YOWIIRANEYA YA MWEEKUMINI

Hiyo Noophwanya Muteko Wootepexa Ohakalaliha

Elavuliwe Ni David Ni Gwen Cartwright

OKATHI miyo ni Gwen naarina ahu iyaakha 5, naahipacerya wiixutta wiina. Nlelo khinaasuwelana. Okathi wainnuwa ahu, khula mmosa aahipaka yoothanla ya omwiina balé ekumi ahu yotheene. Nto vaavale vaapacenrye ahu okhumela saana muteko ole woomwiina balé, naahilakela ohiya muteko ahu ole. Exeeni yaaniirinhe opaka yoothanla eyo?

David: Miyo kiyariwe mwaakha wa 1945 muttetthe wa Shropshire, wInglaterra. Paapa aka aahikhalana ematta ota wa epooma ele. Nookhuma oxikola waanikisivela ohelela ilyakhu, ottottela mooce, okhapelela inyompe ni ipwittipwitthi. Okathi waakhuma aka ifeeria oxikola, kaanikhaliherya muteko wa ohepha, okathi mukina kaaneettiha itratoore.

Yookhala etthu ekina yookisevela yaakhumelenle mweekumini mwaka. Paapa aka aahoona wira nlelo kiri mwaana waanikisivela wiina, nave kaaniini khula nipuro kiiwa aka muusika. Nto okathi waarina aka iyaakha 5, apaapa yaahaaruma amaama wira akirowane exikola yiixuttiha wiina. Mwiixuttihi a exikola ele ahoona wira miyo kanwerya wiixutta omwiina balé, nto aahipacerya okiixuttiha mwiinelo owo. Kirineene iyaakha 15, kaahithanliwa wira kasomeke exikola yuulupale eniireliwa Royal Ballet School oLondres. Nto naahisuwelana ni Gwen, okhala wira taarowa wiinaka ni miyo.

Gwen: Miyo kiyariwe epooma yuulupale ya oLondres mwaakha wa 1944. Nlelo kiryeene mwaaruusi, kaanimwaamini vanceene Muluku. Kanimananiha omusoma Biibiliya aka, masi vaanikivila omwiiwexexa. Nlelo kirineene iyaaka 5, kaahipacerya wiixutta wiina. Nuuvira iyaakha 6, kaahikanyari ovathaana waakhumelenle wa wiina wa atthu otheene a elapo ele, nto mutthu aakanyari aanirowa osoma nipuro naaxuttihiwa anamwane wiina The Royal Ballet School. Exikola eyo yaari nipuro nenne nniireliwa White Lodge, nenno naari empa yooreerexa ya Georgian mansion ya Richmond Park oLondres. Nipuro nle kaanisoma oxikola ni kaaniixuttihiwa wiina ni maprisoori oovuwa. Okathi kaarina aka iyaakha 16, kaahipacerya osoma ni atthu aalupale a The Royal Ballet School yeeyo yaari variyari va oLondres, nto kaahikumana ni David. Muhina mwa myeeri vakhaani naaniina hoothe mapuro yiiniwa balé ni opera oRoyal Opera House ni oCovent Garden, oLondres.

David: Ntoko Gwen sihimyale awe muteko ahu wa wiina waahinipixa mapuro oovuwa ntoko Royal Opera House vamosa ni London Festival Ballet (nenno olelo nniireliwa English National Ballet). Prisoori mmosa a oRoyal Ballet, aahikhalana ekompaniya ya ilapo sinceene, nto khonithanla wira niroweke navareke muteko wa wiina nipuro nniiriwa Wuppertal, wAlemanha. Okathi waavara ahu muteko wa wiina naahirowa mapuro manceene oovuwa ni naanivara muteko vamosa ni atthu oovuwa ntoko Dame Margot Fonteyn ni Rudolf Nureyev. Muteko ole waavara ahu waahiniiriha opacerya okhala atthu oowiitthuna, nto naanivara muteko niphavelaka ovuwa wahu paahi mwaha wa muteko ole waavara ahu.

