Yohaannisi Xaafidoogaa
21 Hegaappe simmin, Yesuusi bana kaalliyageetuyyo haranttuwakka bana qonccissiis; Eti Xibiriyadoosa Abbaa matan A hagaadan beꞌidosona. 2 He wode, Simoon Pheexiroosi, Toomaasi (Menttiya giyogee), Qaana Galiilaa Naatinaaꞌeeli, Zabddiyosa naatinne Yesuusa kaalliya hara naaꞌꞌati issippe deꞌoosona. 3 Simoon Pheexiroosi etayyo, “Taani moliya oyqqanawu bays” yaagiis. Eti ayyo, “Nuunikka nenaara baana” yaagidosona. Eti wolwoluwan gelidi biidosona, shin he qammi aybanne oyqqibookkona.
4 Shin saꞌay wonttiyo wode, Yesuusi abbaa lanqqen eqqiis, gidoppe attin, A kaalliyageeti I Yesuusa gidiyogaa akeekibookkona. 5 Yaatin, Yesuusi eta, “Naatoo, intteyyo miyobi* deꞌii?” yaagiis. Eti, “Baawa” yaagidosona. 6 I etayyo, “Gitiya wolwoluwappe ushachcha baggaara yeggikko, intte amaridaagaa oyqqana” yaagiis. Yaagin, eti gitiya yeggidosona, shin molee keehi daro gidiyo gishshawu, pude goochchidi kessana danddayibookkona. 7 Yaanin, Yesuusa kaalliya A siiqoy Pheexiroosayyo, “Hegee Godaa” yaagiis. Simoon Pheexiroosi kallo deꞌiyo* gishshawu, hegee Godaa gidiyogaa siyidi ba bollan maayuwa yeggidi* abban wulli bayiis. 8 Shin Yesuusa kaalliya harati gaxaappe keehi haakkennasan, 100 meetire* gidiyasan deꞌiyo gishshawu, gitiya kumida moliya goochchiiddi wolwoluwan yiidosona.
9 Eti gaxi kiyidi, molee tamaa bonqquwan uttidaagaanne oyttaa beꞌidosona. 10 Yesuusi eta, “Intte haꞌꞌi oyqqido moliyappe amaridaagaa haa ehiite” yaagiis. 11 Yaagin Simoon Pheexiroosi wolwoluwan gelidi, wogga moleti kumido gitiya goochchidi abbaa gaxaa kessiis. Qassi moleti 153 gidikkonne, gitee daakettibeenna. 12 Yesuusi eta, “Haa yiite, miite” yaagiis. Yesuusa kaalliyageeti I Godaa gidiyogaa erido gishshawu, etappe issoynne, “Neeni oonee?” giidi oychchanawu xalibeenna. 13 Yesuusi oyttaa ekkidi etayyo immiis, hegaadan moliyakka immiis. 14 Yesuusi hayquwappe denddi simmin bana kaalliyageetuyyo I bana qonccissishin hegee heezzantto.
15 Eti mi simmin, Yesuusi Simoon Pheexiroosa, “Yohaannisa naꞌaa Simoonaa, neeni tana hageetuppe aattada siiqay?” yaagiis. Pheexiroosi, “Ee, Godawu, taani nena siiqiyogaa neeni eraasa” yaagiis. Yesuusi A, “Ta dorssa marata miza” yaagiis. 16 Yesuusi haranttuwakka A, “Yohaannisa naꞌaa Simoonaa, neeni tana siiqay?” yaagiis. I, “Ee, Godawu, taani nena siiqiyogaa neeni eraasa” yaagiis. Yesuusi A, “Ta dorssa marata heemma” yaagiis. 17 Yesuusi heezzanttuwakka A, “Yohaannisa naꞌaa Simoonaa, neeni tana siiqay?” yaagiis. Yesuusi A heezzanttuwa, “Neeni tana siiqay?” yaagido gishshawu, Pheexiroosi azzaniis. Hegaa gishshawu, Pheexiroosi ayyo, “Godawu, neeni ubbabaa eraasa; taani nena siiqiyogaa neeni eraasa” yaagiis. Yesuusi ayyo hagaadan giis: “Ta dorssa marata miza. 18 Taani neeyyo tumaa odays, neeni yelagatettan neeyyo maayadasanne neeni koyiyosaa baadasa. Shin neeni cimiyo wode, ne kushiya piddi oottin hara asi nena mayzzananne neeni baanawu koyennasaa efaana.” 19 Pheexiroosi ay mala hayquwa hayqqidi Xoossaa bonchchissanaakko qonccissanawu Yesuusi hegaa yootiis. I yaagi simmidi, Pheexiroosa, “Tana kaalliyogaa aggoppa” yaagiis.
20 Pheexiroosi guyye simmidi, Yesuusa kaalliya I siiqiyogee eta geeduwan deꞌiyagaa beꞌiis. Hegee kahuwa miyo wode Yesuusa tiraakko shiiqi zemppidi, “Godawu, nena aatti immana uray oonee?” yaagidaagaa. 21 Qassi Pheexiroosi A beꞌidi Yesuusayyo, “Godawu, hagee waananee?” yaagiis. 22 Yesuusi ayyo hagaadan giis: “Taani yaana gakkanaashin I hagan deꞌanaadan taani koyiyakkonne, nena hegee ayssi qofissii? Neeni tana kaalliyogaa aggoppa.” 23 Yaatin, Yesuusa kaalliya hegee hayqqenna giyo oduwa ishantti siyidosona. Shin Yesuusi, “Taani yaana gakkanaashin I hagan deꞌanaadan taani koyiyakkonne, nena hegee ayssi qofissii?” yaagiisippe attin, ayyo neeni hayqqakka gibeenna.
24 Ha ubbabaa markkattidaageenne hageeta xaafidaagee Yesuusa kaalliya he izaawa, qassi I markkattiyobay tuma gidiyogaa nuuni eroos.
25 Ubbabay xaafettiyakko, hegee xaafettidobaa wottanawu ha saꞌaykka gidenna gaada taani qoppiyo, hara darobaakka Yesuusi oottiis.