MURU 9
Itthoko Sihirina Tiithi Aahiiso Maama Pooti Okhumela Saana!
1-3. Exeeni eniiriha waatta itthoko sihirina tiithi aahiiso maama, nto eyo enaaxankiha sai yaale anikhala itthoko iyo?
WESTADOS UNIDOS itthoko sihirina tiithi aahiiso maama, “sinootepa waatta”. Ela etthu eniiraneya ilapo sinceene. Anamuyari ni anamwane imilyau sinceene annixankiheya mwaha wa nummuru nuulupale na anamathelana animwalana, anikhumelana, anivalaana, ni anamwane aniyariwa masi anamuyari aya ahilepinhe othelana waya.
2 Maama mmosa ohitheliwe, ohimmye so: “Miyo ka naamukhweli orina iyaakha 28, ni kookhalana anamwane anli. Kinnixanka vanceene okhala wira nkiniphavela waahuwa anaaka ahirina tiithi aya. Vankhala ntoko wira khuuvo onikithokorerya. Anaaka ikwaha sinceene annikiweha kinlaka, nto eyo ennaawereya”. Ohiya paahi owanana mixankiho, ntoko onanariwa, wiivaha nthowa, ni omeekha, anamunceene yaale anaahuwa anamwane mekhaya, annixankiheya vanceene nthowa na ovaraka muteko ottaiwene vamosa ni miteko sa vate. Namuyari mmosa onaahuwa anamwane mekhawe, ohimmye so: “Okhala namuyari onaahuwa anamwane mekhawe etthu yooxankiha. Nuumala wiimananiha vanceene, mutthu ohaana opacerya ovara miteko sinceene. Masi mowaakuveya vaavo mutthu oniwerya awe opaka itthu iyo, sinnikhumelela-tho miteko sikina sintthuneya ovariwa”.
3 Anamwane anikhala itthoko sihirina tiithi aahiiso maama, ikwaha sinceene annikhalana mixankiho. Waaniheryasa anniwanana muxankiho vaavo tiithi aahiiso maama onikhuma awe vate aahiiso okhwa. Wa anamwane anceene, ohikhalana tiithi aahiiso maama etthu enaawereya vanceene.
4. Ninsuwela sai wira Yehova onnoonela othunku itthoko sirina namuyari mmosa?
4 Okathi aalemphwa awe Biibiliya, saahikhala itthoko saarina namuyari mmosa paahi. Soolempwa ikwaha sinceene sinnaaromola “anamwane èkwasuni” ni “athiyana anamukhweli”. (Okhuma 22:21; Otumererya 24:19-21; Yobi 31:16-22) Yehova Muluku aaniwoonela othunku okathi yaahaawa aya. Mulipa oolepa esalimo aahimwiitthana Muluku okhala ‘tithi ànamwane ikwasuni, oniwakiha athiyana anamukhweli’. (Esalimo 68:6) Tthiri, Yehova onnoonela othunku itthoko seiye sirina namuyari mmosa! Mwekeekhai, Nuulumo nawe ninnivaha malakiheryo aniwerya waakhaliherya atthu ala wira akhumele saana.
OKHAPELELA ITTHU SA ETHOKO
5. Muxankiho xeeni wanipacerya, onaaphwanya anamuyari oohithela aahiiso oohitheliwa?
5 Nkahaya muthokorerye muritti wa okhapelela empa. Ikwaha sinceene athiyana annuupuwela wira vaamureera yaarina mulopwana vate. Mwa ntakiheryo, okathi empa enittonya aya, annixankiheya yuupuwelaka moota wootthunyela. Moolikanasa, alopwana amwalanne niinanoru ni axaaraya aahiiso akhweliwe, waaniheryasa miteko sikina sa vate sinnaaxankiha vanceene moota woovara. Nthowa na ohikhapeleleya oratteene itthu sa vatthokoni, anamwane annixanka ni anikhala oohisukeya.
