Pheexiroosi Xaafido Naaꞌꞌanttoogaa
1 Yesuus Kiristtoosa aylleenne I kiittidoogee, taani Simoon Pheexiroosi, nu Xoossaa xillotettaaninne nuna ashshiya Yesuus Kiristtoosaagan nuugaadan geeddari baynna tumaa ammanidaageetuyyo* hagaa xaafays:
2 Xoossaanne nu Godaa Yesuusa intte geeshshi eridoogan, Xoossay intteyyo laggetiyabi baynna kehatettaanne sarotettaa gujjanaadan woossays; 3 ba gitatettaaninne loꞌꞌotettan nuna xeegida Xoossaa geeshshi eriyogaappe denddidaagan, deꞌanawunne awu ammanettanawu nuuyyo koshshiya ubbabaa I ba wolqqan immiis.* 4 I geeddari baynna keehi gita anjjota ba gitatettaaninne loꞌꞌotettan nuuyyo immiis;* yaatin, iita amoy* ayfido, ha saꞌaa asay haniyo moorobaappe intte hegeetun kessi ekkidi Xoossaagaadan ayyaana gidana danddayeeta.
5 Hegaa gishshawu, intte ammanuwan loꞌꞌotettaa, intte loꞌꞌotettan eraa gujjanawu wozanappe baaxetite; 6 qassi intte eraa bolli inttena naagiyogaa, inttena naagiyogaa bolli genccaa, intte genccaa bolli Xoossawu ammanettiyogaa, 7 intte Xoossawu ammanettiyogaa bolli ishanttudan gomppan mishettiyogaa, intte ishanttudan gomppan mishettiyogaa bolli siiquwa gujjanawu wozanappe baaxetite. 8 Ayssi giikko, hageeti inttenan deꞌiyabanne korettiyaba gidikko, nu Godaa Yesuus Kiristtoosa geeshshi eriyogaara gayttidaagan intte oottiyoban azalla woy ayfennaageeta* gidennaadan inttena naagana.
9 Hageeti baynna ooninne pooꞌuwa beꞌanawu koyenna gishshawu qooqe,* qassi I kase oottido nagaraappe geeyidoogaa dogiis. 10 Simi ishatoo, intte xeegettidonne doorettido maataa mintti oyqqanawu yaa gujji baaxetite; ayssi giikko, intte ubbatoo hageeta oottikko, mule kunddekketa. 11 Intte yaanidi, nu Godaanne nuna ashshiya Yesuus Kiristtoosa merinaa Kawotettaa geliyo gita anjjuwa* ekkana.
12 Hegaa gishshawu, intte hageeta eriyabanne intte eriyo tuman minni eqqidaba gidikkonne, taani awudekka hageeta inttena hassayissanawu koyays. 13 Shin taani ha dunkkaaniyan* deꞌiyo wode, inttena hassayissiyogan denttettiyogee bessiyaba gaada qoppays; 14 nu Goday Yesuus Kiristtoosi taayyo qonccissidoogaadan, ha dunkkaanee mata wode kichchanaagaa taani erays. 15 Taani ba simmin intte hageeta hassayanawu* danddayana mala, taani awudenne tawu danddayettida ubbabaa oottana.
16 Nu Goday Yesuus Kiristtoosi ay keena gitakko beꞌidappe attin, coo medhdhi yootiyo worddobaappe nuuni A wolqqaanne I simmidi nunaara takkiyo wodiya intteyyo erissibookko. 17 Ayssi giikko, Xoossay Aaway, gita bonchchuwaway, “Hagee ta Naꞌaa, taani siiqiyogaanne tana ufayssiyagaa” giya ha qaalata ayyo yootido wode, A bonchchiisinne xoqqu xoqqu oottiis. 18 Ee, nuuni aara geeshsha deriyan deꞌiyo wode he qaalati saluwappe yiishin siyida.
19 Xoossay odissido ubbabay polettanaagaa nuuni mintti ammanidoy hegaassa, qassi xuman pooꞌissiya xomppiya (saꞌay wonttananne bakkaalee kiyana gakkanaashin) wochchiyogaadan, hegeeta intte wozanan wochchiyogan loꞌꞌobaa ootteeta. 20 Ayssi giikko, intte koyro hagaa ereeta; Geeshsha Maxaafan Xoossay odissidoban asa qofappe pulttidabi aybinne baawa. 21 Ayssi giikko, Xoossay erissidobay asa shenen odettido wodee baawa, shin Xoossaappe yiidabaa asati geeshsha ayyaanay kaalettin* yootidosona.