YOWIIRANEYA YA MOOKUMINI

Koophwanya Etthu Yootepa Oreera Ovikana Ovuwa

Elavuliwe ni Mina Hung Godenzi

Ohiyu omosa eyaakha ya 1984, okumi aka waahiturukeya khukhala mutthu oovuwa. Kaahivahiwa nsina noowi Muthiyana oovuwa oHong Kong. Efootu aka yaanikumiheriwa ipaaxina soopacerya sa irevista ni ijornale. Miyo kaaniipa, wiina, olavula myaha sa mulaponi, olattuliwa iprograma sa TV, owara ikuwo sa musurukhu, ni weetta ni atthu oovuwa, ntoko guvernatoro oHong Kong.

Nuuvira eyaakha emosa, kaahipacerya opaka ifilme, nto ikwaha sinci kaanihoolela. Majornalista yaaniphavela okisuwela; alipa yaakumiha ifootu yaaniphavela okikumiha ifootu; atthu yaanikilattula mapuro otheene yaakumiheriwa wala ovahereriwa itthu isya; nave kaanilattuliwa olya yoolya ya othana ni ya ohiyu ya vameekhaaya. Kaari mutthu oovuwa vanceene!

Vakhaani-vakhaani kaahoona wira itthu iye khisaarina efaita ntoko kuupuwela aka. Ifilme sinceene kiirela aka mpantta saaniwaniwa ni saari sowoopiha. Atthu yaapaka ifilme sa oHong Kong khiyaapakelela itthu ntoko atthu oHollywood siniira aya. Nto miyo kaahaana opaka itthu sowoopiha, ntoko ovira vasulu va ekaaro kinwenle ene moota. Ifilme sinci sooniherya orupihana woohiloka, owali ni okhwiri.

Eyaakha ya 1995, kaahitheliwa ni namakumiherya a ifilme. Nnaamwi kaarina itthu sotheene, ntoko ovuwa, muhakhu, ni iyaka aakiphenta, ikwaha sinceene nkaahakalala ni kaaniriipiwa murima. Nto kaahilakela ohiya opaka ifilme.

WUUPUWELELA ONAMWANE AKA

Kaahipacerya wuupuwelela waamini kaarina aka kiryeene mwaaruusi. Okathi ole, khuta eSaabadu miyo ni muhima aka naanixukurya emusi ya Anamoona a Yehova. Tiithi a emusi eyo, Joe McGrath aanaasomiha Biibiliya anaawe araru axithiyana hoothe ni hiyo. Emusi eyo yaari yoophenta, nto “Joe yoowo aari ntoko taata ahu”, aanaattittimiha amwaarawe ni anaawe. Nave, naanirowa hoothe omithukumanoni sa eKristau. Ikwaha sikina naanirowa mithukumano suulupale. Okathi ole waanikisivela maana kaanihakalala ni Anamoona a Yehova.

Masi vatthokoni va anamuyari aka saanikhumela itthu soohiloka. Mweettelo wa apaapa waanahaaxa amaama, nto nuuvira okathi amaama yaahiriipiwa murima vanci. Kirina ene iyaakha 10, amaama yaahihiya othukumana ni Anamoona. Miyo kaahivikaniha omusoma Biibiliya ni khubatiziwa kirina ene iyaakha 17. Masi moohipisa, kaahihiya mweettelo weeKristau ni wiirela mpantta muloko.

KAAHILAKELA OTTHIKELA MMULOKONI

Nuumala otheliwa, axitokweene anli Anamoona a Yehova a muttetthe waakhala aka, yaahikixukurya. Awo yaahikitthokiherya moota wootthikela wa Yehova. Yaahipaka mareheryo wira misionaaria aitthaniwa Cindy, akikhaliherye. Okhala wira kaahihiya waamini waka, nto kaahinvekela wira akooniherye wira tthiri Biibiliya ti Nuulumo na Muluku. Owo aahikooniherya moota iprofesia sa Biibiliya siiraneyale aya. Vakhaani-vakhaani naahikhala apatthani. Owo aahikivekela osoma hoothe sowiixuttiha soopacerya sa Biibiliya nto kaaheemya. Okathi owo, kaahoona wira Yehova ti Muluku oophenta ni oniphavela wira kihakalaleke.

Okathi kaatthikenle aka orowela mithukumano sa eKristau, kaahoona wira vaanikisivela wiiraana ni Anamoona waavikana atthu yaapakana aka ifilme. Itthu saakiranenle onamwane aka saahikiiriha wiixoona ohikhalana efaita ni ohimuroromela mutthu. Masi, murokora a mmulokoni aahikikhaliherya vaavo aakoonihenrye awe mBiibiliyani moota woomaliha mixankiho sa mmuupuweloni; nave kaahiixutta waapaka apatthani eekeekhai.

ETTHU YOOTEPA OREERA OVIKANA OVUWA

Eyaakha ya 1997, miyo ni aiyaka naahithaamela oHollywood, Califórnia, EUA. Vaanikisivela waakhaliherya atthu osuwela Nuulumo na Muluku. Nto omwiixuttiha Biibiliya wookiphwanyiha ohakalala wuulupale ovikana ovuwa kaaphwanya aka kipakaka ifilme. Mwa ntakiheryo, eyaakha ya 2002, kaahikumana ni Cheri yoowo aari mpatthani aka khalai oHong Kong. Okumi ahu waamulikana mwa inamuna sinci. Owo aahithanliwa okhala Muthiyana oovuwa oHong Kong nuuvira eyaakha emosa vaavo kaathanliwe aka nave. Okathi kaaxinttale aka, owo taakiwarinhe ekhara ya etthuvo. Nave-tho Cheri aanikumiherya ifilme, nto muhoolo mwaya aanipaka ifilme iyo ni ahooleli oovuwa. Nto owo aahithaamela oHollywood.

