Roome Asaassi Xaafettidaagaa
11 Hegaa gishshawu, taani hagaadan oychchays: Xoossay ba asaa aggidee? Mule aggibeenna! Ayssi giikko, taanikka Abrahaama zeretta, Biniyama yaraappe yelettida Israaꞌeela asa. 2 Xoossay koyro doorido ba asaa aggibeenna. Eelaasi Israaꞌeela asaabaa Xoossawu amassalidoogaara gayttidaagan Geeshsha Maxaafay woygiyakko erekketii? 3 “Yihoowaa, eti neeni erissidobaa yootiyageeta woridosona, neeyyo yarshshiyo sohota xayssidosona, qassi attiday ta xalaala; eti haꞌꞌi tana* woranawu koyoosona.” 4 Shin Xoossay ayyo woygidee? I, “Baꞌaalayyo goynnanawu gulbbatibeenna 7,000 asati taayyo haꞌꞌikka deꞌoosona” yaagiis. 5 Hegaadan, ha wodiyankka laggetiyabi baynna Xoossaa kehatettaadan doorettida guutta asay* deꞌees. 6 Laggetiyabi baynna kehatettan doorettiyaba gidikko, oosuwana gidiyogee attiis; hankkoode, laggetiyabi baynna kehatettay laggetiyabi baynna kehatetta gidiyogee attiis.
7 Yaatin nuuni woygana koshshii? Israaꞌeelati wozanappe koyidobaa demmibookkona, shin eta giddoppe doorettidaageeti demmidosona. Haratu wozanay gerzzumiis; 8 hagaadan xaafettidoogaadaana: “Xoossay eti xiskkuwa kayridabadan, hanno gakkanawu bantta ayfiya kammanaadaaninne bantta hayttaa tuccanaadan oottiis.” 9 Qassi Daawiti hagaadan giis: “Eta cimatay* etayyo pirenne gite, qassi xubenne maqqacco gido. 10 Eti xeellenna mala eta ayfee daabidaabo, qassi eta zokkuwa awudekka quuna kessa.”
11 Hegaa gishshawu, hagaadan oychchays: Eti zaaretti denddennaadan xubettidi kunddidonaa? Akkay! Shin eti moorin hara biittaa asay attido gishshawu, hegee eti qanaatanaadan oottiis. 12 Hegaa gishshawu, Ayhudatu anjjoy guuxxidi hara biittaa asaa anjjoy darana mala, Ayhudati he anjjuwa demmana xayikkonne saꞌaa asay anjjettiyaba gidikko, eti kumexxiyogee hegaappe daro anjjuwa demissana!
13 Taani intteyyo hara biittaa asatuyyo haꞌꞌi yootays. Taani hara biittaa asaayyo kiitettidaagaa gidiyo gishshawu, Xoossawu haggaaziyo haggaazaa saaphoyays;* 14 ta biittaa asay* qanaatanaadan taani awunkko eta denttettin etappe amaridaageeti attanaakkonne gaada hegaa oottays. 15 Ayssi giikko, Xoossay eta oli bayiyogee saꞌaa asay aara sigettanaadan oottikko, I eta baakko shiishshiyogee eti hayquwappe denddidi paxa deꞌiyogaa mala. 16 Qassi gakkida xeera kattadan yarshshiyo koyro baso oyttay geeshsha gidikko, attida oyttaykka geeshsha; qassi xaphoy geeshsha gidikko, tashetikka geeshsha.
17 Gidoppe attin, Xoossay tashetuppe amaridaageeta karidi, intte woraa wogara gidikkonne, attida tashetuura inttena gatti oyttin wogaraa xaphuwa anjjuwa intte etaara shaakkikko, 18 xaphoy inttena tookkiisippe attin, intte xaphuwa tookkibeenna gishshawu, he tashetu bolli axiraaroppite.* 19 Qassi intte, “Xoossay tana hara tashetuura gatti oyttanawu he tasheta kariis” yaagana danddayeeta. 20 Hegee tuma! Ayssi giikko, eti ammanenna gishshawu Xoossay eta kariis, shin intte ammaniyo gishshawu minni eqqideta. Intte yayyiteppe attin, otorettoppite. 21 Xoossay gade tasheta karidaba gidikko, I inttenakka karana danddayees. 22 Hegaa gishshawu, Xoossaa kehatettaanne A mino seeraa qoppite. I olidoogeeta mintti seerees, shin intte A kehatettay bessiyogeeta gididi deꞌikko, I intteyyo kehana; hankkoode, I inttenakka karana. 23 Qassi eti ammanuwa xayidi deꞌiyogaa aggikko, Xoossay eta zaarettidi gatti oyttana danddayiyo gishshawu, etikka ohettana. 24 Xoossay inttena woraa wogaraappe karidi gade wogaraara gatti oyttiis. Hegee darotoo gatti oyttiyo oge gidana xayikkonne, Xoossay inttena hegaadan gatti oyttiis; hegaa gishshawu, I gade wogaraa tasheta eta sohuwan zaarettidi gatti oyttana danddayees!
25 Ishatoo, intte hayyo keehi eriyabadan qoppenna mala, Xoossay genttido ha yohuwa intte eranaadan taani koyays: Hara biittaa asaappe doorettida ubbay yaana gakkanaashin, issi issi Israaꞌeelatu wozanay gerzzumana. 26 Hegaadan hanin kumetta Israaꞌeelee attana. Geeshsha Maxaafay hagaadan gees: “Laꞌa kessiyagee* Xiyoneppe kiyidi, Yaaqooba zerettay iitabaa oottiyogaa agganaadan maaddana. 27 Qassi taani eta nagaraa atto giyo wode, etaara ha maachchaa maacettana.” 28 Ee tuma, mishiraachchuwara gayttidaagan, eti Xoossaa morkke, qassi hegan intte goꞌettideta; shin Xoossaa dooruwara gayttidaagan, eta mayzza aawatu gishshawu Xoossay eta siiqees. 29 Ayssi giikko, Xoossaa imotaynne A xeessay I ba qofaa laammiyo yoho gidenna. 30 Intte kase Xoossaayyo azazettibeennaba gidikkonne, eti azazettennan ixxido gishshawu inttena haꞌꞌi I maaridoogaadan, 31 eti haꞌꞌi azazettenna gishshawu I inttena maariis, shin hegaappe denddidaagan I etakka maarana danddayees. 32 Eti ubbaykka azazettibeenna gishshawu Xoossay eta ubbaa maaranawu, qashettida asadan eta xeelliis.
33 Xoossaa gita anjjuwawu, A hayyuwawunne A erawu hoola! I maaciyobaa ooni erana danddayii! A ogiya ooni akeekana danddayii! 34 Ayssi giikko, “Yihoowa qofaa ooni erana danddayii, woy A ooni zorana danddayii?” 35 Woy, “Xoossay zaaridi immana mala, koyro ooni ayyo immidee?” 36 Ayssi giikko, ubbabawu kochchay A, ubbabay aaninne ayyo deꞌees. Merinawu sabay ayyo gido. Aminꞌꞌi.