Gwen: Muupuwelo ni erutthu aka yotheene kaahivahererya mmutekoni wa wiina. David ni miyo naaphavela okhala atthu ootepexa ovuwa. Hiyo waaninisivela waasinari nsina nahu naavekeliwaka ni atthu, waakhela ifilori, ni owiiwa atthu anoopelaka ikuphi moonitthapela. Ntoko siniiraya atthu anceene anivara miteko iya, miyo kaaroromela ehirisi kaarina aka yeeyo yaakiphwanyiha eparakha. Ohiya-vo, khula okathi kaakhala ni atthu oohisuumaaliha, yaampaha soona ni anamuhapaliwa.

OTURUKEYA WA OKUMI AHU MOOMALELA

David: Nuuvira iyaakha sinceene kivaraka muteko wa wiina, kaahivela omakela weetana maala. Okhala wira nkinnuwenle opooma, yaahipacerya okinkhela ekumi ele yoohattiheriwa itthu ya omatta. Nto mwaakha wa 1967, kaahihiya muteko ole wa wiina, kinapacerya ovara muteko empresa emosa yuulupale yaari waattamela nipuro naakhala anamuyari aka. Mwaneene ematta ele ahikaalugariha empa yaamukhaani. Nto kaahimulikarela Gwen, oryeene omutekoni wawe kimurya wira kimuthele. Okathi ole Gwen wira ovahiwe ene eparakha ekina ya wiina ya vasulo ovikana ele yaarina ahu, nto vaahimuxankiha opaka yoothanla ele. Hata vari siiso, owo ahaakhulela wira nithelane, nto ahiirwa okhala ni miyo omatta weiwe nnaamwi ahaasuwela ovara miteko sa mmatta.

Gwen: Tthiri vaari voovila olimalela makhalelo a omatta. Owama nipele na inyompe, ohelela ikuluwe ni ilyakhu yaari etthu kahatonko aka wuupuwela wira kanvara mweekumini mwaka. David aahirowa omwiira kursu a myeeri 9 nipuro naasoma alimi wira wiixutte inamuna sa naanano, nto miyo kaahihala meekhaaka othana wotheene mpakha ohiyu vaarwa awe owaani. Okathi owo naahimuyara mwanihu oopacerya mwaamuthiyana Gilly. David aahikilakiherya wira kiixutte weettiha ekaaro, nto nihiku nimosa kaahirowa epooma yaari vakhiviri, khikumaana ni Gael. Miyo kaanimusuwela khalairu okathi aavara awe muteko elooxa emosa ya muttetthe ole.

Gael mooreera murima aahikilattula wira kirowe owanyawe nawurye exa. Nto aahikooniherya ifootu sa ekasamento awe, masi yookhala efootu yaawoniherya atthu aryeene nipuro nniireliwa Empa ya Omwene. Nto kaahimukoha wira ‘ela etiini ya enamuna xeeni’? Nuumala okihimeeyra wira owo ni iyawe yaari Anamoona a Yehova, kaahitteeliwa murima vanceene. Kaahuupuwela wira amurokoraya apaapa yaari Namoona. Kaahuupuwela-tho moota apaapa yaananariwe aya ni oriha iliivuru sa amurokoraya ale, saamuthokiherya Biibiliya. Nave kaahitikinihiwa nthowa naamwiirinhe paapa aka yoowo aari mutthu oopatthaneya okhala wene, onanariwa moota ole ni atthu ale oreera murima.

Tthiri ele yaari eparakha aka ya osuwela nthowa niiriha sookupali sa anaakhe ale okhala soovirikana ni sa itiini sikina. Gael aahikooniherya ele Biibiliya oniixuttiha awe tthiri. Nto kaahisiveliwa woona wira sowiixuttiha sinceene ntoko ele enihimya wira amuluku ari araru, wira mutthu khonikhwa moomalela, saari itthu sahaphwanyaneya mBiibiliyani. (Mus. 9:5, 10; Yoh. 14:28; 17:3) Kaahoniheriwa-tho nsina na Muluku, Yehova, mBiibiliyani ekhwaha yoopacerya.​—Okhum. 6:3.

