Omoriwa Ikharari
Mikhalelo xeeni sikina siniirela mpantta omoriwa ikharari?
Soowiiraneya sa mbiibiliyani sa efaita yinceene:
Esa 51:3, 4 — Okathi mwene Davidi aamuxonttenle awe Yehova wiira ommorele ikharari, owo aavekela wiira Yehova omulevelele ni ottipihe itampi sawe.
Luk 10:29-37 — Yesu aahiixuttiha efaita erina aya omoriwa ikharari okathi aalavunle awe nlikanyiho na musamariya aamureerenle murima muyuda.
Xeeni apinaatamu ootheene aniphavela aya omoreliwa ikharari?
Nave-tho munwehe 1 Ma 8:46-50.
Xeeni Yehova ori awe ntakiheryo nooloka na omoriwa ikharari?
Okh 34:6; Ne 9:17; Esa 103:8; 2 aKo 1:3
Soowiiraneya sa mbiibiliyani sa efaita yinceene:
Yoob 42:1, 2, 6-10; Yak 5:11 — Yehova aahimmorela ikharari Yoobi ni aahimwiixuttiha waamorela ikharari atthu akina.
Luk 15:11-32 — Yesu aahooniherya omoriwa ikharari wa Yehova okathi aalavunle awe enamuna paapa mmosa aamuthokorenrye awe mwanawe oohiiwelela, yoowo aattharunwe ni murima wootheene.
Xeeni Yehova onnimorela awe ikharari?
Nave-tho munwehe Tit 3:4, 5.
Mukuttho wa Yesu Kristu onnikhaliherya sai oleveleliwa itampi sahu?
Xeeni okathi wootheene ninreerela ahu onvekela Yehova wiira onimorele ikharari ni omuxukhurela onimorela wawe ikharari?
Soowiiraneya sa mbiibiliyani sa efaita yinceene:
Esa 51:3-6 — Okathi ahaareere awe oriipiwa murima ni wiivaha nthowa mwaha wa itampi sawe, moowiiyeviha mwene Davidi aahimuxonttela Yehova wiira ommorele ikharari.
Luk 18:9-14 — Yesu aahipaka nlikanyiho ophavelaka onikhaliherya woona wiira Yehova onnaamorela ikharari atthu ale moowiiyeviha aneemererya soovonya saya.
Xeeni hata atthu yaale apanke itampi suulupale anireerela aya omoreliwa ikharari?
Soowiiraneya sa mbiibiliyani sa efaita yinceene:
2 Wa 33:9-13, 15 — Nnaamwi Manase aari mwene ootakhala vanceene, owo aahittharuwa ni murima wootheene ni aahinvekela Yehova wiira ommorele ikharari. Nto Manase aahitthikela okhala mwene ni aahooniherya ni miteko sawe wiira aahittharuwa ni murima wootheene.
Yon 3:4-10 — Nnaamwi atthu a oNiinive yaari ootakhala murima ni anawiive, awo yaahittharuwa ni murima wootheene ni yaahimoreliwa ikharari ni Muluku.
Naaphavelaka omoreliwa ikharari ni Yehova, xeeni ninreerela ahu ohimya itampi sahu ni ottharuwa ni murima wootheene?
Omoriwa ikharari wa Yehova khonnikhapelela wiira nihihukhummwe, nnakhala ohaawa mwaha wa sookhumelela soohiloka sa itampi sahu
Xeeni ninreerela ahu waamorela ikharari atthu akina?
Akhala wiira khannaamorela ikharari atthu akina, etthu xeeni enrowa wiiraneya ni ompatthani ahu ni Yehova?
Nave-tho nwehe Mir 21:13.
Soowiiraneya sa mbiibiliyani sa efaita yinceene:
Mat 18:23-35 — Yesu aahipaka nlikanyiho ophavelaka wooniherya wiira akhala wiira mutthu khonaamorela ikharari atthu akina, khonrowa omoreliwa ikharari ni Yehova.
Luk 10:29-37 — Nlikanyiho nla atthu anceene anisuwela aya oratteene, Yesu aahooniherya wiira yena ni Yehova khanisiveliwa ni atthu ale ahinimoriwa ikharari, masi annisiveliwa vanceene ni atthu oomoriwa ikharari ntoko musamariya.