Nyuwo anamwane, muhaana omwiiwelelaka tiithi inyu oohithela aahiiso maama anyu oohitheliwa
6, 7. (a) Nlikanyiho xeeni nivahiwe ni “muthiyana òkhomala” onihimmwa mu eliivuru ya Miruku? (b) Moota xeeni wiimananiha wa namuyari oohithela aahiiso oohitheliwa, onimukhaliherya aya ovara miteko sa vate?
6 Exeeni eniwerya waakhaliherya? Nkahaya moone ntakiheryo nivahiwe ni “muthiyana òkhomala” onihimmwa mu eliivuru ya Miruku 31:10-31. Miteko sinivara awe khasireere, eyo piiyo, othuma, otumiha, ottottha, waapeya, oruuha ikaruma vate, olima ni omweetta nakoso. Aawerya sai opaka eyo? Mwaha woowi aari oowiimananiha, avaraka muteko mpakha makaaripi, ni aavinya voosiisu wira apacerye miteko sawe. Muthiyana ola aari oowiitthokiha ni aanaakawela miteko atthu akina ni aanaakhapelela. Moohaaniherya aanittottopeliwa!
7 Akhala wira nyuwo mwa namuyari ori mekhawe, muhaana osuwela miritti sirina anyu vatthokoni. Musiveliweke ni miteko iyo, mwaha woowi onnincererya ohakalala wa aniinyu. Nto, wiitthokiha ni waapaka apalano etthu yootthuneya. Biibiliya onihimya so: “Ovara muteko n’utthokelela onnisarya nikuphi”. (Miruku 21:5) Tiithi mmosa ohirina muthiyana, onihimya so: “Ikwaha sinceene kinuupuwela opaka yoolya kavoliwa etala”. Masi soolya sootthokihiwa oratteene ti soolokexa wa erutthu ovikana seiye simpakiwa mowaakuveya. Waaniheryasa pooti okhala vooloka wiixutta opaka itthu sikina sa vate. Waakoha apatthani aahiiso atthu akina, onoomukhaliherya maama ohitheliwe wiixutta moota woopaka empa aahiiso waahuwa axinama.
8. Anamwane a tiithi aahiiso maama ori mekhawe akhaliheryeke sai miteko sa vate?
8 Niireke wira ti vooloka waavekela anamwane wira akhaliheryeke? Maama mmosa ohitheliwe ohimmye so: “Mutthu omphavela wira ovare miteko saari sa tiithi ophavelaka waakhweiherya anamwane”. Eyo pooti okhala yooweemerereya, masi waaniheryasa khahiyo okathi wotheene etthu yooloka wa mwaana. Amiravo yaamwiiwelela Muluku okathi wa khalai, yaanivahiwa miteko wira avareke. (Maphattuwelo 37:2; Nsipo n’Ophentana 1:6) Nnaamwi vatthuneyaka okhalana ephoole wira muhiwuncererye miteko anamwane, masi vanrowa okhala va miruku waathanlela miteko ntoko orapiha iparatho, ni okwesa ekwaartu aya. Nthowa xeeni muhinivara anyu vamosa miteko sikina? Eyo pooti okhala etthu yoohakalaliha vanceene.
