Niireke Wira Ela ti Etthu Muluku Yaalakenly’awe?

NKAHAYA musome ejornale eri yotheene. Aahiiso munwehee televisau, walaa munwiriyane raadio. Munrowa ophwanya isaren’ye ene soohimmwa sinceene sa ecrime, ekhotto ni terrorismu! Nkahaya muupuwele mixankiho sanyu. Waaniheryasa, eretta aahiiso okhwa wa ole onimphenta anyu onniwiirihani okhala ooxankiheya vanceene. Khino nyuwo pooti woonaka ntoko siisaale soonaly’awe mulopwana ooloka Yobi, yoowo aahimmye wira “otakhaliwa waka wokihapala”.​—Yobi 10:15.

Vano mwiikoheke:

▪ Niireke wira ela ti etthu Muluku yaalakenly’awe wa miyo ni wa apinaatamu akina?

▪ Kinrowa ophwanya woowi nikhaliheryo wira kixintte mixankiho saka?

▪ Niireke wira nookhala nlipelelo noowi onookhala tthiri murettele valaponi?

Biibiliya onnaakhula moohakalaliha makoho ala.

BIIBILIYA ONIIXUTTIHA WIRA MULUKU ONROWA OLOKIHERYA MIKHALELO IYA VALAPONI.

“Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”.​—Wisupulula 21:4

“Alipa-òtuthunya anotupha ntoko nahe”.​—Yesaya 35:6

“Mahiku awo anotthukuwa maitho àlipa-òhona”.—Yesaya 35:5

“Onophiya okathi onìraya atthu othene ari mmahiye . . . ekhume mmahiye”.​—Yohani 5:28, 29

“Mw’atthu ankhala mmuttettheni khavo-tho onkela ohimya wira: ‘Miyo ki muretta’”.​—Yesaya 33:24

“Mmatta mothene muruwerye solya sinjene: mattumuxa esareye ipyó”.​—Esalimo 72:16

MUREERELO ONIKHUMA MU SOWIIXUTTIHA SA BIIBILIYA

Muhaakuvele okhootta ele enihimmwa wanipacerya wa ipaaxina iya moonaka okhala ntoko etthu ehinrowa wiiraneya. Muluku oolakela waakhwaniherya itthu iya, nto Biibiliya onnitthokiherya moota Muluku sinrowa awe opaka.

Ohiya vo, Biibiliya onnittotteleya mureerelo mu iphiro sinceene. Onoowerya woophwanyihani okumi wa ohakalala wekeekhai, hataa olelo va. Nkuupuwelani vakhaani soothananiha ni mixankiho sanyu. Iyo pooti ohela muhina othoiwa musurukhu, mixankiho sa vatthokoni, owereiwa aahiiso okhwa wa ole onimphenta ahu. Biibiliya onoowerya wookhaliheryani wira nwanane mixankiho sa mahiku ala, ni onoowerya okhala yoomumuliha vaavo vanaakhula awe makoho ntoko ala:

▪ Nthowa xeeni vanihaawa ahu?

▪ Neettiheke sai soothananiha sa okumi?

▪ Ninwerya sai wiiriha okumi wa etthoko ahu okhala woohakalala?

▪ Exeeni enniiraneela vaavo vanikhwa ahu?

▪ Nnimwaaweha-tho ale anaaphenta ahu akhwiiye?

▪ Ninrowa osuwelexa sai wira Muluku onrowa owaakhwaniherya anatiri awe a muhoolo?

Mwaha woowi munisoma eliivuru ela munooniherya wira nyuwo munniphavela osuwela ele Biibiliya eniixuttih’awe. Nto eliivuru ela enrowa wookhaliheryani. Nwehee wira iparagrafo sookhalana makoho aya vathii va epaaxina. Atthu anceene annisiveliwa ovarihelaka muteko nikoho ni waakhula, vaavo vanilavula aya sa Biibiliya ni Anamoona a Yehova. Ninlipelela wira nyuwo-tho munrowa osiveliwa. Nto mukhalane mareeliho a Muluku vaavo vanihakalala anyu ni itthu sootteeliha murima musomaka ele Biibiliya eniixuttih’awe tthiri!