Okathi mwaamusoma anyu Biibiliya ni Anamoona a Yehova ahookhaliheryani osuwela saana ekeekhai ya mBiibiliyani. Moohaaniherya, itthu mwiixuntte anyu, soowiirihani wataana ni Muluku ni sihoovahani nlipelelo na okumi muhoolo ni mareeliho mparayiisu valaponi elamuleliwaka ni Omwene wa Muluku. Waamini wanyu Nuulumo na Muluku ohoolipihani, nave mwaha wowaataana ni muloko wa eKristau, wowiirihani ophwanya mareeliho manceene. Nave munnixukhurela moota Yehova onaathokorerya awe atthu awe olelo-va.—Zak. 8:23.

Nto vaavo muniilokiherya anyu wira mpatisiwe, nyuwo munoottottela mureerelo wuuluula sowiixuttiha suulupale sa mBiibiliyani, wira mwathokorerye ni axitokweene a mmulokoni. (aHéb. 6:1-3) Yehova ovikanihe oreeliha wiimananiha wanyu wira mmusuwele yena, ni oovaheeni etthuvo oleihenrya awe.—Yoh. 17:3.

1. Xeeni muniphavela anyu opatisiwa?

2. Yehova ti pani?

• “Yehova ti Muluku eekeekhai, wiirimu ni vathi. Khuuvo-tho Muluku mukina”.—Otum. 4:39, Tradução do Novo Mundo.

• “Nyuwo nsina nanyu ti Yahvéh [Yehova], nyuwo mekhinyu mwà namusulú velaponi vothene”.—Esal. 83:19, Biblya Exirima.

3. Xeeni munireerela anyu orumeela nsina na Muluku?

• “Vano, mulompeke so: ‘Tith’ihu, muri wirimu! Nsina nanyu nivuwihiwe’”.—Math. 6:9.

• “Atthu othene anvekela nsina n’Apwiya animòpowa”.—aRom. 10:13.

4. Biibiliya onirumeela moolumo xeeni wira omuhimye Yehova?

• “Apwiya ti Muluku a mahiku othene: awo t’apattunxe ilapo sothene sa vathí”.—Yes. 40:28.

• “Tith’ihu, muri wirimu”.—Math. 6:9.

• “Muluku ophentá”.—1 Yoh. 4:8.

5. Etthu xeeni mukhanle anyu onvaha Yehova Muluku?

• “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene”.—Mar. 12:30.

• “Mwakokhorele Apwiya, Muluku anyu: mwattittimiheke yawo pahi”.—Luka 4:8.

6. Xeeni muniphavela anyu ororomeleya wa Yehova?

• “Mwan’aka, nwetteleke ankhili: siso miyo kinotteliwa murima, kinowerya omwakhula onkiveha.”—Mir. 27:11.

7. Ninvekeleke aani, nto nrumeeleke nsina nawani?

• “Miyo [Yesu] kinolelani èkhweli wira: etthu p’itthu enavekela anyu Atithi ni nsina naka, awo animovahani”.—Yoh. 16:23.

8. Itthu xeeni sikina sinireerela ahu ovekelaka?

• “Vano, mulompeke so: ‘Tith’ihu, muri wirimu! Nsina nanyu nivuwihiwe; omwene anyu orwe; otthuna wanyu wireye ntoko wirimu siso vathí-va. Munivahe olelo yoly’ahu ya khula nihiku. Munlevelele sottheka sahu ntoko hiyo sàlevelenlyahu yanitthekenle. Muhinihiyé omora, nehereriwaka: vano munakiherye mutakhali’”.—Math. 6:9-13.

• “Hiyo nosuwela wira Muluku onninìwa nanvekelaka etthu, nanvekelakaru sintthara otthuna wawe”.—1 Yoh. 5:14.

9. Exeeni ekhanle oomwiiriha Yehova ohaakhula mavekelo ahu?

• “Onophiya okathi onrowanyu wakhuwelela Apwiya, ehiwakhuleni: . . . mwaha wa sottheka sinìranyu”.—Mik. 3:4.

• “Apwiya annasuka atthu òrera murima, annìwelela malompelo aya: masi anninanariwa n’ale anìra sotakhala”.—1 Ped. 3:12.

10. Yesu Kristu ti pani?

• “Simoni Pedru ahimwakhula wira: ‘Nyuwo mwá Kristu, Mwana a Muluku mukumi’”.—Math. 16:16.

