Qoronttoosa Asaassi Xaafettida Koyroogaa

5 Intte giddon pokkiya tuna nagaraa* oottiya asi deꞌiyogaa siyaas, hegaa mala pokkobay* haray atto hara biittaa asaa giddonkka baawa; I ba aawaa machcheera deꞌees.* 2 Yaatin hegee intte ceeqettiyobee? Intte azzanana koshshennee? Qassi intte hegaa mala nagaraa oottida asa intte giddoppe kessana koshshennee? 3 Taani inttenaara deꞌennaba gidikkonne, qofan* inttenaara deꞌays, qassi taani inttenaara deꞌiyabadan hegaa malabaa oottida bitaniya bolli pirddaychchaas. 4 Nu Godaa Yesuusa sunttan intte issippe shiiqiyo wode, taani ta qofan,* qassi nu Godaa Yesuusa wolqqay inttenaara deꞌiyogaa eridi, 5 Godaa gallassi galchchaa ayyaanay qohettennan attanaadan, he bitanee galchchaa shaallidobay xayana mala, intte A Seexaanaassi aattidi immana bessees.

6 Intte ceeqettiyogee loꞌꞌo gidenna. Guutta irshshoy munaqan ubbasaa gakkiyogaa erekketii? 7 Intte giddon irshshoy deꞌana bessenna gishshawu, intte ooratta munaqa mala gidanaadan, irshshuwa intte giddoppe kessite. Ayssi giikko, Kiristtoosi nuussi Paasikaa dorssa gididi ba deꞌuwa yarshshiis. 8 Hegaa gishshawu, nuuni iitatettaanne nagaraa bessiya irshshuwara baalaa bonchchana bessenna. Shin loꞌꞌobaanne tumubaa bessiya, irshshoy baynna oyttan bonchchana bessees.

9 Intte pokkiya tuna nagaraa* oottiyageetuura zuppetiyogaa* agganaadan, taani intteyyo kiittido dabddaabbiyan xaafaas; 10 hegee pokkiya tuna nagaraa* oottiya woy yaarettiya woy bonqqiya woy eeqawu goynniya ha saꞌaa asaappe mule shaahettite giyogaa gidenna. Yaaniyakko, intte ha saꞌaappe kiyiichchana bessees. 11 Shin pokkiya tuna nagaraa* oottiya woy yaaretiya woy eeqawu goynniya woy cayiya woy mattottiya woy bonqqiya, isha geetettiya oonaaranne zuppetiyogaa* intte agganaadan haꞌꞌi intteyyo xaafays; he bitaniyara haray atto qumaakka mooppite. 12 Ayssi giikko, Galchchan deꞌennaageetu bolli pirddanawu tana gattiyabi baawa. Galchchan deꞌiyageetu bolli intte pirddekketii? 13 Galchchan deꞌennaageetu bolli Xoossay pirddees. “Iitabaa oottida bitaniya intte giddoppe kessite.”