MUXANKIHO WA MOOTA WOOPHWANYA YOOLYA
Muhaana ovirihaka okathi munceene ni aniinyu
9. Nthowa xeeni ikwaha sinceene aximaama oohitheliwa anixankiheya aya moota woophwanya musurukhu?
9 Ophwanya musurukhu wira athume itthu sootthuneya, etthu yoovila wa anamuyari anaahuwa anamwane mekhaya, vanceenexa wa aximaama amiravo ahitheliwe.a Mu ilapo kuvernu onaakhaliherya awe atthu ntoko ala, pooti okhala vooloka ovaha nsina wira okhaliheriweke, mpakha ophwanya muteko. Biibiliya onneemererya wira maKristau pooti orumeelaka sookhaliherya iyo sinivahiwa vaatthuneyaka. (aRoma 13:1, 6) Mixankiho iyo sinnaaphwanya anaamukhweli ni athiyana oomwalaniwa. Othowa musurukhu onniwiiriha atthu ala ophavela otthikela ovara muteko, nnaamwi yaalimalenle ovara miteko sa vate, nto ikwaha sinceene aniphwanya muteko onaakheliwa musurukhu vakhaani paahi. Akina anniwerya olokiherya mukhalelo aya vaavo animwiira aya kursu muulupale oniixuttiha muteko, aahiiso kursu a okathi vakhaani.
10. Maama oohitheliwa aatthokiheryeke sai anaawe etthu enimwiiriha waavya muteko?
10 Muhituthuwe okathi aniinyu ahinrowa aya osiveliwa vaavo munaavya anyu muteko, ni muhiivaheke nthowa. Nto, mwaatthokiherye nthowa naya vantthuneya anyu ovaraka muteko, ni mwaakhaliherye osuwela wira Yehova onoovekelani wira mwaakhapeleleke aniinyu. (1 Timótheyo 5:8) Muhoolo mwaya anamwane anceene annilimalela. Masi, muhaana ophavelaka okathi munceene wira nviriheke n’awo moovarihana ni eprograma anyu. Othokorerya iwo woophenta pooti okhaliherya ovukula muxankiho wa othowa musurukhu etthoko enikhalana aya.—Miruku 15:16, 17.
TANI ONIMUKHAPELELA MUKHW’AWE?
Anna a mmulokoni ahaana waathokoreryaka “anamukhweli” ni “ikwasuni”
11, 12. Mikano xeeni anamuyari anaahuwa anamwane mekhaya antthuneya aya okhalanaka, ni moota xeeni anrowa aya opaka eyo?
11 Ikwaha sinceene anamuyari anaahuwa anamwane mekhaya, annaataana vanceene ni anaaya, masi vantthuneya okhalana ephoole wira mikano Muluku opanke awe eriyari ya anamuyari ni anaaya sihivikaniweke. Mwa ntakiheryo, pooti okhumelela mixankiho suulupale akhala wira maama ohitheliwe, oniwehererya wira mwanawe mulopwana ovareke miteko siri sa muhooleli eetthoko, aahiiso akhala wira maama ola onnimuleela mwanawe muthiyana isiiri sawe. Opaka eyo khahiyo etthu yooloka, ni ennimukhulumula mwaana ni oxankiha muupuwelo awe.
12 Mwaalipiherye aniinyu wira munrowa waakhapelelaka, ohiya awo wookhapelelani nyuwo. (Munwehe 2 aKorinto 12:14.) Waaniheryasa nyuwo ikwaha sikina pooti ophavelaka nikhaliheryo aahiiso miruku. Muhaana ovekelaka nikhaliheryo wa axitokweene a mmulokoni aahiiso arokora owunnuwela ari maKristau, ohiya aniinyu acikhaani.—Tito 2:3.
NVIKANIHEKE WAALAKA ANAMWANE
13. Muxankiho xeeni waaniheryasa orina awe maama ohitheliwe voohimya sa moota wowaalaka anamwane?
13 Mulopwana pooti ohikhalana mixankiho sinceene voohimya sa anaawe omwiiwelela ntoko mulipa-oolaka, masi muthiyana pooti okhalana muxankiho muulupale mmwaha ola. Maama mmosa ohitheliwe onihimya so: “Anaaka axilopwana arina erutthu ni nsu na mulopwana muulupale. Ikwaha sikina vannivila waalaka mwaha woowi ahinnuwa”. Waaniheryasa nyuwo munninla ikwaha sinceene mwaha wa okhwa wa ole aathelanne anyu aahiiso wiivaha nthowa wala onanariwa mwaha wa omwalana. Akhala wira oowanli anyu mookhalana ehakhi ya ohalana n’anamwane, moovarihana ni kuvernu, waaniheryasa nyuwo munnoova wira mwaninyu onrowa othanla okhalaka ni ole omwalanne anyu. Mikhalelo iya pooti wiiriha okhala woovila waalaka anamwane oratteene.
