1-3. Makoho xeeni atthu anipaka aya voohimya sa okhwa, nto itiini sinaakhula sai?

BIIBILIYA onnileiherya wira muhoolo “khunrowa okhala-tho okhwa”. (Wisupulula 21:4) Muru 5, nihiixutta wira yowoopola enninikhaliherya ophwanya okumi woohimala. Masi olelo-va atthu annookhwa. (Musuweli 9:5) Nto, nikoho nootthuneya ninkhumela ti nna: Exeeni enniiraneela nakhwa vale?

² Ti vootepa otthuneya osuwela waakhuliwa wa nikoho nna, okathi yoole vanikhwa awe ole onimphenta ahu. Waaniheryasa ninniikoha so: ‘Oronwe woowi? Niireke onniniweha? Onoowerya onikhaliherya? Ninnilipelela onweha-tho?’

³ Itiini sinceene sinnaakhula makoho ala mwa inamuna soovirikana. Itiini sikina siniixuttiha wira atthu ooloka, anrowa wiirimu, masi atthu ootakhala anrowa omooroni. Sikina siniixuttiha wira vaavo vanikhwa anyu munipakeya munepa nto munarowa okhala ni amusi anyu akhwiiye. Nlelo itiini sikina siniixuttiha wira nuumala okhwa ni ophukeliwa, munrowa oyariwa vasya ni erutthu ekina, waaniheryasa ntoko mutthu aahiiso mwaamunama.

4. Muupuwelo xeeni itiini siniixuttiha aya voohimya sa okhwa?

⁴ Khuta etiini eniixuttiha moota aya. Masi sowiixuttiha iyo sotheene sirina muupuwelo mmosaru. Siniixuttiha wira nuumala mutthu okhwa, yookhala etthu enivikaniha okhala. Niireke eyo ekeekhai?

NINROWA WOOWI NAKHWA VALE?

5, 6. Exeeni enniiraneela vaavo vanikhwa ahu?

⁵ Yehova onnisuwela ele enniiraneela nakhwa vale, ni onihimya wira vaavo mutthu vanikhwa awe, owo onoomala-mala. Ole okhwiiye khorina okumi. Tivonto, mutthu akhwa vale, khokhanle munepa onivikaniha okhala maana moonelo ni muupuwelo awe onoomala-mala.a Nto vaavo vanikhwa ahu khaninwerya woona, wiiwa, nnakhala wuupuwela etthu.

⁶ Mwene Salomoni aalempe wira “alipa-òkhwa khansuwela-tho etthu”. Tthiri, alipa-ookhwa khanwerya ophenta aahiiso onyokha ni “khuvovo muteko nnákhala osuwela walá otthokelela nnákhala ankhili” mMahiye. (Mmusome Musuweli 9:5, 6, 10.) Esalimo 146:4, Biibiliya onihimya wira vaavo mutthu vanikhwa awe ‘sowupuwela sawe’ sinoomala-mala.

ELE YESU AALAVUNLE AWE VOOHIMYA SA OKHWA

7. Exeeni Yesu aalavunle awe voohimya sa okhwa?

⁷ Vaavo vaakhwiiya awe mpatthani awe iihaniwa Laazaro, Yesu aahaaleela awiixutti awe oriki: “Mpatthan’ihu Lázaro, onorupa”. Masi Yesu khaaphavela ohimya wira Laazaro aamurupa. Maana aahihimya-tho wira: “Lázaro ohòkhwa”. (Yohani 11:11-14) Nwehe wira Yesu aalikanyinhe okhwa ni orupa. Nto khaahimmye wira Laazaro aaronwe wiirimu aahiiso aari ni amusi awe akhwiiye. Nnakhala khaalavunle wira Laazaro aamuhaaxiwa omooroni wala aahiyariwa vasya khukhala mutthu mukina aahiiso mwaamunama. Masi Laazaro aari ntoko sinikhala awe mutthu onrupa ikhove suulupale. Okathi mukina Yesu aahilikanyiha okhwa ni orupa. Vaavo aamuhihimunxe awe mwaana mwaamuthiyana a Jairo, Yesu aahimmye wira “ola khakhwiye: onorupa”. (Luka 8:52) Nave murummwa Paulo aalempe wira maKristau makina “yaahirupa mokhwaani”.​—1 aKorinto 15:6, NM.

