Qoronttoosa Asaassi Xaafettida Naaꞌꞌanttoogaa
2 Taani haranttuwa inttekko biyo wode inttena azzanttennaadan maacaas. 2 Ayssi giikko, taani inttena ubbaa azzanttikko, tana ufayssana danddayiyay oonee? Taani azzanttidoogeetu xalaala. 3 Taani kase xaafidobaa xaafaas; hegaappe denddidaagan, taani inttekko biyo wode etan ufayttana bessiyogeetun azzanikke; tana ufayssiyabay inttena ubbaakka ufayssanaagaa ammanettays. 4 Ayssi giikko, taani ta wozanan keehi waayettayddanne unꞌꞌettaydda, qassi daro afuxxaydda intteyyo xaafaas; shin taani inttena ay keena siiqiyakko intte eranaadan xaafaasippe attin, inttena azzanttanawu xaafabeykke.
5 Ooninne azzanttikko, ay keena gidikkokka, inttena ubbaa azzanttiisippe attin, tana azzanttibeenna. Shin ha yohuwa daro minttanawu koyikke. 6 Intte giddoppe daroti he bitaniya seerido seeray awu gidana; 7 Intte wozanappe ayyo atto gaananne A minttettana koshshees; yaatikko, I keehippe azzanidi hidootaa qanxxenna.* 8 Hegaa gishshawu, intte A siiqiyogaa bessanaadan taani inttena zorays. 9 Qassi intte ubbaban azazettiyogaa bessanaakkonne eranawu gaadakka xaafaas. 10 Intte aybakka atto giyo urawu taanikka atto gays. Taani atto giidobaa aybanne (taani aybakka atto giidaba gidikko) intte goꞌettana mala Kiristtoosa sinttan atto gaas, 11 yaatiyogee nuuni Seexaanan cimettidi xoonettennaadaana; ayssi giikko, nuuni A hiillata* loytti eroos.
12 Taani Kiristtoosabaa mishiraachchuwa yootanawu Xiroꞌaada gakkin Godaa oosuwan taayyo penggee dooyettido wode, 13 taani ta ishaa Tiita demmabeenna gishshawu, hirggaa aggana danddayabeykke. Hegaa gishshawu, eta saro deꞌite gaada Maqidooniya baanawu denddaas.
14 Shin Kiristtoosa kaalliya nuna olan xooni simmiya wotaaddaratudan ubba wode kaalettiya Xoossawu galatay gido; qassi I sawuwa tonggu giya ba eraa nuuni ubbasaa gattanaadan* oottees! 15 Kiristtoosabaa awaajjiya nuuni Xoossaayyo sawuwa tonggu giyabaa mala; he peenoy attanaageetukkokka xayanaageetukkokka gakkees; 16 hegee xayanaageetussi hayquwadan peenotees,* qassi hayquwawu gattees; attanaageetussi deꞌuwadan sawees, qassi deꞌuwawu gattees. He haggaazawu giiga asi oonee? 17 Nuna; ayssi giikko, nuuni hara daro asatuugaadan Xoossaa qaalaa bayzziyageeta* gidokko, shin nuuni Xoossay kiittin, Kiristtoosa kaallidi Xoossaa sinttan geeshsha wozanaappe yootoos.