11. Exeeni yaamwiirinhe Yesu orwa valaponi?

• “Mwana a Mutthu kharwenle orumeliwa: orwenlé warumela atthu n’uleva ekumi awe, wira awopole atthu othene”.—Math. 20:28.

• “Kihana olaleya ehapari Yorera y’omwene wa Muluku mittetthe sikina-tho: p’itthu kirwenlyaka”.—Luka 4:43.

12. Munrowa wooniherya sai oxukhurela wanyu mukuttho wowoopola wa Yesu?

• “Kristu ohakhwela atthu othene, wira ale ari akumi ehìkhalele mmansaya, nto emukhaleleke ole àkhwenle, ni àhihimuwenle yawo”.—2 aKor. 5:15.

13. Okhulupale xeeni Yesu orina awe?

• “Kovahiwa owerya wothene wirimu ni vathí”.—Math. 28:18.

• “Muluku onvuwiha vanceene, khunvaha nsina noovikana masina otheene”.—aFil. 2:9.

14. Niireke nyuwo munnikupali wira Nikhuuru Noolamulela na Anamoona a Yehova ti “murumeyi òroromeleya ni ànkhili” othanliwe ni Yesu?

• “Murumeyi òroromeleya ni ànkhili tuvi? T’ule athanliwe ni pwiyawe, wira awettiheke anamuteko akina, àkaweleke yolya okathi aya”.—Math. 24:45.

15. Niireke munepa wowaarya, mutthu?

• “Nlaikha naahimwaakhula wira: “Munepa woowaarya onookhala ni nyuwo, nto owerya wa Muluku Muulupalexa onimookhapelelani. Tivo, ole onrowa anyu omuyara, onookhala oowaarya, ni onrowa wiihaniwaka Mwaana a Muluku’”.—Luka 1:35, NM.

• “Munamwi muri nyuwo, muri òtakhala murima, munasuwela wavaha an’inyu itthu sorera, Atith’inyu ari wirimu anotepa wavaha Eroho Yowarya ale anavekela”.—Luka 11:13.

16. Yehova ovarihenle sai muteko munepa wowaarya?

• “Nulumo na Muluku nopattuxa erimu: nsuwa, mweri n’itheneri sipattuwixe ni yowo”.—Esal. 33:7.

• “Nyuwo munimwakhela ikuru s’eroho yowarya enrowa wokhuruwelani; siso munrowa okhala anamon’aka . . . mpakha omalenle elapo”.—Mit. 1:8.

• “Khiivo eprofesia ya Soolempwa enikumiheriwa ni muupuwelo wa apinaatamu. Tthiri, eprofesia khetonko okumiheriwa ni apinaatamu, masi apinaatamu yaahilavula moolumo a Muluku, yeettihiwaka ni munepa woowaarya”.—2 Ped. 1:20, 21, NM.

17. Omwene wa Muluku exeeni?

• “Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”.—Dan. 2:44.

18. Omwene wa Muluku onrowa woophwanyihani mireerelo xeeni?

• “Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.—Wis. 21:4.

19. Nyuwo munsuwela sai wira mareeliho a Omwene wa Muluku anookhumelela voohipisa?

• “Awixutti awe yahimuthukumanela okhwipi, khumukoha yiraka: ‘Munihimerye: itthu iya sinrowa okhumelela lini? Nave ethonyeryo y’orwa wanyu ni y’omala olumwenku t’ivi?’ Yesu ahiwakhula wira: ‘. . . Maloko makina anowana ni maloko makhw’aya, elapo enotuphela elapo ekina. Enokhumelela etala n’tetere ilapo sinjene. Nave ehapar’ila yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke’”.—Math. 24:3, 4, 7, 14.

• “Okathi wokiserya, anophiya mahiku òxanka. Atthu anrowa wisupuwelaka mmansaya pahi, anrowa okhala anamilili, anrowa wittottopaka ni wisona. Awo anonveha Muluku, anokhala òhiwìwelela anamuyari aya, òhixukhuru, òhittittimiha itthu sowarya, òhiphenta, òhimoriwa ikharari, òwòtherya akhw’aya, òhisumaliha, òwali, òvirikanya sorera sothene, anamalupattha, òwakuva onanariwa, òsareya wisona, òphavela sopuha, òmuhiya Muluku; antthuna woneyaka ntoko atthu òwamini, nto anokhotta ikuru so wamini weiwo. Nave yawo, nyuwo muhettaneké”.—2 Tim. 3:1-5.

20. Munrowa wooniherya sai wira munnivaha efaita Omwene wa Muluku?

• “Mpajeryeke ophavela omwene wa Muluku, ni wiwelela otthuna wawe”.—Math. 6:33.