David: Gwen aahikihimeerya itthu saaxuttale awe. Nto kaahuupuwela wira paapa aka khalai aahikihimeerya wira mwanaka musome Eliivuru Yooloka. Nto hiyo naheemererya omusoma Biibiliya ni Gael ni iyawe Derrick. Nuuvira myeeri 6 naahithaamela muttetthe wa Oswestry, nlelo elapo yeele ya Shropshire, okhala wira kaahivahiwa eparakha ya waalugari ematta emosa yaamukhaani. Nuuphiya mapuro ale, Deirdre, Namoona aakhala mapuro ale, moopixa murima aahiniixuttiha Biibiliya. Wanipacerya naanipisa orowa vahoolo. Okhala wira okhapelelala inama sahu waaniniyerya okathi munceene. Masi vakhaani-vakhaani ekeekhai yaninnuwa vamurimani vahu.

Gwen: Muxankiho muulupalexa waarina ahu ti oxintta woova ethiru. Yoolepa ya Yesaya 65:11 yaahikikhaliherya woona moota Yehova siniwoonela awe ale ‘aniwapèla yolya amuluku’ a eparakha. Nto waahivira okathi ni kaahipaka mavekelo manceene wira kihiye waaroromela amuluku a eparakha ni ihirisi saka. Osuwela wira “ole onisinnuwiha, onoyevihiwa, ole onìyeviha, onottittimihiwa”, waahikhaliherya waasuwela atthu aneemereriwa ni Yehova. (Math. 23:12) Tthiri kaaphavela omurumeela Muluku onnivaha efaita mpakha onivaha Mwanawe ntoko yowoopola. Okathi ole niira nimuyanre ene mwaana mukina mwaamuthiyana, nto vaari vootteeliha murima osuwela wira emusi ahu yanwerya okhala voohimya valaponi.

David: Okathi waiwexenxe aka waakhwanela wa iprofesia suulupale sa mBiibiliyani ntoko ele eri va Matheyo ekapitulu 24 ni eliivuru ya Daniyeli, kaahipacerya woona wira kaahiphwanya ekeekhai. Kahoona wira khiivo etthu ekina erina efaita yuulupale elapo ela ohiya okhalana ompatthani wooloka ni Yehova. Nuuvira okathi kaahipacerya ovukula wiitthuna waka. Kaahixutta wira amwaaraka ni anaaka yaahikhalana efaita yuulupale ntoko yeele yaarina aka. Yoolepa ya aFilipi 2:4, yaahikikhaliherya wira miyo kihiphaveleke mureerelo aka paahi, ntoko ematta yuulupale yaaphavela aka okhalana. Ohiya-vo kahaana ohela omurumeela waka Yehova nipuro noopacerya mweekumini mwaka. Nto kaahihiya omulya soona. Masi opaka marehereryo wira nirowe omuthukumanoni saapakiwa eSaabadu makaaripi nipuro naarakamenle ahu etthu yowiiraka ikhiloomu 10, vaari voovila okhala wira okathi omosaru naahana owama nipele na inyompe. Masi, Gwen aahikikhaliherya wira nihicompe mithukumano, ni khinaacompela waakuxa aniihu ale nirowanaka muteko woolaleerya Ettiminku voosiisu, nuumala owama nipele na inyompe.

Amusi ahu khiyaasiveliwe ni murukunuxo ole naapanke ahu. Paapa awe Gwen aahihiya olavula ni mwanawe iyaakha 6. Anamuyari aka nave yaaheererya onikhoottiherya weetta ni Anamoona a Yehova.

Gwen: Yehova aahinikhaliherya okathi ole wooxankiha. Nto okathi waavira awe, anna ni arokora a muloko wa Oswestry yaahikhala amusi ahu asya, moophenta yaahinikhaliherya okathi ole wooxankiha. (Luka 18:29, 30) Naahivahererya ekumi ahu wa Yehova nto khubatiziwa mwaakha wa 1972. Kaahiphavela ovara muteko munceene wira kaakhaliherye atthu anceene wira yiixutte ekeekhai, nto kaahikela epioneero.

