Atthu akavi akhanle Anamoona a Yehova nyuwo munaasuwela anyu? Pooti wira akina a hiyo muhaattamana, munivarana muteko wala aneetta ni nyuwo oxikola. Aahiiso, pooti wira aatoko olavula ni nyuwo voohimya sa Biibiliya. Masi hiyo na atthu a mukhalelo xeeni tthiri? Nave exeeni enniiriha waaleelaka akina sookupali sahu?

Hiyo na pinaatamu ntoko akina. Naatthu a maloko ni makhalelo oovirikana. Khalai, akina yeettela etiini yoovirikana, wala khiyaakupali wira Muluku ookhala. Masi, nihinatthi okhala Anamoona, naapacenrye otokosa oratteene sowiixuttiha sa Biibiliya. (Miteko 17:11) Nuumala-vo khikupali ele yiixuntte ahu, nto moohikhanyereriwa khuthanla omukokhorela Yehova Muluku.

Omusoma Biibiliya wooniphwanyiha mireerelo. Ntoko atthu otheene a olumwenku ola, hiyo nave ninnikhalana mixankiho ni sootteettheya. Masi okhala wira khula nihiku nimphavela weettela sooruma sa Biibiliya, makhalelo a okumi ahu tootepa oreera ovikana khalai. (Esalimo 128:1, 2) Tivonto vanaahimeerya ahu atthu akina itthu sooloka siniphwanya ahu mBiibiliyani.

Ninneettela sooruma sa Muluku. Sooruma siri mBiibiliyani, sinitumererya makhalelo ooloka ntoko owoonela efaita akina, okhala oororomeleya ni oreera murima. Sooruma iyo, sinniphwanyiha ekumi yooloka, owiiraaniha atthu, ovara miteko saana, wiiwanana vatthokoni ni okhalana mweettelo wooloka. Mwaha wookupali wira “Muluku khanimuthanla mutthu”, Anamoona annimananiha okhala oowiiraana toko amusi hata aryeene a ilapo sinci, tivontokhaninyokhana mwaha wa nikhuli ni khaniirela mpantta ipoliitika. Nto hata nilikanaka ni atthu akina, hiyo niri oowiiraana saana.​—Miteko 4:13; 10:34, 35.

• Itthu xeeni Anamoona a Yehova anilikana aya ni atthu akina?

• Sooruma xeeni Anamoona a Yehova yiixuntte aya mwaha woomusoma Biibiliya?

Anamunceene anuupuwela wira Anamoona a Yehova, etiini ekhumenle niinano. Masi, iyaakha soovikana 2.700 sivinre, arumeyi a Muluku a ekeekhai, yaaniihaniwa “anamona”. (Yesaya 43:10-12) Ehinatthi eyaakha ya 1931, hiyo niitthaniwa Alipa-oomusoma Biibiliya. Nto xeeni nihalaka okuxa nsina noowi Anamoona a Yehova?

Nsina nlo nimmusuwanyeiha Muluku ahu. Moovarihana ni iliivuru sa khalai soolempwa ni matata, nsina na Muluku, Yehova, ninniphwanyaneya mBiibiliyani ikwaha sinceene. Masi aBiibiliya anceene nsina nla aarantteliha ni miihaneliwo oowi Apwiya, wala Muluku. Masi, Muluku eekeekhai aahimuleela Moise nsina nawe, Yehova, oriki: “Nla ti nsina naka wa mahiku othene”. (Okhuma 3:15) Nto, Yehova oovirikana ni amuluku otheene owootha. Nto hiyo ninnoona okhala eparakha olaleya nsina noowaarya na Muluku.

Nsina nlo nnooniherya muteko ahu. Okhuma Abeli yoowo aari naxariya, atthu anceene a khalai, yaahiirela onamoona omwaamini waya Yehova. Iseekulu sinceene sivinre, atthu ntoko Nowe, Abrahamu, Sara, Moise, Davidi, ni akina, yaanihimmwa okhala ‘anamona òwatta ntoko meku’. (aHéberi 11:4–12:1) Ntoko siisaale omilattuni mutthu onimukhalela awe onamoona mutthu mukina ohitthenke, hiyo ninlipiherya ohimya ekeekhai voohimya sa Muluku ahu.

Hiyo nimmutakiha Yesu. Biibiliya onnimuhimya Yesu okhala “namona òroromeleya ni èkekhai”. (Wisupulula 3:14) Yesu aahimyale wira ‘ahasuweliha akina nsina na Muluku’ nto ‘kukhala namona èkekhai’ a Muluku. (Yohani 17:26; 18:37) Tivonto, awiixutti eekeekhai a Kristu, annilaleya nsina na Yehova ni waasuweliha akina. Ela ti etthu Anamoona a Yehova aniimananiha aya opaka.

• Exeeni ewiirinhe Alipa-oomusoma Biibiliya okuxa nsina noowi: Anamoona a Yehova?

• Yehova opacenrye silini okhalana anamoona valaponi?

• Ti pani ori Namoona muulupale a Yehova?

Biibiliya aahihimya wira nuumala okhwa Kristu, eriyari ya maKristau oopacerya yaamukhumela alipa owiixuttiha oowoka ni yaamuhonona ekeekhai ya mBiibiliyani. (Miteko 20:29, 30) Nto eyo yaahiiraneya okathi aya. Awo yaahitakaaha sowiixuttiha sa Yesu ni muupuwelo wa epagau, nto khikhumelela etiini yoowootha. (2 Timótheyo 4:3, 4) Olelo-va ninrowa osuwela sai wira ekeekhai enikupali ahu ti yeeyo Biibiliya oniixuttiha awe tthiri?

