Nyuwo Axitokweene, Munoonela Sai Owiiniha Nikuruta Atthu Akina?

“Itthu sothene molumwenkuni-mu sokhalana okathi aya”.​—MUS. 3:1.

MWAAROWA WAAKHULA SAI?

Xeeni varyaaya vootthuneya owiiniha nikuruta anna, nto nthowa xeeni?

Mureerelo xeeni oniphwanya awe Muloko mwaha wa axitokweene owiiniha nikuruta anna?

Voohimya sa owiiniha nikuruta akina, axitokweene anrowa ottharihela sai ntakihero na Samuweli?

1, 2. Muxankiho xeeni axitokweene a esirkwitu anceene yoonale aya wira wookhala miloko sinceene?

MUTOKWEENE a esirkwitu oniira ohalaka vakhaani omaliha muthukumano awe ni axitokweene. Nto okathi onaaweha awe owiitho waya onnoona otteeliwa waya murima ni wiimananiha waya wira akukhule muloko, masi anamunceene toowunnuwela anilikana ni paapa awe. Masi yookhala etthu yaamuxankiha, nto khwaakoha wira, “Anna exeeni enipaka anyu wira nwiinihe nikuruta atthu akina wira akhalane miritti mmulokoni-mu”? Nto yaahuupuwela wira mukwaha wookiserya munna ole axekunrye awe muloko aya aahaatumererya wira akhalele nthiti owiiniha nikuruta anna akina. Nto mutokweene mmosa aalavunle so: “Ohimya ekeekhai, khanipanke etthu”. Axitokweene akina yaahittikinyiha muru yaakhulelaka ele yaahimmwale.

² Vakhala wira nyuwo mwa mutokweene mmulokoni, nto munniwerya woona etthu yaakhumelenle muthukumano ole? Woonasa wene. Axitokweene anceene a esirkwitu olumwenku wotheene annoona wira miloko soowaatta annitthuneya wiinihiwa nikuruta anna anceene, amiravo ni oowunnuwela, wira akhaliheryeke okhapelela nikoto na Muluku. Nto owo muxankiho muulupale. Nthowa xeeni?

3. (a) Moota xeeni Soolepa sinnooniherya aya wira ti vootthuneya owiiniha nikuruta atthu akina, nto xeeni otheene ahu vanitthuneya ahu opaka eyo? (Nwehe enoota.) (b) Exeeni eniwiiriha axitokweene anceene woonaka okhala voovila owiixuttiha atthu akina?

³ Nyuwo mukhanle amakampusi, tthiri munnisuwela wira owiiniha nikuruta atthu etthu yootthuneya vanceene.a Nyuwo munnisuwela wira annitthuneya anna anceene oophwanelela wira alipihe miloko sikhanle ni wira ahooleleke iye sinirowa okhumelela muhoolo. (Mmusome Yesaya 60:22.) Nave moosuwela wira Nuulumo na Muluku nnootumereryani wira ‘nwixuttiheke-tho atthu akina’. (Mmusome 2 Timótheyo 2:2.) Hata vari siiso, nyuwo pooti woonaka eyo okhala etthu yooxankiha opaka, ntoko axitokweene ale aromoliwe wanipacerya. Okhala wira nuumala okhapelela sootthuneya sa emusi anyu, muteko anyu wa mulaponi, miritti sanyu sa mmulokoni, itthu sikina sinikhumelela sootthuneya ovara, nto onihala okathi vakhaani wira nwiinihe nikuruta atthu akina mmulokoni. Nto vakhala siiso, vannireerela othokorerya nthowa nniiriha muteko wa owiiniha nikuruta atthu akina okhala wootthuneya vanceene.

OWIINIHA NIKURUTA AKINA ETTHU YOOTTHUNEYEXA

4. Muupuwelelo xeeni oniwooceeliha axitokweene owiiniha nikuruta atthu akina?

⁴ Exeeni anuupuwela aya axitokweene anceene ahiniwerya osuka okathi wira awiinihe nikuruta atthu akina? Woonasa wene awo anuupuwela so: ‘Owiiniha nikuruta anna awo etthu yootthuneya tthiri, masi sookhala itthu sikina sootepexa otthuneya sihinireerela ohiiwa siiso. Vakhala wira miyo nkiniwerya owiiniha nikuruta anna nenna-va, khiivo enihononeya mmulokoni’. Ekeekhai wira sookhala itthu sinceene sinitthuneya waakuveliwa, masi woolowela owiiniha nikuruta akina pooti ohonona makhalelo ooloka oomunepani a muloko.

5, 6. Exeeni ekhanle aya ooniixuttiha nlikanyiho voohimya sa nakaaro ni moonelo awe olokiherya mutooro wa ekaaro eyo, nto eyo enivarihana sai ni owiiniha nikuruta akina mmulokoni?

⁵ Muupuwele ntakiheryo nla: Mutthu oneettiha ekaaro onnisuwela wira vanitthuneya olokiherya ekaaro eyo ni omuturuka ooleyo khula okathi onitthuneya aya wira yeetteke saana. Masi owo pooti opaceryaka wuupuwela wira eyo khahiyo yootthuneyexa ovikana omuhelela diisele mutankini. Ekeekhai wira aahimuhelele diisele mutankini, ekaaro eyo khenirowa weettaka. Owo pooti wuupuwelaka so: ‘vakhala wira nkirina okathi wa omuturuka ooleyo, ekaaro nlelo enaamweetta’. Masi yoowoopiha xeeni erina awe? Vakhala wira mutthu owo khonilokiherya mutooro wa ekaaro eyo, nnoophiya nihiku ekaaro yootheene enrowa aya ohononeya. Nto eyo yakhumelela, owo onrowa oliva musurukhu ni oviriha okathi munceene wira elokihiwe ekaaro eyo. Exeeni ekumihenrye eyo?

