Yehova ‘Nihiku ti Nihiku Onnìreya Muritti’ Aka

Maretha du Raan

Nnaamwi sikhumelelaka mixankiho sa ekumi, vanakhala wira khivaniweryaneya ovilela; masi kooweha ophenta ni nikhaliheryo nuulupale na Tiithi ahu oophenta a wiirimu mookumini mwaka. Mwaha woomurumeela Yehova mmuteko wa opioneero ovikana iyaakha 20 sivinre, koophwanya ohakalala.

Kiyariwe mwaakha wa 1956 kirineene eretta eniitthaniwa espinha bífida, eyo piiyo, ohononeya wa misiphe sinivarihana ni ottoopare. Ohononeya wa misiphe iyo, waanikikumiherya muxankiho wa weetta ni mixankiho sikina suulupale sa ekumi aka.

Kihinatthi oyariwa, mamisionaario a Anamoona a Yehova yaahipacerya omusoma Biibiliya ni anamuyari aka. Okhuma onamwane aka, muttetthe waakhala aka yaari anamalaleerya vakhaani paahi yaawo yaakhala esidade ya Usakos, oNamíbia. Nto, mithukumano sa mmulokoni naathokorerya vatthokoni vahu ntoko emusi. Okathi kaarina aka iyaakha 7, kaahooperariwa epantta emosa ya erutthu wira ethoroliwe ephaka ya ovira miyoso. Okathi kaarina aka iyaakha 14, kaahikhalana oretta wa ecilecile. Okhala wira exikola yuulupale yaari ottaiwene, nave kaahaana okhapeleliwaka ni anamuyari aka, nto nkaawenrye omaliha osoma.

Hata vari siiso kaahilakela winnuuherya omunepani waka. Iliivuru sinceene sa eKristau khisaaphwanyaneya sa nttaava kiyareliwaka, nttaava Afrikaans. Nto kaahipacerya wiixutta Enkelexi wira kiweryeke osoma iliivuru sinceene. Kaahikhala namalaleerya a Omwene kibatiziwa kirineene iyaakha 19. Iyaakha xexe moottharelana, kaahiwereiwa vanceene ni oxankiheya. Masi, opuro waakhala aka ni atthu a nikhuli naka, kaahipacerya ohiya oluttuweliwa olaleerya mwaha wa omoova pinaatamu.

Okathi kaarina aka iyaakha okhuma 20, naahikhuma oNamíbia nirowaka wAfrica do Sul, nto ekwaha yoopacerya kaahiwerya wiirela mpantta miteko sa muloko. Eyo yaari etthu yootepa oreera! Masi, kaahaana-tho otthikela wooperariwa nrupo na miyoso suulupale.

Muhoolo mwaya, kaahiwiriyana mwaha waalavuliwe ni mutokweene onixukurya waalavula sa opioneero. Masu awe yaahivara murima aka. Kaahisuwela wira ekumi aka khiyaalonke, masi kaahiweha moota Yehova aakikhalihenrye awe mmixankiho saka. Nto kaahiilepiha opioneero wookilaatheya. Masi, mwaha wa oretta aka, axitokweene yaanoovelela okeemererya.

Hata vari siiso, kaahilakela ovikaniha olaleerya ihapari sa Omwene. Kikhaliheriwaka ni amaama ni atthu akina, kaahiwerya ovara iwoora sa opioneero myeeri mithanu namosa. Eyo yaahooniherya ophavela waka okhala pioneero nnaamwi okumi aka wahaalipalipa. Kaahivekela-tho opioneero nto ekwaha ela kaaheemereriwa. Eyaakha ya 1988, 1 a Setembro kaahiilepiha opioneero wookilaatheya.

Ntoko pioneero, kaaniweha nikhaliheryo na Yehova. Owiixuttiha Biibiliya atthu, ohiya owehexexaka mukhalelo aka paahi, yaahikikhapelela, ni okilipiha omunepani. Kaanitteeliwa murima mwaha wa eparakha ya waakhaliherya atthu anceene wiivahererya ni obatiziwa.

Okumi aka nlelo khonisuwanyeya. Masi Yehova ‘nihiku ti nihiku onnìreya muritti’ aka. (Esal. 68:20, Biblya Exirima.) Owo onnikikhaliherya ohiya paahi oweryaka weettiha ekumi aka, masi-tho wira kihakalaleke mwaha wookhala mukumi!

[Elatarato epaaxina 9]