‘Mukhale Oowehaweha Mulompeke Orattene’
‘Mukhalaneke ankhili . . . oowehaweha ni mulompeke orattene’.—1 PED. 4:7.
MWAAROWA WAAKHULA SAI?
Inamuna xeeni sa mavekelo sinitthuneya anyu omakelaka opaka?
Xeeni maKristau vanitthuneya aya omakelaka ovekela?
Ti pani onittottela mureerelo okathi onaavekelela anyu akina?
1, 2. (a) Xeeni varya aya vootthuneya okhala oowehaweha niphavelaka ovekela? (b) Voohimya sa ovekela makoho xeeni anireerela ahu opaka?
“VAKELAKA oxa, ti okathi woovila ovikaniha okhala owehaweha ni ohirupa”, masu ala ahimmwale ni mulopwana mmosa aatonko ovara muteko ohiyu. Anamunceene avanre muteko ohiyu, annaakhulela masu ala. Makristau a vano anniwana ni muxankiho onilikana ni ikhove, okhala wira woophiya okathi woovila ovikana khalai, wa ohiyu woopisa oxa wa mukhalelo wootakhala wa Satana. (aRom. 13:12) Tthiri okathi ola wookiserya ti vootepa woopiha orupa! Tivonto varya aya vootthuneyexa ‘okhalana ankhili’ ni wiiwelela yootumererya ya Biibiliya yoowi ‘nikhaleke owehaweha ni nilompeke orattene’.—1 Ped. 4:7.
2 Mwaha woosuwela okathi onikhala ahu, ti vamiruku wiikohaka so: ‘Kinnivikaniha okhala owehaweha ni opaka mavekelo? Kiireke wira kinnipaka mavekelo a khula enamuna ni ovekela moohihiyererya? Kinnipaka okhala yoolema aka waavekelela atthu akina wala okhalawene mavekelo aka anihimya itthu siniphavela aka aahiso sinikithowa paahi? Voohimya sa woopoliwa waka, moota xeeni mavekelo aryaaya ootthuneya?’
OPAKA MAVEKELO A KHULA ENAMUNA
3. Inamuna xeeni sikina sa mavekelo?
3 Epaphelo Paulo aalepenle awe anna a wEfeso, owo aahilavula sa mavekelo a khula enamuna. (aÉf. 6:18) Khula okathi mavekelo ahu akhaleke oomuxonttela Yehova wira onikhaliherye ophwanya itthu sinnitthowa ni oxintta mixankiho. Muluku yoowo ‘oniwa mavekelo’, moophenta onrowa onaakhula okathi onimuxonttela ahu. (Esal. 65:3) Masi, nohaana-tho wiimananiha orumeela inamuna sikina sa mavekelo. Eyo enihela muhina mavekelo anittottopela, anixukhurela ni oxonttela.
4. Xeeni vanitthuneya ahu omuttottopela Yehova imaara sinceene?
4 Aakhala mathowa manceene anniiriha omuttottopela Yehova okathi onivekela ahu. Mwa ntakiheryo, hiyo ninnimuttottopela Yehova vaavo vanuupuwela ahu ‘miteko sawe sowerya’ ni waatta wa ikuru sawe. (Musome Esalimo 150:1-5.) Tthiri mwa Biibiliya mukina iverso thanu na mosa sa Esalimo 150 sinnitumererya ottottopeliwa Yehova ikwaha sowiiraka 13! Mwaha womoova Muluku, nasaalimu mukina iipale so: “Kinnotthapelani imara thanu na pili khula nihiku mwaha wa malamulo anyu a xariya”. (Esal. 119:164) Yehova tthiri onniphwanela ottottopeliwa. Nto niireke khivanireerela omuttottopela Yehova ni mavekelo ahu “imara thanu na pili”, niire so, imaara sinceene?
5. Onikhaliherya sai opaka mavekelo anooniherya oxukhuru?
5 Oxukhurela enamuna ekina yootthuneya ya mavekelo. Paulo aahatumererya maKristau oFilipe ariki: ‘Muhivelavelé mwaha w’etthu p’itthu. Masi okathi wothene, mmulompeke Muluku, munvekelaka itthu simphavelanyu; munvekeleke mmuxukhuruku’. (aFil. 4:6) Mavekelo anooniherya omuxukhurela Yehova anninikhapelela mwa sowoopiha sinceene. Opaka eyo ti vootthuneya okhala wira ninkhala mahiku ookiserya anamunceene arya aya ‘ohixukhuru’. (2 Tim. 3:1, 2) Tthiri munepa woohixukhuru woomwareela mulaponi motheene. Naahikhalane ephoole munepa owo pooti onipahula mowaakuveya. Okhala ooxukhurela ononiiriha otteeliwa murima ni ohikhala ‘alipa-owulumasa ni wapa’ mwaha wa mixankiho sahu. (Yuda 16) Tivonto, vaavo muhooleli a etthoko vanimuxukhuru awe Muluku, okathi woolompa ni emusi awe, owo onniwiixuttiha amwaarawe ni anaawe okhala ooxukhuru.