⁶ Axitokweene annikhapelela miteko sinceene sootthuneya; nto ohiira siiso onookhumelela muxankiho mmulokoni. Moovirikana ni nakaaro ole oromoliwe aakhalela nthiti omuhelela diisele paahi, axitokweene ahaana ‘osuwela othanla itthu sintepa ophwanelela’. (aFil. 1:10) Masi aakhala axitokweene akina anixankiheya ni myaha sikina anahiyererya owiiniha nikuruta atthu akina, weiwo onilikanyihiwa ni olokiha mutooro wa ekaaro. Nto vakhala wira axitokweene annoolowela owiixuttiha atthu akina, voohipisa, muloko aya khonirowa okhalana anna oophwanelela anrowa ohoolelaka muloko owo.

7. Niwooneleke sai axitokweene aniwerya osuka okathi aya wira awiinihe nikuruta atthu akina?

⁷ Moowiiwanyeya saana, hiyo nihaana osyaka muupuwelelo woowi owiiniha nikuruta atthu akina khurina efaita yinceene. Axitokweene aniwerya woona saana ni orumeela oratteene okathi aya awiinihaka nikuruta anna akina, annooniherya okhala anamuteko ooloka ni annikumiherya mareeliho manceene mmulokoni mwaya. (Mmusome 1 Pedru 4:10.) Mireerelo xeeni siniphwanya awe muloko?

WIIMANANIHA ONIKUMIHERYA MIREERELO

8. (a) Mikhalelo xeeni ni etthu xeeni axitokweene anisuwela aya eniwiiriha owiiniha nikuruta atthu akina? (b) Muteko xeeni woowaakuveya orina aya axitokweene anirumeela “mapuro oothowa axitokweene”? (Nwehe ekaaxa eni “Muteko Wootthuneyexa.”)

⁸ Axitokweene a miruku annisuwela wira vaavo vanuuluvala aya, sinnivukuwa miteko siniwerya aya ovara mmulokoni. (Mik. 6:8) Ohiya-vo ahaana osuwela wira ‘otakhaliwa’ pooti onimorela mootutuxerya, nto eyo enoowerya oturuka makhalelo ahu ni miteko saavara ahu mmulokoni. (Mus. 9:11, 12; Yak. 4:13, 14) Nto mwaha wa othokorerya waya ni murima wotheene nikoto na Yehova, axitokweene annuupuwela muhoolo, vaavo vaniwiixuttiha aya amiravo itthu sixuntte aya iyaakha sinceene amurumenle aya Yehova moororomeleya.​—Musome Esalimo 71:17, 18.

9. Itthu xeeni sinirowa okhumelela muhoolo siniiriha otthuneyaka vanceene anna wiinihiwa nikuruta?

⁹ Mathowa xeeni makina aniiriha axitokweene aniwiiniha nikuruta akina okhala mareeliho a muloko aya? Okhala wira awo annaakiherya muloko. Moota xeeni? Oluttuweliwa wa axitokweene wira yaakhaliherye akina onniiriha okhumelela anna olikanela wira akhaliheryeke muloko wetta saana ni okhala woowiirana, ohiya olelo paahi masi okathi onirwa aya mixankiho ni maxakha maalupale. (Ezek. 38:10-12; Mik. 5:5, 6) Tivonto vanivekeliwa aya axitokweene ootheene wira awiiniheke nikuruta atthu akina okhuma nenna-va.

10. Exeeni enitthuneya awe opaka mutokweene wira ophwanye okathi wa owiiniha nikuruta atthu akina?

¹⁰ Tthiri ninnisuwela wira okathi oniviriha anyu mukhapelelaka miteko sikina sootthuneya sa mmulokoni sinnoophwanyihani olipa omunepani. Masi munnitthuneya orumeela okathi mukina wira nwiinihe nikuruta atthu akina. (Mus. 3:1) Wira siiso onimooniherya wira nyuwo munnirumeela okathi anyu mwa miruku.

MULOKIHERYE MURIMA WA OLE ONIMWIIXUTTIHA ANYU

11. (a) Etthu xeeni yoohakalaliha voohimya sa miruku sivahiwe ni axitokweene a ilapo sinceene aniwiiniha nikuruta akina? (b) Moovarihana ni eliivuru ya Miruku 15:22, xeeni siryaaya soovareleya muteko miruku sivahiwe ni axitokweene akina?

¹¹ Egrupu emosa ya axitokweene yaawo anisuwela saana waakhaliherya atthu wira yinnuwe omunepani, yaahikohiwa inamuna sinirumeela aya wira awiinihe nikuruta atthu akina.b Nnaamwi makhalelo a anna awo yaari oovirikana vanceene, masi otheene aya anihimya etthu emosaru. Eyo enooniherya exeeni? Enooniherya wira miruku siri mBiibiliyani voohimya sa owiiniha nikuruta akina sinnivareleya muteko ‘khula nipuro ni khula muloko’ ntoko siryaaya okathi wa murummwa Paulo. (1 aKor. 4:17) Vano, ninrowa othokorerya miruku vakhaani sivahiwe ni axitokweene awo, muru ola ni onittharelana. (Mir. 15:22) Moophavela okhweiherya, miru iya sinirowa owiirelaka ale aniwiiniha nikuruta akhwaaya “mwiixuttihi” nto ale aniinihiwa nikuruta ninrowa owiirelaka “aniixuttihiwa”.

