Xeeni Waarowa Aya Okhala Opwetexiwa

Yesu aaheererya inamuna soovirikana wira aakhaliherye atthu woona otthuneya waya okhalana ompatthani wooloka ni Muluku. Yesu aahaakhaliherya ekwaha ekina vaavo aari awe ntthoko na nFarisi.

Atthu akina yaari vaavale, yaahilavula ehasara yiiraneyale. Awo yaahimya ‘atthu òGalileya, yawo guvernatoro Pilato [ooRoma] arummyawe wiviwa okathi wahelaya mukuttho’. (Luka 13:1) Yaaphavela ohimya exeeni?

Woonasa wene, atthu ale a oGalileya ti yaale yaiviwe vaavo aYuda anceene yanvaanyinha aya Pilato mwaha woorumeela musurukhu wa otemplo wira oteke mukhulaku waarowa oruuhaka maasi oYerusalemu. Pooti wira makhulupale a mutemplo ti yamphwanyihale Pilato musurukhu ole. Woonasa wene, awo yuupuwela wira atthu a oGalileya yaahaaphwanya ehasara ele mwaha wa miteko saya sootakhala. Masi Yesu aahaavaanyiha.

Yesu aahaakoha wira: “Munùpuwela wira atthu awo òGalileya, yivakasiwe siso, yari òtakhalexa wavikana aGalileya akina?” Yesu aahaakhula wira nnaari. Masi aahirumeela ehasara ele wira aalopole aYuda ale oriki: “Nto, mwahirukunuxe murima, munimokhwa othene siso”. (Luka 13:2, 3) Nuumala-vo, Yesu aahilavula ehasara ekina yiiraneyale niinanoru okathi waatekiwa aya mukhulaku ole.

Vano Yesu aahaakoha wira: “Khi ale mulokó n’athanu n’araru yaphitiwe n’impa y’oSilowé, khukhwasa: munùpuwela wira atthu awo yari òtakhalexa wavikana atthu akina othene òYerusalemu?” (Luka 13:4) Muttitthi ole wuupuwela wira atthu ale yaakhwiiye mwaha woopaka itthu sootakhala. Vano Yesu aahitthikela waavaanyiha. Maana aanisuwela wira “oreriwa n’utakhaliwa” ti waakhumelenle atthu ale. (Musuweli 9:11) Atthu ale yaahaana wiixutta etthu ni yookhumelela ele. Yesu aahimmye so: “Nto, mwahirukunuxe murima, munimokhwa othene siso”. (Luka 13:5) Xeeni Yesu aattittimiherya awe etthu ele?

Mwaha woowi aahiviriha okathi munceene olaleeryaka. Ti maana aya aarumenle awe nlikanyiho noowi: “Mutthu mmosá ahiphatteya mmatta mwawe mwiri wa ifigu. Vano ahirowa ophavela mihokorokho mmwirini mmo, khuhiphwanya. Tivó, ahimwirela namulima wira: ‘Sovira iyakha ttharu kirwaka ophavela mihokorokho sa mwiri ula, kihinaphwanya. Mùhé! Onivuvurela-ni mahala etthay’ela?’ Vano namutek’owo ahimwakhula wira: ‘Pwiya, muhiyé mano mitano va. Miyo kinothipa mukhitte mwaya, kìtthele ikokhola. Mwahiyu waimá, onokhala: wahìme, mùhiheke’”.—Luka 13:6-9.

Iyaakha saavikana tthaaru, Yesu aaheererya waakhaliherya aYuda wira amwaamini Muluku. Hata vari siiso, atthu vakhaani paahi ti yaakhanle awiixutti awe. Nto awo pooti othokoreriwa ntoko yoowiima ya muteko awe. Vano waari mwaakha wa neexexe wa muteko woolaleerya wa Yesu, owo aahiimananiha vanceene. Mwaha wa olaleerya ni wiixuttiha oYudeya ni oPereya, vaakhala ntoko wira Yesu aamuthipa ni ohela eturumu mwiri wa efiigu ya aYuda. Tiivi yaari yookhumelela aya? AYuda vakhaani paahi ti yeemerenrye muhupi wa Yesu. Okhala wira nloko notheene na aYuda naahikhootta ottharuwa itampi saya, awo yaarowa opwetexiwa.

Okathi vakhaani, nihiku na Saabadu, atthu anceene yaahooniherya ohimwaamini waya Muluku. Yesu iixuttihaka oSinagoga, aahimoona muthiyana aavirinhe iyaakha 18 okulamme ene mwaha woovariwa ni nlaikha nootakhala. Omoonelaka othunku, Yesu aahimuleela wira: “Nyuwo mama! Movona erett’anyu”. (Luka 13:12) Nuumala Yesu onvara muthiyana ole, owo aahookololowa, niire so, aahipenuwa onapacerya onvuwiha Muluku.

Nto eyo yaahimwiiriha presidenti a osinagoga onanariwa onahimya wira: “Àkhala mahiku mathanu na mosa òvara muteko. Murweke mahiku yawo, nvonihiweke iretta sanyu, khahiyó nihiku na Sábadu!” (Luka 13:14) Mukhulupale ole khaakhoottale wira Yesu aahikhalana owerya wa waavoniha atthu, masi aapwapwela atthu ale mwaha woorwaka openuxiwa nihiku na eSaabadu! Mwa miruku Yesu aahimwaakhula wira: “Anawothe! Khula mutthu a nyuwo khantaphula enyompe awe walá bùru awe munsisini nihiku na Sábadu, khíyarowana owuriha? Vano, muthiyan’ola, ori mwana Àbrahamu, ovirihale iyakha mulokó ni thanu na ttharu [18] atthukiwene ni Satana, khakhanle otaphuliwa ohawa nno nihiku na Sábadu?”​—Luka 13:15, 16.

Atthu ale yaamulupattha Yesu yaahuuliwa muru, masi muttitthi ole waahihakalala mwaha wa itthu sootikiniha Yesu aapanke awe. Nuumala-vo, Yesu aahitthikela olavula oYudeya malikanyiho manli a Omwene. Yaawo aalavunle awe ori ene mukalawani Ephareya ya oGalileya.​—Matheyo 13:31-33; Luka 13:18-21.