Hiyo khanirina ahooleli a itiini aniliviwa musurukhu. Masi ntoko siireya aya ni muloko wa eKristau woopacerya, axitokweene oophwanelela annithanliwa wira ‘yettiheke muloko wa Muluku’. (Miteko 20:28) Axitokweene ala annisuwela itthu sinci sa Biibiliya, annihoolela ni okhapelela muloko ‘n’utthuna waya wothene, ntoko Muluku sintthunawe, vohikhala ntoko anokhanyereriwa. Khaniphavela musurukhu, masi towivahererya’. (1 Pedru 5:1-3) Itthu xeeni sinivara aya wira anikhaliherye?

Awo anninikhapelela ni onikhaliherya. Axitokweene annilakiherya ni okhapelela muloko wira waataaneke ni Muluku. Okhala wira annisuwela wira Muluku ohaavaha muritti ola muulupale, awo khanaalamulela atthu, masi, anninikhaliherya wira nikhaleke saana moohakalala. (2 aKorinto 1:24) Siisaale makampusi onikhapelela awe saana khula epwittipwitthi, axitokweene annimananiha omusuwela saana khula mutthu a mmulokoni.​—Miruku 27:23.

Awo anniniixuttiha moota woopaka yootthuna ya Muluku. Khula esumana, axitokweene annihoolela mithukumano sa mmulokoni wira alipihe waamini wahu. (Miteko 15:32) Alopwana ala oowiileva annihoolela muteko woolaleerya, khiyavara ni hiyo muteko owo ni anniixuttiha inamuna sotheene sa olaleerya.

Awo annimulipiha khula mutthu. Wira anikhaliherye wataana wahu ni Yehova, arumeelaka Soolempwa axitokweene pooti onixukurya owannyihu wala Empa ya Omwene wira anikhaliherye ni onilipiha.​—Yakobo 5:14, 15.

Nnaamwi avaraka miteko iyo mmulokoni, axitokweene anceene aakhalana muteko wa mulaponi onivara aya, ni ahaana othokorerya-tho miteko sa vatthokoni vaya. Tthiri anna awo oowiimananiha annireerela waattittimiha.​—1 aTesalonika 5:12, 13.

• Muteko xeeni onivara aya axitokweene?

• Moota xeeni axitokweene animuthokorerya aya khula mutthu?

Biibiliya onnihimya igrupu piili sa alopwana maKristau anivara miteko sa muloko: “makhulupale n’arumeyi”, eyo piiyo, axitokweene ni arummwa oorumeela. (aFil. 1:1, Biblia Solempwa sa Muluku) Nto, aakhala anna anci anirumeela mwa enamuna eyo khula muloko. Miteko xeeni sinivariwa ni arummwa oorumeela sinnikhaliherya?

Awo anikhaliherya nikhuuru na axitokweene a mmulokoni. Arummwa oorumeela ti atthu oororomeleya, anuupuwela saana ni aneettela sooruma sa Biibiliya, pooti okhala amiravo wala owunnuwela. Awo annivara miteko sa faita, masi vanceenexa otthokiha miteko sa matata sa mmulokoni. Nto eyo ennaavaha okathi axitokweene wira awiixuttihe ni waakhapelela anna.

Awo annivara miteko sootthuneya. Arumeyi akina annivahiwa muteko wa owaakhela atthu anirwa mmithukumanoni. Akina anivahiwa muteko wa okhapelela ikaruma sinirumiha masu, okawa iliivuru opalkuni, okhapelela musurukhu a muloko, ni okhapelela mittetthe soolaleerya. Awo-tho annikhaliherya okhapelela Empa ya Omwene. Okathi mukina, axitokweene annaavekela arummwa oorumeela wira yaakhaliherye anna oowuuluvala. Mwaha woophavela ovara khuta muteko onivekeliwa aya, arumeyi anniphwanela-tho ottittimihiwa.​—1 Timótheyo 3:13.

Awo annivaha ntakiheryo nooloka ntoko alopwana maKristau. Arummwa oorumeela, anithanliwa moovarihana ni mikhalelo saya sa oKristau. Okathi onilavula aya myaha mmuthukumanoni, awo annilipiha nroromelo nahu. Ntakiheryo naya nooloka mmuteko woolaleerya onniniiriha-tho okhala ooluttuweliwa. Mwaha wa wiiwelela waya onnikumiherya ohakalala ni wiiraana mmulokoni. (aÉfeso 4:16) Nto muhoolo mwaya, awo anniphwanelela okhala axitokweene a mmulokoni.