12. Makhalelo xeeni mwiixuttihi onitthuneya awe okumiherya ni nthowa xeeni?

¹² Mwiixuttihi onitthuneya olokiherya murima wa ole onimwiixuttiha awe. Ntoko siisaale mulipa-oolima onitthuneya awe ovatta wala woolowiherya etthaya ohinatthi waala mmiso awe, nto ole oniixuttiha onitthuneya olokiherya wala omulipiha murima ole onirowa awe omwiixuttiha itthu isya. Nto mwiixuttihi onrowa olokiherya sai murima wa ole aniwiixuttiha awe? Ottharihelaka enamuna emosa yaarumeeliwe ni profeta a Yehova khalai. Enamuna xeeni?

13-15. (a) Muteko xeeni profeta Samuweli aavahiwe awe? (b) Samuweli aakhwanihenrye sai muteko ole? (Nwehe elatarato yoopacerya.) (c) Moota xeeni yowiiraneya ela ya Samuweli eri mBiibiliyani enrowa aya waakhaliherya axitokweene olelo-va?

¹³ Nihiku nimosa, iyaakha 3.000 sivinre, Yehova aahimuhimeerya profeta awe oowuuluvala Samuweli wira: “Melo, okathi ene yola, kinimovelelihani mulopwana a nihimo na Beniyamini. Mmuttikhe omwene w’atthu aka a Isarayeli”. (1 Sam. 9:15, 16) Samuweli aahisuwela wira okhulupale awe waahiphiya wanikisa waya ni Yehova aahimuruma orowa omuthanla mwene mukina wira omuranttele. Woonasa wene, Samuweli aanuupuwela so: ‘Kinrowa omulokiherya sai mulopwana ole wira aakhulele muteko ola’? Owo ahuupuwela ele yaarowa awe opaka nto aahimpaka palano.

¹⁴ Mmeeloni mwaya, okathi Samuweli waamoonale awe Sawuli, Yehova aahimuhimeerya profeta ole wira: “Ti yowo mulopwan’ole òhimenryakani”. Vano Samuweli aahimuttharihela palano awe. Owo aahimulattula Sawuli wira arowe yalye yoolya nipuro naalyiwa. Nto owo aahinvaha opuro woottittimiheya Sawuli ni arumeyi awe ni aahithanlela enama yoolokexa nto khwaahimeerya wira: “T’ila epantte esukeriwanyu. Mulyeke, okhala wira karimwiyathi mwayini wosukeryani okathi valattunlyaka atthu”. Nuumala-vo, Samuweli ni Sawuli yaahetta arowaka owannyawe profeta, nto yanivaanela yeettaka siisaale. Samuweli aaphavela orumeela saana okathi ole woohakalaliha waarivo enama yoolokexa ni orowa waya weetta hoothe waahikumiherya okathi wa otteeliwa murima. Nto nuuphiya aahimwiirela Sawuli wira awele vataratoni. Nto okathi yaawoopela aya ettheku yooriirya ya makaaripi, Samuweli ‘aahivikaniha ovaanela ni Sawuli aryeene vataratoni’ mpakha orupasa. Mmeeloni mwaya, Samuweli aahimwiitthela makhura Sawuli vamuru, khumukhupaarela, nto khunvaha malakiheryo makina. Nuumala-vo, aahimulaxerya Sawuli, amulokihenrye ene mwaha wa ele yaarowa okhumelela.​—1 Sam. 9:17-27; 10:1.

¹⁵ Omuthanla mutthu wira okhale namahoolela a nloko, khonilikana ni omwiiniha nikuruta munna wira okhale mutokweene wala murummwa oorumeela mmulokoni. Hata vari siiso, axitokweene olelo-va anoowerya wiixutta itthu sinceene sa enamuna Samuweli yaarumeelale awe. Nrowe nithokorerye itthu piili saapanke awe Samuweli.

ATTHU OOPHAVELA WIIXUTTIHA NI APATTHANI A EKEEKHAI

16. (a) Muupuwelo xeeni aarina awe Samuweli okathi aIsarayeli yanvekenle aya mwene mukina? (b) Samuweli aakhwanihenrye sai muteko wa orowa omuthanla Sawuli?

¹⁶ Mwiivahereryeke moohovelela. Okathi Samuweli waiiwale awe wira aIsarayeli yaaphavela olamuleliwaka ni mwene pinaatamu, Samuweli aahipacerya woona wira atthu ale yaanimunyokha ni khiyamphavela. (1 Sam. 8:4-8) Tthiri owo anoovelela opaka ele atthu ale yanvekela aya, nto Yehova aahimutumererya ikwaha tthaaru wira owiiwelele atthu ale. (1 Sam. 8:7, 9, 22) Hata vaari siiso, Samuweli khaanyonyiwe wala omukhalela nrima mutthu ole aarowa omuranttela. Okathi Yehova waamurumme awe orowa omuthanla Sawuli, profeta ole aahipaka eyo, ohiya moophavela waakhwaniherya ele yaarummwale awe paahi, masi aavanre ni murima awe wotheene ni ophenta.