6, 7. Anitaphulela exeeni mavekelo a oxonttela ni myaha xeeni sikhanle ahu oomuxonttela Yehova?
6 Oxonttela enamuna emosa ya ovekela eniiriwa ni murima wotheene. Nto itthu xeeni sikhanle ahu oomuxonttela Yehova? Nihaana omuxonttela okathi onilupatthiwa ahu, wala akhala wira nirina oretta muulupale. Nto okathi owo, oveka wahu nikhaliheryo wa Muluku, onikhala woxonttela. Niireke okathi wa mixankiho paahi, tonireerela omuxonttela Yehova?
7 Nrowe nthokorerye nivekelo na ntakiheryo na Yesu, wira noone ele yaahimyale awe, sa nsina na Muluku, Omwene ni yootthuna Awe. (Mmusome Matheyo 6:9, 10.) Olumwenku ola woosareya itthu sootakhala, ohiya-vo, iguvernu sa apinaatamu khinniwerya waavaha ale anaalamulela aya itthu sotheene sinaathowa. Tivonto nihaana ovekelaka wira nsina na Tiithi ahu a wiirimu nitteelihiwe, nto Omwene awe, omala-malihe olamulelo ola wa Satana valaponi. Ola okathi woomuxonttela Yehova wira otthuna wawe wiireye valaponi ntoko siniireya aya wiirimu. Nto nrowe nivikanihe okhala owehaweha nirumeelaka khula enamuna ya mavekelo.
MMAKELEKE OVEKELA
8, 9. Xeeni vahinreerela ahu wuupuwelaka wira Pedru ni arummwa akina yaawo yaavariwe ikhove ojardim ya oJeseemani yaari alolo?
8 Nnaamwi murummwa Pedru aatumerenrye maKristau wira ‘akhaleke owehaweha ni alompeke oratteene’, owo mmensawe ahooceela mukwaha mmosa. Owo aari mmosa mwa awiixutti yaale yaarumpe okathi Yesu aavekela awe ojardim wa oJeseemani. Nnaamwi Yesu aaloponle wira ‘alipeleleke ni olompa moohihiyererya’, awiixutti ale khiyaawenrye opaka eyo.—Mmusome Matheyo 26:40-45.
9 Ohiya wuupuwelaka wira Pedru ni arummwa akina yaari alolo, vaamureera wuupuwela wira awo yaahikhulumuwa mwaha wa muteko munceene waavanre aya vahinatthi wiila. Awo yaahimulokiherya Paasikha yoole yaamwinre aya emakaaripi yeele. Nuumala-vo, Yesu aahipaka Yoolya ya Apwiya mukwaha woopacerya, ovahaka ntakiheryo wa atthareli awe a muhoolo yaarowa wuupuwelaka okhwa wawe. (1 aKor. 11:23-25) ‘Vano, yahipa isipo sa Pásika, numala yahivenya, enarowa o mwako Olivera’, yeettaka mukwaha woorakama iphiro soophunyeya sa oYerusalemu. (Math. 26:30, 36) Owehasa wene okathi ole wira ovinre ene ohiyu eriyari. Vaakhanle wira hiyo naari ojardim ya oJeseemani ohiyu ole, woonasa wene naanvariwa ikhove. Tivonto, ohiya waapwapwela awiixutti ale yaavoliwe ikhove, Yesu moophenta aahimmye so; ‘munepa ti wolipa masi erutthu khelimpe’.
10, 11. (a) Etthu xeeni Pedru aixuntte awe mwa ele yaamwiiranenle ojardim wa oJeseemani? (b) Exeeni eniixutta anyu mwa ele yaamwiiranenle Pedru?
