Qoronttoosa Asaassi Xaafettida Naaꞌꞌanttoogaa
1 Xoossaa shene gidiyo gishshawu Kiristtoos Yesuusi kiittido taani Phawuloosinne nu ishay Ximootiyosi Qoronttoosan deꞌiya Xoossaa galchchawunne Akaayiyan ubbasan deꞌiya geeshshatuyyo hagaa kiittoos:
2 Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido.
3 Nu Godaa Yesuus Kiristtoosa Xoossawunne Aawawu, gita maarotaa Aawawunne ubbaban minttettiya Xoossawu sabay gido, 4 Xoossay nu waaye* ubban nuna minttettees; I nuna minttettiyo minttettuwan harati ay waaye* waayettikkokka, nuuni eta minttettana danddayoos. 5 Ayssi giikko, Kiristtoosan nuuni daro waayettiyogaadan, hegaadankka Kiristtoosan nuuni minettiyo minttettoykka daro. 6 Nuuni waayettikko,* intte minettanaadaaninne attanaadan waayettoos; qassi nuuni minettikko, intte minettanaadan minettoos; hegee inttekka nuugaadan waayettiiddi genccanaadan inttena maaddees. 7 Qassi intte nunadan waayettiyogaadan, nuuni minettiyogaadan minettanaagaa eriyo gishshawu, nuuni inttenan keehi ammanettoos.*
8 Ishatoo, Isiya moottan nuuni waayettido waayiyabaa intte eranaadan koyoos. Nuuni nu wolqqaappe aadhdhiya waaye waayettida; hegaappe denddidaagan, nuuni paxa attanaakkokka eribookko. 9 Ee, nuuni hayqqoos giidi qoppida. Shin nuuni hayqqidaageeta denttiya Xoossaanappe attin, nu huuphen ammanettennaadan hegee haniis. 10 Nuuni hayqqana giidi hirggido hegaa malabaappe I nuna ashshiis, qassi sinttappekka ashshanaagaa ammanettoos. 11 Nuuyyo Xoossaa wozanappe woossiyogan inttekka nuna maaddana danddayeeta; ayssi giikko, daroti nuussi Xoossaa woossikko,* I siyananne nuna maaddana; hegaappe denddidaagan daroti Xoossaa galatana.
12 Ayssi giikko, nuuni ha saꞌaa asaa hayyuwan gidennan, laggetiyabi baynna Xoossaa kehatettan ammanettidi, intte giddooninne hara asaa giddon Xoossay tamaarissido geeshshatettaadaaninne tumaadan deꞌido gishshawu ceeqettoos; nu kahay hegaa markkattees. 13 Ayssi giikko, nabbabanawunne* akeekanawu metennabata nuuni intteyyo xaafoos, qassi intte awudekka hageeta wurssi akeekanaagaa ammanettays. 14 Nuuni intteyyo ceeqettiyo gaaso gidiyogaa intteppe amaridaageeti akeekeeta; nu Godaa Yesuusa gallassi nuunikka inttenan ceeqettana.
15 Taani hegaa ammanettiyo gishshawu, intte haranttuwakka ufayttanaadan* zaarettada inttekko baanawu kase qoppaas; 16 ayssi giikko, taani Maqidooniya baydda inttenaara gayttanawunne Maqidooniyappe simmaydda inttekko baanawu, hegaappe simmin, Yihudaa biyo wode guutta ogiya tana intte moyssanaadan kase qoppaas. 17 Taani hegaa qoppiyo wode, keehi koshshiyabadan xeellabeykkinaayye? Woy taani asaagaadan* oottanawu qoppiyanaa? Yaanikko, taani “Ee, ee” ga simmada, “Akkay, akkay” giyanaa? 18 Shin nuuni intteyyo “ee” gi uttidi, “akkay” geennaagaa Xoossan ammanettana danddayeeta. 19 Taani, Siliwanoosinne* Ximootiyosi intteyyo abaa yootido Xoossaa Naꞌay Yesuus Kiristtoosi “ee” gi simmidi, “akkay” geenna; shin ayyo “ee” awudekka “ee” gidi attees. 20 Ayssi giikko, Xoossay immana giidobati ay keena gidikkokka, hegeeti A baggaara “ee” gididosona. Hegaa gishshawu, nuuni Xoossaa woossiyo wode “Aminꞌꞌi” giyoykka aana; yaatiyogan Xoossaa sabboos. 21 Nuuninne intte Kiristtoosaba gidiyogawu waabiya immiyageenne nuna dooridaagee Xoossaa. 22 I ba maatafaakka nu bolli wottiis, qassi yaanabawu malaataa* nuussi immiis, hegeekka, ayyaanaa nu wozanan wottiis.
23 Taani inttena kayyuwappe ashshanawu hanno gakkanawu Qoronttoosa babeykke; hegawu Xoossay ta* bolli markka gido. 24 Hegee nuuni intte ammanuwawu goda giyogaa gidenna, shin intte intte ammanuwan minni eqqido gishshawu, intte ufayttana mala inttenaara issippe oottoos.