa Muluku opacenrye aya olamulela. Niri hoothe mpakha-va?

Tomaas: Aayo. Wuuluula nno wookikhaliherya.

Antoonio: Vano, nrowe nithokorerye mwaha wa olelo wira niwehe mwaakha simanle aya imaara thanu na piili. Kisomme niinano mwaha ola wira kuupuwelele iponto suulupale. Kinoomananiha wootthokiheryani.

Tomaas: Kihiiwa.

IMAARA THANU NA PIILI SINNIMALA, NI ANNIPACERYA MAHIKU OOKISERYA

Antoonio: Wiiraneya woopacerya wa eprofesia ela, onimuhimya Nabukhodonosori, nto imaara thanu na piili sintaphulela iyaakha 7 paahi. Masi wiiraneya wuulupale onihela muhina Omwene wa Muluku, nto imaara thanu na piili sintaphulela iyaakha sinceene ohiya iyaakha 7 paahi.

Tomaas: Exeeni eniwiirihani ohimyaka siiso?

Antoonio: Muupuweleke wira imaara thanu na piili sipacenrye vaavo Yerusalemu aapwetexiwe awe eyaakha ya 607 AEC. Nakontari iyaakha 7 paahi okhuma 607 AEC, ninrowa omalela mwaakha wa 600 AEC. Masi khiivo etthu yaakhumelenle eyaakha ele enivarihana ni olamulelo wa Muluku. Ohiya-vo, ntoko niwenhe ahu, okathi Yesu aaryaawe valaponi aahihimya wira imaara thanu na piili khisaamanle nlelo.

Tomaas: Aah! Vano kihuupuwela.

Antoonio: Nto, imaara thanu na piili khasintaphulela iyaakha 7 paahi, masi sinihela muhina okathi munceene.

Tomaas: Nto saari iyaakha kaavi?

Antoonio: Eliivuru ya Wisupulula yeeyo enivarihana ni Daniyeli, enninikhaliherya osuwela olekela wa imaara iye thanu ni piili. Eyo ennooniherya wira imaara tthaaru nnimeya sinithoonyerya mahiku 1.260. Tivonto, imaara “thanu na piili” okathi waarowa wuncereriwa ikwaha piili, eyo piiyo, mahiku 2.520. Niri hoothe?

Tomaas: Aayo, niri hoothe. Masi nkinoona moota mwaha ola onooniherya aya wira Omwene opacenrye olamulela 1914.

Antoonio: Kihiiwa, nrowe nuupuwelele vakhaani. Ikwaha sikina, iprofesia sa mBiibiliyani, nihiku nimosa ninthoonyerya eyaakha emosa.d Akhala wira nnoolikanyiha nihiku nimosa, ntoko eyaakha emosa, nto imaara thanu na piili sohaana ophiyeryaka 2.520 iyaakha sene. Nakontari okhuma 607 AEC, iyaakha 2.520 sinrowa omalela 1914.e Eyo enooniherya wira eyaakha ya 1914 simanle aya imaara thanu na piili, nto Yesu aahipacerya olamulela ntoko Mwene a Omwene wa Muluku. Nave, okhuma 1914, sinnikhumelela itthu sinceene, seiyo Biibiliya aahimmye awe wira saarowa okhumelela mahiku ookiserya.

Tomaas: Itthu xeeni?

Antoonio: Muthokorerye ele Yesu aahimyale awe va Matheyo 24:7. Ohimyaka sa okathi aarowa awe opacerya olamulela wiirimu, Yesu aalavunle so: “Maloko makina anowana ni maloko makhw’aya, elapo enotuphela elapo ekina. Enokhumelela etala n’itetere ilapo sinjene”. Moone wira Yesu aahihimya wira yaamukhumelela etala ni itetere mahiku ookiserya. Nto okhuma eseekulu evinre, ninnoona wuncerereya wa mixankiho iyo, khahiyo siiso?

Tomaas: Ekeekhai.

Antoonio: Yesu aahihimya-tho wira saamukhumelela ikhotto okathi aarowa awe okhala Mwene. Eliivuru ya Wisupulula khenihimya ekhotto yaarowa owaniwa opuro omosa, masi enihimya ikhotto saarowa owaniwa elapo yotheene, okathi wookiserya.f Munnuupuwela mwaakha wa ekhotto yoopacerya ya olumwenku wotheene?

Tomaas: Waari mwaakha wa 1914, mwaakha yoowo muhimmye anyu wira Yesu taapacenrye awe olamulela! Nkitonko wiiwa mwaha ola.

Antoonio: Tthiri, wiiwexexa saana eprofesia ela enilavula sa imaara thanu na piili vamosa ni iprofesia sikina sa Biibiliya voohimya sa mahiku ookiserya, onnikhaliherya. Anamoona a Yehova annikupali wira Yesu opacenrye olamulela ntoko mwene a Omwene wa Muluku eyaakha ya 1914, ni mahiku ookiserya apacenrye eyaakha yeeyo-tho.g

Tomaas: Kihaana wiimananiha wira kiiwexexe mwaha ola.

Antoonio: Khiva mwaha. Sintoko kihimmye aka wanipacerya, ni miyo kaahaana oviriha okathi wira kiiwexexe saana iprofesia iya. Masi kinoona wira ovaanela wahu ohookhaliheryani oweha wira nnaamwi eyaakha ya 1914 ehiromoliwaka mBiibiliyani, Anamoona a Yehova annilipiherya sookupali saya voohimya sa eyaakha eyo amurumeelaka Biibiliya.

Tomaas: Ekeekhai. Kinimakela otikinihiwa ni nyuwosa, khuuvo mwaha onilavula anyu ohinivarihana ni Biibiliya. Khamuniroromela muupuwelo anyu. Vano kinnoona nthowa naya kaaxankiheyaka. Mwaha ola tthiri ti woovila. Xeeni Muluku ahaanileelale awe mBiibiliyani wira Yesu aarowa opacerya olamulela wiirimu eyaakha ya 1914?

Antoonio: Nlo nikoho nooreera. Tthiri sookhala itthu sinceeene sihilempwale mBiibiliyani. Nto xeeni Muluku eemerenrye awe wira Biibiliya alempwe mwa enamuna enitthuneya wiimananiha wira atthu amwiiwexexe? Esumana eyo, nnoolavula mwaha owo. Munoonela sai?

Tomaas: Vanooreera, kinimoolipelelakani.

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali ni sowiira sa Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iyo ni nyuwo.

[Inoota]

Moone muru 9 wa eliivuru Biibiliya Oniixuttiha Exeeni Tthiri?, yoolaleiwa ni Anamoona a Yehova. Enniphwanyaneya-tho va www.pr2711.com/vmw.

[Eponto yuulupale epaaxina 9]

Ohimyaka sa okathi aarowa awe opacerya olamulela wiirimu, Yesu aalavunle so: “Maloko makina anowana ni maloko makhw’aya, elapo enotuphela elapo ekina. Enokhumelela etala n’itetere ilapo sinjene”