14. Anamuyari anaahuwa anamwane mekhaya anrowa waalaka sai anaaya mookhalela?
14 Biibiliya onihimya wira “mmiravo onihiwa ettaka sintthunawe, owùliha muru ame awe”. (Miruku 29:15) Yehova Muluku onnookhaliheryani wira nvaheke malamulo vatthokoni vanyu, tivonto muhiivaheke nthowa aahiiso woova. (Miruku 1:8) Muhikhala-khale mpakaka itthu sinivirikana ni malakiheryo ari mBiibiliyani. (Miruku 13:24) Mwiimananiheke wira mwaareereleke murima aniinyu, masi moohivirikaniha malamulo. Moovira wa okathi anamwane anrowa wiiwelelaka. Masi, muhaana othokoreryaka miyuupuwelo sa aniinyu. Tiithi mmosa okhweliwe amwaarawe onihimya so: “Kinnaalaka anaaka mmukhalelo woomaaleleya wira ahitepeke oriipiwa murima mwaha wa opweteya amamaya. Ninnivaanela okathi wotheene. Okathi nnaapeya ahu yoolya ya ohiyu, ‘ninnileelana isiiri sahu’. Okathi owo, mootaphuwa annikileela isiiri saya”.
15. Namuyari oomwalaniwa osyakeke exeeni, vaavo onilavula awe sa ole omwalanne awe?
15 Akhala wira nyuwo moomwalaniwa, muhinanarihe nttittimiho na ole omwalanne anyu. Onyakulihana wa anamuyari onnaawereya anamwane, nto onoowiiriha anamwane ohaattittimihaka anamuyari aya. Musyake masu ooveeha ntoko ala: “Weyo, orina murima wa atith’awo!” Nnaamwi ole omwalanne anyu ookumihenryeneni mixankiho, nlelo onnivikaniha okhala namuyari a mwaninyu, mwaana yoowo onitthuneya ophentiwa ni okhapeleliwa ni nyuwo oowanli anyu.b
16. Marehereryo xeeni oomunepani anitthuneya opakiwaka moohihiyererya wira alakiwe anamwane, mu itthoko sirina namuyari mmosa?
16 Ntoko nthokorenrye ahu mmiru sivinre, olaka ontaphulela wiiniha nikuruta, wiixuttiha, ohiya ohukhumu. Mixankiho sinceene pooti osyakiwa akhala wira enookhala eprograma yooloka ya wiixuttiha itthu somunepani. (aFilipi 3:16) Ohicompela mithukumano sa eKristau onnikhaliherya vanceene. (aHéberi 10:24, 25) Nave-tho, muhaana okhalanaka yoosoma ya Biibiliya ya vatthokoni khuta esumana. Ekeekhai wira khahiyo ti vookhweya opaka yoosoma eyo moohihiyererya. Maama mmosa onaakhapelela anaawe onihimya so: “Nuumala ovara muteko wa nihiku, ekeekhai wira mutthu onniphavela ophumurya. Masi kinnitthokiha muupuwelo aka wira kisome ni mwanaka muthiyana, okhala wira kinnisuwela otthuneya waya opaka eyo. Nto mwanaka, onnisiveliwa tthiri opaka yoosoma eyo!”
17. Exeeni nniixutta ahu voohimya sa ohuiwa wa Timooteyo, mpatthani awe Paulo?
17 Mpatthani awe murummwa Paulo, Timooteyo, waaniheryasa iixuttihiwe malamulo a Biibiliya, ni amamawe, ni apiipi awe, ohiya apapawe. Masi, Timooteyo aahikhala muKristau oophwanelela! (Miteko s’Arummwa 16:1, 2; 2 Timótheyo 1:5; 3:14, 15) Nave-tho, nyuwo pooti olipelelaka wira aniinyu anrowa okhumela saana, vaavo muniimananiha anyu waahuwa ni ‘owettiha ni walakaka n’ikano s’Apwiya’.—aÉfeso 6: 4.
