Ihapari suulupale sa mBiibiliyani ti Omwene wa Muluku. Yehova onrowa orumeela Omwene owo wira iirihe elapo yotheene okhala eparayiisu. Masi Omwene wa Muluku exeeni? Ninsuwela sai wira Omwene onnilamulela? Etthu xeeni Omwene opanke aya? Omwene onrowa opaka exeeni muhoolo? Yoosoma ela ni soosoma piili sinittharelana, ninrowa waakhula makoho awo.

1. Omwene wa Muluku exeeni ni ti pani ori Mwene aya?

Omwene wa Muluku ekuvernu epakiwe ni Yehova. Mwene aya ti Yesu Kristu ni onnilamulela wiirimu. (Matheyo 4:17; Yohani 18:36) Biibiliya, onihimya wira Yesu “onrowa olamulela ntoko Mwene mahiku otheene”. (Luka 1:32, 33) Okhala wira ti Mwene a Omwene wa Muluku, Yesu onrowa waalamulelaka atthu otheene valaponi.

2. Atthu xeeni anrowa olamulelaka ni Yesu?

Yesu khonrowa olamulelaka mekhawe. “Atthu a mahimo otheene, ni a mattaava otheene, ni a makhuli otheene ni a maloko otheene . . . anrowa okhala mamwene wira elamuleleke elapo” ni Yesu. (Wiisuupulula 5:9, 10) Atthu akavi anrowa olamulelaka ni Kristu? Okhuma okathi Yesu aarwiiye awe valaponi, imilyau sinceene sa atthu yaahikhala atthareli awe, niire so, makristau. Niireke makristau otheene anrowa olamulelaka ni Yesu? Nnaari. Maana makristau oothanliwa 144.000 paahi, tanrowa wiirimu wira yalamuleleke ni Yesu. (Mmusome Wiisuupulula 14:1-4.) Makristau makina anrowa okhalaka valaponi.—Esalimo 37:29.

3. Xeeni Omwene wa Muluku ori aya wooloka ovikana ikuvernu sa apinaatamu?

Hata anamalamulela a apinaatamu apakaka itthu sooloka, awo khaniwerya opaka itthu sootheene aniphavela aya. Woonasa wene, onniphiya okathi anrantteliwa aya ni anamalamulela akina. Nto awo anaaranttela pooti okhala oowiitthuna ni ohiphavela waakhaliherya atthu. Masi namalamulela a Omwene wa Muluku, khonrowa orantteliwa ni mutthu mukina. Muluku “onokumiherya omwene ohinrowa omala, nnákhala oweriwa n’umwene mukina”. (Daniyeli 2:44) Yesu onrowa olamulelaka elapo yotheene ni onrowa waathokoreryaka mwa xariya atthu otheene. Nave Yesu mutthu oophenta, ooreera murima ni a xariya. Nave-tho onoowiixuttiha atthu otheene waathokorerya akhwaaya mwa enamuna emosaru, niire so, moophenta, mooreerela murima ni mwa xariya.—Mmusome Yesaya 11:9.

4. Omwene orina owerya woolamulela elapo yotheene

Owerya Yesu Kristu orina awe, onnaavikana anamalamulela otheene a apinaatamu akhanle ni yaakhanle khalai. Mmusome Matheyo 28:18, nuumala-vo mwaakhule nikoho ninttharelana:

• Owerya Yesu orina awe ni owerya wa anamalamulela a apinaatamu arina aya ovirikanne sai?

Anamalamulela a apinaatamu, animakela oturukiwa ni anilamulela mpantta mmosa paahi wa elapo. Masi ankhi Omwene wa Muluku? Mmusome Daniyeli 7:14, nuumala-vo mwaakhule makoho anittharelana:

• Xeeni vari aya vooloka osuwela wira Omwene wa Muluku khonrowa ‘opwetexiwa’?

• Xeeni vari aya vooloka osuwela wira Omwene wa Muluku onrowa olamulelaka elapo yotheene?