• Arummwa oorumeela anikhala alopwana a moota xeeni?

• Arummwa oorumeela anikhaliherya sai muloko wira weetteke saana?

Soolempwa sa eGriki sa eKristau, ikwaha sinceene sinnimuromola Baarnaba ni murummwa Paulo. Alopwana ala yaari axitokweene ooweetteetta yaaxukurya miloko sa eKristau soopacerya. Mwaha aya? Okhala wira yaaniphavela vanci waalipiha annaya ale. Paulo aahilavula ariki “ntthike nàxekurye axinn’ihu” wira nasuwele ehaali aya. Owo aaneetta ikiloomo imiya sinceene wira aalipihe axinna awe. (Miteko 15:36) Olelo va, etthu emosaru teniphavela aya anna anixekurya miloko.

Awo aniphavela onilipiha. Khula mutokweene a esirkwiitu onixukurya miloko sowiiraka 20. Khula mwaakha onnixukurya ikwaha piili, ovirihaka esumana emosa khula muloko. Hiyo ninniphwanya mireerelo sinci mwaha woowi anna awo ni axaaraya, akhala wira toothela, annisuwela itthu sinceene. Awosa, anniimananiha waasuwela amiravo ni anna owunnuwela, nave annirowa ni hiyo olaleerya ni wiiriha soosoma sa Biibiliya. Awo ni axitokweene annirowa waaxukurya anna mmavaateni mwaya ni onilipiha, annilavula myaha soolipiha mmulokoni wala muthukumano wa esirkwitu.​—Miteko 15:35.

Awo annaathokorerya atthu othene. Axitokweene ooweetteetta annithokorerya vanceene mukhalelo wa oKristau wa anna a mmulokoni. Awosa annithukumana ni axitokweene ni arummwa oorumeela wira yoone moota muloko oninnuwa aya, ni annivaha malakiheryo a moota woovara muteko. Anna awo, annaakhaliherya mapioneero orowa vahoolo mmuteko woolaleerya, nave vannaasivela waasuwela anna asya ni oweha wunnuwa waya mwekeekhaini. Axitokweene ooweetteetta, ahiivahererya ‘wavarela muteko’ axinna aya eKristau. (2 aKorinto 8:23) Nitthareke ntakiheryo naya na omwaamini Muluku.​—aHéberi 13:7.

• Xeeni axitokweene a esirkwitu anixukurya aya miloko?

• Nto munrowa ottottela sai mureerelo oxukurya waya?

Vaavo vanikhumela aya ihasara, Anamoona a Yehova mowaakuveya anniitthokiha wira yaakhaliheryeke axinnaya aphwanyiwe ihasara. Wiimananiha iwo onooniherya ophentana wekeekhai orina ahu. (Yohani 13:34, 35; 1 Yohani 3:17, 18) Nnaakhaliherya sai axinnihu?

Ninnivaha musurukhu wira nikhaliherye. Vaavo etala yuulupale yaakhumelenle aya oYudeya, maKristau oopacerya wAntiyokiya yaahiroiha soovaha saya wa axinnaya eeKristau. (Miteko 11:27-30) Vamosaru, vaavo ninsuwela ahu wira annihu a mittetthe sikina sa elapo sihaaphwanya mixankiho, hiyo ninnipaka soovaha sinikhuma khuta miloko wira naakhaliherye annihu awo anihaawa.​—2 aKorinto 8:13-15.

Hiyo ninnikhaliherya mooreerela. Axitokweene anikhala muttetthe okhumelenle ehasara annimphavela khuta munna wira esuwele akhala wira mukumi wala ookhuma opuro ole. Nikhuuru ninkhaliherya okathi wa ihasara ninnitthokiha soovaha ntoko yoolya, maasi ooreera, ikuwo, mapuro ookhala ni murette. Anamoona anceene anisuwela ovara miteko soovirikana anniivahererya arumeelaka musurukhu aya wira yakhaliherye olokiherya inupa soophweeya vamosa ni Ipa sa Omwene. Wataana ninkhalana ahu mwaha wa ovara muteko wootthokiheya ni osuwela oniphwanya ahu, onniniiriha ovaraka muteko hoothe mowaakuveya. Nnaamwi naakhaliheryaka annihu “òwamini”, vaaweryaneyaka ninnaakhaliherya-tho akina hata atthu yaale ahikhanle Anamoona.​—aGalasia 6:10.

