Pheexiroosi Xaafido Koyroogaa
5 Hegaa gishshawu, taani intte giddon deꞌiya cimata issibaa woossays;* ayssi giikko, taanikka cima, qassi Kiristtoosa waayiya beꞌaasinne sinttappe qonccana bonchchuwa inttenaara bonchchettana; taani woossiyobay hagaa: 2 Naaganaadan intteyyo imettida Xoossaa wudiya cima gididi haggaaziiddi* heemmite; wolqqanttido asadan gidennan, Xoossaa sinttan eeno giidi heemmite; inttena goꞌꞌiyabaa siiqiyo gishshataassa gidennan, yeemottidi heemmite; 3 Xoossaa aqo gidiyageeta haariya asadan gidennan, wudee waatanaakko bessiiddi heemmite. 4 Qassi waanna henttanchchay qoncci beettiyo wode, intte moorettenna bonchcho kallachchaa ekkana.
5 Hegaadankka, yelaga attuma asatoo, cima attuma asatuyyo* azazettite. Shin inttena ubbaa issuwa issuwara gattiyaban ziqqi giite;* ayssi giikko, Xoossay otorettiyageetun ufayttenna, shin ziqqi giyageetuyyo laggetiyabi baynna kehatettaa kehees.
6 Hegaa gishshawu, Xoossaa wolqqaama kushiyappe garssan ziqqi giite; yaatikko, I bessees giyo wodiyan inttena xoqqu oottana danddayees; 7 qassi I intteyyo qoppiyo gishshawu, inttena hirggissiyabaa ubbaa* A bolli olite. 8 Suure qoppiyogaa aggoppite, naagetti uttite! Intte morkkee Dabloosi asa mittanawu* koyiiddi, gudiya gaammodan yuuyees. 9 Shin kumetta saꞌan deꞌiya intte ishati ubbay* intteegaadan waayettiiddi gencciyogaa eridi, ammanuwan minnidi aara eqettite. 10 Shin guutta wodiyawu waayetti simmin, intte Kiristtoosaara issuwa gidiyo gishshawu ba merinaa bonchchuwawu xeegida, ubba ogiyan laggetiyabi baynna kehatettaa kehiya Xoossay inttena meezeyidi polana. I intte yeeqennaadan oottana; I inttena minttana; I inttena mintti essana. 11 Wolqqay merinawu ayyo gido. Aminꞌꞌi.
12 Ammanettiya ishay Siliwanoosi* maaddin, taani ha dabddaabbiya intteyyo xaafays; Xoossay tumukka laggetiyabi baynna kehatettaa intteyyo kehidoogaa intte erana mala, inttena minttettanawu xaafays. He kehatettan minni eqqite. 13 Baabiloonen deꞌiya, inttenadan doorettidaara inttena saro gawusu, ta naꞌay Marqqoosikka saro gees. 14 Issoy issuwa siiquwan yeridi sarotite.
Kiristtoosa kaalliya intteyyo ubbawu sarotettay gido.