MOOTA WOOXINTTA OMEEKHA
18, 19. (a) Onoonihereya sai omeekha wa namuyari onaahuwa anamwane mekhawe? (b) Miruku xeeni sinivahiwa wira mutthu axintte soophavela sa erutthu?
18 Namuyari onaahuwa anamwane mekhawe aahiikhupanyerya oriki: “Okathi onitthikela aka owaani, ni khiyaweha ixiri iye xexe, vanceenexa nuumala anamwane orupa, omeekha onnitepa okirweela”. Tthiri omeekha ikwaha sinceene muxankiho muulupale wa anamuyari anaahuwa anamwane mekhaya. Eri etthu yeephattu okhalana munkhela wa ompatthani onikumiherya aya ekasamento. Niireke wira ti vooloka ophavela ophuka mwaha ola moohuupuwela mixankiho sinrowa okhumelela muhoolo? Mahiku a murummwa Paulo, amiravo akina athiyana yaari anaamukhweli, yaahihiya soophavela saya sa orupihana saahapuxaka ephiro ya Kristau. (1 Timótheyo 5: 11, 12) Ohiya soophavela sa erutthu sinnuwaka pooti ohonona itthu somunepani.—1 Timótheyo 5:6.
19 Mulopwana mmosa muKristau ohimmye so: “Nnaamwi ophavela orupihana oryeene wuulupalexa, masi mutthu pooti owerya oxintta. Okathi muupuwelo wa ophavela orupihana onipacerya aya, muhihiye wunnuwaka. Mutthu ohaana okhoottela muupuwelo owo. Omuupuwela mwaninyu etthu enikhaliherya vanceene”. Nuulumo na Muluku ninninivaha miruku nihimyaka so: “Vano, mpwetexe mwettelo anyu wa vathí-va: enamuttompe, oraruwa, osiveliwa n’itthu sonanara n’uphavela seiyo”. (aKolosi 3:5) Akhala wira muniphavela ottharuwa owurya eviinyu, niireke wira mwamakelaka ovira-vira opuro oniwuryiwa eviinyu, aahiiso otthekulaka n’atthu animakela olavula voohimya sa soowurya soohaphala? Nnaari, nyuwo khimwaapaka eyo! Moolikanasa, eyo ennivariheleya muteko wa soophavela sa erutthu.
20. (a) Woopiha xeeni okhanle wuuryana ni mutthu ohikhanle muKristau mukhwiihu? (b) Eseekulu yoopacerya ni olelo va, moota xeeni atthu aniwerya aya ovilela muxankiho wa okhala mekhaya?
20 MaKristau akina annipacerya wuuryana ni atthu ahikhanle maKristau akhw’aya. (1 aKorinto 7:39) Niireke wira eyo enniphuka muxankiho aya? Nnaari. Muthiyana muKristau, omwalaniwe oloponle so: “Yookhala etthu yootepa otakhala ovikana ohithela aahiiso ohitheliwa. Etthu ene ti ela: othelana ni mutthu oohiphwanelela!” Eseekulu yoopacerya, anaamukhweli maKristau moohaaniherya wookhala okathi yaariipiwa aya murima nthowa na okhala mekhaya, masi ale yaari a miruku yaanivikaniha ovara miteko ntoko ‘owakhela orattene aletto, orapiha inawu s’aKristu, wakhaliherya alipa-òhawa’. (1 Timótheyo 5:10) MaKristau oororomeleya olelo va, yaawo mu iyaakha sinceene, aniwehererya omphwanya mutthu onimoova Muluku wira athelane, annivikaniha opaka miteko iyo. Murokora mmosa orina iyaakha 68, okathi aapacerya awe woona othunku nthowa na okhala mekhawe, aanirowa waaxukurya anaamukhweli akhw’awe. Owo onihimya so: “Kooweha wira okathi onixukurya aka, okhapelela empa aka, ni okhapelela sootthuneya saka somunepani, khonihala okathi wooxanka mwaha wa omeekha”. Owiixuttiha atthu akina voohimya sa Omwene wa Muluku, muteko onikhaliherya vanceene.—Matheyo 28:19, 20.