17. Moota xeeni axitokweene mahiku ala akhanle aya oomutakiha Samuweli, nto eyo enrowa waaphwanyiha exeeni?

¹⁷ Moolikana ni Samuweli, axitokweene arina ankhili olelo-va annaareerela murima atthu aniwiiniha aya nikuruta. (1 Ped. 5:2) Axitokweene moota owo khanoovelela owiiniha nikuruta atthu akina yoonaka wira animwaakhiwa iparakha sikina sirina aya mmulokoni ni ale aniwiixuttiha aya. Alipa-owiixuttiha ooreera murima khaniwoona ale aniwiixuttiha aya okhala awanani aya masi aniwoona okhala axaapara aya a “muteko”, anikumiherya mireerelo mmulokoni. (2 aKor. 1:24; aHéb. 13:16) Tthiri alipa-owiixuttiha moota owo annitteeliwa murima vaavo vaniwoona aya ale aniwiixuttiha aya arumeelaka osuwela waya mmureerelo wa muloko aya!​—Mit. 20:35.

18, 19. Moota xeeni mutokweene okhanle awe oolokiherya murima wa ole onimwiixuttiha awe, nto xeeni varyaaya vootthuneya wiira siiso?

¹⁸ Mukhaleke apatthani ohiya mwiixuttihi paahi. Nihiku nenne Samuweli aamoonale awe Sawuli, profeta ole anwerya okuxa makhura ale ni wiitthela vamuru va Sawuli moowaakuveya, nto omuhimyeke wira ookela omwene, masi Sawuli khaarowa osuwela ovara etthu. Ohiya-vo, Samuweli mooreera murima aahiviriha okathi olokiheryaka murima wa Sawuli vakhaani-vakhaani. Nto nuumala olya yoolya yooloka, weetta hoothe, ovaanela okathi munceene ni orupa saana ohiyu, profeta ole aahoona wira waahiphiya okathi wooreerela wa omuthanla Sawuli.

¹⁹ Vamosaru, mwiixuttihi ohaana opacerya omwiiniha nikuruta munnawe omalihaka okathi hoothe wira olimalelane ni ole onimwiixuttiha awe. Mavalo akhanle ootthariwa ni mutokweene wira omwiixuttihe mutthu pooti ovirikanaka moovarihana ni makhalelo ni soolimalela sa khula elapo. Hata vari siiso, woonasa wene munikhala mapuro oovirikana, mwakhala wira nyuwo mwa mutokweene owaatteliwa miteko, musukeke okathi wira mukhale ni ole onimwiixuttiha anyu, nto vaavo vanipaka anyu eyo munimuleela wira “Miyo kinnoophentani”. (Mmusome aRoma 12:10.) Enamuna eyo ya omukhapelela saana ole oniixuttihiwa enoomukhaliherya woona wira tthiri munninvaha efaita ni omphenta.

20, 21. (a) Mwaarowa otthokiherya sai ele enimwiiriha mutthu okhala mwiixuttihi ookhumela saana? (b) Exeeni enrowa othokoreriwa muru onittharelana?

²⁰ Nyuwo axitokweene, musuweleke wira: Mwiixuttihi onikhumela saana ti ole ohinisiveliwa wiixuttiha paahi, masi onimphenta mutthu ole onimwiixuttiha awe. (Munwehe Yohani 5:20.) Enamuna enirumeela anyu wira mwiixuttihe ennaakuva wooniwa ni ole oniixuttihiwa ni eyo enoomukhaliherya waakuva wiixutta. Ti maana aya, nyuwo axitokweene oophentiwa, okathi oniwiiniha anyu nikuruta akina muhikhaleke mwiixuttihi paahi, nto mukhaleke mpatthani aya.​—Mir. 17:17; Yoh. 15:15.

²¹ Nuumala olokiherya murima wa ole oniixuttihiwa, mutokweene ohaana omwiixuttiha itthu sootthuneya. Nto mutokweene owo onrowa orumeela enamuna xeeni? Eyo enrowa othokoreriwa muru onittharelana.

[Inoota]

[Ekaaxa epaaxina 8]

Muteko Wootthuneyexa

MAPURO makina a mulaponi, miloko sinceene sinnaakhela nikhaliheryo na anna ni arokora yaawo anirowa mapuro “oothowa anamalaleerya”. Anamoona awo oowiivahererya annikhaliherya vanceene muteko wa ohepha onivariwa. Masi exeeni enrowa okhumelela vakhala wira anamalaleerya awo a nthiti annoomoliwa elapo eyo? Tthiri miloko sinceene khasinirowa okhalana anna anceene a elapo yeeyo aniwerya ohoolelaka muloko. Vanonto vanaamutepa aya “othowa” atthu oophwanelela, okhala mutokweene, muteko wootepa otthuneya, nto mmananihe waakhaliherya anna a mapuro anikhala anyu wira aweryeke okukhula nikoto.

Moota Axitokweene Aniwiiniha Aya Nikuruta Akina Mmulokoni

“Ikekhai sikìwalyanyu kihimyaka . . . , mwalèle atthu òroromeleya”.​—2 TIM. 2:2.

MWAAROWA WAAKHULA SAI?

Inamuna xeeeni mutokweene okhanle awe oomulipiha munna omunepani?

Soolepa xeeni sikhanle oomukhaliherya munna onooneya ntoko mutthu ohineemererya miritti mmulokoni?

Moota xeeni ale aniixuttihiwa akhanle aya oomutakiha Eliya?

