Qoronttoosa Asaassi Xaafettida Naaꞌꞌanttoogaa
9 Geeshshata maaddiyogaara* gayttidabaa taani intteyyo xaafana koshshenna; 2 ayssi giikko, Akaayiyan deꞌiyageeti issi layttawu giigi uttidoogaa Maqidooniyan deꞌiyageetuyyo taani ceeqettada yootido gishshawu, intte maaddanawu koyiyogaa erays, qassi intte maaddanawu yeemottiyogee eta giddon darota denttettiis. 3 Shin taani he ishata haꞌꞌi kiittays; hegaa gishshawu, nuuni intte kehatettaabaa ceeqettiyogee hada attenna, qassi taani yootidoogaadan intte giigi uttana. 4 Hankkoode, Maqidooniyan deꞌiya ishati tanaara inttekko bin, intte giigi uttana xayikko, nuuni inttenan ceeqettido gishshawu yeellatana, qassi inttekka yeellatana. 5 Hegaa gishshawu, intte kehatettan immana giidoogaa kasetidi giigissana mala, he ishati taappe sinttawu baanaadan eta minttettana koshshiyogaa qoppaas; yaatikko, hegee giddin intte immiyoba gidennan, kehidi immiyo imotadan giigi uttana.
6 Shin hegaara gayttidaagan, guuttaa zeriya uri guuttaa cakkana, shin daruwa zeriya uri daruwa cakkana. 7 Xoossay ufayttidi immiya ura siiqiyo gishshawu, asi ubbi ba wozanan maacidoogaadan immoppe attin, koyennan* woy giddin immoppo.
8 Hegaa bollikka, Xoossay laggetiyabi baynna ba kehatettan intteyyo zawi baynnaagaa kehana danddayees; hegaa gishshawu, intteyyo koshshiyabay awudenne paccenna, qassi loꞌꞌo ooso ubbawu koshshiya darobay intteyyo deꞌana. 9 (Hegee, “I daro imotaa* immiis; I hiyyeesatuyyo immiis. A xillotettay merinawu deꞌees” geetettidi xaafettidaagaadaana. 10 Zeriyagawu zerettaa, qassi maanawu qumaa koridi immiya Xoossay zeranawu intteyyo daro zerettaa immana, qassi I intte xillotettaa ayfiya gujjana.) 11 Intte ubba ogiyan kehatettan immana mala, Xoossay inttena ubbaban anjjees, qassi nuuni hegaadan kehiyogee asay Xoossaa galatanaadan oottees; 12 harata hegaadan maaddiyogee* geeshshatussi koshshiyaban eta maaddiyogaa xalaala gidennan, he maaduwappe denddidaagan daroti Xoossaa galatanaadankka oottees. 13 Intte maadoy intte ay mala asakko bessiyo gishshawu, intte awaajjidoogaadan Kiristtoosabaa mishiraachchuwawu azazettiyogaappe, qassi etayyonne haratu ubbaassi intte darobaa immidoogaappe denddidaagan eti Xoossaa sabboosona. 14 Xoossay laggetiyabi baynna ba kehatettan intteyyo zawi baynnaagaa kehidoogaappe denddidaagan, eti intteyyo wozanappe Xoossaa woossoosonanne inttena siiqoosona.
15 Ay qaalinne qonccissana danddayenna, Xoossay coo immido imotawu galatay awu gido.