5. Anamalamulela a apinaatamu annirantteliwa

Xeeni Omwene wa Muluku onrowa aya oranttela ikuvernu sa apinaatamu? Nwehe EVIIDIYU, nuumala-vo mwaakhule nikoho.

EVIIDIYU: Omwene wa Muluku Exeeni?—Eviidiyu yaamukhaani. (1:41)

• Ikuvernu sa apinaatamu sinikumiherya mixankiho xeeni?

Mmusome Musuweli 8:9, nuumala-vo mwaakhule makoho anittharelana:

• Munoona wira Omwene wa Muluku ohaana tthiri oranttela ikuvernu sa apinaatamu? Mwaha wa xeeni?

6. Anamalamulela a Omwene a Muluku annisuwela makhalelo ahu

Mwene ahu Yesu Kristu, ootoko okhala valaponi. Nto “onnisuwela otteettheya wahu”. (aHeeberi 4:15) Nave Yehova ohaathanla alopwana ni athiyana oororomeleya 144.000 wira yalamuleleke ni Yesu. Awo “atthu a mahimo otheene, ni a mattaava otheene, ni a makhuli otheene ni a maloko otheene”.—Wiisuupulula 5:9.

• Munoonela sai osuwela wira Yesu ni ale anrowa olamulelaka ni yena annisuwela makhalelo ahu ni mixankiho sahu? Mwaha wa xeeni?

7. Malamulo a Omwene wa Muluku toolokexa ovikana malamulo a ikuvernu sa apinaatamu

Ikuvernu sinnipaka malamulo wira saakhapeleleke ni waakhaliherya atthu. Nave Omwene wa Muluku wookhalana malamulo. Mmusome 1 aKorinto 6:9-11, nuumala-vo mwaakhule makoho anittharelana:

• Munoonela sai, elapo yaarowa okhala sai vaakhanle wira atthu otheene annitthara malamulo a Muluku?a

• Munoona wira Yehova ookhalana ehakhi ya waavaha atthu malamulo wira yeetteleke? Mwaha wa xeeni?

• Etthu xeeni enooniherya wira atthu ahiniiwelela malamulo a Muluku pooti opaka marukunuxo?—Nwehe eversiikulu 11.

IPONTO SUULUPALE

Omwene wa Muluku ekuvernu yeekeekhai eri wiirimu yeeyo enrowa olamulelaka valaponi.

Wuuluula

• Tani anrowa okhala anamalamulela a Omwene wa Muluku?

• Xeeni Omwene wa Muluku ori aya woolokexa ovikana ikuvernu sa apinaatamu?

• Itthu xeeni Yehova oniphavela awe wira apakeke atthu anrowa wiirelaka mpantta Omwene awe?

NWEHE ITTHU SIKINA

Nwehe itthu Yesu iixuttinhe awe voohimya sa opuro ori ya Omwene wa Muluku.

“Niireke Omwene wa Muluku Etthu Eri Vamurimani?” (Mwaha ori va jw.org)

Xeeni Anamoona a Yehova aniiwelela aya Omwene wa Muluku ovikana ikuvernu sa apinaatamu?

Awo Anniiwelela Omwene wa Muluku (1:43)

Nwehe ele Biibiliya onihimya awe voohimya sa atthu 144.000, Yehova aathanlale awe wira yalamuleleke ni Yesu.

“Tani Anirowa Wiirimu?” (Mwaha ori va jw.org)

Etthu xeeni yaamwiirinhe muthiyana mmosa aatthukweliwe mukhatteya woona wira Omwene wa Muluku paahi tonrowa omaliha mixankiho sa moolumwenkuni?

“Kaaphavela Omaliha Ohixariya” (Nvenye!, Novembro 2011)

Omwene wa Muluku opacenrye olamulela wiirimu okhuma mwaakha wa 1914. Nto okhuma mwaakha ole, yaahipacerya mahiku ookiserya a ikuvernu sa apinaatamu. Ninsuwela sai? Nrowe niwehe ele Biibiliya aahimmye awe vahinatthi voohimya sa mwaha owo ni itthu saarowa okhumelela moolumwenkuni okhuma mwaakha wa 1914.

