Anamunceene aahiya orowa okerexa, mwaha woowi ele enihimmwa khenaakhaliherya ni khenaakhula makoho aya. Xeeni vanitthuneya anyu orowa omuthukumanoni wa Anamoona a Yehova? Munrowa ophwanya exeeni?

Munimwaaphwanya atthu aniphentana ni othokoreryana. Eseekulu yoopacerya maKristau yaahikhalana miloko, nto khuta muloko waanikhalana mithukumano sa omulompa Muluku, osoma Soolempwa ni olipihana. (aHéberi 10:24, 25) Mwaha wookhala ni atthu oophentana, awo yaari apatthani oororomeleya, eyo piiyo, anna ni arokora eeKristau. (2 aTesalonika 1:3; 3 Yohani 14) Hiyo nintthara ntakiheryo naya, nto ninniphwanya ohakalala.

Oreera waya wiixutta ni weettela malamulo maalupale a Biibiliya. Ntoko khalai, olelo-va, alopwana, athiyana ni anamwane annithukumana vamosa. Awiixuttihi oophwanelela amurumeelaka Biibiliya, anninikhaliherya osuwela ovarela muteko mookumini mwahu malamulo maalupale a Biibiliya. (Otumererya 31:12; Nehemiya 8:8) Nto atthu otheene anneemereriwa okomentari ni wiipa, wira yooniherye nlipelelo naya na eKristau.​—aHéberi 10:23.

Mareeliho mwaha woomwaamini saana Muluku. Murummwa Paulo aahaahimeerya anna a muloko mmosa wira: ‘Kinniphavelexa wowehani, wira nilipihane ni wamini omosaru, wawinyu ni wawaka’. (aRoma 1:11, 12) Okhala wira omuthukumanoni ninnikumana ni annihu oowaamini, nroromelo nahu ni oKristau ahu onnilipa.

Ninnoolattulani orowa owiriyana muthukumano ahu wira moone mmansinyu. Munimwaakheliwa saana. Mithukumano sotheene khisinliviwa etthu, ni kheneettihiwa ephace ovekiwaka musurukhu.

• Mithukumano sahu sa mmulokoni sinitthara ntakiheryo xeeni?

• Mareeliho xeeni nimphwanya ahu mwaha woorowa omuthukumanoni?

Hiyo khannicompela mithukumano sa eKristau hata ikwaha sikina niviraka mutakhwani, nsuwa nivihaka wala epula erupaka. Xeeni Anamoona a Yehova aniimananiha aya orowa othukumana ni anna aya maKristau, hata akumanaka mixankiho wala otemwa mwaha wa miteko sa khuta nihiku?

Mithukumano sinniniiriha okhala saana. Vaavo murummwa Paulo aalempe awe wira “nùpuxeryaneke mukina ni mukhw’awe”, aahimya ale anithukumana ni hiyo mmulokoni. (aHéberi 10:24) Moolumo awo anooniherya wira nihaana osuwelana saana. Masu a Paulo anintumererya ophavelaka waathokorerya akina. Osuwela imusi sikina sa annihu maKristau, onooniiriha woona moota aniwerya aya oxintta mixankiho soolikana ni sawihu ni pooti onikhaliherya oxintta mixankiho sahu.

Mithukumano sinnilipiha wataana wahu. Othukumana wahu mmulokoni khonlikana ni othukumana ni atthu pure anaasuwela ahu. Hiyo ninthukumana ni egrupu ya atthu akhanle tthiri apatthani ahu. Ikwaha sikina, ninnithukumana mwaha woophavela othekula mwa enamuna yookhalela. Nto mithukumano iyo sinikumiherya mireerelo xeeni? Ninniixutta moota woottittimihana ni sinnilipiha wataana wahu. Nto saaphwanya mixankiho annihu, hiyo ninnaakuvela waakhaliherya mwaha wa ophenta orina ahu. (Miruku 17:17) Wataana ni anna otheene mmulokoni, onimooniherya wira ‘ninnithokoreryana mukina ni mukhwaawe’.​—1 aKorinto 12:25, 26.

Nto ninnootumereryani wira apatthani anyu akhaleke atthu yaale aneettela sooruma sa Muluku. Nyuwo munoowerya waaphwanya eriyari ya Anamoona a Yehova. Nto ehikhale etthu enrowa owiirihani okhootta wataana ni hiyo.

• Xeeni othukumana ni axinnihu onikumiherya mireerelo?

