Mwaatakiheke Maprofeta—Yoweli
1. Ninrowa otakiha sai wiiyeviha wa Yoweli vaavo ninlaleerya ahu?
1 Ti pani aari profeta Yoweli? Owo onihimya wira aari “mwana a Petuweli”. (Yow. 1:1) Profeta ola oowiiyeviha aahittittimiherya ihapari sa Yehova, ohiya muteko awe ntoko profeta. Moolikanasa, okathi woolaleerya hiyo khanniphavela wiivuwiha wala ottittimihiwa, masi nimphavela onvuwiha Yehova ni Biibiliya. (1 aKor. 9:16; 2 aKor. 3:5) Nave, ninniphwanya ikuru orweela mwa ihapari ninlaleya ahu. Nto, itthu xeeni sa eprofesia ya Yoweli sinrowa oniiriha okhala ooluttuweliwa ni okhalana nlipelelo olelo-va?
2. Waattamela wa nihiku na Yehova, ohaana oniirihaka opaka exeeni?
2 ‘Nihiku na [Yehova] Niri Vakhiviru’. (Yow. 1:15): Nnaamwi moolumo ala alempwale ene khalai, hiyo ninkhala okathi eprofesia ela enimaliheriwa aya. Itthu soohiloka siniiraneya, ohicaleliwa ni oveehiwa ninkumana ahu mmuttettheni mwahu, sinnooniherya saana wira mahiku ookiserya a olumwenku ola wootakhala aaphiya. (2 Tim. 3:1-5; 2 Ped. 3:3, 4) Nto, vaavo ninweha ahu wira wanikisa onnaattamela, nihaana opakaka khula etthu wira nipacerihe muteko woolaleerya mookumini mwahu.—2 Ped. 3:11, 12.
3. Xeeni olaleerya oryaaya wootepa otthuneya vaavo nnaattamela ahu maxakha maalupale?
3 Yehova ‘ti Ntthyawelelo n’Atthu Awe’. (Yow. 4:16): Othukumela onihimmwa eveersu ela, onitaphulela maphukelo a Yehova okathi wa maxakha maalupale. Hiyo ninnihakalala mwaha woosuwela wira Yehova onrowa owoopola arumeyi awe oororomeleya okathi owo. (Wis. 7:9, 14) Nto, vaavo ninluttuweliwa ahu olaleerya ni woona moota Yehova onnikhaliherya awe ni onivaha ikuru, ninnilipiha nroromelo nahu ni ovilela weiwo onrowa onikhaliherya okathi wa maxakha maalupale anaattamela.
4. Xeeni vanitthuneya ahu ohakalala ni olipelelaka itthu sa muhoolo ni nroromelo?
4 Nnaamwi atthu akina ahimyaka wira ihapari sa Yoweli ti sooriipiha murima, iyo sinnaavaha arumeyi a Muluku yoolipelela yoohakalaliha ya woopoliwa. (Yow. 3:5) Nto, nrowe nilipeleleke itthu sa muhoolo moororomeleya ni oluttuweliwa olaleya ihapari sooreera sa Omwene wa Muluku niiwelelaka moolumo a Yoweli 2:23, yaawo ani: “Mutteliweke murima, mutthapeke mwaha wa sorera siniwirelayani Apwiya Muluku anyu”.