1. Itthu xeeni Biibiliya aahimmye awe vahinatthi?

Eliivuru ya mBiibiliyani ya Daniyeli, enninikhaliherya osuwela wira Omwene wa Muluku waarowa opacerya olamulela wanikisa wa okathi 7 aahiiso “thanu na pili”. (Daniyeli 4:13, 14) Nuuvira iyaakha sinceene, Yesu aahihimya okathi owo okhala “okathi wa amalapo”. Nave aahiixuttiha wira okathi owo nlelo khiwaamanle. (Luka 21:24) Ntoko ninrowa ahu oweha, okathi thanu na piili waamanle mwaakha wa 1914.

2. Itthu xeeni saarowa okhumelela valaponi okhuma mwaakha wa 1914?

Awiixutti a Yesu, yaahimukoha wira: “Munileele: okathi xeeni sinrowa aya okhumelela itthu iya, nave tiivi eri ethoonyeryo ya otthika wanyu ni omala wa olumwenku?” (Matheyo 24:3) Okathi aawaakhula awe, Yesu aahihimya itthu saarowa okhumelela okathi aarowa awe opacerya olamulela wiirimu ntoko Mwene a Omwene wa Muluku. Itthu iyo, saarowa ohela muhina ikhotto, etala ni itetere. (Mmusome Matheyo 24:7.) Nave Biibiliya aahihimya makhalelo a atthu “mahiku ookiserya”. Okhala wira atthu yaarowa okhalana makhalelo oohiloka, mahiku ookiserya yaarowa okhala “ooxankiha ni oowoopiha”. (2 Timootheyo 3:1-5) Okhuma mwaakha wa 1914, itthu iyo sinnitepa wooneya.

3. Xeeni olumwenku onitepa aya otakhala okhuma okathi Omwene wa Muluku opacenrye aya olamulela?

Moohipisa nuumala Yesu okhala Mwene a Omwene wa Muluku, owo aahiwana ekhotto wiirimu ni Satana vamosa ni minepa sootakhala. Satana ni minepa sawe sootakhala yaahixinttiwa. Biibiliya, onihimya wira Satana ‘aahiriheliwa vathi, nave-tho, malaikha awe yaahiriheliwa vathi vamosa ni yoowo’. (Wiisuupulula 12:9,10,12) Nto Satana khoreere onanariwa, mwaha woowi onnisuwela wira moohipisa onoopwetexiwa. Okhala wira Satana ooriheliwa vathi-va, tivonto itthu sintepa aya otakhala moolumwenkuni! Masi moohipisa Omwene wa Muluku onoomaliha mixankiho sootheene.

MWIIXUTTE ITTHU SIKINA

4. Iprofesia sa mBiibiliyani saanihimya mwaakha wa 1914

EVIIDIYU: Omwene wa Muluku Opacenrye Olamulela Okhuma Mwaakha wa 1914 (5:02)

Muluku, aahimwiiriha mwene Nabukhodonosori a oBabilonia wa khalai oloha. Yooloha ele, Yehova aahimooniherya itthu saarowa wiiraneya muhoolo. Nto Daniyeli aahihimya ele yaataphulela aya yooloha ele ni moota yaavarihana aya ni ekuvernu ya Nabukhodonosori vamosa ni Omwene wa Muluku.—Mmusome Daniyeli 4:17;a

Mmusome Daniyeli 4:17-23, nuumala-vo murumeelaka ekwaaturu, mwaakhule makoho anittharelana:

• (A) Etthu xeeni Nabukhodonosori aalonhe awe?—Nwehe eversiikulu 17 ni 18.

• (B) Etthu xeeni yaarowa wiiraneya ni mwiri ole?—Nwehe eversiikulu 20.

• (C) Etthu xeeni yaarowa wiiraneya wanikisa wa okathi “thanu na pili”?—Nwehe eversiikulu 23.

Yooloha Ele ya Mwiri Enivarihana Sai ni Omwene wa Muluku?