8. Ninsuwela sai wira Muluku khaapattunxe apinaatamu wira akhweeke?

⁸ Niireke Muluku aapattunxe Adamu ni Eva wira akhaleke nuumala-vo akhweeke? Nnaari! Yehova aapattunxe wira akhaleke mahiku otheene ni okumi woohakalaliha. Vaavo Yehova aapattunxe awe apinaatamu, aahaavaha ophavela okhala mahiku otheene. (Musuweli 3:11, NM) Ntoko siisaale anamuyari ahinisiveliwa aya waaweha anaaya ahaawaka ni okhwa, Yehova onoona siiso. Masi akhala wira Muluku onipattunxe wira nikhaleke mahiku otheene, xeeni vanikhwa ahu?

XEENI VANIKHWA AHU?

9. Niireke yooruma Yehova aavanha awe Adamu ni Eva yaari yoovila wiiwelela?

⁹ OJardim ya wEedeni, Yehova aahaaleela Adamu wira: “Munowerya olya mihokorokho sothene siri mmatta-mu: muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”. (Maphattuwelo 2:9, 16, 17) Yooruma ela khiyaavila wiiwelela, maana Yehova aahikhalana ehakhi ya waaleela Adamu ni Eva ele eri yooloka ni yoohiloka. Vaakhanle wira yaahimwiiwelela Yehova, yaamooniherya ottittimiha okhulupale awe. Nave-tho, yaamooniherya wira yaanimuxukhuru mwaha wa itthu saavanha awe.

10, 11. (a) Satana aawonke sai Adamu ni Eva? (b) Xeeni vahaaleveleleya aya Adamu ni Eva mwaha woohimwiiwelela Mpattuxa aya?

¹⁰ Mooriipiha murima, Adamu ni Eva yaahithanla ohimwiiwelela Yehova. Satana aahaakoha Eva wira: “Ekekhai wira Muluku òhokhottiheryani olya mihokorokho sa mirí sothene sa mmatta?” Eva yaakhunle wira: “Ninniwerya olya mihokorokho sa mirí sa mmatta, nto muhokorokho wa mwirí ori mmatta eriyari, Muluku ohimyalé wira: ‘Muhilyé-ru yowo, nnákhala muhivaré-ru yowo. Mwalya-ru, munimokhwa’”.​—Maphattuwelo 3:1-3.

¹¹ Satana aahimwaakhula wira: “Nnari, khamunokhwa! Muluku orosuwela wira nihiku ninkelanyu olya, maitho anyu anotthukuwa, nyuwo munokhala ntoko Muluku, musuwelaka oreriwa n’utakhaliwa”. (Maphattuwelo 3:4-6) Satana aaphavela owiiriha Eva wuupuwelaka wira yaahaana opaka soothanla saya voohimya sa ele eri yooloka ni yoohiloka. Nave-tho, Satana aahootha voohimya sa ele yaarowa okhumelela yaahimwiiwelele Muluku. Maana Satana aahimmye wira Eva khiyaarowa okhwa, nto Eva yaahilya muhokorokho ole ni khunvaha iyaya. Masi Adamu ni Eva yaanisuwela yooruma ya Yehova wira ahilye muhokorokho ole. Tivonto, olya moolakelela muhokorokho ole yahooniherya wira khiyiiwelenle yooruma yookhweya ni yookhalela. Okhala wira yaahilya muhokorokho, awo yaahimuramusa Tiithi aya a wiirimu oophenta. Mwaha woohimwiiwelela Mpattuxa aya awo khiyaaleveleleya!

12. Xeeni varyaaya vooriipiha murima Adamu ni Eva ohimwiiwelela Yehova?

¹² Tthiri yaahimuriipiha murima vaavo anamuyari ahu yoonihenrya aya ohimuttittimiha Mpattuxa aya! Mwaarowa woonela sai, vaakhanle wira moomuhuwa ni omukhapelela mwaana mwaamulopwana aahiiso mwaamuthiyana, nto owo khithanla ohiwiiwelelani ni ohinapaka ele eninvekela anyu? Niireke khimwaariipiwa murima?