• Munrowa liini waasuwela atthu a muloko ahu?

Mithukumano sa maKristau oopacerya atthu yaaniipa masipo, olompa, osoma ni otthokiherya Soolempwa, masi moohitthara soolema sa atthu. (1 aKorinto 14:26) Nto mithukumano sahu munrowa ophwanya etthu emosaru.

Malakiheryo anikhuma mBiibiliyani toovareleya muteko. Wuumalani wa esumana, miloko sinceene sinnithukumana wira siwiriyane mwaha onikhuma mBiibiliyani wa minutu 30, yoowo onitthokiherya moota Soolempwa sinivarihana aya ni makhalelo ahu ni okathi onikhala ahu. Otheene ahu ninnitumereriwa otthara mBiibiliyani mwahu okathi onisommwa aya. Nuumala mwaha owo, ennikhala Yoosoma ya “Owehaweha” ya ewoora emosa, yeeyo atthu otheene anitumereriwa aya ovaha ikomentaario arumeelaka erevista erina mwaha onisommwa nihiku nlo. Yoosoma ela ennikhaliherya weettela sooruma sa Biibiliya mweekumini mwahu. Mwaha mmosaru owo onnithokoreriwa miloko sinivikana 110.000, molumwenkuni.

Ninnikhaliheriwa wira niixuttiheke saana. Ninnikhalana eriyari ya esumana muthukumano orina ipantta tthaaru nirumeelaka Okumi ni Orummwa Ahu wa eKristau, yeeyo enikumiheriwa khuta mweeri Okumi ni Orummwa Ahu wa eKristau Ekaderno Enirumeeliwa Omuthukumanoni. Mpantta woopacerya wa muthukumano ola, ninnithokorerya Mihakhu Sinkhuma MBiibiliyani, seiyo sinnikhaliherya wiixutta ikapiitulu sa Biibiliya sithanliwe esumana eyo. Moottharelana ninnikhalana mpantta oni: Murumeele Saana Malakiheryo Ala Okathi Woolaleerya, nto mpantta ola onnikhalana sowooniherya sinnikhaliherya waalaleerya atthu nimurumeelaka Biibiliya. Muhooleli a muthukumano onnivaha miruku sinnikhaliherya olokiherya osoma wahu ni olavula saana niixuttihaka. (1 Timótheyo 4:13) Mpantta wookiserya wa muthukumano ola oni: Makhalelo a MaKristau, ninnithokorerya moota woovarihela muteko malakiheryo a Biibiliya mookumini mwahu. Mpantta ola annikhala makoho ni waakhuliwa yaawo annikhaliherya omwiiwexexa saana Biibiliya.

Okathi onirowa anyu omuthukumanoni wahu, munimoona moota Biibiliya sinitthokiheriwa awe saana.​—Yesaya 54:13.

• Munrowa woona exeeni omuthukumanoni wa Anamoona a Yehova?

• Muthukumano xeeni vasumanani oniphavela anyu orowa niinano-va?

Mooweha ilatarato sa ebroxura ela moota Anamoona a Yehova aniwara aya yaarowaka omuthukumanoni? Xeeni nikhanle ahu oovaha ephoole moota oniwara ahu ni moota wowiitthokiha?

Mwaha wa omuttittimiha Muluku ahu. Ekeekhai wira Muluku khaniweha mukhalelo ahu paahi a werutthuni. (1 Samuweli 16:7) Hata vari siiso, okathi onithukumana ahu wira nimulompe yena, yoolakela ahu ti omuttittimiha Muluku, vamosa ni annihu eeKristau. Vakhanle wira ninrowa opuro oniphukiwa milattu ohoolo wa namaphuka milattu, hiyo naarowa owara saana mwaha wowaattittimiha ale aniphuka. Vamosaru, mawarelo ahu naarowaka omuthukumanoni anooniherya omuttittimiha wahu ole ‘onilamula elapo yothene’ Yehova Muluku, vamosa ni opuro onilompa ahu.​—Maphattuwelo 18:25.

