Muruu Wa Namuloko Neethanu Nenli
Moota Womwaattamela Muluku Nnivekelo
Nthowa xeeni vanitthuneya ahu ovekelaka wa Muluku?
Nipakee exeeni wira Muluku owiriyane mavekelo ahu?
Muluku onaakhula sai mavekelo ahu?
ELAPO ya vathii ti yootepa oyeva yalikanyihiwa ni erimu. Tthiri, Yehova, ‘yowo opattunxe erimu n’ilapo ya vathí’, onilikanyiha maloko aapinaatamu ntoko nttoittoi na maasi nnikhuma mmwaapuni. (Esalimo 115:15; Yesaya 40:15) Hataa vari siiso, Biibiliya onihimya wira: “Apwiya anniwattamela othene ale anavekela, yale anaroromela ni murim’aya w’ekekhai. Apwiya annavaha simphavelaya ale anattittimiha: anniwiriyana okhuwela waya”. (Esalimo 145:18, 19) Nkahaya muupuwele yootaphulela ya masuu awo! Mpattuxa oowerya sotheene orii vakhiviru vahu ni onrowa oniwiriyana akhala wira ‘nnimuroromela ni murim’ahu w’ekekhai’. Onvekela Muluku eparakha yuulupale erina ahu!
2 Vano, naphavela wira Yehova owiriyane mavekelo ahu, nohaana onvekelaka ntoko siniphavela awe. Ninrowa opaka sai ela akhala wira khannisuwela ele enihimya Biibiliya voohimya sa nivekelo? Ti vootthuneya osuwela ele eniixuttiha Biibiliya mmwaha ola, okhala wira nivekelo ninninikhaliherya omwaattamela Yehova.
NTHOWA XEENI VANITTHUNEYA AHU ONVEKELAKA YEHOVA?
3 Nthowa nimosaa nuulupale ninniiriha ovekelaka wa Yehova, okhala wira owo onninlattula wira ninvekeleke. Nuulumo nawe ninnitumererya so: “Muhukhuwé mwaha w’etthu p’itthu. Vano, okathi wothene nweliherye mavekelo anyu wa Muluku mmulompaka, munvaraka metto, mmuxukhuruku-tho. Siso murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu”. (aFilipi 4:6, 7) Mwekeekhai khivanreerela ohicalela yoovaha eyo epakiwe ni Namalamulela Muulupale a olumwenku wotheene!
4 Nthowa nikina ninniiriha ovekelaka, mwaha woowi ovekela moohihiyererya wa Yehova enamuna emosaa enlipiha wataana wahu n’uwo. Apatthani eekeekhai khanilavulihana paahi okathi oniphavela aya etthu. Ohiya vo, apatthani eekeekhai annithokoreryana mukina ni mukhw’awe, nto wataana waya onnilipa vaavo vanileelana aya miyuupuwelelo saya, soophavela saya, ni moonelo aya. Mmikhalelo sikina, wataana wahu ni Yehova Muluku ohaana okhala siiso. Eliivuru ela, ehookhaliheryani wiixutta itthu sinceene voohimya sa ele Biibiliya eniixuttih’awe sa Yehova, omutthu awe, ni soolakela sawe. Nyuwo moosuwela wira Yehova, Muluku okhanle tthiri. Nivekelo ninnoovahani okathi wooreerela wira mmuleele Tiith’inyu a wirimu, miyuupuwelelo sanyu ni miyoonelo sa murima anyu. Mwiiraka siiso, nyuwo munomwaattamelaka Yehova.—Yakobo 4:8.
SOOVEKELA XEENI SINITTHUNEYA AHU WAAKHWANIHERYA?
5 Niireke wira Yehova onniwiriyana mavekelo a atthu otheene? Nkahaya muthokorerye ele yaahimenrye awe anaIsarayeli oomwareya mmahiku a mprofeta Yesaya: “Mwathipelelaka okivekela, miyo nkinowiriyanani. Tthiri matat’anyu t’òsareya ephome”. (Yesaya 1:15) Nto, sowiira sikina pooti omwiiriha Muluku ohiwiriyana mavekelo ahu. Tivonto, wira Muluku awiriyane mavekelo ahu, hiyo nohaana waakhwaniherya soovekela sikina sootthuneya.