Ninnivaha nikhaliheryo omunepani ni mmupuweleloni. Vanceenexa atthu aphwanyiwe ehasara annitthuneya olipihiwa. Okathi owo ninnilipihiwa ni Yehova, “Muluku onnihakalaliha inamuna sothene”. (2 aKorinto 1:3, 4) Moohakalala, ninnaahimeerya atthu awo axankale sooleiherya sa Biibiliya sinilipiha, wira moohipisa Omwene wa Muluku onoomaliha ihasara sotheene sinikumiherya ohaawa.​—Wisupulula 21:4.

• Exeeni eniwiiriha Anamoona waakuva okhaliherya okathi wa ihasara?

• Sooleiherya xeeni sa Muluku sinaaleela ahu ale axankale mwaha wa ehasara ekhumelenle?

Ohalaka vakhaani okhwa, Yesu aahivaanela ni awiixutti awe axexe paahi: Pedru, Yakobo, Yohani, ni Andre. Nto vaavo Yesu aahimya awe ithoonyeryo sa okhala wawe mahiku ookiserya, owo aahipaka nikoho nla nuulupale: “Murumeyi òroromeleya ni ànkhili t’uvi? Athanliwe ni pwiy’awe, wira awettiheke anamuteko akina, àkaweleke yolya okathi aya?” (Matheyo 24:3, 45; Marko 13:3, 4) Yesu aahaalipiherya awiixutti awe wira owo ntoko “pwiya aya” aarowa omuthanla “murumeyi” wira ovaheke yoolya yomunepani moohihiyererya okathi wa mahiku ookiserya. Nto murumeyi owo ti pani?

Murumeyi owo ti egrupu yaamukhaani ya atthareli a Yesu athanliwe ni munepa wootteela. “Murumeyi” owo onnaavaha yoolya ya omunepani ale animukokhorela Yehova. Hiyo ninlipa ni murumeyi ola oororomeleya, wira nivikanihe waakhela yoolya okathi woophwanelela.​—Luka 12:42.

Murumeyi owo onniweettiha atthu a Muluku. (1 Timótheyo 3:15) Yesu onvaha murumeyi muritti muulupale woweettiha muteko wa epantte ela ya valaponi ya nikhuuru nootthokiheya na Yehova. Owo onnipaka eyo athokoreryaka saana itthu sinithummwa, olakiherya moota woolaleerya, ni oniixuttiha orumeelaka miloko sahu. Tthiri wira okumiherye itthu sinitthuneya wa hiyo ni okathi onitthuneya aya “murumeyi òroromeleya ni ànkhili” onnikawa yoolya ya omunepani orumeelaka iliivuru sinivarela ahu muteko naalaleeryaka, ni okathi onirowa ahu mithukumano sa muloko ni mithukumano suulupale.

Murumeyi ola toororomeleya voohimya sa wiixuttiha masu ekeekhai ari mBiibiliyani ni muteko woolaleerya ihapari sooreera; ohiya vo tankhili okhala wira onnikhapelela saana soophavela sa Kristu valaponi. (Miteko 10:42) Yehova onnireeliha muteko wa maKristau ala oothanliwa, nto onnincererya soolya sa omunepani ntoko iliivuru ni itthu sikina.​—Yesaya 60:22; 65:13.

• Tani aathanliwe wira avaheke yoolya ya omunepani wa awiixutti a Yesu?

• Moota xeeni murumeyi ola oryaawe oororomeleya ni ankhili?

Eseekulu yoopacerya egrupu yaamukhaani ya “arummwa ni mahumu oYerusalemu”, yaari ntoko nikhuuru noolamulela nenno naapaka soothanla suulupale eriyari ya miloko sotheene sa maKristau oothanliwa. (Miteko 15:2) Anna awo yaanipaka soothanla mowiiwanana attharihelaka Soolempwa ni ororomela munepa wa Muluku. (Miteko 15:25) Nto, ela ti enamuna enirumeeliwa olelo-va.