1. (a) Exeeni anisuwela aya atthu a Muluku okhuma khalai voohimya sa owiixuttiha akina, nto xeeni eyo enivareleya aya muteko olelo-va? (b) Exeeni enrowa ahu othokorerya muru ola?

ATTHU a Muluku okhuma khalai annisuwela wira owiiniha nikuruta akina onnikumiherya mireerelo sinceene. Muhavinre Abrahamu “ahathukumanya arumeyi awe. . .  òtupexa”, wala oowiinihiwa nikuruta, wira amoopole Lothi, nto aahikhumela saana. (Maph. 14:14-16) Okathi wa Mwene Davidi, alipa-oowiipa mpaani mwa Muluku yahixuttihiwa wiipa nto “yanirattela owipela Apwiya”, ni yaaninvuwiha Yehova. (1 Wah. 25:7) Olelo-va hiyo ninniwana ekhotto ya omunepani ni Satana waahela muhina atthu awe. (aÉf. 6:11-13) Ohiya-vo, ninnipaka sotheene siniwerya ahu wira ninvuwihe Yehova. (aHéb. 13:15, 16) Tivonto, wira nilikaneke ni arumeyi a Muluku a khalai, nihaana wiixuttihiwa wira nikhumele saana. Mmulokoni wa eKristau, Yehova ohaavaha axitokweene muritti wa owiixuttiha akina. (2 Tim. 2:2) Nto inamuna xeeni sinirumeela aya axitokweene a miruku wira awiixuttihe anna osuwela ovara miteko sa okhapelela nikoto?

MMULIPIHE OMUNEPANI OLE ONIMWIIXUTTIHA ANYU

2. Ohinatthi omwiixuttiha mutthu itthu isya, exeeni mutokweene enitthuneya awe opaka, ni nthowa xeeni?

² Nyuwo mukhanle axitokweene, munnilikanyihiwa ni mulimi. Ohinatthi waala mmiso, mulimi pooti woonaka wira etthaya ele enitthuneya wunttelaniha wira oruwerye saana. Vamosa-ru, muhinatthi opacerya omwiixuttiha munna itthu sihinisuwela awe, nyuwo munitthuneya osuwela Soolepa sinrowa olokiherya murima awe wira owerye waakhelela oratteene itthu sinirowa awe wiixuttihiwa.​—1 Tim. 4:6.

3. (a) Moota xeeni masu a Yesu ari va Marko 12:29,30 akhanle aya oorumeeliwa okathi onivaanela anyu ni ole onimwiixuttiha anyu? (b) Ikuru xeeni sirinaaya nivekelo nnipakiwa ni mutokweene ohoolo wa ole onimwiixuttiha awe?

³ Wira musuwele moota ekeekhai enivara aya muupuwelelo ni itthu sinipaka awe ole oniixuttihiwa, nyuwo muhaana omukoha so, ‘Moota xeeni wiivahererya wanyu wa Yehova oturunke aya makhalelo anyu’? Nikoho nla nnoowerya okumiherya ovaanela wooloka voohimya sa ele enniiriha omurumeela Yehova ni murima ahu wotheene. (Mmusome Marko 12:29, 30.) Woonasa wene wanikisa wa ovaanela iwo vaamureerela opaka nivekelo, munvekelaka Yehova wira onvahe munepa awe wootteela ole onimwiixuttiha anyu wira owerye wiiwexexa ele enrowa awe wiixuttihiwa. Tthiri wira siiso onoomulipiha murima munna owo, vaavo vanrowa awe owiiwakani munvekelelaka!

4. (a) Nvahe matakiheryo a soolepa sa mBiibiliyani sikhanle oomukhaliherya ole oniixuttihiwa wunnuwa omunepani. (b) Yoolakela xeeni onikhalana awe mutokweene okathi oniwiixuttiha awe akina?

⁴ Okathi onipacerya anyu omwiixuttiha, muthokoreryeke sowiiraneya sa mBiibiliyani seiyo sinoona anyu wira sinoomukhaliherya ole onimwiixuttiha anyu wira iixutte wiivahererya, ororomeleya ni wiiyeviha. (1 Mam. 19:19-21; Neh. 7:2; 13:13; Mit. 18:24-26) Makhalelo awo tootthuneya wa ole oniixuttihiwa ntoko etthaya enitthuneya aya wunttelanihiwa. Awo annimwiiriha waakuva wunnuwa omunepani. Mutokweene mmosa a oFrança, oniireliwa Jean-Claude onihimya so: “Yoolakela aka kaamwiixuttihaka mutthu kiniphavela wira osiveliweke itthu sa Muluku. Kinniphavelasa okathi wooreerela wira nisome yoolepa emosa hoothe enrowa ‘omutthukula maitho’ ole onimwiixuttiha aka wira ‘oneke orattene ikano sothamaleya’ siri mBiibiliyani”. (Esal. 119:18) Nto inamuna xeeni sikina sinimukhaliherya ole oniixuttihiwa?

MMUKHALIHERYE OTHANLA YOOLUKAMA NI MMULAKIHERYE

5. (a) Xeeni varyaaya vootthuneya olavula ni ole onimwiixuttiha anyu voohimya sa soolukama sawe? (b) Xeeni axitokweene vanitthuneya aya opacerya owiixuttiha anna nlelo aryeene acikhaani? (Nwehe enoota.)

