Pheexiroosi Xaafido Naaꞌꞌanttoogaa
3 Taani siiqiyogeetoo, intteyyo koyro xaafidoogaadan, hagee intte suure qoppanaadan maaddiyabaa hassayissanawu taani intteyyo xaafiyo naaꞌꞌantto dabddaabbiya; 2 Xoossay erissidobaa yootiya geeshshati kase odidobaanne* inttekko kiitettidaageetu baggaara Godaynne Ashshiyagee azazidobaa hassayite. 3 Ubbaappe koyro hagaa erite: wurssetta gallassatun loꞌꞌobaa qilliicciya asati yaana; eti bantta amuwadan iitabaa oottananne 4 hagaadan gaana: “I yaana giis, shin awan deꞌii? Nu mayzza aawatu wodeppe doommidi aybinne laamettibeenna; ubbabay Xoossay asaa medhdhido wodeegaadan deꞌees.”
5 Daro wodeppe kase Xoossaa qaalan saloti deꞌiyogaanne saꞌay haattaa giddon, haattaappe pude minni eqqidoogaa, eti eriiddi shenehoo goosona; 6 hegeetun saꞌay he wode xayiis; kumetta saꞌan haattay shohattin hegee haniis. 7 Shin he qaalan, haꞌꞌi deꞌiya salotinne saꞌay Xoossaayyo azazettenna asati xayiyo pirddaa gallassay gakkanaashin tamawu uttidosona.
8 Gidoppe attin, taani siiqiyogeetoo, Yihoowayyo issi gallassay shaꞌu laytta, qassi shaꞌu layttay issi gallassa gidiyogaa hassayite. 9 Issi issi asay leddi guussaabaa qoppiyogaa mala gidenna; Yihoowi oottana giidobaa polanawu leddi geenna, shin I asay ubbay zilꞌꞌettidi laamettanaadan koyeesippe attin, ooninne xayanaadan koyenna gishshawu inttebaa danddayees. 10 Gidoppe attin, Yihoowa gallassay kaysodan yaana; he wode saloti guummiiddi elle kichchana, shin salotuuninne saꞌan deꞌiyabati mishuwa suullidi seerana, qassi saꞌaynne an oosettidabati qonccana.
11 Ha ubbabati hegaadan seerana; hegaa gishshawu, intte ay mala asa gidana koshshiyakko qoppite; intte geeshshabaa haniyanne Xoossaayyo ammanettiyogaa bessiyabaa oottiya asa gidana koshshees; 12 qassi saloti tamaa lacuwan xayananne etan deꞌiyabati suulliya mishuwan seerana Yihoowa gallassaa* naagitenne hassayiyogaa* aggoppite! 13 Shin I yootidoogaadan, nuuni ooratta salotanne ooratta saꞌaa naagoos, qassi hegeetun xillotettay deꞌana.
14 Simi taani siiqiyogeetoo, intte hegeeta naagiyo gishshawu, inttenan xeleqoynne qiti baynnan sarotettan deꞌiyogaa Xoossay beꞌana mala, intteyyo danddayettida ubbabaa oottite. 15 Hegaa bollikka, nu Godaa danddayaa atotettadan xeellite; nuuni siiqiyo ishay Phawuloosi baayyo imettida hayyuwadan xaafidobaykka hegaa; 16 I hegeetubaa ba dabddaabbetu ubban xaafiis. Shin hegeetun issi issibati akeekanawu metoosona; akeekennanne* yeeqiyeeqiya asati Geeshsha Maxaafan harabaakka mirqqiyogaadan, hegeetakka mirqqoosona, qassi hegaa gaasuwan eti xayana.
17 Simi taani siiqiyogeetoo, intte hagaa eriichchido gishshawu, maari baynna asati balettiyoban intte etaara wora simmidi, minnidi eqqidosaappe* kunddennaadan naagettite. 18 Shin nu Godaanne Ashshiya Yesuus Kiristtoosa laggetiyabi baynna kehatettaaninne eran dicciyogaa aggoppite. Ayyo haꞌꞌikka merinawukka bonchchoy gido. Aminꞌꞌi.