BIIBILIYA ONNIRUKUNUXA MIRIMA SA ATTHU

“Miyo Kaahipacerya Wuupuwelela Saana Weiwo Okumi Aka Waarowa aya”

Yowiiraneya Elavuliwe ni Allan Hancock

MWAAKHA OYARIWE AWE: 1941

ELAPO OYARIWE AWE: AUSTRÁLIA

MWAHA ENE: MULIPA AMPAHA SOONA, NI NAMUHAPALIWA

MWEETTELO AKA WA KHALAI: Kinnunwe Warialda, epooma yaamukhaani ya Nova Gales do Sul. Warialda epooma yowaatta alimi arina ipwittipwitthi, inyompe, nakhuwo, ni itthu sikina. Epooma yooreera ni yoohaatta ekrime.

hala wira miyo kaari oopaceriwa mwa anamwane 10 vatthokoni, nto kirineene iyaakha 13 kaahipacerya ovara muteko wira kikhaliherye owaani. Mwaha woowi miyo nkaasomale vanci, kaavara mapuro saari imatta suulupale. Nto kirineene iyaakha 15, miyo kaari mulipa ookukhula ikhavalo.

Ovara mapuro awo waahikiphwanyiha mareeliho oovirikana. Mwa ntakiheryo, waanikisivela muteko kaavara aka, vamosa ni oweha mapuro yaakhaliwa. Miyo kaanikilaathi mutakhwani kipattihale ene mooro ohiyu, ni kinaweha mweeri ni erimu yoosareya itheneeri ni epheyo ya ohiyu yaaruuha wunkhela wa itthu sa mutakhwani. Kinnitthokelela okathi kuupuwela aka wira aahaavo Mutthu aapattuxale itthu iye sotheene sootikiniha. Masi-tho, miyo kaari ooxankiheya mwaha wa ompatthani ni atthu akina a mapuro ale. Ikwaha sinci kaaniwiiwa atthu aruwanaka, nave-tho kaahipacerya ompaha soona. Nto ompaha soona ni oruwana yaari etthu yoolema mookumini mwaka.

Nuumala okhalana iyaakha 18, kaahithaamela epooma ya oSydney. Miyo kaahimananiha okela etoropa masi kiheemereriwa mwaha woowi nkaasomale vanci. Kaahiphwanya muteko ni kinakhala oSydney mpakha mwaakha mmosa. Nto waari okathi yoola kaapacenrye aka okumana ni Anamoona a Yehova. Kaahemererya nlattulo naya noorowa omuthukumanoni waya ni moohipisa kaahoona wira itthu siixuttiha aya saari sekeekhai.

Masi, moohipisa, kaahuupuwela otthikela epooma aka. Kaahirowa okhala epooma ya oGoondiwindi, muttetthe wa oQueensland. Kaahiphwanya muteko, kaahithela, ni mooriipiha murima, kaahipacerya ohapaliwa.

Miyo ni amwaaraka naahaayara anamwane anli. Nuumala-vo, miyo kaahipacerya wuupuwelela saana voohimya sa okumi aka waarowa aya. Kaahuupuwelela etthu kiiwale aka omuthukumanoni wa Anamoona oSydney, ni kaahuupuwela opaka etthu mmwaha owo.

Nto kaahiphwanya erevista ya khalai ya Owehaweha, yeeyo yaarina enderesu ya efiliyaali ya Anamoona a Yehova a wAustrália. Nto, kilepa epaphelo kivekelaka nikhaliheryo. Waakhuliwa waya, Namoona mmosa ooreera murima ni oophenta aahirwa okixukurya. Moohipisa, kaahipacerya omusoma Biibiliya.

MOOTA BIIBILIYA ORUKUNUNXE AWE OKUMI AKA: Vaavo kaamusomaka Biibiliya, kaahiweha wira kaahaana opaka marukunuxo maalupale mookumini mwaka. Eveersu emosa ya Biibiliya yaakivanre murima yaari 2 aKorinto 7:1. Eveersu eyo ennitumererya wira “nrapihe sonanara sothene s’erutthu”.

