Yaaqoobi Xaafidoogaa
3 Ta ishatoo, Xoossay nuna haratuugaappe aaruwan* yiggi xeellanaagaa intte eriyo gishshawu, intte giddon daroti asttamaare gidana koshshenna. 2 Ayssi giikko, nuuni ubbay darotoo xubettoos.* Ooninne inxxarssan xubettennaba gidikko, I ba kumetta bollaa bixaalana danddayiya wottiyobi baynna asa. 3 Parati nuuyyo azazettanaadan bixaalikko, nuuni koyidosaa eta kaalettana danddayoos. 4 Markkabetubaakka qoppite: Eti wolqqaama carkkoy sugin biya keehi gitaba gidikkonne, laaggiyosan deꞌiya bitanee keehi guutta mittan haattaa shaaridi eta ba koyidosaa laaggees.
5 Hegaadankka, inxxarssay bollaa shaahotun guutta gidikkonne, keehi ceeqettees. Gita woraa xuuggiya tamay ay keena guuttakko akeekite! 6 Inxxarssaykka tama. Inxxarssay nu bollaa giddon iitatettay kumidoba; ayssi giikko, I bollaa muleera tunisseesinne deꞌo ogiya* muleera xuuggees, qassi I Gaannabiyan xuugettees. 7 Asay doꞌatu, kafotu, goshoshattiyabatunne abbaa giddo meretatu qommo ubbaa aadiseesinne aadissiis. 8 Shin ay asinne inxxarssaa aadissana danddayenna. Inxxarssay woriya marzzee kumido makkalanchchabanne qohiyaba. 9 Nuuni inxxarssan nu Aawaa Yihoowa sabbikkonne, “Xoossaa milatidi” merettida asaa an qanggoos. 10 Issi doonaappe anjjoynne qanggettay kiyees.
Ta ishatoo, hegee hanana bessennaba. 11 Issi pulttuwappe loꞌꞌo* haattaynne cammiya haattay pulttiiyye? 12 Ta ishatoo, balasiya mittay wogaraa woy woyniya ayfana danddayiiyye? Maxiniya pulttoykka loꞌꞌo haattaa pulttana danddayenna.
13 Intte giddon hayyo eriyanne akeekiya asi oonee? A loꞌꞌo eeshshay hayyoy ayfiyo ayfiyan, I ashilaalidi oottiyoban beettana koshshees. 14 Shin intte wozanan iita qanaateenne ooshshay* deꞌikko, ceeqettoppitenne tumaa phalqqiyabaa haasayoppite. 15 He hayyoy saluwappe pulttenna; hegee saꞌaaba, ashuwaba, daydanttaba. 16 Ayssi giikko, qanaateenne ooshshay* deꞌiyo soho ubban maari baynnabaynne iitabay ubbaykka deꞌana.
17 Shin saluwappe pulttiya hayyoy ubbaappe koyro geeshsha, qassi saruwa ehees,* zozzu geenna, azazettanawu giigi uttees, maarotaynne loꞌꞌo ayfee an eelliis, zaggenna, sholloorettenna. 18 Hegaa bollikka, xillotettaa ayfee saruwa ehiyageetuyyo* sarotettay deꞌiyosan zerettees.