Muluku onnivarihela nikhuuru nlo wira opake ele enitthuna awe. Anna oothanliwa ni munepa, yaawo akhanle a Nikhuuru Noolamulela, annitthara oratteene Nuulumo na Muluku, nave annisuwela othokorerya saana myaha soovareleya muteko ni sa mBiibiliyani. Nikhuuru Noolamulela, ninnithukumana khula esumana wira nithokorerye myaha sa anna olumwenku wotheene. Ntoko siireya aya khalai, annivahiwa malakiheryo anikhuma mBiibiliyani, orweela mwa ipaphelo aahiiso axitokweene anixukurya miloko, ni anna akina. Eyo enniwiiriha atthu a Muluku okhala oowiiraana mwa inamuna sotheene. (Miteko 16:4, 5) Nikhuuru Noolamulela ti ninkumiherya khuta mwaha wa omunepani, ni otumererya muteko woolaleerya, waathanla anna anivara miteko sa Muluku.

Nikhuuru nlo ninnaakhulela weettihiwa ni munepa wa Muluku. Nikhuuru Noolamulela ninnivaha efaita yuulupale malakiheryo a Mukhulupale Yehova ni Muru wa muloko, Yesu Kristu. (1 aKorinto 11:3; aÉfeso 5:23) Anna awo, khaniphavela wooniwaka ahooleli mwa atthu a Muluku. Awo vamosa ni maKristau otheene oothanliwa, “animutthara mwapwittipwitthi [Yesu] nipuro ti nipuro ninrowawe”. (Wisupulula 14:4) Nikhuuru Noolamulela ninnixukhurela vanceene waavekelela wahu mmureerelo aya.

• Tani yaari nikhuuru noolamulela eseekulu yoopacerya?

• Moota xeeni Nikhuuru Noolamulela olelo va nintthara aya malakiheryo a Muluku?

Nuulumo na eHeeberi noowi Betheli nintaphulela “Empa ya Muluku”. (Maphattuwelo 28:17, 19) Nsina nla ti noophwanela ovaha inupa seiye sinipakiwa ni Anamoona a Yehova elapo ti elapo, wira okhapeleliweke-mo muteko woolaleerya. Nikhuuru Noolamulela ninkhala oNova Iorque wAmerika, EUA, oseedi wa Anamoona a Yehova a ilapo sotheene, nto ola ti opuro onitthokihiwa aya miteko sinivariwa mBetheli, ilapo sinceene. Egrupu ya atthu anivara miteko opuro owo, anihimmwa okhala emusi ya Betheli. Ntoko emusi, awo anikhala vamosa, ovara miteko, olya ni omusoma Biibiliya hoothe mowiiwanana.​—Esalimo 133:1.

Betheli opuro woottittimiheya onivariwa muteko mwa nthiti ntoko amusi. Khula eBetheli, aakhala alopwana ni athiyana maKristau yiivaherenrye ovara miteko sa Muluku ni okhaliherya soophavela sa Omwene awe. (Matheyo 6:33) Khuuvo oniliviwa wala waakhela esalaario, masi awo annikhalana ikwaartu, yoolya, ni yookhaliherya wira aweryeke ophwanya itthu sinaathowa. Khula mutthu ori oBetheli, ookhalana muteko woovara, pooti okhala oxikritoorio, okosinya, wala orefeitoorio. Akina anivara muteko opuro onipakiwa aya wala wimpirimiriwa iliivuru, akina anirattela ikwaartu, okattha ikuwo, olokiha itthu sinihononeya ni itthu sikina.

Nipuro nooluttuwa muteko mwaha wa olaleerya Omwene. Yoolakela ya khuta eBetheli ori waasuweliha atthu anceene ekeekhai ya mBiibiliyani, ntoko siniireya aya ni ebroxura ela. Ebroxura ela yoolempwa ehooleliwaka ni Nikhuuru Noolamulela, khurumeeliwa eletronika eroihiwaka mmafiliyaaleni ilapo sinci wa igrupu sinitaphulela. Nuumala vo khimpirimiriwa aarumeeliwaka maakina oowiituperya saana ari mBetheli sinci, nto khuheliwa mukaaroni wira sikaweliwe miloko sinivikana 110.000. Khuta muteko onivariwa oBetheli ni anna yaale yiivaherenrye, onikhaliherya saana muteko ola wootepexa otthuneya: Olaleiwa ihapari sooreera.​—Marko 13:10.

• Tani anirumeela oBetheli, nto anikhaliheriwa sai?

• Muteko xeeni wootepa otthuneya onivariwa khula eBetheli?

Atthu anirumeela obetheli, annivara miteko soovirikana akhapelelaka muteko woolaleerya wa elapo yeeyo aahiiso ilapo sikina. Awo pooti orumeela ntoko anamataphulela, wimpirimiri irevista ni iliivuru, okawela miloko iliivuru, opaka iviidiyu, wala itthu sikina sa muttetthe owo.