21. Mu iphiro xeeni nivekelo ni apatthani ooloka aniwerya aya waakhaliherya ale ari mekhaya?
21 Tthiri, khokhanle mwiiriirya onimaliha omeekha. Masi nikhaliheriwaka ni Yehova, hiyo nnoowerya ovilela. Nikhaliheryo nno, ninrwa vaavo muKristau ‘vahinihiya awe omulompa Muluku, avekelaka okhaliheriwa, othana n’uhiyu’. (1 Timótheyo 5:5) Olompa ori ovekela ni murima wotheene, aayo, ovekela mooluttuweliwa, waaniheryasa ni wunla. (Munwehe aHéberi 5:7.) Omuleela Yehova mixankiho sanyu “ohiyu n’uthana”, mwekeekhai pooti wookhaliheryani. Nave-tho, okhalana apatthani ooloka pooti onikhaliherya wira nxintte omeekha. Okhala ni apatthani ooloka, pooti omwiiriha mutthu wiiwa “nulumo nowepesa”, ni noolipiha ntoko sihimmya aya eliivuru ya Miruku 12:25.
22. Itthu xeeni sinrowa wookhaliheryani, okathi onixanka anyu nthowa na omeekha?
22 Akhala wira miyuupuwelo sa othunku mwaha wa omeekha sinimoophwanyani, okhala wira eyo etthu enilipelela ahu, musuweleke wira khuuvo ohirina mixankiho. Mwekeekhai “axinn’inyu a elapo yothene” annihaawa mu inamuna soovirikana. (1 Pedru 5:9) Musyake wuupuwela moota mwaakhala anyu khalai. (Musuweli 7:10) Muupuweleke ni nweheke sooloka sa niinano siniphwanya anyu. Mwa sotheene mwiimananihe ovikaniha okhala oororomeleya wa Yehova wira muhakalalihe murima awe.—Miruku 27:11.
MOOTA AKINA ANIWERYA AYA OKHALIHERYA
23. Muritti xeeni arina aya maKristau, wa anamuyari anaahuwa anamwane mekhaya mmulokoni?
23 Nikhaliheryo na maKristau akhwiihu etthu yoolokexa. Yakobo 1:27 onihimya so: “Edini yorera ni yoloka vamaithoni va Muluku Tith’ihu t’ila: nijaleke ikwasuni, najaleke athiyana anamukhweli, nakhaliheryaka mohawani mwaya”. Aayo, maKristau annitumereriwa okhaliherya itthoko sa anamuyari anaahuwa anamwane mekhaya. Itthu xeeni maKristau akhanle aya oopaka wira akhaliheryeke?
24. Ipantta xeeni anamuyari anaahuwa anaaya mekhaya akhanle aya ookhaliheriwaka?
24 Pooti ovahiwaka itthu sa werutthuni. Biibiliya onihimya so: “Akhala mutthu ohinthoiwa muhakhu wa vathí-va, amona munn’awe òthoiwa, khùmiha murim’awe, khuhinvaha etthu, onwerya sai ohimya wira: ‘Miyo kinnimphenta Muluku’?” (1 Yohani 3:17) Nuulumo na eKriki noowi “amona”, khontaphulela onweha nihiku nimosa aahiiso okumanana paahi, nintaphulela osuwela oratteene mixankiho sawe. Eyo entaphulela wira maKristau oophenta ahaana ophavela osuwela mixankiho sa vatthokoni-vo. Waaniheryasa pooti wira etthoko eyo ethoiwale musurukhu. Akina annixankiheya ni moota woolokiherya empa. Aahiiso akina pooti oxukhurela vaavo anilattuliwa aya orowa olya, wala efesta yaamukhaani.