EPROFESIA (Daniyeli 4:17-34)

Ekuvernu

(A) Mwiri muulupale

Wuntereriwa wa ekuvernu

(B) ) ‘Wikitthiwa mwiri’ ni okathi “thanu na pili”

Ottikiheriwa ekuvernu

(C) Okhalihiwa-tho mwene

Wiiraneya woopacerya wa eprofesia ela . . .

• (D) Mwiri anithoonyerya aani?—Nwehe eversiikulu 25.

• (E) Okathi xeeni ahiyale awe olamulela?—Mmusome Daniyeli 4:26-30.

• (F) Etthu xeeni yaamwiiranenle Nabukhodonosori wanikisa wa okathi “thanu na pili”?—Mmusome Daniyeli 4:31-33.

WIIRANEYA WOOPACERYA

Ekuvernu

(D) Nabukhodonosori mwene a oBabilonia

Wuntereriwa wa ekuvernu

(E) Nuumala mwaakha wa 606 Kristu Ohinatthi Orwa, Nabukhodonosori aahipacerya okhala ntoko naanepa aahiiso mulolo ni aahihiya okhala mwene iyaakha 7

Ottikiheriwa ekuvernu

(F) Nabukhodonosori onnitthikela okhala saana ni onnitthikela olamulela

Wiiraneya wa nenli wa eprofesia ela . . .

• (G) Tani yaathonyerya mwiri ole?—Mmusome 1 Wahala 29:23.

• (H) Okathi xeeni yaahiyale aya olamulela? Ninsuwela sai wira khiyaalamulela mpakha okathi Yesu aari awe valaponi?—Mmusome Luka 21:24.

• (I) Okathi xeeni ni opuro xeeni omwene waatthikenle awe olamulela?

WIIRANEYA WA NENLI

Ekuvernu

(G) Mamwene a wisarayeli yaawo yaathonyerya olamulela wa Muluku

Wuntereriwa wa ekuvernu

(H) Yerusalemu onnipwetexiwa, mamwene a wisarayeli annihiya olamulela iyaakha 2.520

Ottikiheriwa ekuvernu

(I) Yesu onnipacerya olamulela wiirimu ntoko Mwene a Omwene wa Muluku

5. Olumwenku wooturukeya okhuma mwaakha wa 1914

Nwehe EVIIDIYU.

EVIIDIYU: Omwene wa Muluku Opacenrye Olamulela Okhuma Mwaakha wa 1914 (5:02)

Yesu aahihimya vahinatthi makhalelo a valaponi nuumala yena okhala Mwene. Mmusome Luka 21:9-11, nuumala-vo mwaakhule makoho anittharelana:

• Itthu xeeni muniweha anyu siraneyaka olelo-va?

Murummwa Paulo aahihimya makhalelo a atthu yaarowa okhalaka mahiku ookiserya a olamulelo wa apinaatamu. Mmusome 2 Timootheyo 3:1-5, nuumala-vo mwaakhule nikoho ninttharelana:

• Niireke atthu a olelo-va annooniherya mikhalelo iya?

6. Nihaana okhaliherya Omwene wa Muluku

Mmusome Matheyo 24:3, 14, nuumala-vo mwaakhule makoho anittharelana:

• Muteko xeeni wa faita yinceene onivariwa onooniherya wira Omwene onnilamulela?

• Munrowa okhaliherya sai ovariwa muteko owo?

Omwene wa Muluku onnilamulela ni nihanle ophiya nihiku onrowa aya olamulela olumwenku wootheene. Mmusome aHeeberi 10:24, 25, nuumala-vo mwaakhule nikoho ninttharelana:

• Nihaana opaka exeeni vaavo nnoona ahu “wira nihiku na Muluku ninnaattamela”?

IPONTO SUULUPALE

Iprofesia sa mBiibiliyani ni itthu siniiraneya moolumwenkuni, sinnooniherya wira Omwene wa Muluku onnilamulela. Okathi ninlaleerya ahu, ni orowela mithukumano sa mmulokoni ninnooniherya wira ninnikupali eyo.