Ekomisau ya Efiliyaali eniweherya miteko. Nikhuuru Noolamulela ninruma Ekomisau ya Efiliyaali yeeyo enikhala ya axitokweene oophwanelela araru aahiiso ovikana-vo, wira eweheryeke miteko sa khuta efiliyaali. Nto ekomisau eyo enniroiha erelatoorio wa Nikhuuru Noolamulela voohimya sa ikhalelo sa miteko sa khuta elapo eniweheriwa ni ekomisau eyo, vamosa ni mixankiho sikina sinikhumela. Irelatoorio iyo sinnikhaliherya Nikhuuru Noolamulela osuwela moota wooreherya myaha sinrowa okhumela muliivuruni, wala myaha sinrowa othokoreriwa mmithukumano sa muloko ni mithukumano suulupale. Axitokweene a Nikhuuru Noolamulela aahiiso ale anirummwa ni Nikhuuru nno, annixukurya ifiliyaali ni ovaha malakiheryo a moota Ikomisau sa efiliyaali sikhanle aya oovara saana miteko sithanleliwe aya. (Miruku 11:14) Eprograma ya vameekhaaya, ennihela muhina mwaha onilavuliwa ni mutokweene owo onixukurya, wira aalipihe anna yaale anikhala muttetthe ori efiliyaali.

Sinnikhaliheriwa miloko sa elapo eyo. Anna oororomeleya ofiliyaali anneemererya opakiwa miloko isya. Nave-tho anna awo anniweha-weha miteko sa mapioneero, mamisionaario ni axitokweene a esirkwitu anirumeela muttetthe yoowo ori efiliyaali. Annaalokiherya akongresu, asembeleya, ohoolela muteko wooteka Ipa sa Omwene, ni anniweha akhala wira iliivuru sooroihiwa mmamilokoni wira anna akhalane iliivuru siniphavela aya. Miteko sotheene sinivariwa ofiliyaali sinikhaliherya muteko wootthokiheya wa olaleerya.​—1 aKorinto 14:33, 40.

• Moota xeeni Ikomisau sa Ifiliyaali sinikhaliherya aya Nikhuuru Noolamulela?

• Miteko xeeni sinivariwa ni efiliyaali?

Wira niwerye waalaleerya “atthu a maloko othene ni a mahimo othene ni a malavulelo othene ni a ilapo sothene”, ninnipaka iliivuru mattaava anivikana 750. (Wisupulula 14:6) Nto ninwerya sai ovara muteko ola woohikhweya? Ninniwerya opaka eyo nikhaliheriwaka ni egrupu ya oolepa myaha a ilapo sinceene, vamosa ni anamataphulela oowiivahererya, othene aya Anamoona a Yehova.

Wanipacerya iliivuru iyo sinilempwa ni nttaava na Englexi. Nikhuuru Noolamulela ti ninweherya muteko wa eDepartamento Enilepa iliivuru oseedi wa Anamoona a Yehova ya olumwenku wotheene. Edepartamento ela tenaavaha muteko alipa oolepa yaawo anirumeela oseedi ni iBetheli sikina. Nto mwaha wookhalana atthu a ilapo soovirikana anilepa myaha sa khula enamuna, awo anniiriha iliivuru sahu wooniwaka oreera ni atthu a ilapo sotheene.

Nuumala olempwa ni Englexi annivahereriwa alipa ootaphulela. Nuumala eliivuru eyo olempwa ni okupaleeliwa, tanivahereriwa aya anamataphulela olumwenku wotheene erumeeliwaka eletronika. Awo annitaphulela, ovarerya saana, ni oweha akhala wira yookhalela tthiri. Anamataphulela anniimananiha othanla ‘molumo òsiveliha ni ekekhai’, ni moolumo anivarihana saana ni ele enihimmwa ni Englexi.​—Musuweli 12:10.

Komputadore onnikhaliherya vanceene. Akomputadore khaniwerya waaranttela alipa oolepa ni anamataphulela. Masi awo annikhweiherya muteko mwaha wa disionaario ni itthu sinikhaliherya wiiwexexa moolumo. Anamoona a Yehova aakhalana eSistema Enipaka Iliivuru sa Mattaava Othene (MEPS), nto myaha silempwale ni mattaava vanceene sinniheliwa musistema owo, wira etestu ni ilatarato sikhaleke vamosa okathi wowimpirimiri.

