Yohaannisi Beꞌido Ajjuutaa
8 I laappuntto maatafaa denttiyo wode, bagga saate gidiyagaa saloy sirphphi giis. 2 Taani Xoossaa sinttan eqqiya laappun kiitanchchata beꞌaas, qassi etayyo laappun malkkatati imettidosona.
3 Tonggu giyabaa cuwayiyo worqqa miishshaa oyqqida hara kiitanchchay yiidi yarshshiyosan eqqiis, qassi araataa sinttan deꞌiya, worqqaappe oosettida yarshshiyosan, geeshshatu ubbaa woosay siyettiyo wode yarshshana mala, ayyo daro tonggu giyabay imettiis. 4 Geeshshatu woosay siyettiyo wode tonggu giyabaa cuway kiitanchchaa kushiyappe Xoossaa sintti pude kiyiis. 5 Shin sohuwara kiitanchchay tonggu giyabaa cuwayiyo miishshaa ekkidi, yarshshiyosaappe amarida tamaa an kunttiisinne saꞌan oliis. Qassi dadaa gunttaynne haasayettiyabay siyettiis, wolqqanttay wolqqammiisinne biittay qaaxxiis. 6 Qassi laappun malkkatata oyqqida laappun kiitanchchati punnanawu giigettidosona.
7 Koyroogee ba malkkataa punniis. Yaatin, suuttaara walahettida shachchaynne tamay saꞌan wodhdhiis; saꞌaappe heezzaappe issi kushee xuugettiis, mittaappe heezzaappe issi kushee xuugettiisinne maata ubbaappe heezzaappe issi kushee xuugettiis.
8 Naaꞌꞌantto kiitanchchay ba malkkataa punniis. Qassi eexxiya wogga dere milatiyabay abban wodhdhiis. Abbaappe heezzaappe issi kushee suutta gidiis; 9 qassi abbaa giddon paxa deꞌiya* meretatuppe heezzaappe issi kushee hayqqiis, hegaadankka, markkabetuppe heezzaappe issi kushee meqqiis.
10 Heezzantto kiitanchchay ba malkkataa punniis. Yaatin, xomppiyadan eexxiya wogga xoolinttee saluwappe wodhdhidi, shaafatuppe heezzaappe issi kushiyaninne haattaa pulttotuppe heezzaappe issi kushiyan wodhdhiis. 11 He xoolinttiya sunttay Cuqqunniya. Qassi haattaappe heezzaappe issi kushee cuqqunne kiyiis; haattay cammidoogaappe denddidaagan daro asay hayqqiis.
12 Oyddantto kiitanchchay ba malkkataa punniis. Qassi awa ayfiyappe heezzaappe issi kushee, aginaappe heezzaappe issi kusheenne xoolinttetuppe heezzaappe issi kushee xumiis; hegaappe denddidaagan, gallassaappe heezzaappe issi kushee, hegaadankka, qammaappe heezzaappe issi kushee dumꞌꞌiis.
13 Qassi taani hagaa beꞌaas: saluwan* paalliya issi argganttay ba qaalaa xoqqu oottidi hagaadan giyogaa siyaas: “Bantta malkkataa elle punnana hara heezzu kiitanchchati punniyo wode hananabaappe denddidaagan saꞌan deꞌiyageetuyyo aayye, aayye, aayye!”