• “Yesu ahalèla awixutti awe wira: ‘Akhalá mutthu ontthuna okitthara, aikhotte mwanene, [“okuxe mwiri awe wa nihaaxeryo”, NM], akitthareke’”.—Math. 16:24.

21. Satana ti pani? Ankhi malaikha ootakhala akhumelenle sai?

• “Nyuwo, tith’inyu ti Satana: . . . Owo ti mulipa-òwiva okhuma wopajeryani”.—Yoh. 8:44.

• “Khuriheliwa ota. Enow’eyo yulupalexa t’inowa yele ya khalai, enìhaniwa Nwanani walá Satana, yeyo eniwototha atthu othene. Eyo yahiriheliwa elapo ya vathí: malaikh’aya yahiriheliwa-tho mulaponi vamosá ni yeyo”.—Wis. 12:9.

22. Satana aamoothenrye exeeni Yehova? Ankhi ale animukokhorela Yehova, Satana aawoothenrye exeeni?

• “Muthiyana ahakhula wira: ‘Ninniwerya olya mihokorokho sa mirí sa mmatta, nto muhokorokho wa mwirí ori mmatta eriyari, Muluku ohimyalé wira: “Muhilyé-ru yowo, nnákhala muhivaré-ru yowo. Mwalya-ru, munimokhwa”’. Enowa yaahimwakhula muthiyana wira: ‘Nnari, khamunokhwa! Muluku orosuwela wira nihiku ninkelanyu olya, maitho anyu anotthukuwa, nyuwo munokhala ntoko Muluku, musuwelaka oreriwa n’utakhaliwa’”.—Maph. 3:2-5.

• “Satana ahavanya Apwiya, iraka: ‘Ekumi khinakakhanyihiwa. Atthu annivaha sothene sirinaya wira esuke ekumi aya.’”—Yobi 2:4.

23. Munrowa wooniherya sai wira soohimya sa Satana ti sowootha?

• “Mmurumeleke [Muluku] ni murima worera”.—1 Wah. 28:9.

• “Kinoolaleya ohittheka waka mpakha okhwa”.—Yobi 27:5.

24. Xeeni atthu anikhwa aya?

• “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”.—aRom. 5:12.

25. Exeeni eniwiiraneela ale akhwiiye?

• “Atthu akumi annisuwela wira anrowa okhwa, masi alipa-òkhwa khansuwela-tho etthu”.—Mus. 9:5.

26. Nlipelelo xeeni arina aya ale akhwiiye?

• “Atthu othene, ale òrera murima n’ale òtakhala murima, anohihimuwa mokhwani”.—Mit. 24:15.

27. Atthu akavi anrowa wiirimu wira yalamuleleke ni Yesu?

• “Miyo kahiweha-tho, khumona mwapwittipwitthi emenlene vamwako Siyoni. Yahikhala vavo ni yowo atthu ikonto miloko mulokó ni miloko mixexe n’atthu ikonto xexé [144.000], yale yalempwe vayuji nsina na mwapwittipwitthi ni nsina n’Atiithi awe”.—Wis. 14:1.

Okathi mwaamusoma anyu Biibiliya, nyuwo moosuwela itthu sinceene Yehova onoovekelaaweni ni moota wookhala moovarihana ni malamulo awe a xariya. Woonasa wene weettela ele mwiixuntte anyu, wowiirihani opaka marukunuxo manceene voohimya sa okumi ni mweettelo anyu. Vano mulakenle anyu okhala moovarihana ni malamulo a xariya a Yehova, muhiilokiherya wira nvare muteko woweemereriwa ntoko murummwa a ihapari sooreera.

Wuuluula makoho anittharelana onrowa wookhaliheryani, ohiliyala soovekela sa xariya sa Yehova ni onrowa wookhaliheryani wuupuwelela itthu sikina sinreerela anyu opaka wira mukhale muKristau oororomeleya. Myaha iya sinrowa wookhaliheryani osuwelexa otthuneya waya opaka etthu ti etthu ni murima wooloka wira mmuttittimihe Yehova.—2 aKor. 1:12; 1 Tim. 1:19; 1 Ped. 3:16, 21.