⁵ Mmukoheke so ole onimwiixuttiha anyu: ‘Tiivi sikhanle soolukama sanyu’? Vakhala wira owo nlelo khorina yoolakela yooreerela, mmukhaliherye othanla emosa enoona anyu wira enoomukhweyerya waakhwaniherya. Mmuhimeerye yoolukama yaatonko anyu othanla khalai, nto okathi onilavula anyu mooniheryeke otteeliwa murima waaphwannye anyu nuumala nyuwo waakhwaniherya eyo. Nnaamwi ekhalaka ntoko enamuna yoohisuwanyeya, masi ennivara muteko. Victor, yoowo ori mutokweene ni pioneero wAfrika onihimya so: “Okathi kaaryaaka mmiravo, mutokweene mmosa aahikikoha makoho vakhaani oothanliwa saana voohimya sa soolukama saka. Makoho ale yaahikikhaliherya opacerya wuupuwelela oratteene inamuna saka sa omurumeela Yehova”. Axitokweene apacenrye khalai ovara muteko owo annittittimiherya nave wira ti vootthuneya opacerya owiixuttiha anna aryeene nlelo acikhaani, naavahaka miteko mmulokoni sinivarihana ni munnuwelo ni owerya waya. Opacerya owiixuttiha anna aryeene acikhaani, onnaakhaliherya okhalana soolukama soomunepani sooloka ahinatthi wunnuwa vaavo vanrowa aya opaceryaka okhanyereriwa otthara itthu sa mulaponi.​—Musome Esalimo 71:5, 17.a

6. Etthu xeeni yooloka Yesu aapanke awe okathi wawiixuttiha awe atthu akina?

⁶ Nyuwo munoowerya omukhaliherya ole onimwiixuttiha anyu ophavela orumeela vakhala wira khamunimutthokiherya etthu yoopaka paahi, masi munnimuleela etthu enimwiiriha opaka eyo. Okathi onimooniherya anyu mathowa aya, nyuwo munnimutakiha Mwiixuttihi Muulupale, Yesu. Mwa ntakiheryo, ohinatthi waaruma atthareli awe orowa waapaka awiixutti, Yesu aahaahimeerya nthowa naya yaatthuneya aya wiiwelela yooruma eyo. Owo aahimmye so: “Kovahiwa owerya wothene wirimu ni vathí”. Nuumala-vo khwiira: “Vano, murowé, mwawixuttiheke atthu a maloko othene”. (Math. 28:18, 19) Nto nyuwo munrowa otakiherya sai enamuna ya Yesu ya owiixuttiha akina?

7, 8. (a) Moota xeeni axitokweene mahiku ala akhanle aya ootakiha enamuna ya wiixuttiha ya Yesu? (b) Xeeni varyaaya vootthuneya omuttottopela ole oniixuttihiwa? (c) Malakiheryo xeeni akhanle oowaakhaliherya axitokweene okathi oniwiixuttiha aya akina? (Nwehe ekaaxa eni “Moota Woowiiniha Nikuruta Akina.”)

⁷ Mmutthokiheryeke ole onimwiixuttiha anyu mathowa ari mBiibiliyani aniiriha ovekeliwaka opaka etthu emosa. Mwa enamuna eyo, nyuwo munimwiixuttiha wuupuwelela miruku sa mBiibiliyani. Mwa ntakiheryo, vakhala wira muninvekela munna wira orattele nivate na Empa ya Omwene wira nikhaleke nookhweya weetta. Nyuwo pooti othokorerya yoolepa ya Tito 2:10 nto khiyamutthokiherya wira muteko owo woorattela nivate na Empa ya Omwene onrowa ‘ottittimiha ehapari yorera ya Muluku Mòpoli ahu’. Nyuwo pooti omukhaliherya wira owuupuweleke ale oowunnuwela a mmulokoni mmo ni wira muteko onivara awe onaakhaliherya yaawo. Omulakiherya mwa enamuna eyo ole onimwiixuttiha anyu, onoomukhaliherya osiveliwa waakhapelela atthu ohiya woonaka onyoonya otthara sooruma paahi. Owo onrowa okhala ootteeliwa murima vaavo vaniwoona awe anna ni arokora attottelaka mureerelo muteko ovanre awe.

⁸ Ohiya-vo muhaana omuttottopela ole onimwiixuttiha anyu mwaha wa wiimananiha wawe ottharihela malakiheryo aninvaha anyu. Xeeni vanitthuneya aya wira siiso? Omuttottopela mutthu onoolikana ni okhuwari mwiri, nto eyo enoomukhaliherya wunnuwa.​—Mulikanyihe ni Matheyo 3:17.

MUXANKIHO MUULUPALE

9. (a) Voohimya sa owiixuttiha akina, muxankiho xeeni arina aya axitokweene anikhala ilapo soothaaciri? (b) Exeeni eniiriha ekeekhai ohikhala nipuro noopacerya mweekumini mwa amiravo akina?

⁹ Axitokweene anikhala ilapo soothaaciri aakhalana muxankiho muulupale wa waakhaliherya anna oobatiziwa arina iyaakha okhuma 20 mpakha 30 wira akhaleleke nthiti miteko sa mmulokoni. Hiyo nihaakoha axitokweene apacenrye khalai orumeela, anikhala ilapo soothaaciri soowiiraka 20, wira anihimeerye etthu anoona aya wira enniwooceeliha anna weemererya miritti mmulokoni. Anna akina yaakhunle so: Okathi anna awo yaannuwaya, khiyaakhaliheriwe okhalana soolukama sa omunepani. Okathi mukina, hata amiravo yaale yaarina soolukama somunepani, annikhanyereriwa ni anamuyari aya wira aphaveleke toko itthu sa mulaponi! Nto ekeekhai khenikhala nipuro noopacerya mweekumini mwa amiravo siisa.​—Math. 10:24.