Xeeni vanipaka ahu itthu iyo sotheene, hata mattaava yaale anilavuliwa ni atthu vakhaani? Mwaha woowi Yehova oniphavela wira “atthu othene yopowe, esuwele ekekhai”.​—1 Timótheyo 2:3, 4.

• Moota xeeni sinilempwa aya iliivuru sahu?

• Xeeni iliivuru sahu sinitaphuleliwa aya ni mattaava manceene?

Khuta mwaakha nikhuuru nahu ninnikumiherya ni okawa iliivuru sinceene sinimutthokiherya Biibiliya, masi voohitumiha. Hiyo ninniteka ni olokiherya Ipa sa Omwene ni inupa sa oBetheli. Ninnaakhaliherya ikonto sinceene sa anna ari oBetheli, mamisionaario, ohiya-vo ninnikhaliherya okathi wa ihasara ni mixankiho sikina. Nto nyuwo pooti okoha so: ‘Onikhuma woowi musurukhu wa miteko iyo sotheene?’

Kheneettihiwa eparatho wala ephace ovekiwaka musurukhu. Nnaamwi otthuneyaka musurukhu munceene wira nivare muteko woolaleerya, hiyo khanniveka musurukhu. Mwa eseekulu emosa evinre, erevista ahu ya Owehaweha ya nenli, yaahilavula wira: ninnikupali wira Yehova tonnikhaliherya, nto “khaninrowa omuxonttela mutthu wira onivahe musurukhu”, tthiri eyo kheniiraneya!​—Matheyo 10:8.

Muteko ahu onikhaliheriwa ni soovaha sohikhanyereriwa. Atthu anceene anisiveliwa ni muteko ahu wa omusomiha Biibiliya, annivaha musurukhu aya. Anamoona a Yehova mmensaya, moohakalala annirumeela okathi aya, ikuru saya, ni musurukhu aya wira ekhaliherye muteko wa Muluku onivariwa valaponi. (1 Wahala 29:9) Empa ya Omwene sookhala ikaaxa sinipwehiwa wira ole oniphavela ovaha musurukhu oheleke-mo. Aahiiso pooti omurumeela webasaite ahu, jw.org. Vanceenexa, musurukhu onivahiwa ni atthu oohiraala, ntoko muthiyana namukhweli masikhini, aattottopeliwe ni Yesu mwaha woovaha mpaani mwa Muluku, inoota sa esisapo yamukhaani. (Luka 21:1-4) Nto, khula mutthu oniphavela pooti ‘osuka vaté vawe musurukhu awe’ wira ‘avahe attharihaka murima awe’.​—1 aKorinto 16:2; 2 aKorinto 9:7.

Nto, ninnikupali wira Yehova onoovikaniha owiiriha atthu a murima saana ophavela onvuwiha ni ‘omuxukhuru ni sorera saya’ wira emalelihe okhaliherya muteko wa Omwene.​—Miruku 3:9.

• Anamoona a Yehova anivirikana sai ni itiini sikina?

• Musurukhu onivahiwa onirumeeliwa sai?

Nsina noowi Empa ya Omwene ninhimya opuro onithokoreriwa myaha sa Biibiliya seiye sinivarihana ni Omwene wa Muluku, yoowo waari mwaha muulupale wa Yesu.​—Luka 8:1.

Opuro wa okokhorela wekeekhai. Opuro owo tonitthokihiwa aya muteko wa olaleerya ihapari sa Omwene. (Matheyo 24:14) Munnuwelo ni matekeliwo aya, onnivirikana, masi khasinaattiheriwa itthu. Mapuro makina Empa ya Omwene emosa enikhala ya miloko sinceene. Mwaha woowuncerereya anamalaleerya ni miloko, mahiku ala nooteka Ipa sa Omwene isya ikonto sinceene, (wiirela ikontha nimphwanya wira khuta nihiku sinitekiwa Ipa 5). Vaniweryaneya sai eyo?​—Matheyo 19:26.

Sinnitekiwa sirumeeliwaka soovaha sa muttetthe owo. Soovaha iyo sinniroihiwa ofiliyaali onawehiwa waarowaka ophiyerya oteka wala olokiherya Empa ya Omwene.