13. Exeeni Yehova aaphavela awe ohimya ni masu oowi “munotthikela-tho mutthayani memmo”?

¹³ Mwaha wa ohiiwelela waya, Adamu ni Eva yaahipweteiwa eparakha ya okhalana okumi woohimala. Yehova aahaahimeerya Adamu wira: “Tthiri nyuwo mw’ètthayá, munotthikela-tho mutthayani memmo”. (Mmusome Maphattuwelo 3:19.) Ela enitaphulela wira Adamu yaarowa otthikela vatthayani, ntoko saarya aya ahinatthi opattuxiwa. (Maphattuwelo 2:7) Tivonto, nuumala Adamu ottheka, awo ahookhwa, niire so, khakhanle-tho.

14. Xeeni vanikhwa ahu?

¹⁴ Adamu ni Eva saano ari akumi mpakha olelo-va, yaamwiiwelenle Muluku. Masi mwaha woohiiwelela, awo yaahittheka nuumala-vo ahookhwa. Yoottheka enilikana ni eretta yootakhala mutthu eniyaraniwa awe aahiiso oravihiwa ni anamuyari awe. Okhala wira otheene ahu niyariwe oottheka ene, ti nthowa naya vanikhwa ahu. (aRoma 5:12) Masi eyo khahiyo yoolakela ya Muluku wa apinaatamu. Muluku khaaphavela wira apinaatamu akhweeke, tivonto Biibiliya onihimya awe wira okhwa “nwanani”.​—1 aKorinto 15:26.

OSUWELA EKEEKHAI ONNINTAPHULA

15. Moota xeeni osuwela ekeekhai voohimya sa okhwa onnitaphula aya?

¹⁵ Osuwela ekeekhai voohimya sa alipa-ookhwa, onnintaphula mwa sowiixuttiha sinci soohiloka. Biibiliya onniixuttiha wira alipa-ookhwa khanoona owereya aahiiso oriipiwa murima. Khanniwerya olavulana, nnakhala awo khanwerya olavula ni hiyo. Khanniwerya waakhaliherya alipa-ookhwa, ni awo khanwerya onikhaliherya. Khaniwerya onihaaxa, tivonto vahinitthuneya ahu owoovaka. Masi itiini sinceene siniixuttiha wira alipa-ookhwa anikhala opuro mukina, ni wira hiyo pooti waakhaliherya vakhala wira nnimwaaliva musurukhu ahooleli a itiini aahiiso ale anooniwa okhala oowaarya. Nto vaavo vanisuwela ahu ekeekhai voohimya sa alipa-ookhwa, hiyo khanniwokiwa ni muupuwelo owo woohiloka.

16. Itiini sinceene siniixuttiha exeeni voohimya sa alipa-ookhwa?

¹⁶ Satana onirumeela etiini yoowootha wira oniwoke ophavelaka onikupaliha wira alipa-ookhwa nlelo akumi. Mwa ntakiheryo, itiini sikina siniixuttiha wira nuumala mutthu okhwa, yookhala etthu enivikaniha okhala. Niireke wira etiini anyu eniixuttiha siiso, aahiiso eniixuttiha ele Biibiliya enihimya awe voohimya sa alipa-ookhwa? Satana onnaawoka atthu ophavelaka waahapuxa wa Yehova.

17. Xeeni muupuwelo wa opahiwa atthu omooroni onimuramusa aya Yehova?

¹⁷ Sowiixuttiha sa itiini sinceene ovila wiiwexexa. Mwa ntakiheryo, itiini sikina siniixuttiha wira atthu ootakhala anrowa opahiwa omooroni mahiku otheene. Nto wootha nno onnimuramusa Yehova. Maana Yehova khonaahasula atthu! (Mmusome 1 Yohani 4:8.) Mwaarowa omoonela sai namuyari onipaha matata a mwanawe ohimyaka wira onoomulaka? Tthiri nyuwo khamwaasiveliwa ni mutthu owo. Nave khimwaarowa ophavela omusuwela mutthu owo. Moolikanasa, Satana oniphavela wira hiyo nuupuweleke wira Yehova onnaahaaxa atthu!

