Okumi Anyu Oneetta Orowaka Woowi?
• Atthu anceene arii oovareya moomalela ni miteko sa khuta nihiku, tivonto annihiya wuupuwela onirowa okumi aya.
• Biibiliya onninleela sa miyaha sooreera sa muhoolo. Nave-tho onninlopola sa orwa wa murukunuxo muulupale mu elapo yotheene mmilokiheryo sa apinaatamu. Wira niphwanye muraarelo wa yeele enihimya Biibiliya ni osyaka ehasara, ti vootthuneya wiira etthu moohipisa.
• Aakhala atthu anisuwela enihimya Biibiliya ni aneererya ovarihela muteko, masi annihiya soovelaveliha s’ekumi saaroohaka ephiro yoohiloka.
• Niireke wira moohakalala ni mweettelo wa okumi anyu? Mwaaphavelaka opaka etthu, munnithokorerya moota sinrowa aya ohapuwela soophavela sa okumi anyu muhoolo?
[Ekaaxa/Ilatarato siri epaaxina 9]
Etthu Xeeni Yootthuneyexa wa Nyuwo?
Munrowa otthokiha sai miyaha iyo sinttharelana? Muhele nummuru okhuma 1 mpakha 10 moovarihana ni ele eri yoopacerya okhala yootthuneya wa nyuwo.
Sinceene mwa seiyo ti sootthuneya, masi vaavo vanithanla anyu, tiivi enirwa mapuro oopacerya? Mapuro a nenli? Ni mapuro oottharelana.
․․․ Otthekula
․․․ Muteko aka
․․․ Ekumi aka
․․․ Ohakalala waka
․․․ Oothelana aka
․․․ Axitiithi aka
․․․ An’aka
․․․ Empa yooloka, ikuwo sooreera
․․․ Okhumela saana mwa sotheene sinivar’aka
․․․ Omukokhorela Muluku
[Ekaaxa/eri epaaxina 10, 11]
Soothanla Sanyu Sinooroihani Ephiro Eniphavela Anyu Toko?
MUTHOKORERYE MAKOHO ALA
OTTHEKULA: Otthekula onithanla aka onnikiruuhela omumuliha? Onikikuxa murima kinaphiyerya oleva okumi aka aahiiso orakaliha? Toko mukhalelo wa “otthekula” ti woohakalaliha mu okathi wa vakhaani, masi onawerya oruuha oriipiwa murima okathi munceene? Hataa otthekula iwo oryeene wooloka, kinimaliha okathi munceene ohinahala okathi woophiyerya opaka itthu sootthuneya?
MUTEKO AKA: Kinivara muteko wira kiphwanye yoolya ni yoowara, aahiiso kinipakeya epottha ya muteko owo? Muteko ola onimaliha okathi munceene ni ikuruu saka onakiiriha oleva ekumi aka? Yoophavela aka erii omaliha okathi munceene kivaraka muteko aahiiso omaliha okathi owo kiri ni oothelana aka walaa an’aka? Akhala wira patarau aka onikiruma muteko yoowo onixankiha yowuupuxerya aka ya vamurimani aahiiso ikwaha sinceene onikhoottiherya itthu somunepani, kinoovara muteko owo mwaha woowi nkimphavela oyeleela muteko?
EKUMI AKA: Kinooniherya ohicalela ekumi aka aahiiso kinnimananiha okhapelela ekumi aka? Okathi wotheene kinilavula sa ekumi aka paahi? Okhapelela waka ekumi, onnooniherya waathokorerya atthu a vatthokoni vaka?
OHAKALALA WAKA: Ohakalala waka onrwa mapuro oopacerya? Kinikuha ohoolo moovikana ohakalala wa oothelana aka aahiiso an’aka? Kaaphavelasaka ohakalala, kinnooniherya wira ka murumeyi a Muluku eekeekhai?
OOTHELANA AKA: Kinimoona okhala mwaapara aka paahi vaavo vanikihakalaliha awe? Kinnimuttittimiha oothelana aka, kimuthokoreryaka ntoko mutthu? Omuthokorerya waka oothelana aka onnooniherya wira kinnimukupali Muluku?
AXITIITHI AKA: Ntoko mwaana, kinniwiiwelela axitiithi aka—kiwaakhulaka mwanttittimiho, kinavara miteko sa vatee sinikiruma aya, kinaphiya owaani okathi oniphavela aya, kinasyaka wataana woohiloka ni miteko sihintthuna aya? Ntoko oowunnuwela, kinnaawiriyana axitiithi aka ni nttittimiho, kaavahaka nikhaliheryo noophwanelela vaavo vanitthuneya aya? Moota onaathokorerya aka orii moovarihana ni ophavela waka aahiiso moovarihana ni miruku sa Nuulumo na Muluku?