Kaahimonela othunku Cheri okathi kaasuwenle aka wira ole aarowa okhala iyawe aahikhwa mwaha wa oretta wa murima. Etiini awe ya eBudista khiyanvanhe nimaaliho. Ntoko miyo, owo aahiphwanya ovuwa, ni aanikhaleliwa ehace ni atthu akina; masi aaniriipiwa murima ni khaamuroromela mutthu. Kaahipacerya omuleela itthu sa mBiibiliyani kaixuntte aka, masi mahuweliwo awe a eBudista yaaniiriha itthu okhala soovila.

Nihiku nimosa eyaakha ya 2003, Cheri aahikiligarela oryeene oVancouver, Canadá, weiwo aapaka awe efilme. Owo khaareere ohakalala maana aahikileela wira aaneettiha ekaaro ni aahitikinihiwa vaavo aawehale awe mapuro oovirikana; nto aahinvekela Muluku wira: “Xontte, nyuwo ti pani? Nsina nanyu tani?” Okathi owo, aahivira Empa ya Omwene ni khuweha nsina na Yehova. Nto aahoona wira Muluku aahimwaakhula, ni moohipisa aaniphavela ovaanela ni Anamoona. Kaahipaka mareheryo, nto nuuvira mahiku vakhaani owo aahirowela mithukumano sa nttaava na echina muloko wa Vancouver.

Muhoolo mwaya, Cheri aahikihimeerya so: “Atthu ala tthiri annikiphenta. Miyo pooti waaleela ele eri vamurimani vaka”. Kaahihakalala vanci wiiwa siiso, maana okathi Cheri aapaka awe ifilme, khaatonko okhalana apatthani. Owo aahivikaniha orowa omuthukumanoni. Masi eyaakha ya 2005, aahimwaasinari kontrato oopaka ifilme piili oChina sooniherya itthu sa khalai, nto aahitthikela oHong Kong. Moohakalaliha, eyaakha ya 2006, Cheri aahiivahererya wa Yehova ni khubatiziwa wAsembeleyani a Anamoona, oHong Kong. Nnaamwi aaphavela omurumeela Yehova moomalela, muteko awe waanimuxankiha, nto khaahakalala.

OHAKALALA MWAHA WOWAAKHALIHERYA AKINA

Eyaakha ya 2009, makhalelo a Cheri yaahiturukeya. Wira omurumeeleke Yehova moomalela, Cheri aahihiya opaka ifilme. Aahaapaka apatthani anceene asya mmulokoni. Owo aahikhala namalaleerya a okathi wotheene a ihapari sa Omwene, ni waanimusivela waakhaliherya atthu osuwela enamuna yooloka ya okumi.​—Matheyo 24:14.

Nto Cheri aahilakela wiixutta nttaava na eNepales wira aakhaliheryeke atthu yaalavula nttaava nlo oHong Kong. Atthu anceene a oNepal yaakhala oHong Kong, yaanithanyiwa mwaha wa ohisuwela saana Englexi ni eChina, ni okhalana soolema soovirikana. Cheri aahikileela moota aahakalanle awe mwaha wowaakhaliherya atthu awo omwiiwexexa Biibiliya. Mwa ntakiheryo, nihiku nimosa okathi aalaleerya awe khula empa, aahimphwanya muthiyana a oNepal, yoowo aasuwela itthu vakhaani voohimya sa Yesu, masi ahaamusuwela Muluku, Yehova. Cheri aahimooniherya mBiibiliyani wira Yesu aaninvekela Tiithi awe a wiirimu. Okathi muthiyana ole oonale awe wira anwerya onvekela Muluku eekeekhai, Yehova, aaheemya ihapari sooreera. Moohipisa aiyawe ni anaawe yaahipacerya-tho omusoma Biibiliya.​—Esalimo 83:19, BE; Luka 22:41, 42.

Vaavo kaamoona aka Cheri ohakalalaka mwaha wa muteko woolaleerya wa okathi wotheene, miyo kaahiikoha so: ‘Exeeni enikikhoottiherya omutakiha Cheri?’ Nto, kaahitthikela oHong Kong. Kaahilakela olokiherya okumi aka wira kiviriheke okathi munceene kiixuttihaka ekeekhai ya mBiibiliyani. Kihoona wira waawiriyana atthu ni waakhaliherya omwiiwexexa Biibiliya, onnikiphwanyiha ohakalala wekeekhai.

Mwa ntakiheryo, koowerya omusomiha Biibiliya muthiyana mmosa a elapo ya oVietnã yoowo aamakela oriipiwa murima ni wunla. Vano muthiyana owo, ookhalana moonelo wooloka wa okumi ni onnimusivela othukumana ni muloko.

Miyo ni Cheri noophwanya etthu yootepa oreera ovikana ovuwa. Nnaamwi opaka ifilme yaari etthu yookuxa murima ni yaaniphwanyiha ovuwa, owiixuttiha atthu voohimya sa Yehova Muluku, teri etthu yootepexa ohakalaliha maana enninvuwiha Muluku. Tthiri ninnoona wiiraneya wa masu a Yesu ani: “Mulipa-òvaha onoreriwa onvikana mulipa-òvahiwa”.​—Miteko 20:35.

[Eponto yuulupale epaaxina 10]

Kihoona wira waawiriyana atthu ni waakhaliherya omwiiwexexa Biibiliya, onnikiphwanyiha ohakalala wekeekhai