25. Moota xeeni maKristau anrowa aya owoonela othunku anamuyari anaahuwa anamwane mekhaya?
25 Moowuncererya, 1 Pedru 3:8 onihimya so: “Othene anyu mukhaleke òwìwanana ni òkhupanyerya; mphentaneke ntoko axinna; mukhaleke a ikharari”. Muthiyana mmosa oohitheliwa orina anamwane athanu ni mmosa, ohimmye so: “Etthu enkixankiha vanceene ni ikwaha sinceene, ori ohisuwela etthu yoopaka. Masi, iwoora sikina munna aahiiso murokora, onnikihimeerya wira: ‘Joana, munnivara muteko wooloka. Muteko ola onookhumela saana’. Osuwela paahi wira aakhala atthu anoothokorerya, etthu enikhaliherya vanceene”. Athiyana yaale ari maKristau oowuuluvala, annikhumela saana yaakhaliheryaka aximaama amiravo anaahuwa anamwane mekhaya, vaavo vanaawiriyana aya okathi anikhalana aya mixankiho seiyo saarowa okhala sowuuliha muru othokorerya ni mulopwana.
26. Moota xeeni alopwana yaawo ari maKristau oottokotthela, anrowa aya waakhaliherya anamwane ikwaasuni?
26 Alopwana ari maKristau pooti okhaliheryaka mu inamuna sikina. Yobi, yoowo aari mulopwana a xariya aahimmye so: “Kanàkiha ikwasuni saharina òmuroromela”. (Yobi 29:12) Moolikanasa, olelo va, alopwana akina ari maKristau annaakhaliherya anamwane ari ikwaasuni, ni annaakhapelela ni ‘waphenta ni murima wowarya’. (1 Timótheyo 1:5) Ahiliyalaka itthoko saya, ikwaha sikina annirowa olaleerya vamosa ni amiravo ala, ni pooti waalattulaka wira yiirele mpantta yoosoma aya vatthokoni aahiiso orowa otthekula vamosa. Oreera murima mmoota owo pooti owoopola anamwane ikwaasuni mmweettelo woohiloka.
27. Nikhaliheryo xeeni anamuyari anaahuwa anamwane mekhaya aniwehererya aya moohihoverya?
27 Tthiri, anamuyari anaahuwa anamwane mekhaya ahaana ‘okuxa muritti aya’. (aGalasia 6:5, NM) Masi pooti owehereryaka okhaliheriwa ni anna ni arokora aya oophenta eeKristau, ni okhaliheriwa ni Yehova Muluku. Biibiliya onihimya so: “Apwiya . . . annasuka athiyana anamukhweli, annisuka-tho ikwasuni”. (Esalimo 146:9) Okhaliherya woophenta wa Yehova, onookhaliherya itthoko sirina namuyari mmosa paahi okhumela saana!
a Akhala wira muKristau mmiravo muthiyana onnipacerya okhalana mweettelo woohiloka, muloko wa eKristau khonsiveliwa ni itthu iyo soohiloka simpaka awe. Masi akhala wira owo oottharuwa, axitokweene ni atthu akina a mmulokoni pooti ophavela omukhaliheryaka.
b Khannihimya mikhalelo seiye mwaana onaakiheriwa awe namuyari oohaaxa. Nave-tho, akhala wira tiithi aahiiso maama onneererya ovaanyiha moota onaalamulela anyu anamwane, aphavelaka wira anamwane awo akhume vatthokoni vanyu, nyuwo pooti ovekela nikhaliheryo wa apatthani inyu alimalenle myaha iyo, ntoko axitokweene a mmulokoni, wira yookhaliheryeni moota woophuka muxankiho owo.