AN’AKA: Kinnoona okhala muritti aka owiixuttiha an’aka makhalelo ooloka, aahiiso kinilipelela wira anrowa wiixuttihiwa oxikola? Kinnimaliha okathi munceene kitthekulaka ni an’aka, aahiiso kinaahiya athweelaka ni itthu soothweeliha, televisau, walaa computador. Kinnivikaniha waalaka an’aka vaavo vahinaakhwaniherya aya soovekela sa Muluku, aahiiso kinaalaka paahi vaavo vankinyoonyiha aya?
EMPA YOOLOKA, IKUWO SOOREERA: Ephoole enivaha aka mawarelo ni muhakhu aka—kinooniherya ophavela waapenela atthu yaattamanne aka? Ophavela okhala saana wa atthu a vatthokoni vaka? Aahiiso mwaha woowi ka murumeyi a Muluku?
OKHUMELA SAANA MWA SOTHEENE SINIVAR’AKA: Kinoona wira ti vootthuneya opaka itthu saana? Kiniimananiha opaka itthu moolokexa? Kinikhala ooxankiheya vaavo mutthu mukina vanipaka awe etthu moolokexa?
OMUKOKHORELA MULUKU: Okhalana weemereriwa ni Muluku ti wootthuneya wa miyo ovikana okhalana weemereriwa ni oothelana aka, an’aka, axitiithi aka, aahiiso patarau aka? Moophavela okhalana mukhalelo wa okumi wooloka, kineererya okuha mapuro a nenli muteko wa Muluku?
MUTHOKORERYE SAANA MIRUKU IYA SA BIIBILIYA
Mookumini mwanyu, Muluku munimukuha mapuro xeeni?
Musuweli 12:13: “Mwa itthu sothene silempwe-mu, omaliherya waya ti nno: Mmuttittimihe Muluku n’umova, mwìweleleke soruma sawe. Mutthu òpattuxeriwe weiwo”.
MWIIKOHEKE: Okumi aka onnooniherya wi kinoona itthu moovarihana ni Musuweli 12:13? Wiiwelela waka sooruma sa Muluku onnooniherya moota sinithokorerya aka miritti saka, vatthokoni, omutekoni, aahiiso oxikola? Aahiiso soophavela sikina walaa sookhanyererya sa okumi sinniiriha ohiya okathi wa miteko sa Muluku?
Wataana wanyu ni Muluku ti wa mukhalelo xeeni?
Miruku 3:5, 6: “Mwaroromeleke Apwiya ni murim’anyu wothene: muhiroromelé osuwela wanyu pahi! Nwupuwele Apwiya mothene munettanyu: awo anolokiha iphiro sanyu”.
Matheyo 4:10: “Mwakokhorele Apwiya Muluku anyu: yawo pahi mwattittimiheke”.
MWIIKOHEKE: Kinimuthokorerya Muluku ntoko siiso sihimmwale vasuluu-vo? Mmiteko saka sa khuta nihiku, ni othokorerya waka mixankiho, onnooniherya ororomela iwo ni wiiveleela?
Omusoma Biibiliya ti wootthuneya wa nyuwo?
Yohani 17:3: “Vano, ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”.
MWIIKOHEKE: Osoma waka Nuulumo na Muluku ni wuupuwelela moowiixerya esomme aka onnooniherya tthiri wira kinnikupali eyo?
Orowa mmithukumanoni sa muloko wa eKristau etthu yootthuneya wa nyuwo?
AHéberi 10:24, 25: “Nùpuxeryaneke mukina ni mukhw’awe, wira nakuviheryaneke ophenta n’uvara miteko sorera. Nihijompeleké orowa omuthukumanoni, . . . votepa-tho vavo vanònanyu wira nihiku n’Apwiya nri vakhiviru”.
Esalimo 122:1: “Murim’aka khurere okittela vìreliwaka: ‘Nrowé, mpani mw’Apwiya’”.
MWIIKOHEKE: Ephiro enirowa okumi aka ennooniherya oxukhurela yoohoolela ela eri mu Nuulumo na Muluku? Mweeri ovinre, nkironwe mmithukumanoni sa eKristau mwaha wa weemererya opaka itthu sikina?
Munnikhalela nthiti waaleela atthu akina yotthuna ya Muluku?
Matheyo 24:14: “Nave Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele . . . Vano-nto olumwenk’ula omaleke”.
Matheyo 28:19, 20: “Vano, murowé, mwawixuttiheke atthu a maloko othene . . . Mwawixuttiheke wettela sothene sòrumalyakani”.
Esalimo 96:2: “Nwipele Apwiya, muttottopele nsina naya. Mulaleye mahiku othene wira: ‘Awo t’annòpola’”.
MWIIKOHEKE: Kinnivaha efaita tthiri muteko ola mookumini mwaka? Olaleerya waka onnooniherya okupali otthuneya wa okathi onikhala aka?