Mwaha wa ottittimiha malamulo aneettiha okumi ahu. Biibiliya onnaatumererya maKristau owara ikuwo ‘vohùliha muru ni vohìsona’ ntoko atthu ‘animuttittimiha Muluku’. (1 Timótheyo 2:9, 10) Owara ‘vohùliha muru’ ontaphulela osyaka ikuwo mutthu siniwara awe mwaha woophavela wooniwa paahi, wala sowooneela mpuwa ni sootannya. Nave owara ikuwo “vohìsona” ononiirihaka othanla soowara soophwanelela, ohiya ikuwo soohitthokiheya wala sowuuliha muru. Malakiheryo ala khanimukhoottiherya mutthu othanla ikuwo sinimusivela masi siri sookhalela. Mawarelo ahu oophwanelela ‘anottittimiha mwixuttiho wa Muluku Mòpoli ahu’ ni ‘onvuwiha Muluku’, hata nihilavunle etthu. (Tito 2:10; 1 Pedru 2:12) Tthiri, owara saana naarowaka omuthukumanoni, onoowiiriha akina ophavela omukokhorela Yehova.

Muheemye wira ikuwo sanyu siwooceeliheni orowa Empa ya Omwene. Owara saana khontaphulela othuma ikuwo sa musurukhu munci, wira nooniwe okhala ooratta ni oophwaneliwa.

• Xeeni owara saana ori aya wootthuneya naarowaka omuthukumanoni?

• Malakiheryo xeeni nintthara ahu voohimya sa ikuwo sahu ni moota wowiitthokiha?

Akhala wira munimusoma Biibiliya ni Anamoona a Yehova, pooti wira khuta esumana munnilokiherya vahinatthi mwaha onrowa anyu osoma. Nto wira muttottele mureerelo mithukumano, muhaana opaka etthu emosaru. Olokiherya mithukumano sa khuta esumana onnikumiherya mireerelo sinci.

Muhaana othanla opuro ni okathi woosoma. Okathi xeeni onoona anyu okhala wooloka? Niireke voosisu muhinatthi opacerya ovara miteko sanyu, wala makaaripi anamwane aronwe ene orupa? Hata muhiweryaka osoma okathi munceene, muthanle okathi onirowa anyu oviriha musomaka ni muheemererye etthu ekina woohiihani. Mukhaleke opuro woomaaleleya ni ohikhanle etthu eniwaakanyeryani ntoko: raadio, televisau, wala telefoni. Ovekela muhinatthi opacerya onimookhaliheryani ovukula soothananiha sa khuta nihiku ni wuupuwelaka saana Nuulumo na Muluku.​—aFilipi 4:6, 7.

Muhele ethoonyeryo moolumo anirowa anyu okomentari. Wuupaceryani muhaana ovarerya mwaha wotheene. Muupuweleleke muru wa mwaha owo wala ekapitulu; muhaana woona-tho moota khula iponto ikhaani sinivarihana aya ni muru owo; mutokoseke ilatarato ni makoho oowuuluula anttittimiherya iponto suulupale. Nto, musomeke khuta ettima ni ophwanya waakhuliwa wa khuta nikoho. Musomeke soolepa sooniheriwe ni muupuweleke moota sinivarihana aya ni mwaha owo. (Miteko 17:11) Okathi oniphwanya anyu waakhuliwa wa nikoho, muheleke ethoonyeryo efrase wala masu a eponto yuulupale anrowa owiirihani wuupuwela wakhuliwa wa nikoho nlo. Mwaphavela, omuthukumanoni munoowerya weemexa ntata nanyu wira mwaakhule mowaakuveya ni masu anyu.

Ovarerya myaha sinithokoreriwa khuta esumana mmulokoni, onimuncererya ‘muhakhu’ anyu wa osuwela onikhuma mBiibiliyani.​—Matheyo 13:51, 52.

• Itthu xeeni mukhanle anyu oopaka wira mulokiherye mithukumano?

• Munrowa wiilokiherya sai wira mwakomentari omuthukumanoni?

Okhuma khalai, Yehova omphavela wira khuta etthoko eviriheke okathi hoothe, elipihaka wataana waya ni Muluku vamosa ni olipiha etthoko aya. (Otumererya 6:6, 7) Tivonto Anamoona a Yehova anikhalana aya okathi khuta esumana wira amukokhorele Muluku vatthokoni, eyo piiyo, othokorerya moomaaleleya myaha sa Biibiliya sinireerela vatthokoni vaya. Hata mukhalaka mekhinyu, nyuwo pooti ottottela mureerelo okathi owo mulavulaka ni Muluku, niire so, muthokoreryaka mwaha mmosa wa mBiibiliyani onoosivelani.