18. Xeeni vahinitthuneya ahu owoova alipa-ookhwa?

¹⁸ Itiini sikina siniixuttiha wira nuumala okhwa, atthu anipakeya minepa. Itiini iyo sinihimya wira nihaana ottittimiha ni woova minepa iyo, maana pooti okhala apatthani ihu aahiiso awanani ahu ootakhala. Nto atthu anceene annikupali wootha nno wa Satana. Tivonto anniwoova alipa-ookhwa ni waakokhorela, ohiya omukokhorela Yehova. Muhaana osuwela wira alipa-ookhwa khanoona owereya aahiiso ovara etthu, nto nihiwooveke. Yehova tori Mpattuxa ahu. Owo tokhanle Muluku eekeekhai, nto nihaana omukokhorela yoowo paahi.​—Wisupulula 4:11.

19. Onnikhaliherya sai osuwela ekeekhai voohimya sa alipa-ookhwa?

¹⁹ Osuwela ekeekhai voohimya sa alipa-ookhwa, onnintaphula mwa sowiixuttiha sowootha sa itiini. Nave onninikhaliherya owiiwexexa anatiri ooloka yaawo Yehova aaleihenrye awe voohimya sa okumi ahu ni ele enilipelela ahu muhoolo.

20. Muru onittharelana ninrowa othokorerya exeeni?

²⁰ Khalai, Yobi murumeyi a Muluku aahikoha wira: “Masi mutthu okhwiye onowerya okhala-tho mukumi?” (Yobi 14:14) Niireke vanniweryaneya mutthu okhwiiye okhala-tho mukumi? Ele Biibiliya enihimya awe sa mwaha owo ti yoomaaliha vanceene. Muru onittharelana ninrowa othokorerya.

1-3. Exeeni enitthunkwe otheene ahu, nto Yehova onrowa ontaphula sai?

NKAHAYA muupuwele vaakhanle wira mutthukweliwe mukhatteya mwaha wowootheriwa opaka ekrime. Vano khamurina moota wowiixoopola. Okhala wira khiivo eniwerya anyu opaka wira mutaphuliwe, tthiri munkhala oovela-vela ni muhirina nlipelelo. Masi okathi ene yoowo munnisuwela wira ookhala mutthu oniwerya owoopolani nto mutthu owo oolakela wookhaliheryani! Mwaarowa woonela sai?

² Tthiri, otheene ahu nootthukiwa mwaha wa naakhwa. Nnaamwi niimananihaka, khanniwerya osyaka okhwa. Masi Yehova ookhalana owerya woonitaphula mookhwaani. Tthiri owo ooleiherya wira “nwanani onrowa okiserya opwetexiwa, okhwá”.​—1 aKorinto 15:26.

³ Nto nkahaya muupuwele moota onrowa anyu ohakalala osuwela wira khamunrowa oxankaka mwaha wa wuupuwela okhwa! Masi Yehova khonrowa omaliha okhwa paahi. Owo onrowa-tho waahihimuxa alipa-ookhwa. Muupuwele ele enitaphulela aya wa nyuwo. Muluku onileiherya wira ‘onimwattikiherya mulaponi atthu akhwiiye’. (Yesaya 26:19) Ela tiile Biibiliya onihimya awe okhala ohihimuxiwa.

VAAVO VANIKHWA AWE OLE ONIMPHENTA AHU

4. (a) Exeeni ennimaaliha vaavo vanikhwa awe mmusi aahiiso mpatthani ihu? (b) Tani yaari apatthani a Yesu?

⁴ Vaavo vanikhwa awe mmusi aahiiso mpatthani ihu, ninniriipiwa murima vanceene. Hiyo ninnivela-vela. Maana khanniwerya omuttikiherya okumi. Masi Biibiliya onninimaaliha vanceene. (Mmusome 2 aKorinto 1:3, 4.) Nrowe nthokorerye ntakiheryo nimosa ninrowa onikhaliherya osuwela wira Yehova ni Yesu anniphavela tthiri waattikiherya okumi ale anaaphenta ahu akhwiiye. Okathi Yesu aaryaawe valaponi, ikwaha sinceene aahimuxukurya Laazaro ni axirokorawe, Martha ni Maria. Otheene aya yaari apatthani awe Yesu. Biibiliya onihimya so: “Yesu anaphenta atthu awo òraru: Martha ni Maria, munn’awe, ni Lázaro”.​—Yohani 11:3-5.