6 Etthu yuulupale enitthuneya ahu waakhwaniherya orii wooniherya waamini. (Marko 11:24) Murummwa Paulo olempe wira: “Khavo mutthu onwerya omusiveliha Muluku, ahaminiki: mana ole onimwattamela Muluku ohana wamini wira Muluku òkhala ni wira onnatthuvela ale animphavela”. (aHéberi 11:6) Okhalana waamini wekeekhai khahiyo osuwela paahi wira Muluku ookhala ni wira owo onniwiriyana ni waakhula mavekelo. Waamini iwo onooniheriwa ni miteko. Ni mweettelo ahu wa khuta nihiku nnoowerya wooniherya saana wira nookhalana waamini.—Yakobo 2:26.
7 Nave-tho, Yehova oniphavela wira ale aninvekela apakeke eyo moowiiyeveiha ni murima wotheene. Niireke wira khinrina nthowa wira niiyeveiheke vaavo vanilavula ahu ni Yehova? Vaavo atthu vanikhalana aya eparakha ya olavula ni mwene aahiiso presidente, moolimaleleya animulavuliha ni nttittimiho, mwaha wa okhulupale awe ntoko namalamulela. Moota vary’aya vootthuneyexa wooniherya nttittimiho okathi onilavula ahu ni Yehova! (Esalimo 138:6) Mwekeekhai owo “Muluku òwerya sothene”. (Maphattuwelo 17:1) Vaavo vanivekela ahu wa Muluku, moota onivekela ahu ohaana wooniherya wira moowiiyeveiha ninnisuwela opuro ahu ohoolo wawe. Wiiyeveiha iwo onooniiriha-tho ovekela ni murima ahu wotheene ni ekeekhai, nisyakaka opaka mavekelo ootakiha, ni omakela ohimya etthu emosaru.—Matheyo 6:7, 8.
8 Yoovekela ekina wira Muluku owiriyane mavekelo ahu, orii opaka itthu moovarihana ni mavekelo ahu. Yehova onilipelela wira nivareke sotheene seiye siniwerya ahu moovarihana ni mavekelo ahu. Mwa ntakiheryo, vakhala wira ninvekela wi: “Munivahe olelo yoly’ahu ya khula nihiku”, hiyo nohaana wiimananiha ovara eniwerya ahu, ya muteko okhanle. (Matheyo 6:11; 2 aTesalonika 3:10) Akhala wi ninvekela wira nikhaliheriwe ovikana sootteettheya sa erutthu ahu, nohaana okhalana ephoole wira nisyakee mikhalelo ni itthu saarowa oneehererya. (aKolosi 3:5) Nincereryaka soovekela sootthuneya simanly’ahu ohimya, aakhala makoho anittharelana voohimya sa ovekela, yaawo nimphavela ahu ophwanya waakhuliwa waya.
WAAKHULIWA WA MAKOHO MAKINA VOOHIMYA SA NIVEKELO
9 Mavekelo ahu nroiheke wa aani? Yesu aahiwiixuttiha atthareli awe wira avekeleke wa ‘Tith’ihu ori wirimu!’. (Matheyo 6:9) Nto, mavekelo ahu, ahaana oroihiwaka paahi wa Yehova Muluku. Hataa vari siiso, Yehova onivekela wira nisuwele nipuro na Mwanawe mmoseene, Yesu Kristu. Ntoko siixuntta ahu mMuruu wa 5, Yesu aahirumihiwa valaponi wi orumeele ntoko mukuttho wira onoopole mu yoottheka ni okhwa. (Yohani 3:16; aRoma 5:12) Owo tothanliwe wira okhalee Namukuttho Muulupale ni Namaphuka. (Yohani 5:22; aHéberi 6:20) Vanonto, Biibiliya onnintumererya wira nipakeke mavekelo ahu orweela mwa Yesu. Mwaneene Yesu aahimmye wira: “Miyo k’ephiró. Miyo k’ekekhayí. Miyo k’ekumí. Khavo onwerya orowa w’Atithi, ahivinre mwa miyo”. (Yohani 14:6) Wira mavekelo ahu awiriyaniwe, nohaana ovekela wa Yehova paahi orweela mwa Mwanawe.
10 Aakhala makhalelo a vameekh’aya ntoko okilaathi, aahiiso okhoroma, anitthuneya okathi onivekela ahu? Nnaari. Yehova khonivekela mukhalelo a vameekh’aya, ntoko weemexa matata aahiiso weemela. Biibiliya oniixuttiha wira ti vookhalela ovekela mmikhalelo soovirikana. Iya sinihela muhina okilaathi, wuurama, okhoroma, ni weemela. (Nehemiya 8:6; Daniyeli 6:10; Luka 18:13) Tthiri etthu enitthuneya, okhalana mukhalelo wooloka vamurimani, ohiya mukhalelo a vameekh’aya oniwehiwa ni atthu akina okathi woovekela. Mwekeekhai, mmiteko sahu sa khuta nihiku aahiiso vaavo vanikhumelela aya etthu ennoopopiha, pooti opaka nivekelo na vamurimani, khuta opuro ory’ahu. Yehova onniwiriyana mavekelo awo hataa atthu ale anaattamenle ahisuwelaka wira nnoovekela.—Nehemiya 2:1-6.
