MWAHA WOOPACERYA | IHAPARI XEENI BIIBILIYA SIRINA AWE?
Muluku Oopaka Etthu Wira Owoopole Apinaatamu
Muluku aahimuleiherya mulipa-owaamini Abrahamu wira “osùlu” yoole aaleiheriwe, aarowa okhala osuulu awe. Orweela mwa yoowo, atthu a “maloko othene” yaarowa oreelihiwa. (Maphattuwelo 22:18) Muhoolo mwaya, Yakobe musulwaawe Abrahamu, aahithaamela wEjiitu, weiwo emusi awe yaattale aya ni khukhala nloko na Isarayeli.
Muhoolo mwaya, wEjiitu aahikhala Farawo ootakhala aapanke ipottha aIsarayeli mpakha okathi Muluku aamukumihenrye awe profeta Moise, yoowo aakuminhe elapo ele orweela wa miiriirya okawanyaka maasi a Ephareya Yooxeerya. Nuumala-vo, Muluku ahaavaha malamulo aIsarayeli, ohela muhina Sooruma 10, wira saalakiheryeke ni waakhapelela. Malamulo awo yaanihimya itthu soovaha wira atthu aleveleliwe soottheka. Uupuxeriwaka ni Muluku, Moise aahaahimeerya aIsarayeli wira Muluku aarowa waakumiherya eriyari aya profeta mukina. Profeta owo aarowa okhala “osùlu” waaleiheriwe.
Iyaakha sowiiraka 400 muhoolo mwaya, Muluku aahimuleiherya Mwene Davidi wira “osùlu” waahimmwale wEdeni, aarowa okhala namalamulela a Omwene woohimala. Owo aarowa okhala Mesiya, Moopoli oothanliwa ni Muluku wira owoopole apinaatamu ni ottikiherye eparayiisu valaponi.
Orweela wa Davidi ni maprofeta makina, Yehova aahooniherya itthu sikina voohimya sa Mesiya. Maprofeta awo yaahihimya vahinatthi wira Mesiya aarowa okhala oowiiyeviha ni ooreera murima; olamulela wawe waarowa omala-maliha otakhala ni ohixariya. Nave-tho apinaatamu yaarowa okhalana murettele mukina ni mukhwaawe vamosa ni axinama. iretta, ohaawa, ni okhwa, eyo piiyo, itthu sahiirela mpantta yoolakela yoopacerya ya Muluku, saarowa omala. Nto atthu akhwiiye yaarowa otthikela okhalana okumi valaponi.
Muluku aahimuhimeerya profeta Mikeya wira Mesiya aarowa oyariwa oBethelehemu, ni orweela wa Daniyeli aahihimya wira Mesiya aamwiiviwa. Masi Muluku aarowa omuhihimuxa Mesiya mookhwaani ni omuthanla ntoko Mwene wiirimu. Nave-tho, Daniyeli aahikhalana yowoonihiwa yaathonyerya wira Omwene wa Mesiya waarowa oranttela iguvernu sikina sotheene. Niireke tthiri Mesiya aahirwa ntoko saahimmwale aya vahinatthi?
—Mwaha ola onikhuma eliivuru ya Maphattuwelo 22-50, Okhuma, Otumererya, 2 Samuweli, Esalimo, Yesaya, Daniyeli, Mikeya, ni Zakariya 9:9.
[Ekaaxa epaaxina 5]
NSINA NOOTTEELA NA MULUKU
Moovarihana ni aBiibiliya anceene, nsina na Muluku, Yehova, ninnikhumelela ekwaha yoopacerya mwa yoolepa ya Maphattuwelo 2:4. Nsina nla navameekhaaya ninniphwanyaneya ikwaha soowiiraka 7.000 mwa nttaava noopacerya na iliivuru soolempwa ni matata sa Biibiliya. Nsina nlo nintaphulela wira “Owo Onniiriha Okhala”. Eyo ennikupaliha wira Muluku toosareya owerya ni onnaakhwaniherya soolakela sawe ni anatiri awe otheene.
[Elatarato epaaxina 5]
[Elatarato epaaxina 5]