Yohaannisi Beꞌido Ajjuutaa
22 Qassi I Xoossaa araataappenne Dorssaa araataappe kiyidi goggiya, burccukkuwadan qulxxuxxa deꞌo haattaa shaafaa tana bessiis; 2 shaafay katameeyyo wogga ogiya gidduwa duge goggees. Layttan layttan 12too ayfiya deꞌuwa mittati shaafaa doonan naaꞌꞌu ginan deꞌoosona. Qassi mittatu bonccoti dereta pattoosona.
3 Qassi hagaappe guyyiyan qanggetti deꞌenna. Shin Xoossaa araataynne Dorssaa araatay he kataman deꞌana, qassi A aylleti ayyo geeshsha haggaazaa haggaazana; 4 hegaa bollikka, eti A somꞌꞌuwa beꞌananne eta somꞌꞌuwan A sunttay xaafettana. 5 Qassi hagaappe guyyiyan qammay deꞌenna; Xoossay Yihoowi* eta bolli pooꞌissiyo gishshawu, xomppiya pooꞌoy woy awaa pooꞌoy etayyo koshshenna, qassi eti kawo gididi meri merinawu haarana.
6 I taayyo hagaadan giis: “Ha qaalati ammanttiyabanne tuma; ee, mata wode haniyogee attennabata ba aylleta bessanawu, I erissidobaa yootiyageeta odissida Xoossay Yihoowi* ba kiitanchchaa kiittiis. 7 Hekko! Taani elle yaana. Ha maxaafan deꞌiya, Xoossay erissido qaalata naagiya ooninne ufayttees.
8 Hageeta siyidaageenne beꞌidaagee tana Yohaannisa. Taani eta siyidonne beꞌido wode, hageeta tana bessiya kiitanchchaayyo goynnanawu A tohuwa matan gulbbataas. 9 Shin I taayyo hagaadan giis: “Nena yeꞌꞌe! Agga! Nenadan, qassi Xoossay erissidobaa yootiyanne ha maxaafan odettidabata naagiya ne ishatudan taanikka aylle. Xoossaayyo goynna.”
10 I qassikka taayyo hagaadan giis: “Keerettida wodee matido gishshawu, ha maxaafan deꞌiya, Xoossay erissido qaalata attamada gorddoppa. 11 Suurenna asi kaseegaadankka suuroppo, qassi tunabaa oottiya asi kaseegaadankka tunabaa ootto, shin suurebaa oottiya asi kaseegaadankka suurebaa ootto, qassi geeshshabaa oottiya asi kaseegaadankka geeshshabaa ootto.
12 “ ‘Hekko! Taani elle yaana; taani ubbawu A oosuwadan oosuwadan zaarada woytuwa immanawu giiga uttaas. 13 Taani koyroogaanne wurssettaagaa, doomettaanne wurssettaa, Alifaanne Omeegaa.* 14 Bantta maayuwa meecciyageeti ufayttoosona; eti yaatiyo gishshawu, penggetuura katamaa gelana mala deꞌuwa mittatu ayfetuppe miyo maati etayyo deꞌana. 15 Kanati,* iita ayyaanatuura gayttiyageeti, pokkiya tuna nagaraa* oottiyageeti, shemppo woriyageeti, eeqiyageeti, qassi worddotiyogaa dosiyageetinne worddotiyageeti karen deꞌoosona.’
16 “ ‘Taani, Yesuusi, galchchatussi gaada hageeta neeyyo markkattana mala ta kiittanchchaa kiittaas. Taani Daawita xaphuwanne zerettaa, qassi taani pozhzhayiya bakkaaliya.’ ”
17 Ayyaanaynne mishira maccaasiya awudekka, “Haa ya!” yaagoosona, qassi siyiya ooninne, “Haa ya!” yaago, qassi saamettiya ooninne yo; deꞌuwa haattaa koyiya ooninne coo ekko.
18 “Ha maxaafan deꞌiya, Xoossay erissido qaalata siyiya ubbawu taani markkattays: Ooninne hageetu bolli gujjikko, Xoossay ha maxaafan xaafettida boshata A bolli yeddana; 19 qassi ooninne ha maxaafan deꞌiya, Xoossay erissido qaalatuppe aybanne diggirggikko, Xoossay ha maxaafan xaafettidabatuppe, hegeekka, deꞌuwa mittatuppenne geeshsha katamaappe A basuwa ekkirggana.
20 “Hageeta markkattiyagee, ‘Ee, taani elle yaana’ yaagees.”
“Aminꞌꞌi! Godaa Yesuusaa haa ya.”
21 Laggetiyabi baynna Godaa Yesuusa kehatettay geeshshatuyyo gido.