Miyo kaahilakela omuhiya ompaha soona ni ohapaliwa. Tthiri khivaakhweyale opaka marukunuxo awo, mwaha woowi okhuma khalai yaari yoolema aka. Masi kaahilakela okhala mwa enamuna yoomuhakalaliha Muluku. Nto ovarihela muteko yoolepa ya aRoma 12:2, waahikikhaliherya vanceene, yeeyo eni: “Muhitthareké mwettelo w’atthu a vathí, masi murukunuxe makhalelo anyu, mùlule osuwela wanyu”. Kaahoona wira akhala wira kaaniphavela ohiya soolema saka, kaahaana oturuka muupuwelo aka ni woona soolema saka ntoko Muluku sinoona awe, eyo piiyo, soothanyeya. Kikhaliheriwaka ni Muluku, miyo koowerya ohiya ompaha soona, ni ohapaliwa.

Nave, muxankiho aka muulupale, waari ohiya oruwana. Miyo kaanisuwela yoolakiherya ya Biibiliya mwa yoolepa ya aÉfeso 4:29 eni: “Mwano mwanyu muhikhume molumo òtakhala”. Nnaamwi vari siiso, nkaawenrye mowaakuveya oreeriha moolumo aka. Nto wuupuwelela yoolepa ya Yesaya 40:26 waahikikhaliherya vanci. Elavulaka sa waatta wa itheneeri wiirimu eveersu eyo eni: “Muttukhulele maitho anyu wirimu; moneke: t’ani opattunxe itheneri iye sothene? T’ule onettiha itheneri iye, onalikela; t’ule onìhana khula etheneri nsina naya. Owerya wawe ti wulupale, ikuru sawe khasinvukuwa: khivo enihalela, yihaniwaka”. Nto miyo kaahuupuwela so: akhala wira Muluku aahikhalana owerya wira opattuxe olumwenku wotheene wooreera, tthiri aamukivaha ikuru woopaka marukunuxo wira kimuhakalalihe. Orweela wa mavekelo manceene ni wiilipiherya, vakhaani-vakhaani kaahirukunuxa malavulelo aka.

MOOTA OTTOTTENLE AKA MUREERELO: Okathi kaaryaaka mulipa okukhula inama, miyo nkaarina okathi munceene woovaanela ni atthu, mwaha woowi imatta iyo kavara aka muteko yaaphwanyaneya atthu vakhaani paahi. Hata vari siiso, itthu kiixutta aka omuthukumanoni wa Anamoona a Yehova, saahikikhaliherya moota woolavula saana. Nto eriyari ya itthu sikina, wiixuttihiwa iwo wahikivaha ikuru wira kilavule ni atthu akina voohimya sa ihapari sooreera sa Omwene wa Muluku.​—Matheyo 6:9, 10; 24:14.

Mwa iyaakha sinceene sivinre, koophwanya eparakha yoorumeela mmulokoni ntoko mutokweene. Tthiri ela eparakha yuulupale opaka khula etthu eniweryaka wira kaakhaliherye anna. Etthu yootepexa okihakalaliha, okhala oowuuraana nimurumeelaka Yehova, miyo ni amwaaraka oororomeleya yaawo kinaaphenta aka, vamosa ni aniihu.

Tthiri kinnimuxukhurela Yehova okeemererya miyo, mutthu oohisoma vanceene, wira kiixuttihiwe nuuwo. (Yesaya 54:13) Kinnikupali moomalela moolumo ari yoolepa ya Miruku 10:22, yaawo ani: ‘Ojaliwa w’Apwiya [Yehova] onniraliha’. Miyo ni etthoko aka ninnilipelela wira niixutte itthu sinci voohimya sa Yehova ni omurumeela okathi woohimala.

[Elatarato epaaxina 8]

[Elatarato epaaxina 8]

[Eponto yuulupale ya epaaxina 9]

“Kaahoona wira akhala wira kaaniphavela ohiya soolema saka, kaahaana oturuka muupuwelo aka”

[Elatarato epaaxina 9]