11 Nivekeleke exeeni? Biibiliya onilakiherya wira: “Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe”. (1 Yohani 5:14) Nto hiyo pooti oveka etthu eri yotheene enivarihana ni yotthuna ya Muluku. Niireke wira ovekela nihimyaka miyaha sinnixankiha onnivarihana ni yotthuna awe? Aayo! Ovekela wa Yehova pooti olikanyiha ni olavula ni mpatthan’ihuxa. Moohihoverya, nohaana ‘omuhimerya [Muluku] ovelavela wahu wothene’. (Esalimo 62:9) Ti voophwanelela ovekela munepa wootteela, wira onikhaliherye opaka etthu ya xariya. (Luka 11:13) Nave-tho pooti ovekela yoolakiherya wira nipakee soothanla sa miruku ni wira nikhumele saana okathi wa mixankiho. (Yakobo 1:5) Okathi onittheka ahu, hiyo pooti ovekela oleveleliwa nrumeelaka mukuttho wa Kristu. (aÉfeso 1:3, 7) Masi, mavekelo ahu ahikhaleke a sooxankiha sahu paahi. Vaavo vanivekela ahu nohaana waavekelela atthu akina, ntoko amus’ihu ni maKristau akhw’ihu.—Miteko s’Arummwa 12:5; aKolosi 4:12.
12 Miyaha sinimuhela muhina Yehova Muluku, sohaana okhalaka nipuro noopacerya mmavekelo ahu. Mwekeekhai ti voophwanelela omuttottopela ni murima wotheene ni omuxukhuru mwaha wa oreera wawe murima. (1 Wahala a Mamwene 29:10-13) Okathi Yesu aavanha awe nivekelo na ntakiheryo, nlempwale mMatheyo 6:9-13, owo ooniixuttiha ovekela wira, nsina na Muluku nivuwihiwe, eyo piiyo, ntteelihiwe. Orwa wa Omwene wa Muluku ni wiiraneya yotthuna awe valaponi ntoko siiranen’ya aya wirimu, oheliwee nipuro na nenli. Paahi nuumala Yesu olavula miyaha iyo sootthuneya sa Yehova, moottharelana aahihimya sooxankiha sa mutthu mwaneene. Moolikanasa, vaavo vanimukuha ahu Muluku nipuro noopacerya mmavekelo ahu, hiyo nnooniherya wira ninnimucikha vanceene ovikana okhala wahu saana.
13 Opisa wa mavekelo ahu okhaleke woowiira sai? Biibiliya khonitikitherya mukano voohimya sa opisa wa mavekelo a mutthu mwaneene aahiiso anipakiwa nipuro nri atthu anceene. Mavekelo oohipisa anipakiwa okathi wa yoolya pooti ovirikana ni mavekelo oopisa anipaka ahu nri mekhihu, okathi onimuleela ahu Yehova eri vamurimani vahu. (1 Samuweli 1:12, 15) Masi, Yesu aahiwuulumela atthu yaale yaipaka okhala anaxariya, yaapaka mavekelo oopisa, aphavelaka owooniherya atthu akina. (Luka 20:46, 47) Mavekelo awo khanimuhakalaliha Yehova. Etthu yootthuneya orii opaka mavekelo anikhuma vamurimani vahu. Tivonto, opisa wa mavekelo yaawo aneemereriwa pooti ovirikana moovarihana ni ele eniphavela ahu oveka ni mikhalelo.
14 Nivekeleke ikwaha kavii vanihikuni? Biibiliya onnintumererya oriki: “Mulompeke”, “mulipiheryeke olompa”, “mulompeke vohihiyererya”. (Matheyo 26:41; aRoma 12:12; 1 aTesalonika 5:17) Tthiri, masuu ala khantaphulela wira nohaana ovekelaka wa Yehova okathi wotheene vanihikuni. Ohiya vo, Biibiliya onnintumererya ovekela khuta nihiku, nimuxukhurelaka Yehova moohihiyererya mwaha wa onireerela wawe murima ni ophavelasa yoolakiherya awe, yoomaaliha, ni yoolipiha. Niireke wi khivannihakalaliha osuwela wira Yehova khohenle mukano voohimya sa opisa wa mavekelo ni ikwaha sintthuna ahu olavulaka n’uwo? Akhala wira tthiri ninnixukhurela eparakha ya ovekela, ninrowa ophavelasa okathi wooreerela wira ninvekeleke Tiith’ihu a wirimu.