Wuuluula

• Eprofesia ya Daniyeli ennilavula okathi 7, etthu xeeni yiiraneyale nuuvira okathi owo?

• Etthu xeeni enookupalihani wira Omwene wa Muluku opacenrye olamulela 1914?

• Munrowa wooniherya sai wira munnikupali wira Omwene wa Muluku onnilamulela?

NWEHE ITTHU SIKINA

Nwehe itthu ahimmye aya alipa-oolepa sowiiraneya sa mulaponi ni atthu akina voohimya sa itthu siniiraneya okhuma 1914.

“Okathi Mweettelo Wooloka Ohononiwe Aya Moowaakuveya” (Nvenye!, Abril 2007)

Nwehe moota eprofesia eri Matheyo 24:14, yaaturunke aya okumi wa mulopwana mmosa.

“Waanikisivela Ommana Basquete Ovikana Itthu Sikina!” (Owehaweha, N.° 3 2017)

Ninsuwela sai wira eprofesia eri Daniyeli ekapiitulu 4 ennivarihana ni Omwene wa Muluku?

“Omwene wa Muluku Opacenrye Silini Olamulela? (Mpantta 1)” (Owehaweha, 1 a Outubro, 2014)

Ninsuwela sai wira okathi 7 onilavuliwa Daniyeli ekapiitulu 4 waamanle 1914?

“Omwene wa Muluku Opacenrye Silini Olamulela? (Mpantta 2)” (Owehaweha, 1 a Novembro, 2014)

Omwene wa Muluku woopacerya olamulela. Moohipisa, Omwene wa Muluku onoopaka marukunuxo manceene valaponi. Yoosoma ela, nnooweha itthu vakhaani sooloka Omwene wa Muluku onrowa awe opaka.

1. Omwene wa Muluku onrowa okumiherya sai murettele ni exariya valaponi?

Yesu, yoowo ori Mwene a Omwene wa Muluku, onimwaapwetexa atthu otheene ootakhala ni ikuvernu sa apinaatamu okathi wa ekhotto ya Armagedoni. (Wiisuupulula 16:14, 16) Okathi Yesu onrowa awe opaka eyo, enimwiiraneya yooleiherya ya mBiibiliyani enihimya wira: “Atakhali anorimela nananoru: nyuwo munimwaphavela, muhaphwanyé”. (Esalimo 37:10) Orumeelaka Omwene wa Muluku, Yesu onooruuha murettele ni exariya elapo yootheene.—Mmusome Yesaya 11:4.

2. Okumi onrowa okhala sai nuumala wiiraneya ele Muluku oniphavela awe valaponi?

Nkahaya muupuwele okhala elapo atthu otheene ari aya a xariya ni ooreera murima, animphenta Yehova ni aniphentana mukina ni mukhwaawe! Eyo ti etthu enrowa wiiraneya okathi Omwene wa Muluku onrowa aya olamulelaka. Maana “Anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:29) Okathi owo, khuuvo mutthu onrowa owereiwaka ni otheene ahu ninrowa okhalaka mahiku otheene.

3. Omwene wa Muluku onrowa opaka exeeni nuumala atakhali opwetexiwa?

Nuumala atakhali otheene opwetexiwa, Yesu onrowa olamulelaka iyaakha 1.000. Okathi owo, Yesu ni makristau oothanliwa 144.000, yaawo anrowa olamulelaka ni Yesu, anrowa waakhaliherya atthu otheene valaponi okhala oomalela, niire so, ohikhalana etampi. Nuumala iyaakha iyo 1.000, elapo yotheene enrowa okhala eparayiisu yooreera ni atthu otheene anrowa ohakalalaka, maana animwiiwelelaka malamulo a Yehova. Nto Yesu onoomuttikiherya omwene Tiithi awe, Yehova. Nave okathi owo ‘nnootteelihiwa nsina’ na Yehova moomalela. (Matheyo 6:9, 10) Ohiya-vo, okathi owo vanimooneya oratteene wira Yehova tori namalamulela oolokexa onaakhapelela ale onaalamulela awe. Nuumala-vo, Yehova onompwetexa Satana, minepa sootakhala ni atthu otheene ahinrowa ophavela omwiiwelela. (Wiisuupulula 20:7-10) Omwene wa Muluku onooruuha makhalelo ooloka ni anrowa okhala a mahiku otheene.

