Yohaannisi Beꞌido Ajjuutaa
11 I hagaadan giishin adussa xamꞌꞌa* milatiya maqay taayyo imettiis: “Baada, geeshsha sohuwa,* yarshshiyosaanne yan goynniyageeta likka. 2 Shin deretuyyo imettido gishshawu, geeshsha sohuwappe karen deꞌiya, dirssa gidduwa agga baya, likkoppa, qassi eti geeshsha katamaa bantta tohuwappe garssan 42 aginawu yedhdhana. 3 Taani ta naaꞌꞌu markkati 1,260 gallassaa waaruwa maayidi taani erissidobaa yootanaadan kiittana.” 4 Hageeti naaꞌꞌu wogaraa mittatanne xomppiya wottiyo naaꞌꞌu miishshata, qassi eti saꞌaa Godaa sinttan eqqidosona.
5 Ooninne eta qohanawu koyikko, eta doonaappe tamay kiyidi eta morkketa mees. Ooninne eta qohanawu koyikko, A hegaadan worana bessees. 6 Eti Xoossay erissidobaa yootiyo gallassatun ay irinne bukkenna mala saluwa gorddiyo wolqqay etayyo deꞌees, qassi haattaa suutta kessanawunne saꞌaa bosha ubban koyidoogaa keenaa darotoo qohanawu etayyo wolqqay deꞌees.
7 Eti markkattidi wurssido wode, xaha ollaappe kiyida doꞌay etaara olettidi xoonananne eta worana. 8 Qassi eta anhati gita katamaa wogga ogiyan zinꞌꞌana; eta Godaakka mittan kaqqidi worido Sadoominne Gibxxee he katamaa gishshaa eqqiyageeta. 9 Qassi asa sheeshshaappe, yaraappe, doona* ubbaa haasayiya asaappenne dere ubbaappe daro asay heezzu gallassanne baggaa eta anhata beꞌana, qassi anhata moogennaadan eti diggana. 10 Eti hayqqido gishshawu, saꞌan deꞌiyageeti miiddinne uyiiddi ufayttana; Xoossay erissidobaa yootiya ha naaꞌꞌati saꞌan deꞌiya asaa barchchiya bessido gishshawu, eti issoy issuwawu imotaa kiittana.
11 Heezzu gallassanne baggaappe guyyiyan, Xoossay kiittido deꞌuwa ayyaanay etan gelin, eti shuttu giidi eqqidosona; yaatin, eta beꞌidaageeti keehippe yayyidosona. 12 Qassi saluwappe gunttidi haasayiiddi eta, “Haa kiyite” yaagiyogaa siyidosona. Yaatin, eti shaaraa giddoora saluwa biidosona, qassi eta morkketi eta beꞌidosona.* 13 He saatiyan biittay wolqqappe qaaxxiis, qassi katamaappe tammaappe issi kushee laalettiis; hegaa bolli, biittay qaaxxin 7,000 asay hayqqiis, qassi attidaageeti yayyidosonanne saluwa Xoossaa bonchchidosona.
14 Aayye giido naaꞌꞌanttoogee aadhdhiis. Hekko! Heezzanttoogee elle yiiddi deꞌees.
15 Laappuntto kiitanchchay ba malkkataa punniis. Yaatin, saluwappe hagaadan giidi gunttidi haasayishin siyaas: “Saꞌaa kawotettay nu Godaa Kawotettaanne A Kiristtoosaagaa gidiis, qassi I meri merinawu kawo gididi haarana.”
16 Xoossaa sinttan bantta araatatun uttida 24 cimati gulbbatidi Xoossaayyo hoolidosona;* 17 eti hagaadan giidosona: “Haꞌꞌi deꞌiya, kasekka deꞌida, ne Wolqqawu Zawi Baynna Xoossawu Yihoowa,* neeni Kawoy ne gita wolqqan haariyogaa doommido gishshawu, nuuni nena galatoos. 18 Shin dereti hanqqettidosona; yaatin, ne hanqqoy yiis, qassi hayqqidaageetuyyo pirdday imettana malanne neeni erissidobaa yootiya ne aylletussi, geeshshatussinne ne sunttawu yayyiya guuttatussikka gitatussikka neeni woytuwa immana mala, qassi saꞌaa bashshiyageeta bashshana* mala keerettida wodee gakkiis.”
19 Xoossaa geeshsha sohoy* saluwan dooyettiis, qassi taani A geeshsha sohuwan A maachchaa saaxiniya beꞌaas. Hegaa bollikka, wolqqanttay wolqqammiis, daday guummiis, biittay qaaxxiisinne wolqqaama shachchay shacciis, qassi taani haasayaa siyaas.