5, 6. (a) Exeeni Yesu aapanke awe nuumala waaweha amusi ni apatthani a Laazaro yinlaka? (b) Wunla wa Yesu onniixuttiha exeeni?

⁵ Nihiku nimosa Laazaro aahikhwa. Nto Yesu aahirowa ommaaliha Martha ni Maria. Okathi Martha aiwale awe wira Yesu aanirwa, Martha aahikhumela ota wa epooma ele omutthimakelaka Yesu. Nto aahihakalala onweha Yesu, khumuhimeerya so: “Nyuwo mwàri vava, murokor’aka khakhwá”. Martha uupuwela wira Yesu aahipisa ophiya. Nuumala onweha Maria inlaka, Yesu aahiriipiwa murima, ni aahinla. (Yohani 11:21, 33, 35) Yesu aahoona owereya wuulupale onimphwanya mutthu okhweliwe ole onimphenta awe.

⁶ Osuwela wira Yesu onnoona owereya vaavo vanikhweliwa ahu onninimaaliha. Yesu ooniherya mikhalelo sa Tiithi awe. (Yohani 14:9) Yehova ookhalana owerya woomaliha okhwa khuluwi, eyo etthu enrowa awe opaka moohipisa.

“LÁZARO, MUKHUMELE OTÁ NNO!”

7, 8. Xeeni Martha aakhoottiha awe ovenxiwa nluku naattiyelaniwe mahiye a Laazaro, nto Yesu aapanke-ni?

⁷ Vaavo Yesu aaphiyale awe omahiye waavithiwe murutthu wa Laazaro, mahiye ale yaattiyeliwe ni nluku nuulupale. Yesu aahimmye so: “Mukumihe nluku nla”. Martha aahimukhoottiherya. Maana murutthu wa Laazaro aahiviriha mahiku maxexe ori mmahiye. (Yohani 11:39) Martha khaasuwela wira Yesu aarowa omuhihimuxa Laazaro.

⁸ Yesu aahimwiitthana Laazaro oriki: “Lázaro, mukhumele otá nno!” Nuumala-vo Martha ni Maria yaahiweha mwiiriirya. Maana ‘mulipa-òkhw’owo ahikhuma, tthiri, atthukiwene n’ikuwo matata n’inawu’. (Yohani 11:43, 44) Aayo, Laazaro aahittikiheriwa okumi! Vano aahitthikela okhala ni amusi ni apatthani awe. Awo yaanimoona Laazaro, onvara ni olavulana. Tthiri, waari mwiiriirya! Yesu aahimuhihimuxa Laazaro.

“MWANAMWANE, KINIWIRELANI TI MI: NVENYÉ!”

9, 10. (a) Ti pani anvanhe Yesu owerya wa waahihimuxa atthu? (b) Xeeni soohimmwa sa ohihimuxiwa sirya aya sootthuneya wa hiyo?

