Oxintta Wa Omwene​—Orumeeliwa wa Malamulo Wira Saakiheriwe Ihapari Sooreera

NILIKANYIHE wira nyuwo munilaleerya empa ni empa. Moohipisa munniiwa oruma wa esireni. Vano eyo ennitepa wiiwanyeya. Okathi munipacerya anyu olavula empa ekina, mwaapara anyu onnixankiheya vaavo ekaaro ya mapoliisia eniphiya aya. Poliisia mmosa onnikhuma mukaaroni onarwa vakhiviru vanyu nto khiyakoha so: “Ti nyuwo niiwale ahu wira muneetta empa ni empa mulavulaka voohimya sa Biibiliya? Nileeliwe itthu soohiloka voohimya sa nyuwosa!” Nyuwo munnaakhula moottittimiha, mooniheryaka wira mwa Anamoona a Yehova. Nto exeeni enirowa okhumelela moottharelana?

Ele enirowa okhumela enlipa ni sowiiraneya sa opuro owo. Mwa iyaakha sivinre, moota xeeni guvernu a elapo anyu oniwoonela awe Anamoona a Yehova? Niireke itiini sinneemereriwa miteko saya? Vakhala wira ti siiso, eyo enooniherya wira waaniheryasa mwa iyaakha sivinre anna yaahilipiha wira yaakiherye ni ‘olipiha ihapari sooreera’. (aFil. 1:7) Voohicikha etthu sa nipuro nnikhala anyu, wuupuwelela myaha sinixinttiwa ni Anamoona a Yehova mutribunaali, onoolipiha waamini wahu vanceene. Epantte ela, enrowa othokorerya myaha iyo. Oxintta wahu onooniherya wira Omwene wa Muluku onnilamulela, maana khinaawerya opaka etthu mekhihu.