Nyuwo Mwaanisuwela?

Khalai atthu yaapattiha sai mooro okathi yeetta aya mukwaha?

MAPHATTUWELO ekapiitulu 22, Biibiliya onihimya wira Abrahamu aheetta mukwaha woottaiva wira avahe mukuttho. Nto Biibiliya onihimya so: “Abrahamu ahikuxa ikhuni sakelawe otetherya, khumureya mwan’awe Isakhi. Owo mwanene ahikuxa moro ni mwalo, khíyarowa hothe”.​—Maphattuwelo 22:6.

Biibiliya khonitthokiherya moota atthu yaapattiha aya mooro khalai. Nto niireke Abrahamu ni Isakhi yaapattinhe mooro aneettana? Mulipa-ootokosa myaha sa Biibiliya onihimya wira woonasa wene khivaaweryaneya mooro ovikaniha “opatta mukwaha ole woorakama”. Nto, woonasa wene Abrahamu ni mwanawe yaahikuxa itthu yaarowa aya opattihana mooro.

Masi, atthu akina anihimya wira khalai waanivila opattiha mooro. Nto akhala wira vaaniweryaneya, mutthu aanivala mooro etthoko yoowaattamela wira apattihe mooro awe. Asomi anceene anihimya wira Abrahamu aahikuxa mooro ohinatthi okhuma owaani. Owo aapwenhe mmwaapuni yoowo waatthukeleliwa mukhoi onateexa okathi eetta awe mukwaha. (Yesaya 30:14) Nuumala-vo, woonasa wene aahirumeela makhala awo a mooro ni matakwarikhwa wira opattihe mooro.