Ibraawe Asaassi
10 Higgee yaana loꞌꞌobatuyyo eeshoppe attin, he loꞌꞌobata gidenna; Xoossawu goynniyageeti layttan layttan ubbatoo yarshshiyo yarshshotinne Higgee* eta wottiyobi baynnaageeta mule oottana danddayokkona. 2 Hankkoode, yarshshuwa gattiyogee attennee? Ayssi giikko, geeshsha haggaazaa haggaaziya geeyiichchida asati bantta nagaraabaa erokkona. 3 Shin he yarshshoti layttan layttan nagaraa hassayissoosona; 4 ayssi giikko, mirggotunne deeshshatu suuttay nagaraa xayssana danddayenna.
5 Hegaa gishshawu, I ha saꞌaa asaakko yiyo wode hagaadan giis: “‘Neeni yarshshuwanne hara imotaa koyabaakka, shin taayyo bollaa giigissadasa. 6 Muleera xuuggiyo yarshshotuuninne nagaraa yarshshotun neeni ufayttabaakka.’ 7 Yaatin taani, ‘Hekko! Taani yaas. Tabay Geeshsha Maxaafan* xaafettiis. Ta Xoossawu, taani neeni koyiyobaa oottanawu yaas’ yaagaas.” 8 Koyro I, “Neeni yarshshotanne hara imotata, qassi muleera xuuggiyo yarshshotanne nagaraa yarshshota koyabaakkanne etan ufayttabaakka” yaagees. Hageeti Higgiya maaran gattiyo yarshshota. 9 Hegaappe simmin, I, “Hekko! Taani neeni koyiyobaa oottanawu yaas” yaagees. I naaꞌꞌanttoogaa essanawu koyroogaa diggirggees. 10 Xoossay ‘koyidobay’ ubba wodiyawu issitoo xalaalaa yarshshettida Yesuus Kiristtoosa bollan nuuni geeyanaadan oottiis.
11 Hegaa bollikka, kahine ubbay geeshsha haggaazaa* haggaazanawunne nagaraa muleera xayssana danddayenna yarshshota ubbatoo yarshshanawu ubba galla ba sohuwan eqqees. 12 Shin Kiristtoosi ubba wodiyawu nagaraassi issi yarshshuwa gattiisinne Xoossaappe ushachcha baggan uttiis; 13 he wodeppe doommidi, I ba morkketa yedhdhanaadan Xoossay oottana* gakkanaashin naagees. 14 Ayssi giikko, I geeyiyageeta ubba wodiyawu wottiyobi baynnaageeta oottidoy issi yarshshuwana. 15 Hegaa bollikka, geeshsha ayyaanaykka nuuyyo markkattees; ayssi giikko, I koyro hagaadan gees: 16 “Yihoowi hagaadan gees: ‘He gallassatuppe guyyiyan taani etaara maacettana maachchay hagaa: Taani ta higgeta eta wozanan wottana, eta kahankka xaafana.’” 17 Hegaappe simmin hagaadan gees: “Taani eta nagaraanne eti oottido iitabaa mule hassayikke.” 18 Xoossay hageeta atto giyo wode nagaraa yarshshoy attiis.
19 Simi, ishatoo, nuuni Yesuusa suuttan geeshsha sohuwa gelissiya ogiya goꞌettanawu yayyokko;* 20 Yesuusi magalashuwa kantti geliyogan deꞌuwawu efiya ooratta ogiya nuuyyo dooyiis;* he magalashoy A ashuwa, 21 qassi Xoossaa keettaa bolli nuuyyo gita kahinee deꞌees; 22 hegaa gishshawu, simi nuuni nu wozanaa tuna kahaappe geeshshidinne* nu bollaa geeshsha haattan meecettidi suure wozanan, qassi muleera ammanettiyogaaninne ammanuwan Xoossaakko shiiqoos. 23 Simi nuuni nu hidootaabaa minttidi asawu yootanawu genccoos; ayssi giikko, hegaa immana giidaagee ammanettees. 24 Qassi siiquwawunne loꞌꞌo oosuwawu denttettanawu* simi issoy issuwabaa qoppoos;* 25 issoti issoti meezetidoba gidikkonne, nuuni issippe shiiqiyogaa aggokko, shin simi issoy issuwa minttettoos; qassi he gallassay mati mati biyo wode ha ubbabaa yaa gujjidi oottite.
26 Nuuni tumaa geeshshi eri simmidi, eriiddi nagaraa oottikko, nagaraassi yarshshettiya hara ayba yarshshoynne deꞌenna; 27 shin nuuni Xoossay qaxxayanaagaanne makkalanchchata tamaadan maana A hanqquwa yayyiiddi naagoos. 28 Muuse Higgiya naagibeenna oonanne naaꞌꞌu woy heezzu asi markkattin qareti baynnan woroosona. 29 Xoossaa Naꞌaa yedhdhidanne bana geeshshida maachchaa suuttaa goꞌꞌay guutta giidi qoppida, qassi laggetiyabi baynna Xoossaa kehatettaa ayyaanaa karida asi qaxxayettanabay hegaappe ay keena aaro giidi qoppeetii? 30 Ayssi giikko, nuuni, “Haluwa kessiyagee tana; taani bessiyabaa qanxxana” yaagidaagaa, qassi, “Yihoowi ba asaabaa pirddana” yaagidaagaa eroos. 31 Merinawu deꞌiya Xoossaa kushiyan qaxxayettiyogee yashshiyaba.
32 Gidoppe attin, intte pooꞌuwa beꞌi simmidi waayetiiddi keehi baaxetidi genccido, aadhdhida gallassata hassayite. 33 Asaa sinttan* intte issi issitoo kawuyyidetanne waayettideta, qassi issi issitoo hegaadan hanidaageetu miyyiyankka eqqideta.* 34 Ayssi giikko, qasho keettan deꞌiyageetuyyo intte qarettideta; intteyyo xayenna aqoy deꞌiyogaa eridi, inttessi deꞌiyabaa wotti ekkido wodekka ufayttiyogaa aggibeekketa.
35 Simi hegawu gita woytoy deꞌiyo gishshawu yayyennan* haasayiyogaa aggoppite. 36 Intte genccana koshshees; yaatikko, Xoossay koyiyobaa ootti simmidi, I immana giidobaa ekkana danddayeeta. 37 Ayssi giikko, “guutta wodeppe” guyyiyan “yiyagee gakkana, qassi gamꞌꞌenna.” 38 “Shin ta xilloy ammanuwa gaasuwan deꞌana,” qassi “I guyye simmikko, taani an ufayttikke.”* 39 Nuuni nu shemppoy* attanaadan oottiya ammanoy deꞌiyogeetu malappe attin, xayanawu guyye simmiyageetu mala gidokko.