Nuumala ophiya nivalo nla na yoosoma anyu, tthiri nyuwo munniphavela vanceene omwiiwelela Yehova ni wiirela mpantta mutthenkeso awe. Makoho ni soolepa sa Biibiliiya, sinrowa wookhaliheryani ovarerya wiiwexexa wanyu ele entaphulela aya wiiwelela mareheryo a Yehova mmulokoni, vatthokoni, wala myaha sinivarihana ni epoliitika ya olumwenku. Nave, mpantta ola onimookhaliheryani otepa ovaha efaita mareheryo yaawo Yehova opanke awe wira owiixuttihe atthu awe, ni olipiha waamini waya. Mareheryo awo anihela muhina mithukumano sa mmulokoni. Tthiri, nyuwo munrowa ophavela ohicompela mithukumano iyo ni wiirela mpantta seiyo, akhala wira makhalelo anyu anniweemereryani.

Ohiya-vo, mpantta ola onoothokorerya nthowa naya vanreerela aya okhalela nthiti muteko woolaleya Omwene, waakhaliherya atthu wira emusuwele Yehova ni osuwela ele onipaka awe wira aakhaliherye atthu awo. (Math. 24:14; 28:19, 20) Wookiseryani, onrowa wookhaliheryani osuwela saana muritti anyu ni wiivahererya wanyu wa Yehova Muluku ni opatisiwa. Mukupali wira Yehova onnivaha efaita weemererya wanyu oreera wawe murima wuulupalexa owoonihenryaaweni.

1. Tiivi eri yooruma ya eKristau voohimya sa ekasamento? Nthowa xeeni nimosa paahi Biibiliya oneemererya awe omwalana?

• “Nyuwo mosoma khuluwi wira: Wopajeryani Muluku, àpattuxaka atthu, àpakalé mulopwana ni muthiyana, ni wira: ‘Tivó, mulopwana onimwahiya atithi awe n’ame awe, wira aphitane ni mwar’awe: òwanli aya enakhala mutthu mmosá pahi’. Siso awo khahiyó-tho atthu anli: ari mutthu mmosá pahi. Tivó, yeyo Muluku ephitanyalyawe mutthu ahimwalanyihé-tho. . . . Mulopwana onimwalana ni mwar’awe, ohikhanle mwaha wa onamuttompe, anamuthela mukina, onoraruwa”.—Math. 19:4-6, 9.

2. Xeeni mulopwana ni muthiyana anikhala vamosa ntoko anamathelana, anitthuneya aya olepiha ekasamento aya? Nto akhala wira moothelana, niireke ehaavo etthu enookupalihani wira othelana wanyu oheemereriwa ni kuvernu?

• “Nwupuxereke aKristu wira ahana òwìwelela alupale anettiha elapo ni makhulupale makina”.—Tito 3:1.

• “Othelana ottittimihiweke n’atthu othene: ale athelanne ettittimihaneke, ehiraruweké, okhala wira Muluku onimwaphuka anamuttompe n’anamararuwa”.—aHéb. 13:4.

3. Muritti xeeni murina anyu vatthokoni?

• “Mwan’aka, nwiriyane molumo òlaka àtith’inyu: muhithanyeké miruku sinvahiwanyu n’amam’inyu”.—Mir. 1:8.

• “Mulopwana ti murima [muru] wa mwar’awe, sisale Kristu sikhanlyawe murima wa Ekereja [muloko]. . . . Nyuwo, alopwana, mumphenteke mwar’inyu, sisale Kristu saphentalyawe Ekerej’awe”.—aÉf. 5:23, 25.

• “Nyuwo, alipa-òyara, muhanyonyiheké an’inyu, masi mutthukule miru saya, mwettihaka ni mwalakaka nikano s’Apwiya.”—aÉf. 6:4.

• “Nyuwo, anamwane: mwiweleleke atith’inyu n’amam’inyu mwa sothene, okhala wira ela t’inasivela Apwiya”.—aKol. 3:20.

• “Nyuwo athiyana, nwìweleleke aiy’anyu”.—1 Ped. 3:1.

4. Xeeni vanitthuneya ahu ottittimiha okumi?

• “[Muluku] onnavaha atthu othene ekumi n’umumula n’itthu sothene. . . . Nokhalana ekumi mwa yowo, ninnetta mwa yowo”.—Mit. 17:25, 28.

5. Xeeni oryaaya vootthekeya omwiiva mutthu, hata mwaana ohinatthi oyariwa?

• “Yakhala alopwana annyakulihana, khiyawana, khummana muthiyana orupanle, . . . masi muthiyan’owo akhwa vale, vano ekumi eliviwe n’ikumi”.—Okhum. 21:22, 23, Tradução do Novo Mundo.