MWIIXUTTE ITTHU SIKINA

4. Omwene wa Muluku onoopwetexa ikuvernu sootheene sa apinaatamu

Biibiliya onihimya wira “vathí-va àkhala akina arina owerya, àkhala-tho akina anihawa epuheriwaka n’awo”. (Musuweli 8:9) Orumeelaka Omwene awe, Yehova onoomaliha ohixariya wootheene.

Mmusome Daniyeli 2:44 ni 2 aTesalonika 1:6-8, nuumala-vo mwaakhule makoho anittharelana:

• Yehova ni Yesu anrowa wiiriha exeeni ikuvernu sa apinaatamu ni ale anikhaliherya?

• Muupuwelaka itthu sootheene mwiixuntte anyu voohimya sa Yehova ni Yesu, etthu xeeni enookupalihani wira ophukela waya onrowa okhala wooloka ni wa xariya?

5. Yesu ti Mwene ooloka

Okhala wira Mwene a Omwene wa Muluku, Yesu onoopaka itthu sinceene sooloka wira aakhaliherye atthu anrowa okhalaka valaponi. Nwehe EVIIDIYU enooniherya wira Yesu onniphavela waakhaliherya atthu ni Muluku onvaha Yesu owerya wira opake eyo.

EVIIDIYU: Yesu Aahooniherya Ele Omwene wa Muluku Onrowa Aya Opaka (1:13)

Itthu Yesu aapanke awe okathi aari awe valaponi sooniherya itthu onrowa awe opaka ntoko Mwene a Omwene wa Muluku. Mareeliho xeeni ari elista eri vathi-vo munlipelela anyu oweha yiiraneyaka? Musome soolepa sa mBiibiliyani sinivarihana ni mareeliho awo.

6. Omwene wa Muluku onooruuha itthu soohakalaliha muhoolo

EVIIDIYU: Itthu Soohakalaliha Sinrowa Wiiraneya Muhoolo (4:38)

Musome Esalimo 145:16, nuumala-vo mwaakhule nikoho ninttharelana:

• Munsuwela sai wira Yehova onimwaavaha atthu otheene itthu aniphavela aya?

IPONTO SUULUPALE

Omwene wa Muluku onoopaka itthu sootheene Muluku oniphavela awe, wiiriha elapo yotheene okhala eparayiisu ni anrowa okhalaka atthu ammukokhorela Yehova mahiku otheene.

Wuuluula

• Omwene wa Muluku onrowa otteeliha sai nsina na Yehova?

• Etthu xeeni ennikupaliha wira Omwene wa Muluku onoomaliherya sooleiherya sootheene siri mBiibiliyani?

• Omwene wa Muluku onoopaka itthu sinceene sooloka. Nto etthu xeeni muniphavelaxa anyu oweha yiiraneyaka?

NWEHE ITTHU SIKINA

Nwehe etthu nintaphulela aya nuulumo noowi Armagedoni.

“Ekhotto ya Armagedoni Exeeni?” (Mwaha ori va jw.org)

Nwehe itthu Yesu onrowa awe opaka okathi onrowa awe olamulelaka iyaakha 1.000.

“Exeeni Enrowa Wiiraneya Nihiku na Ophukeliwa?” (Owehaweha, 1 a Setembro, 2012)

Nwehe moota nikhanle ahu oowuupuwela niri ene mparayiisu ni atthu akina.

Muupuweleke Muri Ene Mparayiisu (1:50)

Nwehe moota napoliitika aaphwannye awe waakhuliwa wa makoho awe mwaha oni: “Makoho Aka Yaanikixankiha”.

“Biibiliya Onnirukunuxa Mirima sa Atthu” (Owehaweha, 1 a Janero, 2012)