15 Nthowa xeeni vanitthuneya ahu wiiraka “Amen” wanikisa wa nivekelo? Nuulumo noowi “amen” nintaphulela wira “ekeekhai”, aahiiso “ekhalee siiso”. Matakiheryo ari mBiibiliya anooniherya wira ti vookhalela wira “Amen” wanikisa wa nivekelo, mutthu onipaka awe ekhawe aahiiso vari atthu anceene. (1 Wahala a Mamwene 16:36; Esalimo 41:14) Mwaha woohimya wira “Amen” wanikisa wa nivekelo nahu, nnooniherya wira masuu ahu ta ekeekhai. Vaavo vanihimya ahu wira “Amen” moowiiwanyeya aahiiso moohiiwanyeya, wanikisa wa nivekelo nipakiwe ni mutthu mukina eriyari ya atthu anceene, nnooniherya wira ninnaakhulela etthu ehimmwale.—1 aKorinto 14:16.
MOOTA MULUKU SINAAKHULA AWE MAVEKELO AHU
16 Niireke wira tthiri Yehova onnaakhula mavekelo? Aayo, onnaakhula! Nookhalana mathowa maalupale oowi nikupaliki wira ole ‘oniwa’ mavekelo onnaakhula mavekelo eekeekhai anipakiwa ni atthu imilyau sene. (Esalimo 65:3) Yehova onnaakhula mavekelo ahu mu iphiro soovirikana.
17 Yehova onnirumeela malaikha aahiiso arumeyi awe ari valaponi wira aakhule mavekelo. (aHéberi 1:13, 14) Aakhala atthu anceene yaawo yanvekela Muluku wira aakhaliherye omwiiwexexa saana Biibiliya, nto naananoru aphwanyiwa ni murumeyi a Yehova wira aakhaliherye. Sookumanana iyo sinooniherya wira malaikha annikhaliherya muteko wa olaleerya Omwene. (Wisupulula 14:6) Wira Yehova aakhule mavekelo anipaka ahu okathi wa mixankiho, Yehova pooti omwiiriha muKristau orwa wira onikhaliherye.—Miruku 12:25; Yakobo 2:16.
18 Nave-tho, Yehova Muluku onnivarihela muteko munepa awe wootteela ni Nuulumo nawe, Biibiliya, wira aakhule mavekelo a arumeyi awe. Owo pooti waakhula mavekelo ahu wira onikhaliherye ovikana soweeha onivahaka yoolakiherya ni ikuruu, orumeelaka munepa awe wootteela. (2 aKorinto 4:7) Vaavo vanivekela ahu yoohoolela, ikwaha sinceene, mavekelo ahu anaakhuliwa ni Biibiliya, memmo Yehova onnikhaliherya awe opaka soothanla sa miruku. Yookhaliherya eyo pooti ophwanyaneya vaavo vanimusoma ahu Biibiliya, aahiiso vanisoma ahu iliivuru sa eKristau, ntoko eliivuru ela. Iponto sikina siniphavela ahu othokorerya siri mBiibiliya pooti olavuliwa mmithukumanoni sa eKristau aahiiso masuu anilavuliwa ni mutokweene a mmulokoni yoowo oniphavela okhala wahu saana.—aGalasia 6:1.
19 Mavekelo ahu yaakhalaka ntoko khanaakhuliwa ni Yehova, khontaphulela wira Yehova khonwerya-tho waakhula mavekelo awo. Ohiya vo, hiyo nohaana wuupuwelaka wira Yehova onnaakhula mavekelo moovarihana ni otthuna wawe ni okathi wooreerela. Owo onnisuwela soophavela sahu ni moota woothokorerya saana, onivikana hiyo. Ikwaha sinceene, owo onnineemererya wira ‘nivekeleke, navyeke, ni nimaneke mukhora’. (Luka 11:5-10) Othipelela ovekela iwo onnimooniherya Muluku wira ninvekela ni murima wotheene ni wira nroromelo nahu ti neekeekhai. Ohiya vo, Yehova pooti waakhula mavekelo ahu mmukhalelo ohiniwehererya ahu. Mwa ntakiheryo, owo pooti waakhula nivekelo nahu voohimya sa yoweeha eniwanana ahu, onivahaka ikuruu wira nivilele, moohikumiha muxankiho owo.—aFilipi 4:13.
