MWAHA WOOPACERYA | IHAPARI XEENI BIIBILIYA SIRINA AWE?

“Nomphwanya Mesiya!”

Nuuvira iseekulu xexe vaavo yaalempwale aya eliivuru yookiserya ya eHeeberi, eprofesia ya Mikeya yaahiiraneya: tthiri Yesu aahiyariwa oBethelehemu. Nuuvira iyaakha soowiiraka 30, eyo piiyo, 29 E.C., mpantta woopacerya wa eprofesia ya Daniyeli voohimya sa orwa wa Mesiya waahiiraneya. Yesu aahibatiziwa, nto Muluku khumoottiha ni munepa wootteela. Mwa okathi yoowo, Mesiya yoole aalipeleliwa okathi munceene, eyo piiyo, Osuulu, aahiphiya!

Moohipisa, Yesu aahipacerya muteko awe “alaleyaka ehapari yorera y’omwene wa Muluku”. (Luka 8:1) Ntoko iprofesia saahimyale aya, Yesu aahooniherya okhala ooreera murima, oomoriwa ikharari, ni oowathokorerya akina mwekeekhai. Wiixuttiha wawe waari woovareleya muteko ni woophenta, ni owo aahaavoniha atthu ‘ikwerere saya sothene’, ooniheryaka wira Muluku ari ni yena. (Matheyo 4:23) Atthu a iyaakha sotheene yaanirwa omoona Yesu ni enahimya wira: “Nomphwanya Mesiya!”​—Yohani 1:41.

Yesu aahihimya wira ohinatthi Omwene awe opacerya olamulela moomalela, olumwenku waarowa okumanana ikhotto, ihasara sa ephattu, ni mixankiho sikina sowaatta. Owo ahaatumererya otheene wira ‘alipeleleke ahirupe’.​—Marko 13:37.

Yesu aari mulopwana oomalela aavikaninhe omwiiwelela Muluku, masi aahikhalana awanani yaawo yaamwiivale. Tthiri, okhwa wawe wooliverya moomalela ele Adamu ni Eva ayelenle aya: yoolipelela ya okumi woohimala oparayiisu.

Okhwa wa Yesu ohaakhwaniherya iprofesia, vaavo Muluku aamuhihimunxe awe Yesu ntoko yoopattuxiwa yoowerya yomunepani nuuvira mahiku mararu. Nuumala-vo Yesu aahikhumelela eriyari ya awiixutti awe oovikanaka 500. Ohinatthi orowa wiirimu, Yesu aahaaruma awiixutti awe wira yaahaana olaleya ihapari sooreera voohimya sa owo ni Omwene awe wa “atthu a maloko othene”. (Matheyo 28:19) Niireke awosa yaahivara moomalela muteko yaarummwale aya?

—Mwaha ola onikhuma eliivuru ya Matheyo, Marko, Luka, Yohani, ni 1 aKorinto.

[Elatarato epaaxina 6]