Sinitekiwa ni atthu oowiivahererya ahiniliviwa etthu a makhalelo oovirikana. Ilapo sinci sookhala Igrupu Sinteka Ipa sa Omwene. Igrupu sa arumeyi aniteka Ipa iyo ni anna owiivahererya, annikhuma mmulokoni mwaya arowaka muloko mukina wala muttetthe mukina woorakamela wa elapo yeeyo, wira yahooleleke miteko sa oteka ni owiixuttiha anna a muloko onitekiwa Empa eyo ya Omwene. Ilapo sikina, Anamoona a Yehova oophwanelela annithanliwa ohoolela muteko wooteka ni olokiherya Ipa sa Omwene sa muttetthe owo. Khuta opuro onitekiwa, anna anceene anisuwela etthu anniivahererya ovara muteko owo, masi muteko munceene onivariwa ni anna a muloko a muttetthe owo. Munepa wa Yehova onnaakhaliherya atthu awo aniivahererya ni murima wotheene ovara miteko siniwerya aya.​—Esalimo 127:1; aKolosi 3:23.

• Xeeni opuro onikokhorela ahu oniitthaniwa aya Empa ya Omwene?

• Vaniweryaneya sai otekiwa Ipa sa Omwene ilapo sotheene?

Khuta Empa ya Omwene ya Anamoona Yehova enithoonyerya nsina noowaarya na Muluku. Okhala wira mpantta wa okokhorela wahu ni eparakha yuulupale, khuta mutthu onnoona otthuneya waya othokorerya Ipa sa Omwene wira sikhaleke sooloka ni sooreera saana.

Mwiivahererye nuumala muthukumano wira mureerihe Empa ya Omwene. Nuumala khuta muthukumano axinna ni axirokora moohakalala annireeriha saana Empa ya Omwene. Mukwaha mmosa vasumanani onnivariwa muteko woorattela saana. Mutokweene aahiiso murummwa oorumeela onnihoolela muteko owo, avarihelaka elista ya itthu soovara. Moovarihana ni etthu enireerela opakiwa, akina anikumiha ikokhola ni ntthupi, orapiha mpuwa wa Empa eyo, ikhattera, ixanela, iviiduru, orapiha ilatrina ni murette, oreeriha nivate ni ejardim. Mukwaha mmosa vamwaakhani, ninnikhala nihiku na oreeriha itthu kamosa-kamosa. Anamwane anivahiwa miteko sikina, nto enniwiixuttiha ottittimihaka Ipa sa Omwene.​—Musuweli 5:1.

Mwiivahererye wira nvareke khula muteko. Khuta mwaakha annipakiwa malokiheryo a ovarerya Empa ya Omwene, mpuwa ni ota. Nuumala ovarerya, yaphwanyiwa etthu yoohiloka ennilokiheriwa moohipisa wira esalau ekhaleke yooreera nto eyo enniiriha osyaka ohonona musurukhu munci. (2 Wahala 24:13; 34:10) Ninnimananiha oteka Empa ya Omwene okhala nipuro nooratteleya ni noothokoreriwa saana ntoko nipuro ninreerela omukokhorela Muluku ahu. Okhaliherya muteko ola ti etthu ennooniherya moota murima ahu oninvaha aya efaita Yehova, vamosa ni opuro wa omulompa. (Esalimo 122:1) Eyo enniiriha-tho Empa ya Omwene wooniwaka okhala yooreera mmuttettheni.​—2 aKorinto 6:3.

• Xeeni vanreerela aya ocalela nipuro nahu nookokhorela?

• Eprograma xeeni enipakiwa wira eratteliwe Empa ya Omwene?

Munniphavela otokosa itthu wira muncererye osuwela wanyu voohimya sa Biibiliya? Niireke muniphavela wiiwexexa yoolepa emosa, aahiiso mutthu, nipuro wala etthu eromoliwe mBiibiliyani? Aahiiso muniphavela osuwela moota Nuulumo na Muluku nikhanle aya oowookhaliheryani ni muxankiho aarina anyu? Nto muxukurye eBiibilioteka ya Empa ya Omwene.

Ennikhaliherya otokosa myaha sinci. Pooti wira nyuwo khamurina iliivuru sotheene sa Anamoona a Yehova mwa nttaava nanyu. Masi ebiibilioteka ya Empa ya Omwene yookhalana iliivuru sikumiheriwe naanano. Pooti wira yookhalana-tho aBiibiliya a muthinto woovirikana ni aDisionaario ooloka ni iliivuru sikina sinikhaliherya otokosa myaha. Sihinatthi wala nuumala mithukumano, nyuwo pooti osoma iliivuru siri obibilioteka. Akhala wira ohaavo komputadore, owo pooti okhalana Watchtower Library. Owo ti programa eletroniko orina iliivuru sahu sinceene, nto onnikhweiherya otokosa myaha, okhala wira vanniweryaneya olepa moolumo wala yoolepa ya Biibiliya wira muphwanye mwaha oniphavela anyu.