⁹ Niireke Yesu aahihimuxa atthu orumeelaka owerya wawe? Nnaari. Ohinatthi omuhihimuxa Laazaro Yesu aahinvekela Yehova, vano Yehova aahinvaha owerya Yesu wira omuhihimuxe Laazaro. (Mmusome Yohani 11:41, 42.) Laazaro khaahihimuxiwe mekhawe paahi. Nave Biibiliya onnimuhimya mwaaruusi aarina iyaakha 12 yoowo ahaareere owereiwa. Vano Jairo, oxankale ene aahirowa omuxonttela Yesu wira onvonihe mwanawe ole. Aarina mwaana mmosa yoole paahi. Olavulaka ni Yesu, mulopwana mmosa aahirwa khumuhimeerya wira: “Mwan’inyu ohòkhwa. Munimùkhulela-ni-tho Mwixuttihi ula?” Nto Yesu aahimwiirela Jairo wira: “Muhòvé. Mwamini pahi. Mwan’inyu onimòpowa”. Vano Yesu aahirowa owannyawe Jairo. Vaavo aattamela awe vate va Jairo, Yesu aaniwerya woona empa ele ni owiiwa atthu yinlaka. Olavulaka ni atthu ale, Yesu aahimmye so: “Muhinlé. Ola khakhwiye: onorupa”. Waaniheryasa, anamuyari a mwaaruusi ole yaahixanka ni masu a Yesu. Vano Yesu aahaavekela okhuma atthu ale nto khuhala tiithi ni maama ni mwaaruusi ole aakhwiiye. Yesu aahivarela ntata na mwaaruusi ole khuhimya wira: “Mwanamwane, kiniwirelani ti mi: nvenyé!” Tthiri anamuyari ale yaahihakalala vanceene onweha mwanaya ovenyaka ni oneetta! Yesu aahimuhihimuxa mwanaya ole. (Marko 5:22-24, 35-42; Luka 8:49-56) Okhuma nihiku nne, okathi yanweha aya mwanaya ole, yaanuupuwela ele Yehova yaapanke awe omurumeelaka Yesu.a

¹⁰ Masi atthu yaale yaahihimuxiwe ni Yesu yaahitthikela okhwa. Vano osoma soohimmwa iya ti vooloka maana onninikhaliherya okhalana nlipelelo neekeekhai voohimya sa ohihimuxiwa. Yehova oniphavela waahihimuxa atthu akhwiiye, ni onrowa waahihimuxa tthiri.

ELE ENIIXUTTA AHU NI SOOHIMMWA SA OHIHIHIMUXIWA

11. Exeeni Musuweli 9:5 enniixuttiha awe voohimya sa Laazaro?

¹¹ Mwekeekhai Biibiliya onihimya wira “alipa-òkhwa khansuwela-tho etthu”. Nto ohihimuxiwa wa Laazaro waahooniherya wira eyo ekeekhai. (Musuweli 9:5) Yesu aalavunle wira Laazaro aamurupa. (Yohani 11:11) Okathi aaryaawe mmahiye, Laazaro ‘khasuwela-tho etthu’.

12. Ninsuwela sai wira ohihimuxiwa wa Laazaro waahiiraneya tthiri?

¹² Vaavo Yesu aamuhihimunxe awe Laazaro, atthu anceene yaahinweha. Hata awanani a Yesu, yaahisuwela wira Yesu taapanke mwiiriirya ole. Ohihimuxiwa wa Laazaro, waahooniherya wira ohihimuwa ekeekhai tthiri. (Yohani 11:47) Nave-tho, atthu anceene yaahirowa onweha Laazaro, nto atthu awo yaahipacerya waamini wira Yesu aarummwale ni Muluku. Awanani a Yesu khiyaasiveliwa woona eyo, vano yaahiiwanana omwiiva Yesu ni Laazaro.—Yohani 11:53; 12:9-11.

13. Exeeni ennikupaliha wira Yehova onrowa waahihimuxa alipa-ookhwa?

¹³ Yesu aahimmye wira “atthu othene ari mmahiye” anuupuweliwa ni Muluku anrowa ohihimuxiwa. (Yohani 5:28) Ela entaphulela wira atthu otheene anuupuweliwa ni Yehova anrowa otthikela okhala akumi. Wira Yehova omuhihimuxe mutthu ohaana wuupuwela mikhalelo sotheene sa mutthu owo. Niireke Muluku onniwerya opaka eyo? Aayo, maana sookhala itheneeri ibilyau sinceene siri wiirimu. Nto Biibiliya onihimya wira Yehova onnisuwela masina a khuta etheneeri. (Mmusome Yesaya 40:26.) Akhala wira onnuupuwela nsina na khuta etheneeri, tthiri vanookhweya wuupuwela mikhalelo sotheene sa atthu onrowa awe waahihimuxa. Etthu yootepa otthuneya, mwaha woowi Yehova topattunxe itthu sotheene, nto noosuwela wira ookhalana owerya wa waattikiherya okumi ale akhwiiye.

14, 15. Moolumo a Yobi anniixuttiha exeeni voohimya sa ohihimuxiwa?