10, 11. (a) Moota xeeni mutokweene onrowa awe owerya olokiherya muupuwelelo wa munna ohineemererya miritti mmulokoni? (b) Muupuwelo xeeni wa mBiibiliyani okhanle oorumeeliwa ni mutokweene wira ovaanele ni munna owo, nthowa xeeni? (Nwehe enoota.)

¹⁰ Vakhala wira ookhala munna ohineemya miritti mmulokoni, vanitthuneya okathi, wiimananiha ni opixa murima wira nimukhaliherye. Ntoko siisaale mulimi okathi mukina onikhaliherya awe wookolola miri sawe ohelelaka mavatta, nyuwo munoowerya omukhaliherya munna moota owo oturuka muupuwelelo awe wira opacerye waakhelela miritti mmulokoni. Masi moota xeeni?

¹¹ Musuke okathi wira mmusuwele oratteene munna owo. Mmuhimeerye wira owo onnitthuneya okhaliherya muloko. Nuuvira okathi, mmwiitthane wira nvaanelane mmukhaliheryaka wuupuwelela soolepa vakhaani ni mmuupuxerye voohimya sa wiivahererya wawe wa Yehova. (Mus. 5:4; Yes. 6:8; Math. 6:24, 33; Luka 9:57-62; 1 aKor. 15:58; 2 aKor. 5:15; 13:5) Nyuwo pooti omukoha so: ‘Exeeni yaamuleihenrya anyu Yehova okathi mwiivaherenrye anyu’? Mmananihe onvara murima mmukohaka so: ‘Yehova oonenle sai nihiku mbatiziwe anyu’? (Mir. 27:11) ‘Ankhi Satana oonenle sai nihiku nle?’ (1 Ped. 5:8) Muhipeepheihe moota yoolepa yoothanliwa saana eniwerya aya onvara murima munna.​—Mmusome aHéberi 4:12.b

NYUWO MUNIIXUTTIHIWA, MUKHALE OOROROMELEYA

12, 13. (a) Yoolakela xeeni yaarina awe Eliseyo okathi waixuttihiwa awe? (b) Yehova aamutthuvenle sai Eliseyo mwaha wa ororomeleya wawe?

¹² Ankhi nyuwo amiravo munoowerya okhaliherya? Makhalelo xeeni anrowa wookhaliheryani okhumela saana? Wira naakhule nikoho nlo, nrowe nithokorerye yowiiraneya emosa yaakhumelenle khalai ni mutthu iixuttihiwa.

¹³ Mwa iyaakha sinaattamela 3.000 sivinre, profeta Eliya aahimulattula mmiravo Eliseyo wira okhale namakhaliherya awe. Voohipisa, Eliseyo aaheemererya muteko ole ni aahimurumeela profeta ole oowuuluvala ovaraka miteko soonyoonya. (2 Mam. 3:11) Nto nuuvira iyaakha 6 iixuttihiwaka, Eliseyo aahisuwela wira muteko wa Eliya wa waahoolela aIsarayeli waahanle omala. Okathi owo, Eliya aahimwiirela mwaapara awe ole aamwiixuttinhe awe itthu sotheene wira ohimuttareke-tho, masi Eliseyo aahimuhimeerya Eliya ikwaha ttharu wira: “Miyo nkinohiyani”! Owo aaphavela okhala ni mwiixuttihi awe mpakha vaaweryaneya aya. Nto Yehova aahimutthuvela Eliseyo mwaha wa ororomeleya wawe, khumweemererya woona emalelo yootikiniha ya Eliya.​—2 Mam. 2:1-12.

14. (a) Moota xeeni ole oniixuttihiwa olelo-va onrowa awe omutakiha Eliseyo? (b) Exeeni eniiriha okhala vootthuneyexa ole oniixuttihiwa okhala oororomelya?

¹⁴ Nyuwo amiravo munrowa omutakiha sai Eliseyo olelo-va? Mweemereryeke muhiikhupanyihaka miteko sinivahiwa anyu hata iye soonyoonya. Nwooneke okhala apatthani anyu ale aniwiixuttihani, ni mmuleeleke wira munnixukhurela wiimananiha onipaka awe wira owiixuttiheni. Enamuna enimwiiwelela anyu, pooti olikanaka ni masu oowi: “Miyo nkinohiyani”. Etthu yootepexa otthuneya, nyuwo muhaana wooniherya ororomeleya mwaakhwaniheryaka khula muteko onivahiwa anyu. Exeeni eniiriha eyo okhala yootthuneyexa? Mwaha woowi mwiira siiso axitokweene animoona wira Yehova oheemererya wira nvahiweke miritti sikina suulupale mmulokoni.​—Esal. 101:6; mmusome 2 Timótheyo 2:2.

MOONIHERYE NTTITTIMIHO NOOREERELA

15, 16. (a) Mwa enamuna xeeni Eliseyo oonihenrye awe omuttittimiha mwiixuttihi awe? (Nwehe elatarato yoopacerya.) (b) Moota xeeni Eliseyo aalipinhe awe maprofeta akhwaawe?