Okathi waahiphiya wira Yehova uupulule ekeekhai. Muluku aahihimya wira ‘mahiku òkiserya wamwinjerereya osuwela’ wekeekhai. (Daniyeli 12:4) Eyaakha ya 1870, egrupu yaamukhaani ya atthu yaaphavela ekeekhai, yaahoona wira sowiixuttiha sa ikerexa sinci khisaakhuma mBiibiliyani. Tivonto, yaahipacerya ophavela wiiwexexa sowiixuttiha sekeekhai sa Biibiliya. Nto, Yehova ahaakhaliherya ni waareeliha.

Atthu a murima saana yaahimananiha omwiiwexexa Biibiliya. Alipa-oomusoma Biibiliya yaaranttenle ahu, yaarumeela enamuna yoomusoma Biibiliya yeeyo nlelo enirumeela ahu vano. Awosa yaanithokorerya khula mwaha wa Biibiliya mpakha wiiwexexa. Okathi yaaphwanya aya yoolepa yoovila, yaanaavya soolepa sikina wira yiiwexexe saana yoolepa ele. Okathi yaiwexexa aya moovarihana ni soolepa sikina sa Biibiliya, awo yaanilepa mwaha owo. Mwaha woomurumeela Biibiliya, awo yaahiphwanya ekeekhai voohimya sa nsina na Muluku ni Omwene awe, yoolakela awe wa apinaatamu vamosa ni elapo, ele eniiraneya mutthu akhwa ni nlipelelo na ohihimuwa. Ophavela waya ekeekhai, waahiwiiriha ohiya sookupali ni sowiira sinceene soohiloka.​—Yohani 8:31, 32.

Okhuma mwaakha wa 1879, Alipa-oomusoma Biibiliya, yaahisuwela wira okathi waahiphiya wira ekeekhai esuweliwe saana. Nto okhuma mwaakha yoowo, yaahipacerya okumiherya erevista Owehaweha Elaleyaka Omwene wa Yehova, yeeyo enikumiherya ahu mpakha va. Vano ninnilaleya ekeekhai ya mBiibiliyani ilapo 240, ni mattaava anivikana 750. Tthiri, olelo-va osuwela wekeekhai onnitepa waatta!

• Nuumala okhwa Kristu, exeeni yiiraneyale ni ekeekhai ya mBiibiliyani?

• Exeeni enikhalihenrye wiiwexexa ekeekhai ya Nuulumo na Muluku?

Mwa iyaakha sinceene Anamoona a Yehova yaahaavarihela muteko, owimpirimiri, ni waakawa aBiibiliya ootaphuleliwa ni atthu akina. Masi, nahoona otthuneya waya okhalana Biibiliya musya, aarowa waakhaliherya atthu osuwela saana “ekekhai”, maana Muluku onitthuna siiso. (1 Timótheyo 2:3, 4) Nto, mwaakha wa 1950 saahipacerya okumiheriwa ipantte vakhaani sootaphuleliwa sa Biibiliya Tradução do Novo Mundo, orina moolumo ookhweya. Biibiliya ola ootaphuleliwa mattaava anivikana 130, mwa enamuna yoororomeleya.

Aanitthuneya Biibiliya ookhweya wiiwexexiwa. Nuuvira okathi munceene, atthu annihiya orumeela moolumo makina. Ohiya-vo, aBiibiliya anceene aakhalana moolumo oovila wiiwa wala ahinsuweliwa. Nto sookhala iliivuru sa Biibiliya soolempwa ni matata sa khalai soororomeleya, sinilikanela ni iliivuru soopacerya sa Biibiliya. Nto eyo yaahiiriha omwiiwexexa saana Biibiliya oolempwa ni eHeeberi, Aramaiku, ni eGriki.

Aanitthuneya Biibiliya onitthokiherya moororomeleya nuulumo na Muluku. Ohiya ophavela wuncererya wala ovukula masu oowuupuxeriwa ni Muluku, ale animutaphulela Biibiliya ahaana otthara saana soolempwa soopacerya. Masi, aBiibiliya anceene khanrumeela nsina na Muluku, Yehova.

Aanitthuneya Biibiliya oninvuwiha Muluku. (2 Samuweli 23:2) Biibiliya Tradução do Novo Mundo, oottikiherya opuro waarya aya nsina na Yehova, ikwaha soowiiraka 7.000, moovarihana ni iliivuru sa Biibiliya sa khalai ntoko sinooniheriwa aya vathi-va. (Esalimo 83:18, Tradução do Novo Mundo.) Nuumala iyaakha sinceene sitokosiwaka soolempwa sa khalai, aahikumiheriwa Biibiliya ola ooreera omusoma ni oniiwanyeiha saana muupuwelo wa Muluku. Hata ohitaphuleliwe wala otaphuleliwe ene Tradução do Novo Mundo mwa nttaava nanyu, ninnootumereryani osoma Nuulumo na Yehova khula nihiku.​—Yoxuwa 1:8; Esalimo 1:2, 3.

• Xeeni vaatthuneya aya okhalana Biibiliya musya?

• Nipakeke exeeni khula nihiku wira niixutte yootthuna ya Muluku?