Ennaakhaliherya ale yiilepinhe Okumi ni Orummwa Ahu wa eKristau. Nyuwo pooti ovarihela muteko ebiibilioteka eri Empa ya Omwene okathi onilokiherya anyu mwaha. Munna onihoolela muthukumano owo, toniweherya ebiblioteka eyo. Owo ohaana osuwelexa wira sookhala-mo iliivuru seiye sikumiheriwe niinano, ni akhala wira sootthokiheya saana. Owo wala ole onoosomihani Biibiliya pooti owooniheryani moota woophwanya mwaha oniphavela anyu. Masi khuuvo oneemereriwa okuxa eliivuru Empa ya Omwene. Ohiya-vo nihaana-tho othokoreryaka saana ni ohilepa etthu mpuwa mwaya.

Biibiliya onihimya so: Akhala wira ‘nimphavela omusuwela Muluku’, nihaana ophavelaka ntoko “muhakhu wovithiwa”. (Miruku 2:1-5) Ebiibilioteka ya Empa ya Omwene enoonikhaliherya opaka eyo.

• Itthu xeeni sa otokosa myaha sikhanle obibilioteka wa Empa ya Omwene?

• Tani onrowa wookhaliheryani ovarihela muteko ebiibilioteka ela?

Yesu aahaaleela atthareli awe wira: “Warya wanyu wamwaleleke atthu, wira yòneke miteko sanyu sorera siniranyu, yavuwiheke Atith’inyu ari wirimu”. (Matheyo 5:16) Wira eyo yiiraneye hiyo ninnirumeela etekonologia ya vano vanceenexa Interneti. Websaite ahu jw.org, ti opuro woweemereriwa onlaine onitthokiherya sookupali ni miteko sa Anamoona a Yehova. Nto itthu xeeni siheliwe?

Annaakhuliwa makoho a Biibiliya animakela opakiwa. Nyuwo munoophwanya waakhuliwa wa makoho ootthuneya atthu anikoha aya. Mwa ntakiheryo, ifolyeeto Niireke Ohaawa Onoomala? ni ele eni: Niireke Alipa-ookhwa Anookhala-tho Akumi Tthiri? sinniphwanyaneya onlaine mattaava anivikana 600. Nave onniphwanyaneya Biibiliya Tradução do Novo Mundo mattaava anivikana 130 ni iliivuru sinci sinikhaliherya omwiiwexexa Biibiliya. Iyo sinihela muhina eliivuru Biibiliya Oniixuttiha Exeeni Tthiri? ni irevista Owehaweha ni Despertai! sa khula mweeri. Mwa iliivuru sinceene iya pooti osommwa, owiriyaniwa, okopiyariwa, aahiiso obaxariwa MP3, PDF, wala EPUB. Nyuwo pooti wimpirimiri ipaaxina vakhaani wira mwaavahe atthu akina sinaasivela mwa nttaava naya! Sookhala-tho iviidiyu sinceene sa nttaava ninlavuliwa ni matata. Nave-tho nyuwo pooti obaxari osommwa wa Biibiliya onivara murima, idrama sa mBiibiliyani, ni muusika ahu wooreera wira nwiriyaneke.

Sookhala soohimmwa sekeekhai sa Anamoona a Yehova. Sinniheliwa-tho iviidiyu sinooniherya muteko ahu onivariwa molumwenkuni, itthu siniwiiraneela Anamoona a Yehova, ni nikhaliheryo nnaavaha ahu atthu aniphwanyiwa ihasara. Nyuwo pooti ophwanya soohimmwa sa akongresu anrowa wiireya ni itthu sikina sa ifiliyaali sahu.

Opaka ela onninikhaliherya owooniherya atthu ekeekhai mpakha omalenle elapo. Atthu a ikontinenti sotheene ohela muhina Antártida annittottela mureerelo masu a Muluku. Ninnivekela “wira molumo Àpwiya yakuve omwaramwareya” valaponi votheene wira Muluku avuwihiwe.​—2 aTesalonika 3:1.

• Websaite jw.org onaakhaliherya sai atthu omwiiwexexa Biibiliya?

• Etthu xeeni eniphavela anyu osoma va Websaite ahu?