• “Maitho anyu yahikòna kihinatthi oyariwa. Mahiku othene yarowaka ovira yahilempwa mulivuruni mwanyu, nlelo ehinatthi opajerya.”—Esal. 139:16.

• “Apwiya [anniphweeliwa] ni matata animwiva ohitthenke”.—Mir. 6:16, 17.

6. Muluku onihimya exeeni sa ephome?

• “Muhilyeké ephome, nnákhala inama sohihitiwa”.—Mit. 15:29.

7. Xeeni nintumereriwa ahu waaphentaka anna ni arokora?

• “Kinovahani nikano na nanano: mphentaneke mukina ni mukhw’awe. Sisale miyo kophentalyakani, siso-tho nyuwo muhana ophentana. Atthu othene anosuwela wira mwá awixutti aka, mwaphentanaka mukina ni mukhw’awe”.—Yoh. 13:34, 35.

8. Wira ohaaravihe akina eretta eniiva, xeeni ole orina eretta (a) Onitthuneya awe osyaka opacerihaka omukhupaarela mutthu ni ompexari? (b) Vahintthuneya awe wunlaseyaka akhala wira mutthu mukina khonimulattula owannyawe? (c) Xeeni mutthu onaanyiherya wira ookhalana eretta eniraviwa vanitthuneya awe orowa omwiira anaalisi a ephome ohinatthi opacerya onamorari? (d) Xeeni mutthu orina eretta eniraviwa vanitthuneya awe omuleela mutokweene onuuraanyiha nikhuuru na axitokweene ohinatthi opatisiwa?

• “Muhaxankiheké akhwinyu: muteko anyu okhaleke ophentana. . . . ‘Mwaphenteke akhw’inyu ntoko sinìphentanyu’. Ale anaphenta akhw’aya khaniwirela etthu yotakhala”.—aRom. 13:8-10.

• “Khula mutthu ahiphavelé itthu sinimurerela yowo pahi, nto àphaveleleke-tho oreriwa akhw’awe”.—aFil. 2:4.

9. Xeeni Yehova onilipelela awe wira nnimwaalevelela akina?

• “Nvilelaneke, mulevelelaneke imara sothene muntthekelana anyu. Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu”.—aKol. 3:13.

10. Akhala wira munninyu oowiiyeryani wala owootheryani, muhaana opaka exeeni?

• “Mukhw’inyu attheká, mwakumane mekhinyu ni yowo pahi, mwamulake. Awiwani, momutthikiherya munn’inyu ephiro yorera. Vano, ahiwìweni, mmuroihele mutthu mukina walá atthu anli, wira ‘mulattu anyu ophukiwe oholo w’anamona anli walá araru. Ahiwìwe atthu awo, mwahimerye aKristu èkereja [“a mmulokoni”, NM]: aahiwiwelele hatá amusi aKristu, mmwettiheke ntoko mutthu òhamini walá ntoko mulipa-òttheka”.—Math. 18:15-17.

11. Yehova onoonela sai itampi iya sinittharelana:

▪ Orupihana woohiloka?

▪ Okokhorela ilatarato?

▪ Orupihana alopwana-ru wala athiyana-ru?

▪ Wiiya?

▪ Xooku onirumeeliwa musurukhu?

▪ Ohapaliwa?

• “Muhìhiye motothiwaka: nnákhala anamuttompe, walá ale anattittimiha amuluku èthiru, nnari alipa-òraruwa, nnakhala alopwana anrupihana yaworu, walá anawiye, nnari anamilili, nnákhala alipa-òwapa akhw’aya, wala anamuhapaliwa, nnari ale anihonona itthu s’anene: khavo a yala anwerya okela momweneni mwa Muluku”—1 aKor. 6:9, 10.

12. Voohimya sa orupihana woohiloka, weiwo onihela muhina inamuna sotheene sa orupihana ni mutthu ohithelanne awe, mulakenle opaka exeeni?

• “Mutthyaweke itthu sa ekhapa!”—1 aKor. 6:18.

13. Xeeni ninreerela ahu okhootta olya mirette sotheene sinipahula, wala sinihonona muupuwelo?

• “Mwivahererye wa Muluku, ntoko mukuttho mukumi ni worerihiwa ni womusivela Muluku. Ola t’uri mukuttho wophwanela onvaha Muluku. Muhitthareké mwettelo w’atthu a vathí, masi murukunuxe mukhalel’anyu, mùlule osuwela wanyu, wira nwerye osuwela sintthunawe Muluku, muthanlaka etthu ekhanle yorera, enimusivela Muluku ni ya xariya”.—aRom. 12:1, 2.

