BIIBILIYA ONNIRUKUNUXA MIRIMA SA ATTHU

“Atthu Anceene Yaanikinyokha”

Yowiiraneya Elavuliwe ni Waldo Moya

MWAAKHA OYARIWE AWE: 1978

ELAPO OYARIWE AWE: oCHILE

MWAHA ENE: AARI MULIPA OOTAKHALA VANCEENE

MWEETTELO AKA WA KHALAI: Kinnunwe oSantiago, ekapitaali ya oChile, muttetthe yoowo atthu yaamakela aya olya murette woohapaliha, yaari aya ootakhala ni opaka ikrime. Kirina ene iyaakha 5, apaapa yaahiiviwa. Nuumala-vo, amaama yaanikhala hoothe ni mulopwana aari ootakhala. Owo aamakela onimana miyo ni amaama. Mpakha olelo-va, nkinliyala itthu soohiloka sa okathi ole.

Nto vaavo kannuwa aka, ni miyo kaahipacerya okhala mulipa ootakhala vanceene. Miyo kaaniwiriyana muusika heavy-metal, ohapaliwa, ni okathi mukina olya mirette soohapala. Miyo kaamakela owana mustaraatani ni egrupu ya alipa ootumiha mirette soohapala, yaawo ikwaha sikina yaaphavela okiiva. Okathi omosa, egrupu ekina yaahimuruma mulopwana ootakhala wira okiive, masi kaahitthyawa kirineene nikhwatta aakihomme awe. Nihiku nikina, egrupu ya alipa ootumiha mirette soohapala, yaaniphavela okoopela vamuru ni pistola.

Mwaakha wa 1996, kaahisiveliwa ni muthiyana mmosa Carolina, nto kimuthela eyaakha ya 1998. Nuumala oyariwa mwanihu mwaamulopwana oomwiixutta, kaahoova wira mweettelo aka ole, waarowa okiiriha waatakiha apaapa oohikiyara ni ohaaxa emusi aka. Nto kaahirowa nipuro ninkhaliheriwa atthu arina muupuwelo woohononeya. Kaahivahiwa murette ni nikhaliheryo, masi moohikhumela saana. Miyo kaanivikaniha onanariwa wa khula etthu ni nkaawerya wiihiiha. Nto kimananihaka wira kihiye ohaaxa emusi aka, kaahiphavela wiixiiva. Masi moohakalaliha, nkaawenrye opaka eyo.

Mwa iyaakha sinci, miyo nkaakupali wira Muluku ohaavo; masi kaaniphavela omukupali. Nto kaahipacerya weetta ekerexa evangélica. Okathi owo, amwaaraka yaanimusoma Biibiliya ni Anamoona a Yehova. Miyo kaanaanyokha Anamoona, ni ikwaha sinceene kaanaaveha. Masi awo yaanikithokorerya mwa murettele, moovirikana ntoko suupuwela aka.

Nihiku nlo, mwaaraka aahikivekela osoma Esalimo 83:18 mBiibiliyani mwaka. Eveersu eyo ennihimya saana wira nsina na Muluku ti Yehova. Kaahitikinihiwa osuwela wira etiini yeetta aka kaaniixutta sa muluku, masi ohiya Yehova. Nto wanipacerya wa eyaakha ya 2.000, ni miyo kaahipacerya omusoma Biibiliya ni Anamoona a Yehova.

MOOTA BIIBILIYA ORUKUNUNXE AWE OKUMI AKA: Vaavo kaarowa aka ohoolo, kaahihakalala wiixutta wira Yehova ti Muluku oomoriwa ikharari ni oolevelela. Mwa ntakiheryo, yoolepa ya Okhuma 34:6, 7, ennimuhimya Yehova okhala “Muluku òmoriwa ikharari ni òvilela, òpisa onanariwa, òrera murima ni òroromeleya. Miyo kinnarerela murima atthu n’an’aya n’osulu aya mpakha oholo onkelelahu; miyo kinnileva sottheka saya n’uhìwelela waya n’itampi saya”.

Hata vari siiso, khivaakhweya wiiwelela ele yiixutta aka. Kuupuwela wira nkaawerya-tho ohiya mweettelo aka wootakhala. Masi khula okathi kaatteettheya aka, Carolina aanikilipiha. Owo aanikuupuxerya wira Yehova onnoona wiimananiha waka. Nto kikhaliheriwaka ni mwaaraka, kaahiphwanya ikuru wira kivikanihe omuhakalaliha Yehova, hata ikwaha sinci, kuupuwela wira nkaawerya-tho.

Nihiku nikina, Alejandro, munna aakisomiha Biibiliya, aahikivekela omusoma aGalasia 5:22, 23. Iveersu iyo sinihimya wira yoowiima ya munepa wootteela ti “ophentana, otteliwa murima, murettele, ovilela, othunku, orera murima, ororomeleya, wiyeviha, wisumaliha”. Alejandro aahikitthokiherya wira wunnuuherya waka mikhalelo iya khahiyo waari mwaha wa ikuru saka, masi munepa wootteela wa Muluku. Ekeekhai eyo, yaahituruka muupuwelo aka moomalela!

Muhoolo mwaya, kaahirowa okongresuni muulupale a Anamoona a Yehova. Otthokiheya wa itthu, oreerihiwa wa mapuro ale, ni opatthani koonale aka waahikivara murima, ni waahikiiriha osuwela wira kaahiphwanya etiini ya ekeekhai. (Yohani 13:34, 35) Nto Feverero 2001, kaahibatiziwa.

MOOTA OTTOTTENLE AKA MUREERELO: Yehova oorukunuxa okumi aka wootakhala wira kikhale mutthu a murettele. Tthiri, kinnoona wira owo ookoopola wa mweettelo woohiloka waakivanre. Atthu anceene yaanikinyokha, masi awo kharina nthowa. Masi, vano kihaana murettele vaavo kinimurumeela aka Yehova hoothe ni amwaaraka ni anaaka axilopwana anli.

Amusi aka ni ale yaari apatthani aka, khanikupali moota kiwenrye aka orukunuxa mweettelo aka. Mwaha wa yeeyo, anceene a yaawo ahooniherya ophavela wiixutta ekeekhai. Nave-tho koophwanya eparakha ya waakhaliherya akina omusuwela Yehova. Nto kinnihakalala vanceene oweha ekeekhai ya Bibiliya erukunuxaka mirima saya!

[Elatarato epaaxina 12]

[Elatarato epaaxina 12]

[Eponto yuulupale ya epaaxina 13]

Koohakalala wiixutta wira Yehova ti Muluku oomoriwa ikharari ni oolevelela

[Elatarato epaaxina 13]

Onnikisivela owiixuttiha akina ele yiixuttale aka

[Elatarato epaaxina 13]

Hoothe ni emusi aka, kinnimurumeela Yehova mwa murettele