Owo ti okathi womwaattamela Yehova. “Mmwattameleke Muluku, Muluku onowattamelani”. (Yakobo 4:8) Ninnimusuwela saana Yehova vaavo ninsoma ahu mikhalelo ni miteko sawe mBiibiliyani. Enamuna emosa yookhweya ya opacerya omulompa Muluku vatthokoni, ori omusoma Biibiliya mowiiwanyeya, waaniheryasa muttharaka eprograma ya khuta esumana ya Okumi ni Orummwa Ahu wa eKristau. Khuta mutthu vatthokoni-vo, pooti othanleliwa mpantta mmosa wa yoosoma eyo. Nuumala osoma, atthu awo pooti ohimya etthu yiixuntte aya.

Okathi wowiiraana vatthokoni. Mulopwana ni mwaara awe, anamuyari vamosa ni anamwane, annilipiha wataana waya vaavo vanimuthokorerya aya Biibiliya hoothe. Okathi owo wohaana okhalaka woohakalaliha, woomaaleleya ni woovara murima. Anamuyari ahaana othanlaka myaha sinireerela othokorerya ni anaaya moovarihana ni iyaakha saya. Nyuwo pooti orumeela irevista Owehaweha ni Despertai! Aahiiso onweha websaite ahu www.pr2711.com/vmw. Nyuwo pooti othokorerya mixankiho sinikumanana aniinyu oxikola, wira asuweleke etthu ekhanle aya oopaka. Nwehe eprograma ya televisau JW Broadcasting (tv.jw.org), nto nuumala oweha muthokorerye vamosa. Pooti wiixutta masipo anrowa wiipiwa omuthukumanoni, nto nuumala omulompa Muluku vatthokoni pooti okumiherya etthu yoolya enaahakalaliha atthu otheene.

Okathi ola wa vameekhaaya muniviriha anyu khuta esumana mmulompaka Muluku vatthokoni, onimwiiriha etthoko osiveliwa Nuulumo na Muluku, nave owo onrowa oreeriha wiimananiha wanyu.​—Esalimo 1:1-3.

• Xeeni vaniimananiha ahu osuka okathi khula esumana wira nimulompe Muluku Vatthokoni?

• Anamuyari aniwerya sai wiiriha okathi owo okhala woohakalala wa etthoko yotheene?

Xeeni atthu ala ari aya oohakalala? Atthu ala aniwiriyana muthukumano ahu muulupale. Ntoko arumeyi a Muluku a khalai, yaarowela mithukumano suulupale ikwaha 3 vamwaakhani, hiyo ninnithukumana vamosa ntoko egrupu yuulupale. (Otumererya 16:16) Khula mwaakha, ninnikhalana mithukumano miraru, eyo piiyo: mithukumano miili sa esirkwiitu sa nihiku nimosa, ni mahiku mararu a muthukumano wa muttetthe. Mithukumano iyo sinnikhaliherya sai?

Sinnilipiha emusi ahu yowiiraana ya eKristau. Ntoko aIsarayeli yahakalala aya anvuwihaka Yehova “mmuthukumanoni,” hiyo ninnihakalala omukokhorela Muluku ni annihu mmithukumanoni sa vameekhaaya. (Esalimo 26:12; 111:1) Mithukumano iyo sinnikumiherya okathi wooreerela osuwelana ni othukumana ni anamoona a miloko sikina hata a ilapo sikina. Okathi woophumurya, hiyo ninnoolya hoothe nipuro na muthukumano, nincereryaka ohakalala wa okathi owo. (Miteko 2:42) Okathi owo ninniweha ophenta onnuuraanyiha ni ‘axinn’ihu òwamini’ mulaponi.​—1 Pedru 2:17.

Sinninikhaliherya orowa vahoolo momunepani. AIsarayeli yaanittottela mureerelo ‘wiiwa orattene molumo’ yaataphuleliwe a Soolempwa. (Nehemiya 8:8, 12) Hiyo-tho ninnivaha efaita malakiheryo a mBiibiliyani yaawo anaakhela ahu mmithukumanoni suulupale. Khula mwaha wa eprograma onikhuma mBiibiliyani. Sinnilavuliwa myaha soohakalaliha, myaha soohiyeryana, vamosa ni sowooniherya, ninniixutta moota woopaka yootthuna ya Muluku. Ninnilipihiwa vaavo vaniiwa ahu sowiiraneya sa anna axinttale mixankiho sinaaphwanya maKristau mahiku ala oovila. Omuthukumanoni wa muttetthe, idrama sa atthu awanre ikuwo sa okathi wa Biibiliya sinniixuttiha ni wooniherya moota Biibiliya oryaawe eekeekhai. Khuta muthukumano muulupale, annibatiziwa atthu yiivaherenrye wa Muluku.