20 Moota onimuxukhuru ahu Mpattuxa a olumwenku ola wotheene, okhala wira onniwaattamela otheene yaale aninvekela moophwanelela! (Esalimo 145:18) Hiyo nohaana ovekela moohihiyererya wa Yehova okhala wira eyo eparakha yuulupale. Niira siiso, hiyo ninrowa okhalana yoolipelela yoohakalaliha ya omwaattamelaka Yehova, yoowo Oniwiriyana mavekelo.
ELE BIIBILIYA ENIIXUTTIH’AWE
▪ Ovekela moohihiyererya wa Yehova onninikhaliherya omwaattamela.—Yakobo 4:8.
▪ Wira mavekelo ahu awiriyaniwe ni Muluku, hiyo nohaana ovekela ni nroromelo, wiiyeveiha, ni murima wotheene.—Marko 11:24.
▪ Hiyo nohaana ovekela wa Yehova paahi orweela mwa Mwanawe.—Matheyo 6:9; Yohani 14:6.
▪ Yehova, yoowo ‘onìwa’ mavekelo, onnirumeela malaikha awe, arumeyi awe ari valaponi, munepa awe wootteela, ni Nuulumo nawe wira aakhule mavekelo.—Esalimo 65:3.
[Study Questions]
1, 2. Nthowa xeeni vanitthuneya ahu woonaka nivekelo ntoko eparakha yuulupale, ni nthowa xeeni vanitthuneya ahu osuwela ele eniixuttiha Biibiliya mmwaha ola?
3. Nthowa nimosaa xeeni nuulupale ninniiriha ovekelaka wa Yehova?
4. Moota xeeni ovekela moohihiyererya wa Yehova onlipiha aya wataana wahu n’uwo?
5. Exeeni enooniherya wira Yehova khoniwiriyana mavekelo a atthu otheene?
6. Etthu xeeni yuulupale enivekeliwa wira Muluku owiriyane mavekelo ahu, nto ninrowa waakhwaniherya sai eyo?
7. (a) Nthowa xeeni vanitthuneya ahu wooniherya nttittimiho okathi onilavula ahu ni Yehova? (b) Vaavo vanivekela ahu wa Muluku, ninrowa wooniherya sai wiiyeveiha ni okhala eekeekhai?
8. Ninrowa opaka sai itthu moovarihana ni ele enivekela ahu?
9. Mavekelo ahu nroiheke wa aani, ni orweela mwa aani?
10. Nthowa xeeni vahikhanle aya mukhalelo a vameekh’aya onitthuneya okathi onivekela ahu?
11. Itthu xeeni soophwanelela sinitthuneya ahu ovekelaka?
12. Ninrowa wooniherya sai wira ninnikuha miyaha sa Tiith’ihu a wirimu nipuro noopacerya mmavekelo ahu?
13. Biibiliya onilavula exeeni voohimya sa opisa wa mavekelo aneemereriwa?
14. Antaphulela exeeni masuu annitumererya Biibiliya wira “mulompeke vohihiyererya”, ni nthowa xeeni masuu ala ary’aya oolipiha?
15. Nthowa xeeni vanitthuneya ahu wira “Amen” wanikisa wa nivekelo, mutthu onipaka awe ekhawe aahiiso vari atthu anceene?
16. Nikupaliki exeeni voohimya sa nivekelo?
17. Nthowa xeeni vanihimmwa aya wira Muluku onnirumeela malaikha aahiiso arumeyi awe ari valaponi wira aakhule mavekelo ahu?
18. Yehova onivarihela sai muteko munepa awe wootteela ni Nuulumo nawe wira aakhule mavekelo a arumeyi awe?
19. Nuupuweleke exeeni vaakhalaka ntoko mavekelo ahu khanaakhuliwa?
20. Nthowa xeeni vanitthuneya ahu ottottela mureerelo eparakha ya ovekela?
[Pictures on page 165]
Ole ‘opattunxe erimu n’ilapo ya vathí’ onniwiriyana mavekelo ahu
[Pictures on page 171]
Muluku onniwiriyana mavekelo anyu okathi wotheene
[Picture on page 172, 173]
Yehova onoowerya waakhula mavekelo ahu, omwiirihaka muKristau mukhw’ihu onikhaliherya