Musulwaawe Paulo Aari Oolipa Murima

Nrowe nilavule sa mmiravo ooponle okumi wa taata awe. Owo aari musulwaawe murummwa Paulo. Hiyo khaninsuwela nsina nawe, masi owo aahipaka etthu yooniherya olipa murima. Niireke munniphavela osuwela ele aapakale awe?—

Paulo aari mukhatteya, oYerusalemu. Owo aatthukweliwe mwaha wa olaleya voohimya sa Yesu. Nto yaahikhala alopwana ootakhala yaamunyokha Paulo, ni yampanke palano oohiloka. Awo yaahihimya wira: ‘Nrowe ninvekele muulupale aanakhotto wira aarume atoropa awe omuruuha Paulo otribunaali. Vano, nnoomwiipithela mphironi, nto okathi onirowa awe ovira nnoomwiiva!’

Musulwaawe Paulo aahimwiiwa palano owo. Nto, exeeni aapanke awe? Owo aahirowa mukhatteya ni aahimuleela Paulo voohimya sa palano owo. Moohipisa Paulo aahimuruma orowa omuleela mukhulupale aanakhotto. Munoonela sai, mmiravo owo aahoona okhweya olavula ni mukhulupale owo?— Nnaari, mwaha woowi mukhulupale owo aari mutthu oowoopiha. Masi musulwaawe Paulo aahilipa murima ni khurowa olavulana.

Mukhulupale owo aahisuwela etthu yaareerela opaka. Owo aahaakuxa anakhotto oowiiraka 500 wira amukhaliherye Paulo! Nave, aahaaruma omukuxa Paulo wira amuroihe oKesareya ohiyu ene yoowo. Niireke Paulo ahoopowa?— Aayo, alopwana ale ootakhala khiyaawenrye omutuphela Paulo! Palano aya ootakhala khaavanre muteko.

Mwaha ola oniwiixuttihani exeeni?— Nyuwo muhaana olipaka murima ntoko musulwaawe Paulo. Nihaana olipaka murima vaavo ninlaleya ahu masu a Yehova. Niireke nyuwo munoolipa murima ni ovikaniha olaleya masu a Yehova?— Akhala wira munoopaka eyo, nyuwo pooti omoopola mutthu mukina.