• Xeeni mithukumano suulupale siri aya okathi woohakalaliha?

• Mareeliho xeeni aphwannye anyu mwaha woorowa mithukumano iyo?

Ohalaka vakhaani okhwa, Yesu aahimmye so: “Ehapar’ila yorera y’omwene wa wirimu enolaleiwa mulaponi mothene, wira maloko othene esuwele, yamini”, nuumala erweeke emaliheryo. (Matheyo 24:14) Nto muteko ola woolaleerya mulaponi motheene waarowa wiiraneya sai? Nittharaka ntakiheryo na Yesu okathi aarya awe valaponi.​—Luka 8:1.

Ninneererya olavulana atthu mmawannyeya. Yesu aahiwiixuttiha arumeyi awe olaleya ihapari sooreera khula empa. (Matheyo 10:11-13; Miteko 5:42; 20:20) Anamalaleerya a eseekulu yoopacerya yanithanleliwa mittetthe yaarowa aya olaleeryaka. (Matheyo 10:5, 6; 2 aKorinto 10:13) Vamosaru, olelo-va muteko ahu woolaleerya ori wootthokiheya ni khuta muloko onnithanleliwa muttetthe woolaleerya. Eyo enooniiriha owerya weettela moolumo a Yesu a “walalèrya atthu ni wakhalela onamona”.​—Miteko 10:42.

Ninnimananiha ophiya khuta opuro ori atthu. Yesu ovaha ntakiheryo na olaleerya opuro ari atthu anceene, mapuro owaattamela ephareya ni mittetthe sikina. (Marko 4:1; Yohani 4:5-15) Hiyo tho ninnilavulana atthu voohimya sa Biibiliya khuta opuro onaaphwanya ahu, mphironi, omerkaatu, oniweliwa ikaaro wala ni telefoni. Ninnaalaleerya-tho ale yaattamanne ahu, anivarana ahu muteko, aneettana ahu oxikola aahiiso amusi moovarihana ni okathi onireerela aya. Wiilipiherya wotheene onniwiiriha atthu imilyau sinceene mulaponi motheene wiiwa ihapari sooreera ‘sinopola’.​—Esalimo 96:2.

Niirele ohaavo mutthu oniphavela anyu omuhimeerya ihapari sooreera sa Omwene wa Muluku ni mireerelo sinrowa oruuhiwa ni Omwene owo? Muhooveleleke waaleela akina ihapari iya. Nto mwaakuveleke waaleela!

• ‘Ihapari xeeni sooreera’ sinitthuneya olaleiwa?

• Anamoona a Yehova anitthara sai ntakiheryo na Yesu na olaleerya?

Nuulumo noowi “pioneero” nintaphulela mutthu yoole onipaceriha osuwela muttetthe musya ni onitthukula ephiro wira atthu akina atthareke. Yesu aari pioneero, maana aahirwa valaponi wira ovahe okumi awe ni ohula ephiro ya woopoliwa. (Matheyo 20:28) Olelo va, awiixutti awe annimutakiha vaavo aniviriha aya okathi munceene ‘awixuttihaka atthu’. (Matheyo 28:19, 20) Akina annikela muteko yoole oniitthana ahu opioneero.

Pioneero tuule oniviriha okathi munceene olaleeryaka. Anamoona a Yehova otheene anamalaleerya a ihapari sooreera. Masi, akina anniitthokiha anarumeela ntoko pioneero okilaatheya, avirihaka iwoora 70 khula mweeri alaleeryaka. Wira apake eyo, mapioneero anceene annivukula okathi wa miteko sinivara aya mulaponi. Akina annithanliwa orowa orumeela ntoko mapioneero a vameekhaaya mittetthe seiye anitthuneya anamalaleerya a Omwene, nto khula mweeri, awo annilaleerya iwoora 130 wala ovikana-vo. Mapioneero awo annihakalala ni okumi wohaattana itthu, akupaliki wira Yehova onimwaavaha ele enaathowa. (Matheyo 6:31-33; 1 Timooteyo 6:6-8) Ale ahiniwerya okhala pioneero ookilaatheya pooti orumeela ntoko pioneero ookhaliherya oniviriha iwoora 30 wala 50 khuta mweeri.