¹⁵ Yowiiraneya ya namaranttela a Eliya, Eliseyo, ennooniherya-tho moota anna olelo-va akhanle aya oowaattittimiha axitokweene apacenrye khalai orumeela. Nuumala Eliya ni Eliseyo oxekurya egrupu emosa ya maprofeta oYeriko, awosa yaheetta arowaka Omuro Yordani. Vaaphiyale aya, “Eliya ahirula mukhumi awe, ahikhuna, khumanela mmasini. Màsi awo yahikawanyeya”. Nuumala olapuwa muro ole woowuuma, awosa yaahivikaniha ‘ovanela yettaka sisale’. Vannooneya wira Eliseyo khaapuwela wira aahiixutta itthu sotheene saatthuneya. Mpakha okathi Eliya aakuxiwe awe, Eliseyo aanihela vamurimani vawe khula etthu yaixuttihiwa awe. Nto Eliya aahikuxiwa ni eyuupuri. Nuumala-vo, okathi waatthika awe, oryeene oYordani Eliseyo aahimana maasi ni mukhumi wa Eliya, ohimyaka so: “Ari vai Apwiya, Muluku Èliya?” Nto maasi ale yaahikawanyeya.​—2 Mam. 2:8-14.

¹⁶ Niireke nyuwo moowerya woona wira mwiiriirya woopacerya wa Eliseyo aapanke etthu emosaru yeele yaapakiwe ni Eliya? Exeeni eyo eryaaya yootthuneya? Woonasa wene, Eliseyo khaapuwenle wira vano kirina aka owerya, kihaana oturuka itthu sotheene. Ohiya-vo, mwaha wa ovikaniha otthara inamuna sa Eliya, Eliseyo aahooniherya omuttittimiha mwiixuttihi awe, ni aahaalipiha maprofeta akhwaawe. (2 Mam. 2:15) Muhoolo mwaya, muhina mwa iyaakha 60 sa muteko wa eprofeta, Yehova aahimweemererya Eliseyo opaka miiriirya sinceene ovikana iye saapakiwe ni Eliya. Nto eyo enniixuttiha exeeni olelo-va?

17. (a) Moota xeeni ale aniixuttihiwa olelo-va akhanle aya ootakiha muupuwelelo wa Eliseyo? (b) Waphiya okathi aya, Yehova onrowa waarumeela sai ale aniixuttihiwa?

¹⁷ Nto muhooneke wira nuumala ovahiwa miritti mmulokoni, muhaana orumeela okhulupale orina anyu wira muturuke enamuna itthu saapakiwa aya khalai. Opaka mirukunuxo khonikhumelela mwaha woowi ookhala mutthu oniphavela opaka eyo, masi ohaana okhala mwaha woowi muloko onnitthuneya ni vakhala wira yaakheliwe malakiheryo anikhuma mootthokeyani wa Yehova. Ntoko siisaale Eliseyo saalipinhe awe maprofeta ale ni oonihenrye awe omuttittimiha ole aamwiixuttinhe muteko, nyuwo muhaana waalipiha anninyu ni waattittimiha axitokweene akina a khalai nvikanihaka ottharihela malakiheryo ari mBiibiliyani anitthara aya. (Mmusome 1 aKorinto 4:17.) Ekeekhai wira okathi onirowa anyu wiixutta itthu sinceene, nyuwo munoowerya okumiherya mirukunuxo sinikhaliherya muloko weetta moovarihana ni mulokiheryo wa Yehova yoowo onirowa vahoolo. Tthiri ntoko siisaale seeranenye aya okathi wa Eliseyo, Yehova pooti oweemererya ale aniwiixuttiha anyu opaka itthu suulupale ovikana iye sipanke anyu nyuwo nwiixuttinhe.​—Yohani 14:12.

18. Xeeni wiixuttihiwa anna mmulokoni eryaaya etthu yootepexa otthuneya olelo-va?

¹⁸ Hiyo ninnaamini wira malakiheryo ala ni ale avahiwe muru ovinre animwaakhaliherya axitokweene osuka okathi wira awiixuttihe akina. Nave ninniwehererya wira anna anceene mmulokoni animweemererya wiixuttihiwa iwo ni muhoolo mwaya orumeela malakiheryo awo wira akhapelele ipwittipwitthi sa Yehova. Mweera siiso munoolipiha muloko wa olumwenku wotheene ni munoomukhaliherya khula mutthu okhala oororomeleya okathi wa mixankiho sinrowa okhumelela muhoolo.

[Inoota]

[Ekaaxa epaaxina 8]

Moota Woowiiniha Nikuruta Akina

AXITOKWEENE anisuwela saana owiiniha nikuruta akina, annivaha malakiheryo ala:

1. Nvaheke ntakiheryo na malavulelo ni itthu sinipaka anyu.

2. Wira wunnuwe omunepani mmutumererye ole onimwiixuttiha anyu okhalana eprograma ya omusoma Biibiliya ntero muhina mwa eyaakha emosa.

3. Nvareke muteko woolaleerya hoothe. (Nwehe elatarato eri vakaapani.)

4. Mmwiixuttihe ohoolela oratteene mithukumano sa muteko woolaleerya.

5. Okathi onilavula anyu mwaha wa atthu otheene, munvaheke ekoopiya ya mwaha anyu, wira owo wooneke moota munilavula anyu.

6. Okathi mukina mmulattuleke owo ni emusi awe wira akhale ni nyuwo okathi wa omulompa Muluku vatthokoni.

7. Mmulattuleke owo ni emusi awe wira murowe olaleerya ni emusi anyu muttetthe yoole ohinilaleeriwa vanceene.c

[Enoota]