MWAHA WOOPACERYA | IHAPARI XEENI BIIBILIYA SIRINA AWE?

Hiyo Niphattuwale Sai?

Mmasu vakhaani, eliivuru yoopacerya ya Biibiliya eniitthaniwa Maphattuwelo, ennihimya sa opattuxiwa wa olumwenku yiiraka: “Wopajeryani, Muluku opattunxe erimu n’ilapo ya vathí”. (Maphattuwelo 1:1) Nuumala Muluku opattuxa miri ni axinama, owo aahaapattuxa apinaatamu oopacerya, Adamu ni Eva. Awosa yaari oovirikana ni axinama mwaha woowi apinaatamu anniwerya wooniherya mikhalelo sa Muluku, ohela muhina othanla mootaphuwa. Nto awosa yaanisuwela yaavara aya. Vaakhanle wira yaahimwiiwelela Muluku, awo yaamwiirela mpantta yoolakela Awe ntoko anamuyari oopacerya a emusi ya apinaatamu. Nave, yaamukhalana murettele, okumi woomalela mwa elapo ya vathi wa okathi woohimala.

Masi, nlaikha nimosa, naahiphavelasa enamuna yoowaarumeela apinaatamu mwaha wa soophavela sa nrima. Nlaikha nlo naahipakeya Satana, wala “Nwanani”. Orumeelaka enowa, Satana aahinwoka Eva, omuleelaka wira aarowa okhala saana akhala wira aamuhiya otthara malakiheryo a Muluku. Adamu ni Eva yaahimwiiwelela Satana, nto khuhonona opatthani waarina aya ni Mpattuxa aya. Mwaha wa othanla waya woohiloka, Adamu ni Eva yaahiyeleela okumi woohimala ni aaniraviha etampi, ohimalela ni okhwa.

Naananoru, Muluku aahihimya yoolakela awe wira olokiherye otakhala iwo ni aavahe anamwane a Adamu enamuna yoophwanya-tho okumi woohimala. Muluku aahihimya vahinatthi wira aamukhumelela “osùlu”, eyo piiyo, mutthu a vamekhawe, aarowa omunyaanya Satana ni omaliha ohaawa wotheene Satana, Adamu, ni Eva akumihenrye aya. (Maphattuwelo 3:15) Ti pani aarowa okhala “osùlu” aahimmwale? Nto okathi waarowa wooniherya.

Masi, Satana aahimananiha okhoottiherya wiiraneya wa yoolakela yooloka ya Muluku. Yoottheka ni atthu anci ootakhala yaahincerereya mowaakuveya. Muluku aahilakela omaliha otakhala iwe omuruuhaka mutaaseke. Owo aahimulakiherya naxariya Nowe wira oteke ekalawa, eyo piiyo, ekaaxa yuulupale yaaphempa wira oopowe yena ni emusi awe, ni axinama yaawo aaleeliwe awe wira aaaroihe mukalawani.

Nuuvira mwaakha mmosa vaapacenrya aya mutaaseke, Nowe ni emusi awe yaahikhumela vate va ekalawa nto khuphwanya olumwenku wooloka. Masi “osùlu” nlelo khaaphiyale.

—Mwaha ola onikhuma eliivuru ya Maphattuwelo ikapitulu 1-11; Yuda 6, 14, 15; Wisupulula 12:9.

[Elatarato epaaxina 4]