¹⁴ Yobi mulopwana oororomeleya aanikupali ohihimuxiwa wa alipa-ookhwa. Owo aakonhe so: “Masi mutthu okhwiye onowerya okhala-tho mukumi?” Nto aahihimya wa Yehova wira: “Vano nyuwo mwamukìhana, miyo kiwakhuleni: mwamusiveliwa ni miyo, kipattuxiwe ni nyuwo”. Tthiri Yobi aanisuwela wira muhoolo Yehova onrowa waahihimuxa alipa-ookhwa.​—Yobi 14:13-15.

¹⁵ Nyuwo munoonela sai nlipelelo na ohihimuxiwa wa alipa-ookhwa? Nyuwo pooti wiikoha so: ‘Sai voohimya sa amusi ni apatthani aka akhwiiye, niireke anrowa ohihimuxiwa tthiri?’ Etthu yoomaaliha osuwela wira Yehova onniphavela tthiri waahihimuxa alipa-ookhwa. Nrowe niwehe ele Biibiliya enihimya awe voohimya sa opuro onrowa aya okhalaka ni tani anrowa ohihimuxiwa.

AWO ‘ANIMWIWA NSU NA MWANA A MUTTHU, EKHUME MMAHIYE’

16. Okumi moota xeeni onrowa aya okhalana ale anrowa ohihimuxiwa valaponi?

¹⁶ Khalai, atthu yaale yaahihimuxiwe yaahitthikela okhala ni amusi aya ni apatthani aya valaponi vaava. Nave eyo enimwiiraneya muhoolo masi mwa enamuna yoolokexa. Moota xeeni? Maana atthu awo anrowa ohihimuxiwa muhoolo anrowa okhalaka mahiku otheene ni khanikhwa-tho. Anrowa okhala elapo yoolokexa ni yoovirikana ni ela enikhala ahu olelo. Khunrowa-tho okhala ikhotto, ikrime, ni iretta.

17. Tani anrowa ohihimuxiwa?

¹⁷ Tani anrowa ohihimuxiwa? Yesu aahimmye wira ‘atthu othene ari mmahiye [“anuupuweliwa”, NM], animwiwa nsu na Mwana a Mutthu, ekhume mmahiye’. (Yohani 5:28, 29) Nave Wisupulula 20:13, onihimya wira: ‘Ephareya yahahokoloxa atthu ale yakhwenle memmo. Okhwa n’ilapo y’alipa-òkhwa wahattikiherya atthu yakhwiye yarinaya’. Tthiri ibilyau sinci sa atthu anrowa ohihimuxiwa. Nave-tho, murummwa Paulo aahimmye wira atthu otheene “ale òrera murima n’ale òtakhala murima”, anoohihimuwa mookhwaani. (Mmusome Miteko 24:15.) Masu ala anitaphulela exeeni?

18. Tani anihimmwa okhala “òrera murima” anrowa ohihimuxiwa?

¹⁸ “Ale òrera murima” anihela muhina arumeyi oororomeleya a Yehova yaakhanle Yesu ohinatthi orwa valaponi. Atthu ntoko Nowe, Abrahamu, Sara, Moise, Ruthi, ni Estheri yaawo anrowa ohihimuxiwa wira akhaleke valaponi. Nto munoowerya osoma voohimya sa atthu ala eliivuru ya aHéberi ekapitulu 11. Ankhi arumeyi a Yehova anikhwa mahiku ala? Awo-tho anihimmwa okhala “òrera murima” anrowa ohihimuxiwa.

19. Tani anihimmwa okhala ‘òtakhala murima’? Nto eparakha xeeni Yehova onrowa awe waavaha?

¹⁹ ‘Ale òtakhala murima’, anihela muhina ibilyau sinceene sa atthu akhwiiye ahisuwenle ekeekhai voohimya sa Yehova. Hata akhwiiye ene, nlelo Yehova onniwuupuwela. Owo onrowa waahihimuxa, wira akhalane eparakha ya omusuwela ni omurumeela.

