Olumwenku Ola Oneetta Orowaka Woowi?

Mixankiho suulupale ni sowiiraneya sooriiriha erutthu soopakeya okhala sookhumelela sa khuta nihiku moolumwenkuni! Sotheene iya sintaphulela exeeni?

OVARELELEYA: Ibomba siniphuleya mmerkaato. Maprisoori ni anaxikola annoopeliwa oxikola. Anamwane annitthyawihiwa okathi yoowo axitiithi aya vahinaaweha aya. Athiyana ni olopwana oowuuluvala annitupheliwa vanlakani vene.

ETIINI: Ikerexa sinnikhaliherya maloko aniwana. Ahooleli a itiini annivahiwa nthowa, mwaha wa wiiviwa atthu a nihimo nikina. Vannihimmwa wira mapaatiri annaarupiha anamwane; ekerexa enavitha. Ninnivukuwa nummuru na atthu anrowa okerexa; ikerexa sinnitumihiwa.

MAPURO ANIKHALIWA: Mirii sinniikitthasiwa wira situmihiwe. Itakhwa sinnimalihiwa mwaha wa ikhuni. Maasi anninanarihiwa, ahinareera owurya. Ihopa sinnookhwa mwaha wa ikokhola sinikhuma mukaafrika ni mwaha wa iphiro sikina sa niinaano sa otthatta ihopa. Epheyo enninanarihiwa vanceene.

MUTEKO: Khuta mutthu a okuusini wa oSahara wÁfrica oniphwanya musurukhu wootepa oyeva va mwaakhani. Ahooleli aanakoso anrima annimpwatiha nakoso, awiirihaka atthu anceene ohikhalana muteko. Alipa oowokerya anniiriha olakaseya musurukhu wowooliwa, yoowo osukiwe obanko mu iyaakha sinceene.

OTHOWA WA YOOLYA: Atthu oophiyeryaka 800.000.000 moolumwenkuni khuta nihiku anrupa ni etala.

EKHOTTO: Atthu oovikanaka 100.000.000 ahookhwa mwaha wa ekhotto mu eseekulu 20. Sookhala ikaruma sa ekhotto nucleari soophiyerya owiiva apinaatamu otheene sarumeeliwaru ikwaha sinceene. Ikhotto sa atthu a elapo emosaru. Terrorismu ohuulaana mapuro otheene.

EKWERERE NI IRETTA SIKINA: Okhuma mwaakha wa 1918 kamasi Espanyola oowiiva atthu oophiyeryaka 21.000.000. Vano SIDA oopakeya okhala “epahuu yuulupale mu soohimmwa sa apinaatamu”. Kanser ni iretta sa murima sinniwiiva atthu anceene moolumwenkuni.

Muhiweheke yowiiraneya emosaa paahi. Niireke wira miyaha iya siniiraneya nipuro nimosaa paahi? Aahiiso mpantta wa ithoonyeryo sa mulaponi sirina yootaphulela yuulupale?

[Ekaaxa/Elatarato eri epaaxina 5]

Niireke Wira Muluku Onninthokorerya Toko?

Oxankiheya mwaha wa itthu siniiraneya sooriiriha erutthu aahiiso okhweliwa onniwiiriha atthu ophavela osuwela nthowa naya Muluku onihiya awe itthu iya siiraneyaka.

Tthiri Muluku onninthokorerya. Owo oonivaha vano yoohoolela ni yoomumuliha yekeekhai. (Matheyo 11:28-30; 2 Timótheyo 3:16, 17) Muluku oopaka marehereryo a omalamaliha ohaaxa, iretta, ni okhwa. Marehereryo awe anooniherya waakhapelela wawe atthu, ohiya paahi atthu a nloko nimosaa, masi atthu a maloko otheene, mahimo ni ilavulelo.​—Miteko 10:34, 35.

Nto hiyo ninnimuthokorerya Muluku? Nyuwo munnimusuwela Opattunxe erimu ni elapo ya vathii? Nsina nawe tanii? Yotthuna awe tiivi? Muluku onnaakhula makoho ala mBiibiliya. MBiibiliya owo onninihimeerya itthu sinipaka awe wira omalihe ohaaxa, iretta ni okhwa. Nipakee exeeni naaphavelaka ottottela muraarelo? Nintthuneya omusuwela owo ni yotthuna awe, ni nohaana wooniherya omwaamini wira niphwanye marehereryo awo. (Yohani 3:16; aHéberi 11:6) Ti vootthuneya-tho wiiwelela malamulo awe. (1 Yohani 5:3) Nyuwo munniphavela tthiri wiiwelela malamulo awo?

Wira nisuwele nthowa naya Muluku vaneemererya awe itthu iya, nohaana wiiwexexa mwaha muulupale. Biibiliya onnitthokiherya mwaha ola muulupale. Epaaxina 15 ya ebroxura ela, mwaha ola muulupale onnitthokiheriwa.