14. Inamuna xeeni sikina sa okhwiri Muluku onikhoottiha awe?

• “Ahikhalé onrowa waxerya ehako, walá omurava mukhw’awe, walá wakoha amuluku èthiru, nnákhala opaka maxitta walá omulowa mutthu, nnákhala wakoha majini ni minepa s’alipa-okhwa”.—Otum. 18:10, 11.

15. Ohaana opaka exeeni mutthu opanke etampi yuulupale, onaphavela otthikela waataana ni Yehova?

• “Kihohimeryani etampi aka: nkovithenryeni sottheka saka. Kohimya wira: ‘Kinimwahimerya Apwiya sotakhala saka’”.—Esal. 32:5.

• “Àkhala mwa nyuwo aretta? Ewihane makhulupale [a muloko]: awo yalompeleke, yattikitthele makhura ni nsina n’Apwiya. Malompelo ala, yavelelihiwa ni wamini, anowòpola arett’awo: Apwiya animwavoniha, animwalevelela itampi sìraly’aya”.—Yak. 5:14, 15.

16. Muhaana opaka exeeni mwasuwela wira munna wala murokora, oopaka etampi yuulupale?

• “Akhalá mutthu onrummwa okhala namona omilattuni, khuhitthuna ohimya etthu yonalyawe walá ensuwelawe, etampi enomulemela”.—Onam. 5:1.

17. Akhala wira mmulokoni woolaleiwa wira munna wala murokora, oohiya okhala Namoona a Yehova, nimuthokoreryeke sai mutthu owo?

• “Muhatàné n’atthu ale arina nsina n’aKristu, masi ari anamuttompe, anamilili, walá anattittimiha amuluku èthiru, alipa-òwotherya, anamuhapaliwa, anawiye. Atthu sisa, nyuwo hatá muhilyeke poromosa.”—1 aKor. 5:11.

• “Akhalá mutthu onrwa okumana ni nyuwo, ahikupaliki mwixuttih’ola, muhimwakhele mpani mwanyu, nnákhala onvaha murettele.”—2 Yoh. 10.

18. Xeeni apatthani anyu anireerela aya okhala yaale animphenta Yehova?

• “Onetta n’asuweli onokhala musuweli: onetta n’alolo onophwanya otakhaliwa”.—Mir. 13:20.

• “Muhihiye motothiwaka: wetta n’alavilavi, opwetexa makhalelo órera”.—1 aKor. 15:33.

19. Xeeni Anamoona a Yehova ahiniirela aya mpantta epoliitika?

• “Awo khahiyó a vathí-va, sisale miyo kihikhanlyaka a vathí-va”.—Yoh. 17:16.

20. Xeeni vanireerela aya owiiwelela makhulupale?

• “Khula mutthu ohana owiwelela alupale anettiha elapo, okhala wira khivo eyulupale ehikhumme wa Muluku; vano atokwene ari mulaponi,àkhalihiwa ni Muluku”.—aRom. 13:1.

21. Muhaana opaka exeeni akhala wira apinaatamu aniveka wira mpake etthu entthekela malamulo a Muluku?

• “Etthu yotepa otthuneya omwiwelela Muluku ovikana owiwelela atthu”.—Mit. 5:29.

22. Soolepa xeeni sa Biibiliya sinrowa wookhaliheryani ohiirela mpantta olumwenku, okathi munithanla anyu muteko?

• “Nloko nimosa khininvenya-tho otuphela nloko nikina: amiravo khanrowa-tho wixuttihiwa owana ekhotto”.—Mik. 4:3.

• “Mukhume muttetthe owo [Babilonia Muulupale], wira muhatanè n’itampi saya, ehukhumu aya ehophwanyeni-tho”.—Wis. 18:4.

23. Enamuna xeeni ya otthekula munrowa anyu othanla, ni enamuna xeeni munrowa anyu okhootta?

• “Apwiya . . . anniphweliwa n’alipa-òwali ni òhìwelela”.—Esal. 11:5.

• “Mutthyaweke sotakhala, mwireke sorera”.—aRom. 12:9.

• “Mphaveleke ni murim’anyu wothene itthu sikhanle s’ekekhai ni sottittimiheya; sothene sikhanle sa xariya ni soloka; sothene sikhanle sophenteya ni sophwanelela; sothene sikhanle sa nlema ni sottottopeleya”.—aFil. 4:8.

24. Xeeni Anamoona a Yehova ahinlompa aya ni itiini sikina?

• “Khamunwerya olya vamesa v’Apwiya ni vamesa va Satana”.—1 aKor. 10:21.