10 Etthu yaamwiiranenle Pedru oJardim wa oJeseemani yaahimwiixuttiha etthu yuulupale masi mwa enamuna yoowereya. Ohinatthi ophiya okathi ole, Yesu aahihimya ariki: ‘Otthene anyu munokwattuliwa ohiy’ula mwaha wa miyo’. Okathi owo Pedru aahaakhula wira “othene yakwattuliwa mwa nyuwo nto miyo nkinkwattuliwa!” Yesu ahaakhula wira Pedru aarowa omukhootta ikwaha tthaaru. Onvanyihaka Yesu Pedru aakhunle so: “Nnari! Nkinorunani, mpakha okhwa ni nyuwo!” (Math. 26:31-35) Hata aahimmye siiso, Pedru aahitteettheya ntoko saahimmye awe Yesu. Oxankaleene mwaha woomukhoota Yesu ekwaha yookiserya, Pedru “ahikhumela otá, khunla ìniwene murima”.—Luka 22:60-62.
11 Tthiri Pedru aahiixutta etthu mwa ele yaamwiiranenle, nto khumala-maliha wiiroromela wawe. Woonasa wene nivekelo naahimukhaliherya Pedru mmwaha ola. Tivonto vanimureerela aya Pedru ovaha miruku sini: ‘Mukhaleke oowehaweha mulompeke oratteene’. Niireke hiyo niniiwelela miruku iyo sa Biibiliya? Nto niireke ninnivikaniha ovekela wira nooniherye omuroromela wahu Yehova? (Esal. 85:9) Nihiliyale yoolopola ya Paulo eni: “Siso, ole onona wira orimwemela, aipasope wira ahimore”.—1 aKor. 10:12.
MAVEKELO A NEHEMIYA YAHAAKHULIWA
12. Xeeni Nehemiya okhanle awe ntakihelo nooloka wa hiyo?
12 Nthokorerye ntakiheryo na Nehemiya yoowo aanvahererya soowurya mwene ooPersia, Artaserse eseekulu 5 AEC. Nehemiya oovaha ntakiheryo nooloka na mutthu onipaka mavekelo mooluttuweliwa. Owo aahiviriha mahiku manceene ‘otthukwaka ni omulompaka Muluku’ mwaha wa mixankiho sa aYuda oYerusalemu. (Neh. 1:4) Nuumala Artaserse omukoha etthu yaamwiirinhe oriipiwa murima, nto owo ‘ahimulompa Muluku a wirimu’. (Neh. 2:2-4) Nto aakhuliwe sai? Yehova aahaakhula nivekelo na Nehemiya, nto khwaakhaliherya atthu awe. (Neh. 2:5, 6) Yoowiiraneya ela yaahilipiha nroromelo na Nehemiya!
13, 14. Nipakeke exeeni wira nivikanihe olipiha nroromelo nahu ni omukhoottela Satana yoowo oniphavela ohonona ororomela wahu?
13 Omakela ovekela ntoko siirale awe Nehemiya, onoolipiha nroromelo nahu. Satana khonnoonela othunku, ikwaha sinceene onnituphela okathi yoole onitteettheya ahu. Mwa ntakiheryo, vaavo vaniwereiwa ahu wala owanana oriipiwa wahu murima, hiyo pooti woonaka wira Muluku khonivaha efaita okathi oniviriha ahu nilaleeryaka khula mweeri. Akina mwa hiyo, aniwana ni muupuwelelo woohiloka, waaniheryasa mwaha wa itthu siiranen’ye khalai. Satana oniphavela onikupaliha wira hiyo khanirina efaita wa Muluku. Ikwaha sinceene yoolukama ya Satana ori ohonona muupuwelo ahu wira otteettheihe ororomela wahu. Nto nakhala oowehaweha ni ophavela olompa, ororomela wahu onoolipa. ‘Nikula nowisakiha ori wamini, nnowerya ottipiha matthere a moro anvonyiwa ni mutakhali’.—aÉf. 6:16.
14 Nakhala ‘[owehaweha] ni olompa orattene’, khaninrowa omora hata neehereriwaka mootutuxerya. Okathi onniphwanya aya soweeha, nuupuweleke ntakiheryo na Nehemiya, nto moohipisa ninvekeleke Muluku wira onikhaliherye. Nikhaliheriwaka ni Yehova ti vanrowa ahu owerya okhoottela soweeha ni ovilela itthu sinittetteiha waamini wahu.
MWAAVEKELELEKE ATTHU AKINA
15. Makoho xeeni anitthuneya ahu opaka voohimya sa waavekelela akina?
15 Yesu ahinvekelela Pedru wira waamini wawe ohihononeye. (Luka 22:32) MuKristau oororomeleya a eseekulu yoopacerya iitthaniwa Epafra, aahimutakiha Yesu mmwaha ola, vaavo aamananiha awe waavekelela anna awe oKolosi. Paulo aalempe so: ‘Owo khanihiya wolompelani mahiku othene ni murim’awe wothene, wira muhihiye wamini wanyu, mukhalé aKristu òmalela ni òlikanene wettela otthuna wothene wa Muluku. (aKol. 4:12) Hiyo-tho nnimwiira saana wiikoha so: ‘Kiireke kinnimananiha waavekelela anna aka ari ilapo sotheene? Ikwaha kavi kinaavekelela aka anna anihaawa mwaha wa ihasara sa ephattu? Kikisenrye silini waavekelela anna yaale arina miritti suulupale munikhuuruni nootthokiheya na Yehova? Mahiku ala kiireke kootoko waavekelela anna a muloko aka aniwana ni mixankiho?’