20. Xeeni vahinrowa aya ohihimuxiwa atthu otheene?

²⁰ Niireke eyo enitaphulela wira khula mutthu okhwiiye onrowa ohihimuxiwa? Nnaari. Maana Yesu aahimmye wira atthu akina khanrowa ohihimuxiwa. (Luka 12:5) Ti pani onithanla akhala wira mutthu owo onrowa ohihimuxiwa aahiiso nnaari? Yehova tori Namaphuka ookiserya, ni onvaha Yesu owerya wira “àlamule atthu akumi n’ale akhwiye”. (Miteko 10:42) Tivonto, mutthu yoole onrowa wooniwa okhala mutakhali ni ohiniphavela ottharuwa khonrowa ohihimuxiwa.​—Nwehe Enoota 19.

OHIHIMUXIWA WA ATTHU ANROWA WIIRIMU

21, 22. (a) Anrowa okhalana erutthu xeeni ale anrowa ohihimuxiwa wira arowe wiirimu? (b) Ti pani opacenrye ohihimuxiwa ni erutthu yomunepani?

²¹ Nave Biibiliya onniixuttiha wira atthu akina anrowa wiirimu. Vaavo mutthu vanihihimuxiwa awe wira akhaleke wiirimu, owo khonihihimuxiwa ni erutthu ya opinaatamu. Masi onihihimuxiwa ni erutthu yomunepani wira akhaleke wiirimu.

²² Nto Yesu topacenrye ohihimuxiwa ni erutthu yomunepani. (Yohani 3:13) Mahiku mararu nuumala Yesu wiiviwa, Yehova aahimuhihimuxa. (Esalimo 16:10; Miteko 13:34, 35) Yesu khaahihimuxiwe ni erutthu ya opinaatamu. Murummwa Pedru aatthokihenrye wira Yesu “ohòkhwa ntoko mutthu: masi òkhalihiwa-tho mukumi n’utthuna” wa munepa. (1 Pedru 3:18) Yesu aahihihimuxiwa ntoko mutthu oowerya oomunepani! (1 aKorinto 15:3-6) Masi Biibiliya onnihimya wira aakhala akina anrowa ohihimuxiwa ni owerya iwo.

23, 24. Tani aniirela mpantta “nikoto namukhani”, naalavuliwe ni Yesu nto ari atthu akavi?

²³ Ohinatthi okhwa, Yesu aahaahimeerya awiixutti awe oororomeleya wira: “Miyo kinrowa olokiha nipuro nanyu”. (Yohani 14:2) Masu ala anitaphulela wira atthareli awe yaarowa ohihimuxiwa wira yakhaleke wiirimu. Yaarowa okhala atthu akavi? Yesu aahimmye wira yaarowa okhala atthu vakhaani, niire so, “nikoto namukhani”. (Luka 12:32) Murummwa Yohani aahihimya nummuru nene okathi anweha awe Yesu “emenlene vaMwako Siyoni [wiirimu]. Yahikhala vavo ni yowo atthu ikonto miloko mulokó ni miloko mixexe n’atthu ikonto xexé”, eyo piiyo, atthu 144.000.​—Wisupulula 14:1.

²⁴ Nto yaarowa ohihimuxiwa okathi xeeni maKristau ala 144.000? Biibiliya onihimya wira eyo yaarowa wiiraneya nuumala Kristu opacerya olamulela wiirimu. (1 aKorinto 15:23) Vano ninkhala okathi yoowo, ni atthu anceene a 144.000 aahihimuxiwa khurowa wiirimu. Vaavo vanikhwa aya ale nlelo ari valaponi annihihimuxiwa naananoru wira arowe wiirimu. Masi, atthu anceene anrowa ohihimuxiwa muhoolo wira akhaleke mParayiisu valaponi vaava.

25. Ninrowa wiixutta exeeni muru onittharelana?

²⁵ Moohipisa, Yehova onrowa omaliha okhwa, tthiri okhwa khunrowa okhala-tho! (Mmusome Yesaya 25:8.) Ale anrowa wiirimu anrowa opaka exeeni? Biibiliya onitthokiherya wira atthu awo anrowa olamulelaka ni Yesu, eGuvernu ya wiirimu. Ninrowa wiixutta itthu sikina sa eguvernu eyo muru onittharelana.