• “Tivó Apwiya vanihimyaya-tho wira: ‘Mukhume eriyari aya: mmwalane ni yawo. Muhivaré itthu sa mwikho, wira miyo kiwakheleni’”.—2 aKor. 6:17.

25. Soolepa xeeni sa mBiibiliyani sinrowa wookhaliheryani osuwela akhala wira pooti wiirela mpantta efesta aahiiso ohiirela mpantta?

• “Khukelela otthara ikano saya [amalapo]. Yahirumela ilatarato s’amuluku aya, vano ilatarato iyo sahakwattuliha.”—Esal. 106:35, 36.

• “Alipa-òkhwa khansuwela-tho etthu.”—Mus. 9:5.

• “Awo khahiyó a vathí-va, sisale miyo kihikhanlyaka a vathí-va.”—Yoh. 17:16.

• “Mòviriha mahiku mancene muttharaka sotakhala s’atthu ahinamini: mwahetta enamuttompe, mwahettela makhalelo anyu òtakhala, ohapaliwa, wipeliwa, owuryexa, wakokhorela amuluku ahikhanle ottittimihiwaka”.—1 Ped. 4:3.

26. Matakiheryo a mBiibiliyani anrowa wookhaliheryani sai osuwela akhala wira vannireerela otthapela nihiku nooyariya wala khivanreerela?

• “Mmurottoni mwaya, nahikhala nira nulupale na mwené: ola ahalattulela yolya arumeyi awe othene. Vano ahiwupuwela-tho anamuteko awo anli yari mukhatteya: ahimutaphula mulipa-òlawiha yowurya, khumutthikiherya vamutekoni vawe, . . . Vano ahiruma ohomphwa mulipa-òwoxa iphau”.—Maph. 40:20-22.

• “Nihiku na nìra n’otthapela oyariwa wa Herodi, mwana mwamuthiyana a Herodiya ahìna oholo w’atthu yalattuliwe, khumusiveliha Herodi uwo vanjene. Siso Herodi ahilaphela wira amunvaha etthu p’itthu yatthun’awe onvekela. Owo, athipeleliwaka ni mai awe, khwira: ‘Mukivahe nanano vava, mukamelani, murú wa Yohani Mbatiza!’ Mwené . . . ahiruma wira avahiwe. Khuruma omwikittha muru Yohani Mbatiza, mukhatteya”.—Math. 14:6-8, 10.

27. Xeeni muniphavela anyu owiiwelela axitokweene?

• “Nwìweleleke ale anettiha muthukumano, mutthareke molumo aya, okhala wira annokhapelelani mutthu ti mutthu, yawo anrowa okohiwa mwaha wa nyuwo. Mwawìwelelaka vale, awo anovara muteko n’utteliwa murima, khahiyó n’ucikula: etthu ene yela khiyòphwanyihani etthu”.—aHéb. 13:17.

28. Xeeni nyuwo wala etthoko anyu, vanireerela aya okhalana okathi wa omusoma ni omutokosa Biibiliya voohihiyererya?

• “Ansiveliwa n’ikano s’Apwiya, antthokelela ikano iyo othana n’uhiyu. Atthu awo anlikana ni miri siphatteiwe okherekhere wa màsi anivira, sinìma mihokorokho okathi aya, makukhu aya khanrowa onyàla. Miteko sothene sinvaraya, sinnirera”.—Esal. 1:2, 3.

29. Xeeni vanoosivelaayani orowa omuthukumanoni ni wiirela mpantta?

• “Kinimwalalèrya nsina nanyu axinn’aka: kinimotthapelani mmuthukumanoni mw’atthu.”—Esal. 22:23.

• “Nùpuxeryaneke mukina ni mukhw’awe, wira nakuviheryaneke ophenta n’uvara miteko sorera. Nihijompeleké orowa omuthukumanoni, nihatthariheke ale ahinrowa-tho. Ohiya vo, nlipiheryaneke, votepa-tho vavo vanòna anyu wira nihiku n’Apwiya nri vakhiviru”.—aHéb. 10:24, 25.

30. Muteko xeeni muulupale Yesu onirumme awe ovara?

• “Vano, murowé, mwawixuttiheke atthu a maloko othene, mwabatizaka. . . .  Mwawixuttiheke wettela sothene sòrumaly’akani”.—Math. 28:19, 20.

31. Okathi ninvaha ahu etthu wira nikhaliherye muteko wa Omwene, wala waakhaliherya annihu ni arokorihu, mukhalelo xeeni onimusivela Yehova?