Opioneero muteko onooniherya omphenta Muluku ni Atthu. Moolikana ni Yesu, ninnaalaleerya atthu anceene aniphavela osuwela moolumo a Muluku ni soolakela sawe. (Marko 6:34) Masi hiyo ninnisuwela wira nnoowerya waakhaliherya atthu awo vano, naavahaka nlipelelo nrina ahu na muhoolo. Waaphenta atthu onniwiiriha mapioneero wiivahererya wira yaakhaliheryeke atthu omusuwela Muluku. (Matheyo 22:39; 1 aTesalonika 2:8) Nto waamini waya onnilipa, annimwaattamela Yehova ni anniphwanya ohakalala wuulupale.​—Miteko 20:35.

• Mwarowa otthokiherya sai nuulumo noowi pioneero?

• Exeeni ewiirinhe akina okela muteko wa opioneero wookilaatheya?

Okhuma khalai exikola ya orummwa wa Muluku ennooniherya okhala ethoonyeryo yuulupale ya Anamoona a Yehova. Soopakiwa ixikola wira saakhaliheryeke anna yaale aniviriha okathi munceene avaraka muteko woolaleerya Omwene wira ‘anvareleke Muluku muteko womalela’.​—2 Timótheyo 4:5.

Exikola ya Muteko wa Opioneero. Nuumaliha eyaakha emosa orumeelaka ntoko pioneero ookilaatheya, munna aahiiso murokora onnilattuliwa orowela exikola enimaliha mahiku 6, yeeyo enipakiwa Empa ya Omwene waattamela opuro onikhala awe. Exikola eyo epakiwe wira emukhaliherye pioneero owo omwaattamela Yehova, okhumela saana mmuteko awe woolaleerya, ni ovikaniha ovara muteko woolaleerya moororomeleya.

Exikola ya Anamalaleerya a Omwene. Oopakiwa murehereryo ola wa oviriha myeeri miili akhaliheriwaka mapioneero yaawo aniphavela ohiya opuro onikhala aya wira yarumeeleke mittetthe sinipaveleya anamalaleerya. Anna ni arokora ala, annimutakiha Namalaleerya muulupale aatonko okhala valaponi, Yesu Kristu, vaavo vanihimya aya wira: “Miyo kiri va: kirumekeni”. (Yesaya 6:8; Yohani 7:29) Mutthu okhuma vate vawe pooti otthuneyaka wiilokiherya wira akhaleke moovarihana ni makhalelo a opuro onrowa awe. Makhalelo awo pooti ohela muhina oriirya ni oviha wa opuro owo, aahiiso yoolya pooti okhala yoovirikana ni ele elimalenle awe. Nave pooti otthuneyaka wiixutta nttaava nikina. Exikola ela enniwiixuttiha anna ni arokora, ni anamathelana yaawo arina iyaakha 23 mpakha 65, yaakhaliheryaka okhalana mikhalelo somunepani seiyo sinrowa owiiriha ovara saana miritti sinivahiwa aya, ni ankhili anrowa waakhaliherya orumeeliwa saana ni Yehova ni otthokeya wawe.

Exikola Enimwiixuttiha Biibiliya ya oGileadi. Nuulumo na eHeeberi noowi “oGileadi” nintaphulela “Waatta wa Onamoona”. Nto okhuma mwaakha wa 1943 vaavo vapacenrye aya exikola ela, aagraduariwa mamisionaario anivikana 8.000, khuroihiwa “mpakha wokiseryani w’elapo” wira yalaleeryeke. (Miteko 13:47) Vaavo mamisionaario oopacerya ograduariwa vaaphiyale aya oPeru, khisaakhanle miloko. Nto vano sookhala miloko sinivikana 1.000. Nave okathi mamisionaario yaapacenrye aya olaleerya oJapão, Anamoona khiyaaphiya 10 mwaattelo aya. Masi vano aavikana 200.000. Myeeri mithanu sa kursu a oGileadi sinihela muhina osoma ni ovarerya saana Nuulumo na Muluku. Anna anirumeela ntoko mapioneero a vameekhaaya, mamisionaario, maBethelita, ni axitokweene a esirkwitu, annilattuliwa orowa wiixuttihiwa exikola ela wira akhaliheryeke ni olipiha muteko onivariwa olumwenku wotheene.

• Epakeliweni Exikola ya Muteko wa oPioneero?

• Anna xeeni anilattuliwa Exikola ya Anamalaleerya a Omwene?