KOOTTHUVELIWA NI MUTEKO MUKINA WOOTTEELIHA MURIMA

David: Iyaakha saavara ahu muteko mmatta saaninikhulumula; okathi omosaru nahaana waavaha ntakiheryo nooloka aniihu. Nuuvira okathi, mwaha wa guvernu othoiwa musurukhu, nahoomoliwa mmatta mme. Okathi owo khinaarina empa hata muteko ni mwanihu a neeraru aarina eyaakha emosa paahi, nto naaninvekela Yehova wira onikhaliherye. Nto naahilakela orumeela itthu saasuwela ahu, khuthukula exikola yiixuttiha wiina wira niphwanye musurukhu woowiikhaliheryana. Wiimananiha wahu ohela nipuro noopacerya itthu sa Muluku waahikumiherya mireerelo sooloka. Vootteliha murima aniihu aararu yaahikela muteko wa opioneero noomaliha exikola. Gwen aahikela epioneero, nto owo aaniwerya waakhaliherya aniihu ale khula nihiku.

Nuumala aniihu, Gilly ni Denise otheliwa, hiyo naahithukwa exikola ahu ele ya wiina. Naahilepela epaphelo ofiliyaali wira nisuwele nipuro naakhanle ahu oorowa ovara muteko. Awo yaahinilakiherya wira nahaana orowa ipooma sa mpantta onikela nsuwa wa wInglaterra. Okathi waahalanne ahu mwaana mmosa paahi, Debbie, miyo kaahikela epioneero nave. Nuuvira iyaakha thanu naahivekeliwa wira nakhaliherya muloko mmosa mpantta onikhuma nsuwa. Nuumala Debbie otheliwa, hiyo naahikhalana eparakha ya oviriha iyaakha 10 nivaraka muteko wa oteka ipa ilapo sinceene ntoko oZimbabwe, oMoldávia, oHungria ni oCosta do Marfim. Nuumala-vo naahitthikela wInglaterra orowa okhaliherya otekiwa wa eBetheli ya oLondres. Mwaha wa osuwela waka ovara miteko sa mmatta, kaahithanliwa wira kakhaliherye miteko sa ematta ya oBetheli yaalimmwa okathi ole. Vano nnivara muteko wa pioneero mpantta onikhuma nsuwa wa wInglatera.

Gwen: Muteko waathanlale ahu wanipacerya, eyo piiyo, omwiina balé, waari wooloka masi khaarowa opisa omala. Muteko ahu wa nenli ni wootepexa otthuneya ti wiivahererya wahu wa Yehova, ni wooniruuhela ohakalala wuulupale ni ohinimala. Mahiku ala ohiya wiina hoothe nnivara muteko woolaleerya hoothe. Waakhaliherya atthu wiixutta ekeekhai enoopola ekumi, wooniruuhula ohakalala wuulupale ohinikontareya. Atthu awo anikhala mwa ‘ipaphelo’ sinnihimya okhala oofai, ti suulupale ovikana khula ovuwa wa mulaponi. (2 aKor. 3:1, 2) Vakhanle wira khiniixuntte ekeekhai, olelo-va naarowa ohalana mmuupuweloni paahi itthu sotheene, ifootu sa khalai, ni iprograma sa mapuro naarowa ahu wiinaka khalai.

David: Omurumeela Yehova wookumiherya murukunuxo muulupale mweekumini mwahu. Eyo yookikhaliherya olokiherya makhalelo aka ntoko mulopwana oothela ni tiithi ooloka. Biibiliya onnihimya wira Miryamu, Mwene Davidi ni akina yahooniherya otteeliwa waya murina yiinaka. Vano hiyo ni atthu akina, ninniwehererya okathi onirowa ahu wiina vootteeliwa murima elapo esya ya Yehova.​—Okhum. 15:20; 2 Sam. 6:14.