• “Mwaxukhuru Apwiya, mwavahaka sorera sanyu”.—Mir. 3:9.

• “Khula mutthu avaheke attharihaka murim’awe, khahiyó ni murima omuripale ene, nnákhala mwaha w’okhanyereriwa: tthiri Muluku onsiveliwa n’ule onvaha murima omuttenlene”.—2 aKor. 9:7.

32. Mixankiho xeeni maKristau anilipelela aya wira sinimwaaphwanya?

• “Òreriwa t’ale anlupatthiwa mwaha w’omwiwelela Muluku, okhala wira omwene wa wirimu ti wawaya. Nyuwo munoreriwa mwaruwaniwaka, mwalupatthiwaka ni motheriwaka sotakhala sothene mwaha wa miyo: mutthapeke, mutteliweke murima, okhala wira otthuveliwa wanyu wirimu onokhala wulupale. Tthiri ti siso salupatthiwaya maprofeta akhalai muhinatthi nyuwo”.—Math. 5:10-12.

33. Xeeni opatisiwa ntoko Namoona a Yehova eri aya eparakha yuulupale?

• “Masu anyu àkitteliha murima. Apwiya, Muluku òwerya sothene! Miyo k’àwinyu: tivó masu anyu àsariha murim’aka otteliwa n’upuha”.—Yer. 15:16.

Okhala wene opatiso ompakiwa okathi wa mithukumano suulupale ni mithukumano sa muttetthe wa Anamoona a Yehova. Wanikisa wa mwaha wa opatiso, Mulipa-oolavula mwaha onrowa waavekela ale anrowa opatisiwa wira yeemele ni yaakhule makoho ala manli ni masu oowiiwanyeya ani:

1. Moottharuwa soottheka sanyu, muhiivahererya wa Yehova ni muhaamini wira apinaatamu, anoowerya woopoliwa paahi mwaha wa mukuttho wa Yesu Kristu?

2. Munnisuwela wira opatisiwa wanyu, onooniherya wira nyuwo mwa Namoona a Yehova ni muniirela mpantta mutthenkeso wa Yehova?

Waakhula wanyu makoho ala onithoonyerya ‘ohimya oholo w’atthu’ waamini wanyu yowoopola ni wira muhiivahererya wa Yehova ni murima wotheene. (aRom. 10:9, 10) Vahinatthi, ale anrowa opatisiwa ahaana wuupuwelela makoho ala ni nivekelo wira awerye waakhula moovarihana ni sookupali saya.

Niireke muhiivahererya wa Yehova mpakaka nivekelo, ni moomuleiherya wira munrowa omukokhorelaka yoowo paahi, ni opaka yootthuna awe okhala etthu yootepa otthuneya mookumini mwanyu?

Niireke munnikupali tthiri wira muhaana opatisiwa okathi onaattamela?

Ekuwo xeeni enireerela owara okathi wa opatiso? (1 Tim. 2:9, 10; Yoh. 15:19; aFil. 1:10)

Ale anrowa opatisiwa ahaana owara ikuwo soophwanelela, aphavelaka omuttittimiha Muluku. Nave ahaana osyaka owara ikuwo sinikataniwa sinooneela muhina, wala owara ikuwo silempwale itthu sa elapo aahiiso simmulaleya nakoso.

Ale anrowa opatisiwa ahaana owara ikuwo sooloka, soophwanelela, ni sinireerela okathi owo. Mutthu okhaleke sai okathi woopatisiwa? (Luka 3:21, 22)

Opatiso wa Yesu woovaha ntakiheryo na opatiso wa maKristau olelo-va. Owo aahisuwela wira opatiso nivalo nuulupale, nto ela yaahoonihereya orweela wa mukhalelo awe ni miteko sawe. Tivonto, opuro wa opatiso khahiyo opuro wa othweela, okata, aahiiso mweettelo mukina waarowa ohonona ophwanelela wa okathi ole. Nto khivaarowa okhala voophwanelela muKristau opaka itthu ntoko iyo onakhala wira omuxinttale mutthu. Nnaamwi opatiso oryeene okathi woohakalaliha, ohakalala iwo ohaana wooniheriwa mwa nttittimiho.

Moota xeeni waataana ni muloko onrowa aya wookhaliheryani okhala moovarihana ni wiivahererya wanyu wa Yehova?

Hata nuumala opatisiwa, xeeni munitthuneya anyu okhalana eprograma ya yoosoma anyu ya omwaneene ni ohihiya olaleerya?