16. Niireke mavekelo ahu mmureerelo wa akina annikhaliherya tthiri? Mutthokiherye.
16 Onvekela wahu Yehova Muluku, mmureerelo wa atthu akina, onnikhaliherya tthiri. (Mmusome 2 aKorinto 1:11.) Nnaamwi Yehova ohikhanyereriwaka waakhula mavekelo mwaha woovekeliwaka ikwaha sinceene ni arumeyi awe anceene; masi eyo ennimwiiriha woona oxanka waya ni ophavela waya ni murima wotheene waakhuliwa. Tivonto nihaana woonaka okhala eparakha ni muritti wootepexa otthuneya orina ahu wa waavekelela atthu akina. Ntoko Epafra nihaana wooniheryaka waaphenta wahu ni murima wotheene anna ni arokora, niimananihaka waavekelela. Opaka eyo onnincererya ohakalala wahu, okhala wira ‘Mulipa-ovaha [onnihakalala] onvikana mulipa-òwakhela’.—Mit. 20:35.
‘WOOPOLIWA WAHU ORI VAKHIVIRU’
17, 18. Okhala oowehaweha niphavelaka olompa onrowa onikhaliherya sai?
17 Paulo ahinatthi ohimya wira ‘ohiyu wovira, onnatamela oxá’, owo aalempe so: ‘Nyuwo mosuwela okathi ula onettahu. Wophiya okathi w’omwarexa ikhove, okhala wira wopowa ori vakhiviru, ovikana okathi opajenryahu wamini’. (aRom. 13:11, 12) Tthiri elapo esya elaiheriwe ni Muluku eri vakhiviru, nto woopoliwa wahu ori vakhiviru ovikana ele enuupuwela ahu. Tivonto nihirupe omunepani ni niheemye wira itthu sa mulaponi saakanyerye okathi ahu wookhala ekhihu wira nimulompe Yehova. Ohiya-vo nrowe, nikhale oowehaweha niphavelaka olompa. Opaka eyo onooniiriha ovara saana miteko sowaarya ni omurumeela saana Muluku, vaavo vaniwehererya ahu nihiku na Yehova. (2 Ped. 3:11, 12) Makhalelo ahu ahaana wooniheryaka wira khanirumpe omunepani ni wira tthiri ninnikupali wira omala wa makhalelo ala a itthu ori vakhiviru. Nto ‘nilompeke vohihiyererya’. (1 aTes. 5:17) Nihaana-tho omutakiha Yesu niphavelaka opuro wookhala ekhihu wira nivekele. Akhala wira ninnimakela omulompa Yehova, owo onrowa onaattamela. (Yak. 4:7, 8) Tthiri eyo enrowa okhala mareeliho maalupale!
18 Soolempwa sinihimya so: ‘Yesu, okathi akhalawe vathí-va, ahivekela akhuwelaka, anlaka vanjene, anvekelaka Muluku, yole awerya omwakiherya okhwá. Muluku ahimwakhulela mwaha wo wiwelela wawe’. (aHéb. 5:7) Yesu aahivekela, oxonttela ni okhala oororomeleya wa Muluku mpakha wanikisa wa okumi awe valaponi. Tivonto Yehova aahimoopola Mwanawe oophentiwa wuukhwaani, khunvaha ekumi ehinikhwa wiirimu. Ntoko Yesu, hiyo-tho vanniweryaneya okhala oororomeleya wa Tiithi ahu a wiirimu, nnaamwi nirowaka okumanana soottehatteha sa khula enamuna muhoolo. Tthiri nnoowerya ophwanya okumi woohimala akhala wira ninnivikaniha okhala oowehaweha niphavelaka olompa.
[Elatarato epaaxina 3]
[Elatarato epaaxina 5]
Nnaamwi Pedru aatteetthen’ye, owo aahiixutta okhala oowehaweha ophavelaka olompa (Nwehe ittima 10, 11)
[Ilatarato siri epaaxina 6]
Okhala oowehaweha niphavelaka olompa onooniiriha oxintta mixankiho sinceene (Nwehe ittima 13, 14)